Puas tau muaj zaum twg koj hnov nkees rau koj lub neej? Txhua yam cuag li pheej ua mus ua los li qub, yeej tsis muaj ib yam dabtsi tshiab, thiab koj kuj tsis paub txoj hau kev yuav mus hauv yus lub neej yog dabtsi, txog qhov uas koj cim civ nug tias puas yog Vajtswv tsis ua haujlwm hauv koj lub neej lawm. Tiamsis hnub no, tig rov qabmus saib zaj xwm txheej hais txog Anplahas. Thaum yawg mloog lus tawm hauv qhov chaw yawg nyob tso siab lug mus, Vajtswv coj Anplahas tawm mus nraum zoov saib lub ntuj thiab ntsia pom tej yam loj uas Vajtswv npaj tseg rau yawg.

Hnub no, yog hnub 27/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Susan M. Watkins dhau ntawm Zaj kawm TOS TEJ LUS COG TSEG ZOO

Vajluskub: “Tus Tswv pub lawv tau nyob thajyeeb lug hauv lub tebchaws ntawd, raws li nws tau coglus tseg rau lawv cov yawgkoob lawm. Lawv cov yeebncuab tsis muaj cuabkav tuaj tawmtsam lawv li, rau qhov tus Tswv cia cov Yixalayees kovyeej lawv tej yeebncuab. Tus Tswv ua raws li nws tau coglus tseg rau cov Yixalayees lawm” (Yausuas 21:45)

Tsis ntev los no koj puas nco ntsia tej hnub qub saum nruab ntug? Koj puas tau tseg me ntsis sijhawm los saib tej hnub qub ntawd? Tej hnub qub ntawd yeej ua twjywm cig saum nruab ntug, lawv yeej nyob lawv qhov qub raws li Vajtswv tsim rau lawv nyob. Lub ntuj loj dav yog qhov chaw puv npo Vajtswv tej lus cog tseg, kuj yog qhov chaw nthuav tawm Vajtswv lub tshwjchim uas ci ntsa iab. Kuv tsis paub koj zoo li cas, tiamsis “thaum hmo ntuj” muaj tej zaug kuv raug tej fuab ntis. Thaum lub neej ntsib cua daj cua dub, kuv ntsia tsis pom Vajtswv lub homphiaj tseg rau kuv.

Anplahas txoj hau kev kuj tsaus nti zoo li ntawd. Txawm yog yawg twb muab yawg lub neej fij rau Vajtswv thiab ua ib lub neej tso saib plhuav, los dhau lub caij lub nyoog mus, Anplahas kuj muaj lub caij ua xyem xyav. Vajluskub sau txog qhov uas Vajtswv nthuav tawm Vajtswv lub homphiaj rau Anplahas:

“Vajtswv coj Anplas tawm mus rau nraum zoov thiab hais rau nws tias, “Koj tsa qhovmuag saib saum ntuj thiab suav cov hnubqub saud saib koj suav puas txheeb, koj yuav muaj xeebntxwv coob npaum li tej hnubqub ntawd ntag.” (Chivkeeb 15:5).

Tej lub qe hlaws cig cig saum nruab ntug, thiab tej hnub qub dhau los ua pov thawj qhia rau rau ntiajteb paub txog ib haiv neeg tshiab yuav tshwm los. Hauv txoj kev xav tsis thoob, Anplahas tsa muag saib saum ntuj thiab mloog Vajtswv tej lus cog tseg txog nws caj ces. Cov neeg Yixalayees pib tshwm los zoo li tej hnub qub saum nruab ntug, ci rau qhov tsaus ntuj.

Ntau zaug, kuv nyob hauv tsev ntev dhau. Lub neej ua ub ua no ua rau kuv tsis khoom thiab tsom ntsoov rau tej yam ntawm hauv ntej. Yog li tej uas kuv ntsia pom cia li nqaim zuj zus thiab raug thaiv. Tiamsis, zoo ib yam li Vajtswv tau ua rau Anplahas, Vajtswv pub rau kuv tawm mus sab nraud, kom kuv saib saum ntuj thiab txais yuav tej fuab cua zoo, nqus ib pa. Kuv lub qhov muag cheem tsum sijhawm los saib tej yam tshiab, raws li Vajtswv pom. Kuv tau caw tawm ntawm tej nrim hauv ntiajteb mus thiab ywj pheej rau tej yam uas siab dua. Saib dhau los ntawm phab ntawd, txhua yam cia li hloov pauv. Tej teeb meem saib cuag li yuav kov tsis yeej thaum no ho rov qab dhau los me me. Tej kev txhawj, puav leej ploj mus thuam muaj Vajtswv nyob nrog. Tej nra nyav li tej pob zeb kuj cia li los sib thaum uas Vajtswv txoj kev ncaj ncees tiv thaiv kuv. Kuv txojkev xav tau hloov pauv thaum kuv paub saib ib puas tsav yam raws li Vajtswv saib thiab so rau hauv Vajtswv hav zaub mos.

Muaj tej lub sijhawm, peb yuav tau tawm mus sab nraud, cais yus tawm hauv lub neej mus, kom muaj sijhawm ntsia rau saum ntuj pauv qhov uas pheej nyho hau tag li, thiab nrhiav tej yam uas yooj yim tshaj. Vajtswv yuav hloov pauv peb lub neej, thiab ntxiv zog rau peb kom peb muaj zog dhia ntxiv rau hauv txoj kev sib twv khiav tom hauv ntej.

Ntsib dhau ntau xyoo nrog Vajtswv mus, kuv txais tau ntau lo lus caw los ntawm Vajtswv los. Txawm yog muaj tej zaug qhov muag yuav ntsia tsis pom tag nrho tej uas Vajtswv yuav ua los, kuv ntseeg rau Vajtswv tej lus cog tseg. Nws zoo li thaum koj yuav ib yam khoom twg, koj paub tseeb tias koj twb txaus siab, tsuas tos lawv nqa tuaj xwb. Koj yuav ntsia tsis pom yam khoom ntawd tamsim, tiamsis koj ntseeg tias lawv tab tom xa tuaj. Vajtswv tej lus cog tseg kuj zoo ib yam li ntawd, tej zaug koj yuav tsis pom kiag tamsim ntawm, tiamsis ntseeg tias yuav los yog lub sijhawm. Nyob rau lub sijhawm uas peb tos ntawd, peb yuav tau loj hlob. Peb txhua tus ib leeg nyias muaj nyias ib lub neej txawv, tiamsis tag nrho sawvdawg puav leej tos tej lus cog tseg rau tus kheej dhau los muaj tseeb. Ntseeg tej lus cog tseg mas yooj yim, tiamsis peb puas yuav tos taus ntev? Nco ntsoov Vajtswv tej lus cog tseg, yeej tsis muaj ib nqe uas tsis muaj tseeb:

“Tus Tswv pub lawv tau nyob thajyeeb lug hauv lub tebchaws ntawd, raws li nws tau coglus tseg rau lawv cov yawgkoob lawm. Lawv cov yeebncuab tsis muaj cuabkav tuaj tawmtsam lawv li, rau qhov tus Tswv cia cov Yixalayees kovyeej lawv tej yeebncuab. Tus Tswv ua raws li nws tau coglus tseg rau cov Yixalayees lawm” (Yausuas 21:45).

Zoo li Anplahas, peb kuj yuav tau tawm mus, saib saum ntuj, thiab suav cov hnub qub uas peb suav tsis tas ntawd. Yog peb tsis kam tawm ntawm peb qhov chaw nyob thiab mus nraum zoov, peb yuav tsis muaj hnub ntsia pom tej hnub qub. Peb lub neej yeej tsis raug kaw cia rau tej yam uas nyob tamsim no, vim tom ntej yeej tseem tshuav tej yam zoo uas Vajtswv npaj tos. Txawm yog tej lub sijhawm uas muaj kev txomnyem koj ntsib dhau kuj tsis yog tias tsis muaj nqis. Vajtswv niaj hnub nthuav tawm Vajtswv qhov pom kev rau tej qhov tsaus ntuj tshaj. Tsis muaj leej twg saib hnub qub rau nruab hnub, vim qhov pom kev nruab hnub nws npog tej hnub qub tas. Kuj ib yam li ntawd, nyob rau thaum tsaus ntuj hauv lub neej, peb thiaj ntsia pom Vajtswv meej dua. Yam uas peb yuav tau ua yog tso tseg tej kev xav tsis yog ua rau peb nkag siab yuam kev Vajtswv txoj kev. Yog peb tsis ua li ntawd, peb yuav tsis pom lub homphiaj hauv peb lub neej, tas maj mam dhau los tag kev cia siab. Phem tshaj thiab, peb yuav xav tias Vajtswv tsis ua haujlwm hauv peb lub neej lawm. tiamsis tseeb tiag ntawd yog tag nrho tej haujlwm uas nyob rau hauv Vajtswv lub sijhawm uas zoo tshaj plaws.

Koj puas sau cia Vajtswv tejlus cog tseg rau yus rau qhov twg? Tej zaug ntawd yog lub sijhawm uas koj yuav tau qhib tej ntawv los thiab rov qab nyeem dua. Thiab twb txog lub sijhawm uas koj yuav tau tawm mus nraum zoov saib saum nruab ntug, saib Vajtswv txoj kev zoo.

Thov caw nrog kuv peb thov Vajtswv ua ke
Tus Tswv, nyob rau lub sijhawm uas kuv yuam kev lossis kuv lub hlwb raug cab mus rau hauv txoj kev ua neej tsis muaj hnub khoom, thov ntuas kom kuv nco ntsoov tias Koj muaj ib lub homphiaj zoo rau kuv lub neej. Tej zaug kuv ntsia tsis pom tej uas Vajtswv tab tom ua, tiamsis thov pub kom kuv tuav txoj kev ntseeg khov kho rau Vajtswv tej lus cog tseg zoo. Thov pub rau kom kuv ntsia pom kuv lub neej hauv ntiajteb no tsis yog nres rau ntawm tej yam uas kuv tab tom muaj xwb, tiamsis yog ib ncua kev puv npo koob hmoov thaum kuv paub muab kuv lub neej fij rau Koj. Kuv thov hauv Tswv Yexus Khetos lub npe. Amees.

Cov kwv tij txhua tus, lo lus cog tseg twg uas koj tab tom tos kom tau Vajtswv teb? Koj puas tab tom tos lo lus cog tseg ntawd?

Hnub no, cia li tsa muag saib saum nruab ntug, thiab saib Vajtswv txoj kev zoo, fij lo lus ua tsaug thiab nco tus tsim ib puas tsav yam txiaj ntsig tus uas tau tsim muaj lub ntiajteb no yeej tsis tau muaj ib zaum twg tso koj lub neej tseg tiamsis tab tom foomhmoov thiab nrog nraim koj ua ke.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.