Lăm tơdrong arih, đei dôm lu jơ năr blư hlĭch đei truh, na wă kơ jing tơdrong pơm tơplih tơpă tơdrong mă lu bơ̆n lăng sơng iŏk tơdrong arih păng đon lui. ‘Noh kŭm trŏ kơ mĭnh tơdrong truh tih, mĭnh tơdrong ataih băl, dah mĭnh tơdrong ơh sơ’ngon pơm kơ tơdrong arih lu bơ̆n đei tơplơ̆ tơpă. Mă lei kŭm trŏ kơ hlôi kơ jơ năr thoi noh, buăl gô mơn đei tơdrong ‘mêm mơnat, tơdrong tơpăt păng tơdrong mơnat ăn Kră Yang kiơ̆ hăm tơdrong rơkah rơkai hloh kơ đĭ đăng.

Năr ‘nâu, ‘năr 24/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Cheryl Crofoot Knapp kơ̆l ‘bai TŎ SĔT ĐĔCH ĐEI TƠPLIH CHĂL ARIH KON BƠNGAI.

Sơ̆p Hla Bơar ‘Bok Kei-Dei: “Inh gô pơdơ̆ng ming lu đêl pơchah păng man ming thoi sơ̆.” (Amôt 9:11)

“Liơ inh oei arih? Liơ inh ưh kơ lôch lê̆ đĕch?”

Mĕ inh đei pơma tơlĕch lăm kơplah jơ pă băt yua kơ tơdrong jĭ Alzheimer pơm. Na inh ‘noh thĕng hreh. Măr nhi oei pơma dơnuh oei chơt hiôk, lei na ưh kơ băt kơ tơdrong ơh sơ’ngon thar truh hăm inh blư bla păng krưp thoi noh.

Trŏ kơ tơdrong jĭ ‘nâu đei tơgar iŏk ‘bă inh. Păng dang ei, kơplah lăng ‘bôh mĕ ‘net huŏng lăm trŏ thoi anih mă ‘bă inh đei hlôi tơ’bơ̆p, hăm mĭnh tơdrong hơtuch ưh kơ đei phara kơ kiơ hloi, inh mơn ‘bôh plei nuih inh nhen thoi đei bu ket kơtĭt. ‘Noh jơ̆ jơ pơm tơplih tơpă tơdrong tơ’bưh tŏk bŏk inh păng mĕ- mĭnh hơ yak mă inh ưh kơ hơpơi wă.

Kơplah wei rong mĕ, inh băt kơ tơdrong jĭ ‘noh oei tơplih ‘net ‘net tơdrong ‘mêm lăm mĕ kon. Sư oei tơgar iŏk đơ̆ng inh, ‘net ‘net tŏ sĕt.

‘Bar sơnăm đơ̆ng rŏng, mĭnh ‘nu ‘bok pơgang hơmet jet inh hăm ‘maih wă pơklaih plei nuih kơ mĕ ưh. Pơm thoi yơ inh đei pơ̆n nuih wă tơlĕch tơdrong pơdrơ̆ng? Inh đei krao khan lăm đunh khei, krao apĭnh ‘Bok Dŏng Pơklaih Yang Yêsu ‘nĕ kơ ăn mĕ inh đei pŭ iŏk dơ̆ng. Mă lei kơplah inh apĭnh ‘bok pơgang athei ăn kơ mĕ inh yak năm, inh ưh kơ ngeh kơdih đei tơ’bơ̆p hăm tơdrong pơjăng pơchah lăm jơhngơ̆m- tơdrong mă oei tơplih truh tơ tơm rơh đon lui inh. Hăm trŏ mĕ gô truh tơ mĭnh anih ‘lơ̆ng rŏ hloh tơpă ưh?

Mĭnh ‘nu duch jang pơgang chông inh năm tơ mĕ, kơplah plei nuih sư oei adrin dui jơhngơ̆m tuch luch. Inh ưh kơ gơh dui jơhngơ̆m. Mă lei inh oei dơ̆ng ‘bơ̆t cheng mĕ ‘mêm, chŭm sư, rôp kơjăp ti sư, ư-ang kơ Kră Yang, nhơ̆m hmoi, păng pơma nơ̆r tơklah băl. Đak măt inh ro tơ hơngiĕng mĕ.

Nơ̆r Kră Yang đei chih lăm A-môt 9:11
“Inh gô pơdơ̆ng ming lu đêl pơchah păng man ming thoi sơ̆.”

Dang ei, mĕ inh ưh pă đei pŭ iŏk tơdrong pơrăm đơ̆ng tơdrong jĭ Alzheimer bơih. Bơngai buăl juăt hloh lăm 58 sơnăm chăl arih oei đei pơklaih praih tơ mĭnh anih ‘lơ̆ng rŏ hloh. Mă lei inh tă kơ đei tơklah ataih đơ̆ng mĕ, păng mơn đei nhen thoi đĭ dêh char inh oei hơđang pơchah. Inh đei jet kơdih: Hăm trŏ ‘Bok Kei-Dei đei oei hơdai ưh? Hăm trŏ Plei ‘Lơ̆ng đei tơpă ưh?

Dôm tơdrong tơplih ngăl truh blư hlĭch, na thar pơdăr jơ tơdrong arih lu bơ̆n layơ ưh kơ tam băt. Mĭnh lăm dôm tơdrong tơplih tih hloh lăm chăl arih inh jơ̆ kơplah inh băt kơnăl kơdih tơpă kăl ‘Bok Dŏng Pơklaih Yang Yêsu- kơplah inh hlôh khan Sư oei dơdŭ ‘măng jơhngơ̆m inh, chang gô inh pơih păng ăn kơ Sư mơ̆t (Tơdrong Tơ’bôh 3:14). Păng kơplah inh pơm tơdrong ‘noh, tơdrong arih inh đei tơplih tơpă đơ̆ng tơlăm jrŭ. Kră Yang Yêsu tuh tơ’bĕnh anih rơhông lăm bơhngol inh, păng inh đei mơnat ăn dôm tơdrong yoch.

Mĕ inh kŭm đei pơih ‘măng jơhngơ̆m krao Kră Yang Yêsu mơ̆t pơgơ̆r. Yua kơ thoi noh, inh đei juăt pơma hăm mĕ: “Kơplah Kră Yang Yêsu truh, mĕ kư̆ kơ hơđơ̆ng na brŏk tơ hnam hăm Sư.”

Inh băt khan mĕ lui gơnang kơ Kră Yang, mă lei tơpă ưh kơ ‘bônh kiơ kơplah kơdih ‘bơ̆r inh kăl kơ pơma hăm ‘bok pơgang khan athei ăn mĕ inh yak năm. Tơpă inh ưh tim mă đei layơ hơmet kơ jơ năr ‘noh ôh. Jơ phŭt ‘noh đei ‘bôh truh tơ đon lui inh tơpă gah Plei ‘Lơ̆ng. Inh ‘blŏk truh tơ bơngai tơtông tơ kơpal ‘long pơglang, Kră Yang đei pơma hăm sư: “Inh khan kơ ih tơpă, năr âu hloi boih ih gô oei hơdai păng Inh tơ Pơlei ‘Lơ̆ng ‘Bok Kei-Dei.” (Luka 23:43). Inh kŭm tơchĕng truh tơ Tơdrong Krao Khan kiơ̆ kơ Kră Yang Bơtho mă mĕ kon nhi oei đŏk hơdai rim măng: “Ăn kơ dêh char Ih tĕnh truh. Ăn kơ tơdrong tơchĕng Ih gơh jing, mă tơ teh âu kư̆m thoi tơ plĕnh ti.” (Mathiơ 6:10)

Hăm trŏ ‘Bok Kei-Dei đei tơpă ưh? Đei! Hăm trŏ Plei ‘Lơ̆ng đei tơpă ưh? Đei!
20 phŭt đơ̆ng rŏng kơ mĕ inh lôch, inh oei hơoei ‘bơ̆t cheng giơng, rôp ti mĕ lăm thĕng hreh. Ưh pă đei kơ tơ̆ng kơmăy re, ưh kơ đei plei nuih pơpơ̆ dah dui jơhngơ̆m- lăp pă tơdrong hơđơ̆ng thĕng hreh gom đĭ lăm phŏng. Inh thar mơn đei lăm jơhngơ̆m anat kơ wă roi tơ’bôh… nhen thoi Yang Bơhngol ‘Lơ̆ng oei pơlung jơhngơ̆m pơchah inh hăm tơpang ti rơngơp đơ̆ng Sư.

Jrŭ tơlăm, inh mơn đei khan Kră Yang oei hơdai ‘bơ̆t doh, hăm inh. Inh băt tơpă khan Sư đei pơ’lơ̆ng ba mĕ inh brŏk tơhnam, lăm tơdrong hơđơ̆ng tôm mah thoi Sư đei pơkă. Inh đei bơnê kơ Tơ’ngla Pơjing yua kơ tơdrong tơpăt đơ̆ng Sư, yua kơ nơ̆r pơkă gah mĭnh năr mă kơplah inh păng mĕ đei oei hơdai. Păng inh lui kơ tơdrong mơnat ăn Sư ling lang mah mai kơ đĭ dôm jơ phŭt ơh sơ’ngon hloh lăm chăl arih kon bơngai.

Jơ phŭt ‘noh tơgŭm inh lui tơpă khan ‘Bok Kei-Dei păng Plei ‘Lơ̆ng đei tơpă. Sư đei ăn Yang Bơhngol ‘Lơ̆ng truh pơlung păng ăn tơdrong tơ’bôh tơpă lăm jơhngơ̆m inh, ‘noh bơih jơ̆ tơmam ăn đĕch ‘mêm mơnat dêh mă Sư ‘măn ăn kơ inh. Tơdah inh lui gơnang anih tơdrong ‘mêm ling lang đơ̆ng Sư, lui khan Dêh Char ‘Bă đei truh păng tơdrong ‘Bă wă gô jing, lei Sư gô tơ’bôh kơ inh ‘bôh tơdrong mơnat ăn đĕch lăm kơdih tơdrong oei hơdai đơ̆ng Sư.

Yua kơ liơ ah? Yua kơ Sư ‘mêm mơnat. Yua kơ Sư đei pơkă. Păng yua kơ Sư gơh pơm keh tôm nơ̆r pơkă đơ̆ng Sư.

Lĕi lăi thoi ‘Bok Kei-Dei đei pơdơ̆ng ming bơsŭn kơ ‘bok Đawit, Sư kŭm pơklaih hơmet ming kơdih akâu jăn inh, ăn kơ inh sơng iŏk tơdrong arih ling lang lăm Sư. Păng inh lui khan Yang Bơhngol ‘Lơ̆ng gô chông anhăk kon pơlei Sư yak mơ̆t tơ anih ư-ang ling lang.

Apĭnh đĭ đăng krao khan hơdai:
Kơkuh kơ Kră Yang, đei dôm lu tơdrong blư truh hloi lăm chăl arih mă kon ưh kơ tam hơmet wă tơ’bơ̆p, păng ‘bar pah jơ̆ng kon nhen thoi ưh kơ gơh wă dơ̆ng kơjăp. Mă lei lăm kơdih lăm dôm jơ kơplah nhen thoi tơgơ̆ ‘noh, Sư oei tơ’bôh jơhngơ̆m tơpăt păng ‘mêm mơnat kon tôm tơdrong. Bơnê kơ Kră Yang yua kơ Ih ưh kơ achăng kon mĭnh adrô̆ tŏk bŏk dôm lu tơdrong pơlong lăng anat anot, mă kon đei ngĭl ngŭl dah gleh lap. Apĭnh tơgŭm kon băt khan ti Ih oei rôp bơwei kon, păng lui kơjăp khan Ih oei pơklaih praih dôm lu tơdrong kiơ đei pơchah. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, gô đei dôm tơplih gô truh pơm tơplih dôm tơdrong lăm chăl arih lu bơ̆n. Mă lei Kră Yang pơkă gô năm hơdai hăm lu bơ̆n, pơklaih praih dôm lu tơdrong kiơ đei pơchah, păng ba lu bơ̆n truh tơ anih hiôk hơđơ̛̆ng hăm Sư. Mă khan buăl oei lăm tơdrong ơh sơ’ngon, ngĭl ngŭl dah ưh pă hơmĕng, athei lui khan tơdrong ‘mêm mơnat ling lang đơ̆ng Kră Yang gô ưh kơ layơ achăng buăl. Sư jơ̆ Tơ’ngla ‘lơ̆ng tơpăt, păng dôm nơ̆r pơkă đơ̆ng Sư ‘măn ăn kơ buăl tơpă gô đei pơkeh lăm mĭnh năr ưh pă đunh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.