Hauv lub neej, muaj tej lub sijhawm cia li tshwm tuaj, dhau los yog ib lub sijhawm hloov pauv tag nrho peb txoj kev ntsia txog lub neej thiab txoj kev ntseeg. Ntawd tej thaum yog ib qhov teeb meem loj, ib txoj kev sib cais, lossis ib txoj kev mob ua rau peb lub neej hloov pauv tas. Tiamsis kuj yog nyob rau tej lub sijhawm zoo li ntawd, koj yuav saj tau Vajtswv txoj kev hlub thiab kev ncaj ncees nplua mias tshaj txhua yam.

Hnub no, yog hnub 24/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Cheryl Crofoot Knapp dhau ntawm Zaj kawm LUB SIJHAWM UA RAU LUB NEEJ HLOOV PAUV

Vajluskub: “Kuv yuav rov kho thiab ua kom zoo ib yam li lub qub thaum ub” (Amaus 9:11).

“Vim li cas kuv tseem muaj sia? Vim li cas kuv ho tsis tuag kiag mus kom tas?”
Kuv niam tsa suab hais tawm thaum nws tsis nco qab thaum nws raug tus mob Alzheimer ua rau nws tsis meej pem. Tshuav kuv ces nyob ntsiag to cuag tuag. Wb tab tom sib tham zoo siab, xwb tim txoj kev nyuaj siab cia li los raug kuv tamsim ua rau kuv npaj tsis txhij.

Twb yog vim tus mob no thiaj ua rau kuv txiv tuag lawm. Thiab thaum no, thaum saib kuv niam kuj raug tus mob uas kuv txiv tau ntsib dhau, ces qhov xaus yeej txawv tsis deb, kuv hnov cuag li kuv lub plawv raug muab zawm ruaj ruaj. Ntawd yog lub sijhawm hloov pauv txoj kev sib raug zoo ntawm kuv thiab kuv niam- yog ib lub sijhawm uas kuv yeej tsis xav.

Thaum tu kuv niam, kuv pom tias tus mob no ua rau txoj kev sib raug zoo ntawm wb ib niam tub pauv lawm zuj zus. Nws tab tom txeeb kuv niam mus, ib qho me ntsis zuj zus.

Ob xyoos tomqab, muaj ib tug kws tshuaj hais rau kuv tias kuv puas xav txhab zog rau kuv niam lub plawv thiab lub ntsws. Yuav ua li cas kuv thiaj muaj txaus lub siab tawv los txiav txim siab? Kuv thov Vajtswv ntau hli, taij Tswv Yexus txhob cia kuv niam tiv tus mob ntxiv. Tiamsis thaum kuv thov kws tshuaj cia kuv niam mus, kuv xav tsis txog tias yus ho raug qhov ntawd tsim txom yus mob npaum ntawd – yog yam uas diaj mus txog ntua kuv lub hauv paus kev ntseeg. Tsis paub kuv niam puas mus txog ib qhov chaw zoo dua tiag?

Muaj ib tug kws kho mob coj kuv mus txog rau ntawm kuv niam, thaum niam lub plawv tab tom dhia zaum kawg hauv lub neej. Kuv ua tsis taus pa. Tiamsis kuv yeej sawv ntawm kuv niam ib sab, nwj niam, tuav niam tes, qhuas Vajtswv, quaj thiab hais cov lus xaus. Kuv lub kua muag ntws ntub niam xub pwg tas.

Vajtswv txojlus nyob hauv Amauj 9:11 “Thaum txog hnub ntawd kuv yuav rov txhim kho Daviv lub tebchaws uas zoo ib yam li lub tsev uas twb puas tas lawm. Kuv yuav txhim kho tej ntsayeej dua tshiab. Kuv yuav rov kho thiab ua kom zoo ib yam li lub qub thaum ub”

Thaum no kuv niam tsis raug tiv tus mob Alzheimer tsim txom ntxiv lawm. Kuv tus phooj ywg zoo 58 xyoo hauv kuv lub neej tab tom tau lub neej zoo rau ib qhov chaw uas zoo dua. Tiamsis kuv ho raug cais tawm ntawm kuv niam, thiab hnov cuag li lub ntiajteb tab tom tawg tas. Kuv pib cim civ nug: Vajtswv puas yuav muaj tseeb tiag? Ntuj ceebtsheej puas muaj tiag?

Tej kev hloov pauv nws los thaum tsis ceev faj thiab maj mam muab peb lub neej tig thaum twg peb twb tsis paub. Ib nyob hauv tej kev hloov pauv loj tshaj hauv kuv lub neej yog thaum kuv pom tias kuv cheem tsum Tswv Yexus tiag tiag – thaum kuv nkag siab tias Vajtswv tab tom khob kuv lub qhov rooj siab, tos kuv qhib qhov rooj cia Vajtswv nkag los rau hauv (Tshwmsim 3:14). Thiab thaum uas kuv ua qhov no, kuv lub neej hloov pauv sab hauv tawm sab nraud. Tswv Yexus txhawm kom puv nkaus tej qhov khoob lug hauv kuv tus ntsujplig, thiab kuv tau Vajtswv zam kuv tej kev txhaum huv si.

Kuv niam kuj qhib qhov rooj caw Tswv Yexus nkag los rau hauv. Twb yog vim li ntawd, kuv thiaj pheej hais rau niam tias: “Thaum Tswv Yexus los, niam koj tso siab lug mus nyob hauv Vajtswv lub tebchaws”.

Kuv paub tias niam ntseeg Vajtswv, tiamsis yeej tsis yooj yim thaum kuv lub qhov ncauj yuav tau hais rau kws tshuaj tias cia kuv niam tuag mus. Tseeb tiag kuv yeej tsis tau npaj ib yam dabtsi tseg rau lub sijhawm ntawd. Lub sijhawm ntawd twb hloov pauv kuv txoj kev ntseeg txog ntuj ceebtsheej. Kuv nco txog tus tub sab saum ntoo khaub lig, Tswv Yexus tau hais rau yawg tias: “Hnub no koj yuav tau nrog kuv nyob hauv qhov chaw tau zoo” (Lukas 23:43) Kuv xav txog zaj lus thov Vajtswv uas kuv niam wb yeej ib txwm nyeem ua ke txhua hmo: “Thov kom Vajtswv lub siab nyiam tau ua raws, ib yam saum ntuj thiab hauv ntiajteb” (Mathais 6:10).

Vajtswv puas muaj tiag? Muaj! Ntuj ceebtsheej puas muaj tiag? Muaj!
20 feeb tom qab kuv niam tag sim neej, kuv yeej tseem zaum ntawm niam lub txawj, tuav niam tes. Tsis hnov ib lub suab nrov, tsis hnov niam lub plawv dhia – tsuas yog kev kaj siab maj mam vij puas ncig lub chav tsev ntawd. Xwb tim kuv hnov cuag li tsis paub hais… ib yam li Vaj Ntsujplig tab tom txhawb kuv lub zog hauv Vajtswv txhais tes.

Nyob hauv kuv lub siab, kuv pom tias Vajtswv tab tom tshwm ntsej muag qhov ntawd, nyob ntawm kuv ib sab. Kuv paub tias Vajtswv tau maj mam coj niam mus tsev hauv txoj kev kaj siab ib yam li Vajtswv tau cog lus. Kuv ua twjywm ua Vajtswv tsaug rau Vajtswv txoj kev ncaj ncees txog Vajtswv tej lus cog tseg muaj ib hnub kuv thiab kuv niam wb yuav tau rov qab sib ntsib dua. Thiab kuv ntseeg Vajtswv txoj kev hlub nplua mias rau tej lub sijhawm uas quaj ntsuag tshaj plaws hauv tib neeg lub neej.

Lub sijhawm ntawd pab rau kuv ntseeg ruaj khov tias Vajtswv thiab ntuj ceebtsheej yeej muaj tiag. Vajtswv pub Vaj Ntsujplig los plig kuv thiab pub kom kuv muaj kev tab pov hauv kuv lub siab, ntawd yog qhov khoom plig kev hlub uas Vajtswv npaj tseg rau kuv. Yog kuv ntseeg siab rau Vajtswv txoj kev hlub mus ib txhis, ntseeg tias Vajtswv lub tebchaws yuav los thiab Vajtswv lub siab nyiam yuav tau ua, ces Vajtswv yuav nthuav tawm Vajtswv txoj kev hlub nyob hauv Vajtswv txoj kev tshwm ntsej muag.

Vim li cas? vim Vajtswv hlub. Vim Vajtswv tau cog lus lawm. thiab vim Vajtswv muaj cuab kav ua tiav Vajtswv txhua lo lus cog tseg.

Zoo ib yam li uas Vajtswv tau kho Daviv lub tsev ntaub, Vajtswv kuj yuav pab kuv tus kheej, thiab pub kuv txais tau txojsia ntev dhawv mus ib txhis hauv Vajtswv. Thiab kuv ntseeg tias Vajtswv tus ntsujplig yuav coj Vajtswv haiv neeg nkag mus rau hauv lub ntuj nyob mus ib txhis.

Thov caw nrog kuv peb thov Vajtswv ua ke
Tus Tswv, muaj tej yam cia li tshwm tuaj sai heev hauv lub neej uas kuv npaj tsis txhij yuav ntsib, thiab kuv ob txhais ko taw cuag li yeej sawv tsis taus khov kho. Tiamsis nyob rau lub sijhawm uas saib cuag li lov tas ntawd, Vajtswv yeej tseem nthuav tawm Vajtswv lub siab ncaj ncees thiab hlub tej menyuam tsis tseg. ua Vajtswv tsaug vim Vajtswv tsis tso kuv tseg nyob rau tej lub sijhawm muaj kev txomnyem, txawm yog kuv yuav ua xyem xyav lossis qaug zog. thov Vajtswv pab kom kuv paub tias Vajtswv txhais tes tab tom tuav kuv ruaj ruaj, thiab ntseeg tias Vajtswv tab tom kho tej uas tab tom puas tshuaj, Kuv thov hauv Tswv Yexus Khetos lub npe. Amees.

Cov kwv tij, yuav muaj tej lub sijhawm tshwm ls ua rau txhua yam hauv lub neej hloov pauv tas. Tiamsis Vajtswv cog lus yuav nrog nraim peb, kho tej uas tau pob puas lawm, thiab coj peb rov qab los rau hauv qhov chaw zoo siab nrog Vajtswv ua ke. Txawm yog koj tab tom tsau tsawv hauv txoj kev tu siab, ua xyem xyav lossis tag kev cia siab los, ntseeg tias Vajtswv txoj kev hlub mus ib txhis yuav tsis muaj hnub tso koj tseg. Vajtswv yog tus ncaj ncees, thiab Vajtswv txhua lo lus cog tseg pub rau koj yuav tau ua tiav ib hnub tsis deb tom ntej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.