Bô bơlhu là dô bơta ò rgơi sền gŏ geh, ò rgơi bơ, mơ ya rgơi dơp git geh. cau dòn Yàng Dong Klas geh hòi sac nàng ơn rài kis he be la dô nơm phăn ơn bô bơlhu. Mơ bô bơlhu hơ̆ ò rgơi nhơm mơ ală pơnah he ơs geh, mơya rang tơlik găn dê dô nơm rai kis “kis lơh broă, sang goh mơ niam nùs Yàng Tòm Trồ.”
Ngai do, ngai 28/07/2025, Bơta Hòi Dan Kòp Ngai dan jà ală ồng mò oh mi bơtê bal Jơnau Yàng kơnòm dê bơta dong kơl ồng Paul J.Palma dê bơh tơnggumê BÔ BƠLHU NIAM NÙS YÀNG

Sră Goh: “Behơ̆, ơ oh mi, añ ai ală bơta kòñ nđàc Yàng Tom Trồ dê nàng bơto tơngkah oh mi ơn tĕ să jan he lơh gơs phan ơn duh khoai kis mơ sàng goh, niam nùs Yàng Tom Trồ, hơ̆ la bơta duh khoai di ngan oh mi dê.” (Rôma 12:1)

Neh gơs tŭ lơi oh mi kơnọ bô ơs mơng ngan tian gơs lơh oh mi kah wơl bơh dô bơta bơh oă sơnăm neh rlau hala ò? Kơp tŭ lơmpah gơs ală ngai wêr, bau ur añ ơs ơn ală ồs jrềng bô quế gut dar mpàn sa nàng kah wơl ală tŭ tơngai niam răm mơ tŭ jơ dềt mêr hiu nhă dê. Ală cau sền sơwì ai tơnggit bơta dô gơlik gơs tai bơh ơnih muh (kol gơnoăr broă bơh bơta bô) ơm rềp ngăn di dơngoh (kol gơnoăr broă bơh bơta bơh yau). Tòm prăm nơm pơnah dơp git kòn mơnùs dê: dơp git sền, dơp git kơno, dơp git bô, dơp git liap mơ dơp git tòm să jăn, gen bơta dơp git bô bơh muh là bơta dơp git gơs gơtơm klac dềt rlau jơh mơ bơta kơlôi kah bơh yau.

Tòm Khà Lang Bol 15, bol he gŏ Yàng Giê-hô-va bơtô Môise ơn tĕ phăn ơn duh khoai Kơnràñ in be la dô pơnah bơta duh khoai dê. Prau dơ̆ tòm dap dô , Kơnràñ hôi jà lang bol ơn tĕ ală “phăn ơn duh khoai gơs bô bơlhu” (Khà Lang Bol 15:3, 7, 10, 13, 14, 24). Hơ̆ la ală phăn ơn chu pơgùc gơlik bô bơlhu krơi is; gơ rgơi ndrơm bô be ală poac phăn poan jơng dê tòm tŭ chu gơ. Bulah behơ̆, bơta dơng mang ò gơ ơm tòm gơtha gơ dê: tŭ bol he don duh Yàng bơh broă lơh duh khoai, bơta hơ̆ niam nùs Kơnràñ.

Ngai do, Yàng Tòm Trồ ò găm sôr kòn lang Kơnràñ dê duh khoai găn dê ală phăn ơn tai. Ală phăn ơn mơ phăn duh khoai ò găm càng tai, bơh bơta dong twoai neh geh ai dunnia in găn dê bơta chơt dô dơ̆ tơl rau Bơtau Krist dê: “Bơh Yàng Jesu Krist neh lơh jat nùs kòñ Yàng Tom Trồ mơ bol he neh gơlik gơs sàng goh, kơnòm dê bơta ơn să Kơnràñ dê dô dơ̆ tơl rau. Cau gơnoar ơn phan duh khoai kòp ngai ntào duh broă mơ ơn ală phan ơn duh khoai ndròm bal sùm, la bơta ò gơs tŭ lơi rgơi tă sang tồi glài; Mơya Bơtau Krist, tài bơh tồi glài mơ ơn dô nơm phan ơn duh khoai mìng dô dơ̆ mơ gam sùm sùm, gen nggui đah ma Yàng Tom Trồ,”
Bulah ò găm ơn ală phăn ơn be rai yau, mơya kơp nă cau dòn Yàng ngai do geh hôi jà ơn să tơm rai kis he be la dô nơm phăn ơn Yàng Tòm Trồ in. Bơh bơta hơ̆, cau gơnoăr bơto dơng Pol chôl bơtrôt ală cau dòn tòm Rôma: “Pol, dĭ gơna Yàng Krist Jesu dê, geh Yàng Tom Trồ hòi sac lơh gơs cau gơnoar bơto dờng, ơn is nàng bơto Jơnau Niam Yàng Tom Trồ dê,” (Rôma 12:1 )

Ông Pol neh ngui jơnau pơnyơu bơh phăn ơn kis tòm Sră Goh Yau nàng chôl bơtrôt ală cau dòn rai Sră Goh Pa. Bơh Bơtau Krist neh chơt bol he in, bol he kung neh ơn rai kis he Kơnràñ in. Kơp ngai, bol he gơs tŭ lơmpah duh khoai Yàng mơ hơ wơl ală bơta mơ Yàng Jêsus neh lơh bol he in. Bơta duh khoai ò di ming kơt prăp tòm ală chờ niam tòm ală jơ pơjum. Rai kis duh khoai ngăn ràng tơlik găn dê gùng kis mơ ală bơta sac rwah bol he dê.

Ồng mò oh mi mơ añ ngai do ò càng pal ơn phăn ơn kis tai, bơh bơta phi să Bơtau Krist dê neh jrơm ală tồi glài mơ tis bol he dê. Mham Yàng Jêsus neh tơl oh mi in tòm ngai do mơ sùm sùm. Tòm gùng rài, bol he găm gơs tŭ gơtùp pừ mơ gơtup tis, mơya chi pơng Kơnràñ dê neh tơl bol he in.

Dan jà bol he dô nùs bal tòm bơta hòi dan:
Ưnggai Yàng Jêsus bơh găn dê bơta phi să Kơnrañ dê hơđăng chi pơng mơ kòn geh dong klas. Bulah behơ̆, gơs ală dơ̆ rài kis kòn ò drơng kơp, gơlik gơs lơbơn mơ ò niam nùs Kơnrañ. Dan Yàng toh glài mơ dong kòn git ơn wil tơl rài kis kòn be la dô nơm phăn ơn kis mơ sang goh Kơnrañ in. Kòn jơh nùs hôi dăn tòm sơnđăn Yàng Jêsus Krist, Amen.

Ơ ală ồng mò oh mi kòñ gơboh, bơta duh khoai ngăn ming sơntơm tòm tŭ ồng mò oh mi git he ò găm kis bơh să tòm in tai mơ rcăng sir nùs nhơm ơn jơh rài kis be là dô nơm phăn ơn kis mơ sang goh Yàng in. Ngai do, sền sơwì tĕ rài kis he, sền kơp bơta lơh lòt, kơp bơta lơh nền rềp do ồng mò oh mi dê gơs ràng tơlik dô nơm phăn on “kis mơ sàng goh” diđap măt Yàng hala ò? Gơs bơta lơh lòt ơs mơng, kơlôi sơnưng hala bơta lơh lòt lơi găm lơh ồng mò oh mi ngai bơh bơta sang goh Yàng kòñ dê oh mi sơl? Pơndềt să tĕ tus mơ Yàng tŭ jơ do, yal jơh ală tồi glài mơ bơta tis ồng mò oh mi dê, ràc dăn Yàng toh glài mơ tơmgơl pa ồng mò oh mi, nàng rài kis oh mi ràng tơlik bô bơlhu Kơnràñ dê ală cau gut dar in.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.