Nyob rau hauv lub ntiajteb loj thiab dav nrog rau ntau tus tib neeg muaj lub neej tiav, muaj kev txawj ntse, puas muaj zaum twg koj hnov cuag li yus dhau los zoo li tus “tsis muaj dabtsi”? Peb hnov cuag li yus yeej tsis nto npe lossis yeej tsis muaj peev xwm qhov twg. Lub neej pheej zoo li no dhau mus, ib hnub dhau ib hnub maj mam dua mus nrog tej haujlwm uas tsis tseem ceeb. Tiamsis koj puas paub, Vajtswv tsis saib peb dhau ntawm lub meej mom lossis lub peev xwm sab nraud. Thiab nyob hauv Vajtswv lub qhov muag, peb yeej tsis yog cov neeg dog dig li!

Hnub no, yog hnub 25/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Jonathan Santiago dhau ntawm Zaj kawm YEEJ TSIS DOG DIG

Vajluskub: “Tiamsis Vajtswv xaiv yam uas neeg xav hais tias ruam kawg nkaus hauv lub ntiajteb no kom cov neeg txawj ntse txajmuag; thiab Vajtswv xaiv yam uas neeg suav hais tias tsis muaj zog hauv lub ntiajteb no kom cov neeg muaj zog poob ntsejmuag” (I Kauleethaus 1:27).

Kuv niam pheej tawb kuv ua si tias kuv yug los yog tseg … mus yuav khoom. Tseeb tiag, kuv tau ua zoo li no tiag. Tiamsis kuv kuj thov Vajtswv tshem tej kev ntshaw khoom ntiajteb tawm hauv lub siab mus, thiab Vajtswv tau teb kuv tej lus thov. Tsis yog vim kuv tsis xav tej khoom zoo lossis tej khoom nqes nqi lawm, tiamsis kuv xaiv tsis siv kuv lub sijhawm thiab kuv lub hlwb pub rau tej ntawd ntxiv. Yog kuv xav yuav ib qhov khoom twg ces thov tej phooj ywg pab qhia paub tias lub sijhawm twg txo nqi, lossis kuv ntsia pom ntawm tej kev.

Hnub no, muaj ib tug phooj ywg hu rau kuv thiab hais meej meej tias kuv yuav tau mus rau ntawm ib lub chaw muag khoom ntawd, vim lawv tab tom nqes nqi ntau heev tsis tau muaj dua li. Vim xav paub, kuv cia li tig kiag tsheb rov saib seb puas muaj qhov khoom twg zoo rau kuv yuav.

Mus txog chaw, kuv coj zoo li ib tug neeg “txawj xaiv” khoom, mus saib ib ncig tas ntsia pom “yam yuav yuav”. Muaj ntau yam zoo, tiamsis kuv tsis maj yuav. Kuv rov qab pom ib lub hub av zoo nkauj heev. Tamsim ntawd, kuv nco txog ntu Vajluskub sau hauv Yauhas 2:7: “Tswv Yexus kom lawv “muab dej hliv kom puv nkaus tej hub no.” Lawv hliv puv nkaus rau saum ncauj.”

Thaum ntawd, kuv paub tias kuv yuav tau yuav lub hub no, kom txhua hnub ntuas kom tus kheej nco ntsoov txog Vajtswv txoj kev hlub tshua. Kuv yuav nyiaj pheej yig, tiamsis hauv kuv lub siab, txawm yog yuav them yog tus nqi qub los, kuv yeej yuav yuav. Thaum no lub hub ntawd twb tsawb hauv kuv tsev lawm, zoo li lub cim rau txoj kev hlub thiab Vajtswv txoj kev ua siab ntev.

Vajtswv tab tom siv tej hub dej loj loj uas zoo pheej tshaj xwb, nws yog tej cuab yeej muab siv hauv lub neej txhua hnub. Tswv Yexus txib kom lawv muab dej hliv rau hauv, qhov no yeej zoo li ib txwm ua. Tiamsis thaum muab tso rau ntawm Vajtswv txhais tes ua tus tswj, tej yam uas saib cuag li dog dig ntawd dhau los ua tej yam tseem ceeb.

Peb kuj ib yam li ntawd. Muaj tej lub sijhawm hnov cuag li yog ib leej niam nyob hauv tsev tu tej menyuam, yog ib leej niam zoo li lwm tus, ib tug ua zog noj nyiaj hli ib hnub dhau ib hnub… tiamsis thaum peb muab peb lub neej fij rau tus Tswv kav thiab cia Vajtswv ua tus coj, peb dhau los ua cov neeg tshwj xeeb.

Vajtswv tsis siv tib neeg lub qhov muag los saib peb. Vajtswv ntsia pom tej peev xwm tsis muaj nrim nyob hauv txhua tus, thaum peb fij peb tus kheej ua Vajtswv haujlwm raws li Vajtswv siab nyiam.

Nkide-oos yog ib qhov piv txwv. Thaum cov neeg Yixalayees raug cov neeg Midias tsimtxom, muaj ib tug tub hluas npe hu ua Nkide-oos ntshai khiav nkaum hauv nws lub qhov cub cawv txiv hmab. Nkide-oos yug hauv xeem uas tsis muaj hwjchim hauv cov neeg Yixalayees, thiab tseem yog tus yau tshaj hauv tsev neeg. tiamsis thaum Vajtswv hu yawg, Vajtswv tsis hais tias: “Tus tub hluas uas tsis muaj zog, cia li los ntawm no!”.

Vajluskub sau tseg hauv Cov Thawj Tswj 6:12 “Tus Tswv tus timtswv los rau Nkide-oos porn ntawm qhov chaw ntawd thiab hais tias, “Tus txivneej siab tawv thiab muaj zog, tus Tswv nrog nraim koj nyob.”

Vajtswv paub Nkide-oos zoo yuav dhau los ua ib tug neeg zoo li cas, thaum yawg mloog thiab cia Vajtswv ua haujlwm hauv yawg lub neej. Thiab thaum Nkide-oos muab yawg txoj kev ntseeg cob rau Vajtswv, yawg dhau los ua ib qhov cuab yeej cawm tag nrho nws haiv neeg.

Tshuav koj ne yuav zoo li cas? Koj puas npaj txhij muab koj lub neej tso rau Vajtswv txhais tes thiab ntseeg Vajtswv? Thaum muab lub neej fij rau Vajtswv ua tus coj, koj yuav xav tsis thoob rau ntawm tej yam zoo uas Vajtswv yuav ua dhau ntawm ib tug neeg “ zoo li” koj. Vim nyob hauv Vajtswv txhais tes, koj lub peev xwm yuav tsis muaj nrim!

Thov caw nrog kuv peb thov Vajtswv ua ke
Ua Vajtswv tsaug uas koj tau hlub kuv thiab saib kuv muaj nqis zoo li lwm tus. Txawm yog kuv tseem muaj kev qaug zog thiab ntau yam ua tsis tau, tiamsis nyob hauv koj txhais tes, kuv muaj cuabkav ua tau tej yam zoo uas kuv xav tsis txog. Thov qhia kom kuv paub txo hwjchim muab kuv lub siab pub rau Koj cia koj qhia thiab siv kuv rau koj lub siab nyiam. Kuv ntseeg tias yeej tsis muaj ib yam dabtsi yuav tsis zoo thaum tau muab rau Koj txhais tes. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug koj xav tias yus yeej tsis txawj lossis tsis nto npe, tiamsis Vajtswv tsis ntsia koj raws li ntiajteb ntsia. Vajtswv pom koj muaj nqis, muaj peev xwm thiab muaj Vajtswv lub homphiaj ib txhis tso rau hauv koj. Thiab thaum koj muab txhua yam pub rau Vajtswv, zoo siab hlo cia Vajtswv hloov pauv thiab siv koj lub neej, ces ib tug neeg saib cuag li nws me yuav dhau los ua lub hauv paus koob hmoov rau ntau tus. Tseg sijhawm fij pub rau Vajtswv, kom koj dhau los ua ib qhov cuab yeej muaj nqis los ua tiav Vajtswv lub homphiaj loj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.