Digùl dunnia dơng ơnàng ngan bal mơ oă ngan cau pas-sơm jak chài, gơs tŭ lơi oh mi sền gŏ he gơlơh “bè òs” hala ò? Bol he gŏ he ò gơs bơta lơi pal geh đơs tus hala bơta chài rgơi rlau. Rài kis bol he dê kư behơ̆, ngai sơrlèt ngai dô bă ring-ngềt bal mơ ală broă lơh ò gơs dờng mang. Mơ ya oh mi git sơl, Yàng ò sền bol he gan sơban hala bơta chai rgơi đah bơdìh. Mơ tom gar mat Kơnràñ, bol he ò tŭ lơi la bè òs dô ềt lơi!

Ngai do, ngai 25/07/2025, Bơta Hòi Dan Kờp Ngai dan jà jơh ală cau iat kơlôi sơnơng Jơnau Yàng kơnom di bơta dong kơl Jonathan Santiago bơh tơnggume Ò TŬ LƠI LA BÈ-ÒS

Sră Goh: “Mơ Yàng Tom Trồ neh sac ală bơta lơbơn-lơño dunnia dê nàng lơh bassìl ală bơta pràn kơldang in

Mè añ jê òs đơs kơnhơl lah añ geh deh la nàng … lòt blơi ală phan. Ngan behơ̆, añ neh gơlik behơ̆. Mơ ya añ dăn Yàng tă bơh nùs añ jê ală bơta ham kòñ bơh phan mơna poăc să, mơ Kơnràñ neh dòp jơnau añ jê. Ò di la añ ò gam kòñ gơbơh ală phan hang mơnĕ hala ală phan geh ai gòi, mơ ya añ sac ò lơh roh oă tŭ jơ mơ dơngoh kơlôi tom broă hơ̆ tài. Dilah añ blơi phan lơi gen òs la kơnom gơp bơyô hòi yal tơnggit gơs phan geh tơhuc khà prĭa, hala añ nisơna sền gŏ tom gùng.
Ngai do, dô nă cau bơyô hòi añ in mơ đơs lah añ pal lòt tus tom dô nơm tiah cau brọ phan ne, tài bơh ting hơ̆ gơs cau tơnhuc khà prĭa dờng mơ òhềt gơs bơh lài. Bơta kòñ joi git tom añ gơ-guh, añ wơl rơndeh nàng sền gơs phan lơi gơs khà prĭa dipal hala ò.

Tus rau, añ lơh tom toh be “dô nă cau lơh dă neh git làm”, lòt gơrwàng gùt dar sền sơwì mơ joi “con mồi”. Gơs oă phan hang mơnĕ, mơ ya añ ò mhar blơi gơ. Gen añ gŏ dô nơm gri mơ tiah niam ngan. Tŭ hơ̆ mo, dơngoh kơlôi añ jê kah tus tap seng Sră Goh geh cih tom sră Jang 2:7: “Yàng Jesu sồr bol khai lah: “Tuh tĕ bềng dà tom ală yang do.” gen bol khai tuh bềng tus di bơr.”

Tŭ hơ̆, añ git añ pal blơi gri do, nàng kờp ngai tơngkah să tom bơh nùs nđàc sơngit Yàng Tom Trồ dê. Añ blơi gơ ò kas jên, mơ ya song ngan, bulah pal tơm tomtoh mơ khà jền tom, añ kung kư blơi. Tŭ do, gri gam geh ơn dô bă mang ryŭ tom hiu añ jê, kung be dô nơm rùp sơnio bơta kòñ gơboh mơ lơbơn niam Kơnràñ dê.

Yàng neh ngui ală yang dà ò gơs kas màng, hơ̆ la dô nơm phan ngui bè òs tom rài kis kờp ngai. Kơnràñ sồr cau tuh dà tom ală yang hơ̆, broă lơh hơ̆ kung ò gơs bơta lơi la krơi is. Mơ ya tom tŭ geh ơn tom tê Bơtau At-Bồ, ală bơta sền gơlơh bè òs rlau jơh nisơna gơlik gơs bơta ò găm la bơta bè òs tai.

Bol he kung behơ̆ sơl. Gơs tŭ he sền gŏ he mìng la dô nă cau mè ơm tom hiu sền gar kọ̀n bè òs, dô nă bau ur kung be ală bau ur ndai, dô nă cau lơh ơpah dòp geh jên jat tơngai… mơ ya tom tŭ ơn rài kis he Bơtau At-Bồ in mơ lòi Kơnràñ tề lăm, bol he rgơi gơlik gơs ală cau ò gơs la bè òs.

Yàng ò sền bol he mơ gar mat kòn mơnùs dê. Kơnràñ sền gŏ bơta kwơ màng geh pun ndơp ò git jơh kờp nă cau dê, tom tŭ bol he ơn să he duh broă jat nùs kòñ Kơnràñ.

Gideôn la dô sơnio loh lang. Tom tŭ Israel gơkol làng bol Madian kup bơklơn, dô nă cau pơnu sơnđan la Gideôn rngòt ntoàt du pun tom trồm pat tơrnom. Gideôn gơrê mơ dô mpôl cau lơbơn rlau jơh tom làng bol Israel, mơ ồng kung la cau dềt rlau jơh tom hiu nhă. Mơ ya tom tŭ Yàng Tom Trồ hòi sac ồng, Kơnràñ ò đơs: “Do, cau pơnu lơbơn lơñọ ne, tus tĕ hơ do!”

Sră Goh cih tom Ală Kwang Cahrña 6:12: “Cau gơnrơh Yàng Jehôwa dê tơlik mat mơ khai đơs lah: “Ơ cau lĭng gơnoar-pràn, Yàng Jehôwa ơm băl mơ mê”

Yàng Tom Trồ git loh Giđeôn rơp gơlik gơs cau mbe lơi, tom tŭ ồng dòn duh mơ lòi Kơnràñ lơh broă tom rài kis he. Mơ tom tŭ Gideôn jao wil tơl bơta dòn Kơnràñ in, ồng gơlik gơs dô nơm phan tomlơh dọ̆ng tă jơh làng bol.

Behơ̆ oh mi mbe lơi taih? Oh mi neh rcang sir ơn rài kis he tom tê Yàng mơ jơh nùs dòn kơnom di Kơnràñ hala ò? Tom tŭ ơn să he Yàng in tề lăm, oh mi rơp ai lơh krơi di đap ală bơta niam ngan mơ Kơnràñ rgơi lơh gan dô nă cau “bè òs” kung be oh mi. Tài bơh tom tê Yàng, bơta jak chài oh mi dê la ò git jơh!

Dan jà bol he dô nùs bal tòm bơta hòi dan:
Ưnngai Yàng tài bơh Kơnràñ sùm kòñ gơboh mơ sền dờng mang dô nă cau bè òs be kọ̀n. Bulah kọ̀n gam oă bơta lơbơn lơñọ mơ ò wĭl tơl, mơ ya tom tê Kơnràñ, kọ̀n rgơi lơh gơlik ală bơta niam rlau jơh mơ să tom kọ̀n kung ò kơlôi tus. Dan bơto kọ̀n git pơndềt să jao phi wĭl tơl nùs nhơm kọ̀n Kơnràñ in, nàng Kơnràñ bơt mòn mơ ngui kọ̀n jat nùs kòñ niam Kơnràñ dê. Kọ̀n dòn nên lah ò gơs bơta lơi la ò kwơ màng tom tŭ geh jao phi tom mpang tê gơnap-gơnoar Kơnràñ dê. Kọ̀n jơh nùs hòi dan tom sơnđan Yàng Jesu Krist, Amen.

Ơ ồng mò, oh mi kòñ gơboh, digơlan oh mi kơlôi he ò kwơ màng, ò gơs bơta lơi di pal hala jak chài, mơ ya Yàng ò sền oh mi kung be bơta dunnia òs sền oh mi. Kơnràñ sền bơta kwơ màng, bơta geh pun ndơp mơ tơnggu sùm sùm mơ Kơnràñ neh ơn tom oh mi. Mơ tom tŭ oh mi jao phi jơh ală bơta tom tê Kơnràñ, rcang sir nàng Kơnràñ tơm pơrgơl mơ ngui rài kis oh mi dê, gan dô nă cau gơlơh be dềt rhên rơp gơlik gơs cat lơngai dờng oă cau in. Ơn tĕ wĭl tơl nùs nhơm oh mi dê Yàng in, tô oh mi gơlik gơs phan ngui gơs kwơ lơh ală bơta rơndap dờng mang Kơnràñ dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.