Puas tau muaj zaum twg koj hnov cuag li yus tab tom poob tsau tsawv rau hauv qab ntuj tob tob lawm tau? Hnov zoo li cas thaum uas koj mus deb rov tsis tau qab lawm. Koj ntog thiab tsuas xav muab txhua yam tso tseg. Tiamsis txawm yog nyob rau qhov chaw tsaus ntuj tshaj los, Vajtswv yeej saib ntsoov koj. Koj yeej yog Vajtswv tug. Thiab nyob hauv Vajtswv, tsis muaj ib zaum twg yuav lig dhau rau koj rov qab pib.

Hnub no, yog hnub 23/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia giả Gene Markland dhau ntawm Zaj kawm KOJ TAB TOM UA DABTSI NTAWM NO?

Vajluskub: “Eliyas koj tab tom ua tsi ntawm no?” (I Vajntxwv 19:9)

Muaj ib tug xibhwb ntawd nws tau ntsib dhau ntu neej uas tsaus ntuj nti hauv nws lub neej: Yawg nyob ib leeg, tsis xav ua dabtsi, hnov cuag li yus puas tsuaj ntawm tes haujlwm thiab hauv lub neej tib si.

Muaj ib hmo thaum uas yawg tab tom tag kev cia siab, yawg mus rau hauv ib lub chaw muag cawv me me nraum ntug nroog. Tsis hais ib los, yawg nyo hau mus dhau ntawm lub chav pom kev zem zuag, tas zaum ib sab. Ntawm yawg xub ntiag yog ib khob cawv – yog yam uas yawg ib txwm tsis tau chwv txog. Yawg tsuas zaum ntawd, saib ntsoov rau khob cawv, hauv yawg lub siab nyhav ncuv rau tej kev puas tsuaj, tej kev khuv xim uas tsis paub tis npe rau.

Zaum nrug deb li ob lub rooj muaj ib tug txiv neej saib cuag li twb qaug cawv heev lawm. Xwb tim, yawg tig los saib yawm xibhwb thiab nug ib lo lus nug: “Koj tab tom ua dabtsi ntawm no?”

Tus xibhwb ceeb xav tsis thoob. Hauv yawg lub hlwb puv npo tej lo lus nug: “Kuv puas paub tus neeg no ne? Vim li cas yawg ho nug kuv zoo yam li yawg paub zoo kuv yog leej twg?” Tshuav tus txiv neej ntawd yeej saib ntsoov xibhwb, ib yam li nws twb paub zoo lo lus teb. Tseeb tiag, tus xibhwb ntawd qhov chaw tsis yog nyob ntawm no.

Tamsim ntawd, xibhwb sawv tsees, tawm nrawm nroos hauv lub chaw muag cawv mus. Nkag kiag hauv tsheb, yawg ua twjywm taij thov: “Vajtswv, ua li cas kuv ho poob mus puag hauv qab ntuj li no lawm?”

Thaum xibhwb lub tsheb maj mam thaub tawm ntawm chaw nres tsheb, yawg thov Vajtswv zam txim rau yawg. Hauv txoj kev qaug zog, muaj kev tu siab thiab txaj muag ntawd, yawg tsav tsheb los tsev – rov qab los hauv tsev neeg, los ua tes haujlwm uas yawg xam tias cuag li poob lawm. txawm lub siab yeej tseem hnov cuag li tsis tsimnyog, yawg txiav txim siab maj mam rov qab rau txoj kev qub, los ntawm lub siab lees txim tiag tiag thiab tsis tso tseg.

Thaum kawg Vajtswv tau rub yawg sawv. Ib kaujruam zuj zus, ib hnub zuj zus, Vajtswv kho yawg tus ntsujplig zoo thiab pab kom yawg rov qab khov kho, ua yawg tes haujlwm mus ntxiv uas Vajtswv twb muab cob rau yawg lawm.

Zaj xwm txheej no ua rau nco txog ib tug neeg nyob hauv Vajluskub, ntawd yog tus cev lus Eliyas kuj tau ntsib dhau ib lub caijnyoog cuag li xav muab txhua yam tso tseg.

“Eliyas ntshai heev, nws thiaj nrhiav kev khiav nkaum; nws coj nws tus tubtxib mus rau nram lub nroog Npesenpas uas nyob hauv lub xeev Yudas. Eliyas muab nws tus tubtxib tso tseg rau nrad, Eliyas mus ib hnub ke rau tom roob mojsab qhua. Nws mus nkaum tshav rau hauv ib tsob qab ntoos thiab nws xav tuag lawm xwb. Nws thiaj thov Vajtswv hais tias, “Tus Tswv, txaus kuv lawm lauj. Cia li rho kuv txojsia mus; kuv tuag yuav zoo dua! ” (I Vajntxwv 19:3-4).

Tiamsis Vajtswv nug yawg: “Eliyas, koj tab tom ua dabtsi ntawm no?”

Eliyas teb: “Eliyas nkag mus pw ib hmos hauv qhovtsua.

Ces tus Tswv txawm los hais rau Eliyas hais tias, “Eliyas, koj tuaj ua dabtsi ntawm no? Eliyas teb hais tias, “Tus Tswv uas yog Vajtswv tus muaj hwjchim loj kawg nkaus, kuv ibtxwm ua koj tes haujlwm. Tiamsis cov Yixalayees tsis coj raws li tej lus uas lawv tau cog tseg rau koj, lawv muab koj tej thaj rhuav thiab muab koj cov cevlus tua povtseg tas lawm. Tsuas tshuav kuv tib leeg xwb los lawv tseem nrhiav kuv tua povtseg thiab! ” (I Vajntxwv 19:9-10).

Txawm yog ib tug cev lus nto npe lug zoo li Eliyas los twb qaug zog txog qhov xav muab txhua yam tso tseg, los Vajtswv yeej tsis cia zaj xwm txheej ntawd xaus rau qhov ntawd. Vajtswv nug: “Koj tab tom ua dabtsi ntawm no?” – tas Vajtswv taw kev rau yawg kaujruam txuas ntxiv.

Tej zaug koj kuj ntsib dhau ib ntu sijhawm zoo li ntawd, ntsib dhau ib txoj kev mob tsis yog tsuas yog koj thiab Vajtswv xwb thiaj paub zoo. Tiamsis thov txhob cia li lub sijhawm ntawd ntaus nqi rau koj tus kheej. Txhob cia ib txoj kev puas tshuaj ntaus kom koj xwb tag nrho koj lub neej tseem tshuav ntev tom ntej. Maj mam mus ib kaujruam zuj zus, maj mam kom khov kho. Txawm yog yuav pom tias tsis tsimnyog, los txiav txim siab sim dua ib zaug ntxiv.

Vajtswv yuav rub koj sawv los ntawm Vajtswv txhais tes muaj zog. Vajtswv mus ua ntej koj, qhib kev rau koj thiab ua kom koj txoj kev tiaj. Tej kev puas tshuaj ua rau peb yuav qaug, tiamsis nyob hauv Vajtswv, peb muaj kev cia siab, tau kho zoo, thiab muaj yeej rau lub neej tom ntej.

Thov caw nrog kuv peb thov Vajtswv ua ke
Tus Tswv muaj tej lub sijhawm kuv pom cuag li tsis paub ua dabtsi, ntog zoo li tsau tsawv rau hauv qab tiv tob tob. Tiamsis kuv ua Koj tsaug vim nyob rau tej lub sijhawm uas tsaus ntuj tshaj, koj yeej sawv tos kuv thiab hu kom kuv tig rov qab los cuag Koj. Thov kho zoo kuv tej qhov txhab thiab pab kom kuv muaj zog khov kho txhais ruam nrog koj mus ib kaujruam zuj zus, tig rov qab los rau txoj kev uas koj tau npaj tseg rau kuv lawm. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug koj tab tom daig rau hauv ib qhov teeb meem txomnyem tshaj hauv lub neej. Tej zaug koj ntog thiab hnov cuag li txhua yam lig dhau heev lawm. tiamsis, ntawd tsis tau yog tag nrho. Vajtswv yeej tseem tab tom sawv tos koj, los ntawm txoj kev ua siab ntev thiab cev tes los puag koj. Nws xav rub koj tes sawv, kho zoo koj tej qhov txhab thiab sau ntxiv zaj xwm txheej hauv koj lub neej. Koj tseem tos ua tus dabtsi thiab kav tsij tuav Nws txhais tes?

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.