Tŏk bŏk teh đak tih să hăm lơ bơngai đei tôm mah, đei đon gơh hơgei, hăm đei layơ buăl ‘bôh kơdih akâu thoi kơ “hmă đĕch” ưh? Lu bơ̆n mơn ‘bôh kơdih ưh kơ đei kiơ dah ưh kơ đei đon gơh hơgei hloh. Tơdrong arih lu bơ̆n kư̆ kơ thoi noh, năr ‘nâu, năr to yak hlôi hăm dôm tơdrong ưh kơ đei kăl yua. Mă lei buăl hăm băt ưh, Kră Yang ưh kơ lăng lu bơ̆n đei tơdrong bơ̆jang tih dah gơh hơgei pah ‘ngoaih đĕch. Păng lăm măt Kră Yang, lu bơ̆n ưh kơ đei khan hmă đĕch ôh!

Năr ‘nâu, ‘năr 25/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jonathan Santiago kơ̆l ‘bai ƯH KƠ ĐEI HMĂ ĐĔCH.

Sơ̆p Hla Bơar ‘Bok Kei-Dei: “ ‘Bok Kei-Dei kư̆m rơih iŏk boih lu bơngai tơrăn ala teh âu wă pơm kơ lu bơngai pran kơtang mơlâu.” (I Kôrintô 1:27)

Mĕ inh ngăl pơma hơnul khan tơpŭ kơ inh noh wă kơ … năm răt tơmam. Tơpă, inh kư̆m đêl đei thoi noh. Na inh đei krao apinh Kră Yang athei tŭk lê̆ dôm tơdrong ‘maih wă kơ dôm tơmam, păng Kră Yang đei tơl tơwih kơ inh. Ưh kơ sĭ kơ inh ưh pă hưch wă kơ tơmam ‘lơ̆ng dah tơmam tŏ sĕt jên, na inh rơih iŏk huay kơ hiong jơ năr păng đon tơchĕng lăm tơdrong noh dơ̆ng bơih. Tơdah inh wă răt tơmam kiơ na inh athei bôl buăl krao roi kơ inh đei kơ tơmam răt hăm jên tŏsĕt, dah inh đei ‘bôh tơ rok trong.

Năr ‘nâu, minh ‘nu buăl đei krao inh păng athei inh năm hloi tơ anih tĕch tơmam noh, yua kơ tơ noh đei kơ tơmam trŏ kơ năr răt hăm jên tŏsĕt đĕch. Inh đei tơchĕng, pơkuĕch gre hloi pơlong lăng lăng tơmam đei yua tơpă ưh.

Truh tơ anih, inh pơm trŏ kơ thoi “bơngai juăt kơ pơm”, năm dăr chă lăng lăng păng chă “tơmam”. Đei tơmam ‘lơ̆ng tơpă, mă lei inh ưh kơ hăt hot kơ răt. Na inh ‘bôh minh pôm ge ‘lơ̆ng. Nă jơhngơ̆m đon inh ‘blŏk hloi kơ nơ̆r ‘Bok-Kei-Dei đei chih lăm Yôhan 2:7: “Yêsu khan kơ lu bơngai awih lăm hnam ei khan: “Iĕm tuh đak ‘bĕnh tôm kơ ge âu.” Na lu bơngai awih ei tuh đak ‘bĕnh tôm kơ ‘bơ̆r ge ei hloi.”

Kơplah noh, inh băt kơ inh wă răt ge ‘nâu, wă kơ rim năr đei tơ ‘blŏk kơ kơdih gah tơdrong ‘mêm mơnat đơ̆ng ‘Bok-Kei-Dei. Inh răt ge noh hăm jên tŏsĕt đĕch, mă tơpă đơ̆ng lăm jơhngơ̆m, mă khan ăn jên trŏ kơ tơmam noh inh kư̆m oei wă răt. Jơ ‘nâu, ge noh inh oei dan ‘bơ̆t anih ‘lơ̆ng hloh lăm hnam nhôn, nhen thoi tơ‘bôh tơdrong ‘mêm đơ̆ng Kră Yang.

Kră Yang đei yua dôm kơ lu klĭnh hmă đĕch, noh jơ̆ lu tơmam đei juăt kơ yua lăm tơdrong arih rim năr. Sư athei lu bơngai iŏk đak tuh tơ lăm klĭnh noh, tơdrong pơm noh kư̆m hmă đĕch. Mă lei kơplah dan lăm tơ pang ti Tơ’ngla Pơgơ̆r, dôm tơdrong lăng hmă đĕch noh jing tih hloh.

Lu bơ̆n kư̆m thoi noh. Đei năr lu bơ̆n mơn nhen thoi bơngai mĕ oei hnam wei rong kon lăng nhen hmă đĕch, minh ‘nu bơngai akăn nhen thoi bơngai drŏ- kăn nai, minh ‘nu bơngai bơ̆jang đei apah rim năr … Mă lei kơplah pơyơ̆r tơdrong arih bơ̆n ăn kơ Tơ’ngla Tih Hloh păng ăn kơ Sư bơtho tơ’bôh, rŏ lăng lu bơ̆n gô jing bơngai tih hloh.

Kră Yang ưh kơ lăng lu bơ̆n hăm thoi măt kon bơngai. Sư ‘bôh rim ‘nu lu bơ̆n đei đơ̆ng lăm jơhngơ̆m, kơplah lu bơ̆n pơyơ̆r kơdih akâu bơ̆jang kiơ̆ kơ thoi Sư wă.
Giđêôn jơ̆ mĭnh tơdrong pơtih gia hơđăl. Kơplah dêh Mađian blah Isơrael, minh ‘nu bơngai tơdăm mơlôh anăn sư Giđêôn hli tơrơ kơdâu ôn lăm rim rôm đe pơm tơdrô. Giđiôn gah adrĕch adrŭng rơdu tơrăn hloh lăm kon pơlei Isơrael, păng sư bơngai iĕ hloh kơ lăm hnam dơnŏ sư. Mă lei kơplah ‘Bok-Kei-Dei krao sư, Kră Yang ưh kơ pơma: “ Ơi, bơngai drŏ ‘nglo rơdu tơrăn noh, athei năm tơ âu!”

Nơ̆r ‘Bok-Kei-Dei đei chih lăm ‘Bok Sek Tơlang 6:12: “Linh jang ‘lơ̆ng Kră Yang tơ’bôh kơ sư na khan: Ơ bơngai nuih kơtang, Kră Yang oei hơdai ih!”

‘Bok-Kei-Dei băt hơđăl kơ Giđêôn gô jing bơngai thoi yơ, kơplah sư chu yom păng ăn kơ Kră Yang bơ̆jang lăm chăl arih sư. Păng kơplah Giđêôn dan jơhngơ̆m đon lui kơ Kră Yang, sư jing tơmam dŏng pơklaih adrĕch adrŭng sư.

Lei buăl thoi yơ? Buăl hăm wă ăn chăl arih kơdih lăm tơpang ti Kră Yang păng lui gơnang kơ Kră Yang ưh? Kơplah pơyơ̆r ăn kơ Kră Yang chông anhăk, buăl gô ‘bôh hlĭch kơ dôm tơdrong ‘lơ̆ng tơpăt mă Kră Yang đei bơ̆jang đơ̆ng lăm bơngai “hmă đĕch” thoi kơ buăl. Yua kơ lăm tơpang ti Kră Yang, tơdrong gơh hơgei buăl ưh kơ đei la yơ tôch!

Apĭnh đĭ đăng krao khan hơdai:
Bơnê kơ Kră Yang yua kơ Ih linh lang ‘mêm mơnat păng gĭt kơ minh ‘nu bơngai hmă đĕch thoi kơ kon. Mă khan kon oei đei lơ tơdrong rơdu, păng ưh kơ đei tôm, mă lei lăm tơpang ti Ih, kon gô pơm dôm tơdrong ‘lơ̆ng rŏ mă kơdih kon ưh kơ đei tơchĕng truh. Apinh bơtho tơ’bôh kơ kon băt kơ iŏk đon ala pơjao đĭ jơhngơ̆m ăn kơ Ih, wă kơ Ih ‘bơ̆ hơmet păng yua kon kiơ̆ kơ Ih wă. Kon sĭt lui ngeh ưh kơ đei kiơ hmă đĕch kơplah pơjao lăm tơpang ti tih tin Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, rŏ lăng buăl đei tơchĕng khan kơdih hmă đĕch, ưh đei kiơ hloh păng đei đon gơh hơgei, mă Kră Yang ưh kơ lăng buăl thoi kơ bơngai lăm teh đak ‘nâu lăng. Kră Yang ‘bôh gĭt kăl, đei ‘bôh păng kơ nhăm khŏm khŏm mă Kră Yang đei dan bơih lăm buăl. Păng kơplah buăl pơjao ăn tơdrong ‘nâu lăm tơpang ti Kră Yang, hơmet jơhngơ̆m ăn kơ Sư tơplih păng yua iŏk chăl arih buăl, na kon bơngai lăng ngeh kơ iĕ đĕch mă gô jing tơm kơ tơdrong pŭn hiôk tih ăn kơ lơ bơngai. Athei pơyơ̆r đĭ jơhngơ̆m buăl ăn kơ Kră Yang, wă kơ buăl jing tơmam đei yua gô pơm tơdrong đei proh hơmet tih hloh đơ̆ng Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.