Tú he kơp kờn dô nơm bơta lơi, bol he sùm kơlôi la:”Dilah mìng gơs bơta do, he rơp hưh nus”. Ală bơta kơp kờn hớ ò di la tis, mơ gơ găm di ngan mơ păl càng. Mơya pơn jat tú tơngai, bol he dợp git la ting jat ală bơta gơ rê mơ dunnia mìng cèng tus bơta ò niam mơ gơplơ nus lơm. Tus di tú bol he sac rwah Yang, bol he găm at kớ bơta lơngai sum sum.

Ngai do, ngai 31/07/2025, Bơta Hòi Dan Kòp Ngai dan jà ală ồng mò oh mi kơlôi sơnưng bal Jơnau Yàng kơnòm dê bơta dong kơl Veda Thomas Lucas dê bơh tơnggume: SAC RWAH BƠTA KIS Ò GƠPLƠ NUS

Sră Goh: “Añ neh ơn di đap bol mê bơta kis mơ bơta chơt, ală bơta lơngai lơngò mơ ală bơta srat sơntơm. Sac rwah tĕ bơta kis nàng bol mê mơ ală kòn sau bol mê dê geh kis”(Yal Wơl 30:19-20)

Kơp dớ iat khà đơs chờ nàng yăl tơnggit rơn deh pa kơn teh, ăn gơ lơh sền tơl tú hớ. Dô nơm rơn deh niam ngan, tơl jơh ală broă ngùi tơm rơn deh hớ. Ală phan ngui hang mơné, gơs oă pơnah pal cang, mìng sền gợi kung gơ lơh kờn ngăn. Bau klau ăn di kung be hớ, khai rcăng sền ală bơta dơlam rơn deh di – mơ đơs ngan, ăn ò wă wờng gơtha ală sèng cih hớ. Mơya dilah geh sac rwah dô nơm rơn deh, gen gơ la rơn deh mơ jơh bar nă he kờn geh. Mìng kơlôi tus di tú he ngùi gơ ăn kung gơ lơh chờ hợp jơh dô ngai.

Bol he ngui rơn deh yau tus di tiah tac rơn deh, tơm nus gơ lơh chờ hợp ngan gơn cih mat nàng rọt rơn deh pa. Mơya tus di tú iat khà jèn pal dợp kơp kơnnhai, bar nă ur clau he gơ lơh kơlôi ngan – khà jèn do dơng rlau mơ khà jèn he kơlôi. Bulah be hớ, bol he đơs is la: he neh lơh broă kong bol glar oă sơnam rau, mbe he kung ò rgơi gơs dô nơm phan he kơp kờn? Ăn bơtơl is să tơm he la rơn deh do gơ rơp lot băl mơ he tus di lồi tú tơngai, di pal mơ khà jèn.

Mơya mìng đợ kơn nhai – tơm tú găm poan nam tơm jen tai – ăn gơ lơh dơrcul ngan tú iat bau klau ăn di woam di rơn deh he neh kơp kờn do. Khai sơn tờm sền di rơn deh pa rlau. Nus ăn moat ngan. Dô dớ tai, ăn dơp git: bol he neh phi tú jơ, jen pria mơ nus nhờm gơ wet mơ ală phan mơna ò ai he in bơta hon chờ joh jòng, kung ò gơs kwơ tus di sum sum. Bơta găm wơl la gơplơ nus.

Slet oă nam, ăn neh hok git bơta gơplơ nus gơs oă pơnah. Gơ rgơi la nus sơ iang, moat jrum, ji nus, bol glar, tệp sột, mơ gơplơnus – mơ oă pơnah nus klôi ndai tai. Bol he gơplơ nus bơh ală tú lơm pah neh slet, bơh ală broă lơh gơ tơn tus cồng nha jơh, bơh tú he neh mhăr lơh nền dô bơta lơi mơ ò kơlôi tus di cồng nha gơ di.

Tú Yang Tơm Trồ lơh nus nhờm làng bol in gơlik sàng goh lai mơ tú mut di tiah Yang neh hơ, Yang neh ơn di đap bol khai bar bơta sac rwah: dơp geh bơta lơngai dơng, hala ơm tơm bơta tơm gơl mơ moat jum tơm nus. Sră Goh neh cih la Yang neh ơn di đap bol khai bơta kis mơ bơta chơt, ală bơta lơngai lơngò mơ ală bơta srat sơntơm. Yang jơh nus hoi ja bol khai sac bơta kis nàng bol khai mơ ală kòn sau bol khai dê geh kis, nàng bol khai kòñ gơboh di Jehôwa Yàng Tom Trồ, dòn bơr Kơnràñ mơ ntào kơ̆ tòm Kơnràñ; bơh Yang la bơta kis mơ ai bol khai in kis jŏ jòng tòm lơgar ( Yal wơl 30: 19-20)

Sac bơta kis hớ la sac Yang. Yang Tơm Trô jơh nus hoi ja lang bol Yang di kơnom di Yang, mơ lơh nền gơn kơnom di bơta dòn hớ. Plai soh ngan, Lang bol Israel neh ò sac bơta di pal.

“Yàng Jehôwa đơs mơ Môise lah: “Tŭ do mê rơp bic mơ ală ồng pàng mê dê. Ai làng bol do rơp lơh dri tơlàr mơ ală yàng lơgar bơdìh tòm lơgar mơ bol mê rơp mut, bol khai rơp sang lòi Añ mơ ò prap gàr jơnau ho bal mơ Añ neh bơtào mơ bol khai.”

Lôi dut, bol khai pal kong jơh ală bơta kơn jớ bol glar mơ Yang Tơm Trồ neh yal lài.

Ngai do, Yang Jesu kung ơn di đap mat bol he nàng sac rwah bơta kis mơ bơta chơt:

“Bơh Yàng Tom Trồ kòñ gơboh dunnia, tian gơs neh ai Kòn Dùl Kơnràñ dê, tồ cau lơi in dòn Kơnràñ, gen ò kòl roh rui, mơya geh bơta kis gam sùm sùm.”(Jang 3:16)
“Cau lơi dòn Kòn gen ò kòl cahrña ò; cau lơi ò dòn gen neh kòl cahrña rau, tài bơh ò dòn di sơnđan Kòn Dùl Yàng Tom Trồ dê.”(Jang 3:18)

Gen tàng oh mi ơi, ban gơn tus di tú jơh ală bơta mìng là nus moat jrum. Sac té bơta kis – sac te Bơtau Krist tơm ngai do.

Dan jà bol he dô nùs bal tòm bơta hòi dan:
Yang ơi, nus lơn bơn kon di bươn ngan nàng ting jat ală bơta crih crai dunnia di. Kon git la ală bơta hàng mơne dunnia di mhăr jơh ò tú lơi cèng tus bơta wil tơl mơ mìng Yang lơm mơ rgơi ai kon in. Dan ai kon in git pleh sang ală bơta gơ rê mơ rài do, mơ mìng sac Yang lơm. Tai bơh ò gơs bơta lơi màng rlau mơ bơta lơngai mơ hựh nuâ sum sum mơ Yang pạ ai kơp ngai kon in. dăn kơp bơta sac rwah kon di ngai do mơ sum sum tơ nớ sum rang tơlik nus kờn gơboh Yang. Kon jơh nus hoi dan tơm sơn đan Yang Jesu Krist, Amen

Ơ ală ồng mò oh mi kờn gơboh, dunnia rgơi ai bol he in gơ lơh hưh nus dô êt tú, mơya bơta lơngai kớ nền mìng joi bàn tơm Yang. Ală bơta sền gơ lơh be “di ngan” ngai do, gơ kung rgơi lơh he in tơm gơl nus nhờm. Mơya ò gơs cau lơi sac Yang mơ nus dơrcul. Ngai do, oh mi sac bơta lơi? Ban kis dô rài kis tú he sền wơl mìng là moat jrung. Sac té Yang mơ kơ nus lot jat Yang!

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.