Neh gơs tú lơi he jòng să tài bơh geh dồ nă cau bơyô jak chài sơl ơ? Neh gơs tú lơi he jòng să tú he gơs dồ nă cau bơyô la cau dờng màng oă cau git, hala cau bơyô hớ la dồ nă cau at bồ dờng tòm dồ tiah lơh broă hala at bồ dà lơgar sơl ơ? Gơs tú lơi he neh ngui oă jơ mìng yal wơl ală broă bơh cau bơyô he gơs bè hớ sơl ơ?

Mơya he neh kơlôi sơnơng dồ bơta do sơl: Yang Jesus la Bơtau dờng màng, gơnap gơnoar mơ bềng bơta kờn gơboh neh hòi bol he la “cau bơyô” Yàng dê sơl ơ? Dồ tiah ntào mơ ờ gơs phan lơi tòm dunnia do rgơi pơndrờm jai, mơ rlau jơh hớ la he ờ di pal càng dipal sùm geh bơta hớ. Kơnràn neh sac bol he, kờn gơboh he, mơ pà he in dồ tiah ntào hớ mơ ờ càng lùp he pal lơh dồ bơta lơi.

Ngai do, ngai 30/07/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ ồng Rich Miller bơh tơnggume BƠYÔ CAU BƠTAU DÊ

Sră Goh: “Dilah bol mê lơh jat bơta Añ bơto sồr, gen bol mê la bơyô Añ jê … Añ bơto sồr bol mê ală bơta hơ̆, nàng bol mê kòñ gơboh bal mơ gơp.” (Jang 15:14, 17)

Gơs oă tiah tòm Sră Goh lơh he in kalke git wă tú hớ he mìng đòk dồ bă bàlơhiah, đơs is la ală tap Sră Goh đơs tus bơh jơi bơtiàn tòm sră Khà Làng Bol hala bơta boh lam bơh bơta kòp jê tòm sră Levi, hala đơs tus dê bơta tompà ù tiah Canaan tòm sră Jôsuê.

Gen tàng bè hớ, oă cau rơp sac tap Sră Goh buơn đòk bè ală sră Jơnau niam, jơnau yal wơl ồng David tomlơh mơ ồng Goliat hala ală sră pơyoa ồng Pol dê pơyoa tus dê Hìu Jum Goh Êphêsô dê. Mơya, Jơnau Yàng yal bol he in git lah jơh Sră Goh neh geh Yàng Tòm Trồ khồm nhơm … (2 Timothe 3:16). Gen bè hớ, ală sèng Sră Goh mơ bol he ờ kờn đòk kung là Jơnau Yàng mơ gơs dờng màng mơ kung la phan sa đah hwềng bol he dê.

Bơta do kung neh gơlik gơs mơ an tú an sền 1 Yal Yau 27. Tap do mìng đơs tus bơtau Dabit bal mơ ală cau ling neh geh ồng jào gơnoar at bồ ală mpồl ling tòm Israel, ală cau sền gar phan mơna mơ ală cau jak chài dong kờl bơtau. Tap do gơs oă sơnđan mat, mơ ờ lơh he in kờn đòk gơ. Mơya, kòp ală cau neh geh cih tòm tap sră do sùm gơs bơta dờng màng tòm broă sền gar mơ lơh ală gơnoar broă ala mat cau bơtau in.

Mờr dut tap do la ồng Husai cau Arkit. Husai geh đơs tus la cau bơyô cau bơtau Dabit dê. Sră Goh cih: “ … Husai cau Arkit la bơyô bơtau dê.” (1 Yal Yau 27:33)

Broă dồ nă cau geh đơs tus la cau bơyô cau bơtau dê, tòm rài yau òr do la dồ bơta dờng màng ngan cau hớ in. tú an sền tap Sră Goh do, Yàng neh pà an in gó bơta tomklac ồng Hussai bal mơ ồng Dabit la dờng màng ngan. Mơ dờng màng rlau tai hớ la broă gơlik gơs cau bơyô cau bơtau dê geh đơs tus drờm bal mơ ală cau at bồ mpồl ling cau bơtau dê.

Bơta bơtê dờng màng lơi bol he dờp geh bơh tap Sră Goh do taih? Gơs tú lơi bol he mìng kơlôi tus broă lơh tòm hìu jum mơ jòi bơta dờng màng să tờm he dê tòm ală broă he lơh hớ sơl ơ? He pal kơrhia bơta do, tài bơh bơta do rơp lơh he in híu ală bơta dờng màng rlau hớ la “lơh cau bơyô” bal Yàng Jesus la Bơtau Dờng Màng bol he dê.

Tòm mang Yàng Jesus gơkòl cau pơrlớ dră – di dê tú lài mơ Yàng kong bòl glar, Yang Jesus ờ đơs pràn tus dê gơnoar broă, broă lơh ală cau bơtê dê. Rlau mơ hớ, Yàng kờn bol khi git dồ bơta dờng màng: hớ la Yàng hòi bol khai la “cau bơyô”. Mơ cơng tàng bơta lơh yô do ràng tơlik tòm tú he kis bal mơ gơp.

“Dilah bol mê lơh jat bơta Añ bơto sồr, gen bol mê la bơyô Añ jê … Añ bơto sồr bol mê ală bơta hơ̆, nàng bol mê kòñ gơboh bal mơ gơp.” (Jang 15:14, 17)

Tòm ală sơnđan mơ Yàng rgơi ngui, Yang Jesus neh sac dồ sơnđan ràng tơlik bơta đềt mềr dê gùl bol he mơ să tờm Yàng. Yàng hòi bol he la “bơyô”. Bơh do, Yàng ràng tơlik dồ jơnau song: Yàng sền bơta tomklac dờng rlau mơ gơnoar broă. Yàng Tòm Trồ ờ siuớ cau lơh yô, mơya Yàng pà ai he in gơnoar nàng lơh yô mơ Yàng kơnờm bơta kờn gơboh mơ bơta nđàc tơngkah tơngkan Yàng dê. Gen tàng, bol he ban sền ờ sơp dê bơta nđàc do. Yàng Jesus sùm la Bơtau dờng rlau jơh, Bơtau dipal nàng bol he sùm dờn bơr mơ lơh jat bơta bơto sồr mơ Yàng neh pà ai.

Yang Jesus hòi jà bol he la cau bơyô Kơnràn dê. Yàng kờn bol he tompà mơ Yàng jơh ală bơta gơlik gơs tòm nùs nhơm he dê. Mơ tú he la “cau bơyô” đềt mềr Yàng dê, gen rài kis bol he rơp ràng tơlik rùp să Yàng tus dê ală cau ndai in. An chồl chao ồng mọ oh mi tus té mơ Yàng ngai do tơn, dan Yàng dong ồng mọ oh mi sùm cơnđoà lòt tòm bơta tomklac đềt mềr mơ Yàng bè “cau bơyô” Kơnràn dê.

Dan jà bol he dô nùs bal tòm bơta hòi dan:
Khoai Yàng, bulah Yàng la Bơtau hơđăng ală bơtau, la Bơtau bềng gơnap gơnoar mơ bơta gơkló, mơya Yàng sùm sền bol he la cau bơyô đềt mềr Yàng dê. Dan dong kòn sùm ơm tòm bơta tomklac mơ Yàng kòp ngai, nàng kon ờ híu tiah ntào dờng màng mờ Yàng neh pà ai kon in – hớ la geh lơh “bơyô cau Bơtau dê”. Dan rài kis kon sùm ràng tơlik bơta àng Yàng dê, mơ lơh àng sơnđan Yàng mơ cèng bơta kờn gơboh Yàng dê tus ală cau gùt dar. Kon jơh nùs hòi dăn, ai sơnđan Yang Jesus Krist, Amen.

Ơ ală ồng mọ oh mi kờn gơboh, tú rài kis he bềng bơta kờn gơboh mơ kis tòm bơta tomklac đềt mềr mơ Yàng bè ală cau bơyô Yàng dê. Tú kờp ngai bol he đal git bơta nđàc crih crài Yàng dê, gen dồ bơta rơp gơlik gơs: bol he rơp ràng tơlik bơta chò hòp do tus dê ală cau ndai in.

Bulah ơm tềng tiah lơi, hala tìp cau lơi, nùs bol he sùm kờn ngan tom pà ală bơta nđàc dờng mơ Yàng neh lơh hơđang rài kis he dê. Mơ rlau mơ hớ, bơh rài kis, jơnau đơs, nùs nhơm he dê kòp ngai rơp la cơng tàng bơh Yàng. cau ndai rơp sền gó Yàng bơh rài kis neh geh tomgơl mơ bềng bơta lơngap lơngai bol he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.