Đei layơ buăl mơn kơdih akâu nhen thoi huŏng truh tơ kơđĕl sơlŭng jrŭ ưh? Jơhngơ̆m buăl mơn nhen thoi năm ataih truh tơ pă đei gơh wơ̆t brŏk dơ̆ng. Buăl pơ̆k huŏng păng ‘maih wă achăng lê̆ đĭ đăng. Mă kơplah lăm anih măng mu, Kră Yang oei hnhoi lăng buăl. Buăl oei gah Kră Yang. Păng lăm Sư, ưh kơ đei layơ khan ưh pă tam bơih wă pơtơm đơ̆ng blŭng a dơ̆ng.

Năr ‘nâu, ‘năr 23/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Brad Henry kơ̆l ‘bai “KON OEI PƠM KIƠ TƠ ÂU?”

Sơ̆p Hla Bơar ‘Bok Kei-Dei: “Ơ Êli ih pơm kiơ tơ âu?” (I Lu Pơtao 19:9)

Đei minh ‘nu ‘bok bơtho noh đei kơ sơnăm arih đei tơdrong truh kơnê̆ dêh: sư sơ’ngon, bơ̆l hăl, mơn kơdih hiong răm lăm tơdrong jang hăm lăm tơdrong arih hloi.

Minh măng noh, tŏk ‘bŏk sơ’ngon dêh, sư mơ̆t lăm anih đe et tơdrô ‘bơ̆t mum hlơp tơ pơlei tih. Ưh kơ đei pơma minh nơ̆r, sư kŭp kơ̆l yak hlôi kơ anih ŭnh ưh kơ hơdah, na tơ oei ‘bơ̆t anih tĕch tơdrô noh. ‘Bơ̆t anăp sư noh jơ̆ minh li tơdrô – tơmam mă sư ưh kơ đei layơ hơtŭt chĕp. Na sư ngôi ‘bơ̆t doh đĕch, lăng pơnhen tơ li tơdrrô noh, lăm jơhngơ̆m trăp trĭn yua kơ dôm tơdrong hiong răm, jơhngơ̆m hmach păng chhŭr nuih pă băt khan thoi yơ.

Tơ-oei jê̆ sư noh đei ‘bar tŏ tang dŏ đei bơngai drŏ‘nglo rŏ lăng suai dêh bơih. Blư, sư hue lăng tơ ‘bok bơtho rơhăo păng jet minh nơ̆r: “ Ih oei pơm kiơ tơ âu?”
‘Bok pơtho chrêu hơdrôt. Lăm kơ̆l sư đei lơ kơ nơ̆r jet: “Inh hăm băt kơ bơngai ‘nâu ưh? Liơ sư đei jet nhen thoi băt hơđăl kơ inh noh bu?” Lăm kơplah noh, bơngai drŏ nglo noh oei lăng pơnhen, nhen thoi băt bơih kơ nơ̆r tơl. Hơđăl dêh, ‘bok bơtho ‘nâu ưh kơ trŏ gah anih ‘nâu.

Kơplah jơ noh, sư iung, lĕch mă tĕnh đơ̆ng anih tĕch tơdrô noh. ‘Nao mơ̆t lăm gre, sư ôr krao lăm jơhngơ̆m: “Kră Yang ơi, yua kơ kiơ kon huŏng truh tơ kơđĕl thoi âu”?

Kơplah gre kơdŭn hơdar dêh lĕch đơ̆ng anih pơdơ̆ng gre, sư pơma hơdar apinh Kră Yang huay kơ jô̆ yo. Lăm jơhngơ̆m gleh lap, sơ’ngon păng mơlâu, sư wơ̆r gre brŏk tơhnam- wơ̆t brŏk tơhnam dơnŏ, hăm tơdrong jang mă sư ngeh kơ hiong răm bơih. Mă khan mơn lăm jơhngơ̆m ưh kơ trŏ ‘bơ̆t anăp Kră Yang, sư adrin yak năm đơ̆ng đêl dôm tơdrong so, hăm jơhngơ̆m băt tơbral păng adrin huay kơ achăng lê̆.

Păng Kră Yang đei pơklaih sư. ‘Net ‘net, đơ̆ng rim năr, Kră Yang pơklaih bơhngol sư păng tơgŭm sư dơ̆ng kơjăp thoi đêl, pơtrơp bơ̆jang tơdrong jang mă Kră Yang pơjao ăn.

Tơdrong hơ’mon ‘nâu đei tơ’blŏk kơ bơngai lăm sơ̆p hla bơar ‘Bok-Kei-Dei, noh jơ̆ bơngai khan lê̆ hơdrol Êli- sư kư̆m đei hlôi mơn kơ tơdrong ‘maih achăng lê̆ đĭ đăng:

“Thoi noh Êli hli, sư iung kơdâu weh wă pơklaih tơdrong arih sư. Sư năm truh tơ Pơlei Bêrsêba lăm char Juđa, lê̆ lu đam sư oei tơ noh. Gah Êli, sư năm tơ char glă dang minh năr kơ trong, sư hơ-oei ngôi ‘bơ̆t yơ̆p tơm ‘long hơngo, sư apinh ‘maih wă kơ jah lôch. “Hrăp bơih, dang ei ơ Kră Yang! Jah iŏk bĕ tơdrong arih inh, yua kơ inh ưh kơ đei kiơ ‘lơ̆ng hloh kơ lu ‘bok kơdră inh.” (I Lu Pơtao 19:3-4)

Truh tơ noh, sư mơ̆t tơ hơgơp tơmo, ‘bĭch tep lăm noh minh măng.

Đei nơ̆r Kră Yang khan kơ sư: “Ơ Êli ih pơm kiơ tơ âu?”

Sư tơl: “Jơhngơ̆m inh oei adrin yua kơ Kră Yang ‘Bok Kei-Dei Tih Hloh, yua kơ bơngai Isơrael sơngah bơih kơ tơdrong pơgơ̆p Ih, pơrăm lê̆ chơnang soi ih, păng iŏk đao gưm pơlôch lu bơngai khan lê̆ adrol mă Ih yua. Pă minh ‘nu inh oei arih, na dang ei lu sư kư̆m oei chă wă pơlôch inh.” (I Lu Pơtao 19:9-10)

Bơngai khan lê̆ hơdrol tih thoi kơ Êli kư̆m đêl đei gleh lap truh tơ ‘maih achăng lê̆. Mă lei Kră Yang ưh kơ ăn tơdrong noh tôch ‘bơ̆t doh: “Kon oei pơm kiơ tơ âu?” – păng thoi noh Kră Yang bơtho tơ’bôh sư yak năm dơ̆ng.

Rŏ lăng buăl kư̆m đei hlôi kơ tơdrong thoi noh, đei mơn hlôi kơ chhŭr nuih mă buăl hăm Kră Yang đĕch băt. Mă ‘nĕ ăn tơdrong noh pơm ăn kơ đĭ tơdrong arih buăl. ‘Nĕ ăn tơdrong hiong răm pơm ăn kơ buăl pơ̆k huŏng kơ đĭ chăl arih buăl oei kơ jung tơ anăp. Athei yak năm đơ̆ng minh yak minh, yak hiơ̆ mă lei kơjăp. Athei adrin pơlong lăng pă minh ‘măng dơ̆ng.

Kră Yang gô tưk tơiung buăl hăm tơpang ti pran kơtang Sư. Kră Yang gô yak năm hơdrol kơ buăl, pơih trong păng ăn trong dơhnă lăm trong yak năm buăl. Dôm kơ tơdrong hiong răm pơm kơ lu bơ̆n wă pơ̆k huŏng, mă lei lăm Kră Yang, lu bơ̆n ling lang đei tơdrong chang hơmĕng, tơdrong pơklaih, păng đei tơdrong arih tơ hơnăp kĕ jei.

Apĭnh đĭ đăng krao khan hơdai:
Kơkuh kơ Kră Yang, đei kơ dôm wơ̆t kon đei mơn pă đei kiơ, pơ̆k huŏng tơ sơlŭng jrŭ. Kon bơnê kơ Kră Yang yua kơ dôm tơdrong kơnê̆ noh, Ih oei dơ̆ng răp gô kon păng krao kon wih brŏk tơ Ih. Apinh hơmet pơklaih kon đơ̆ng lăm dôm jĭ rơka lăm kon, păng tơgŭm kon đei jơhngơ̆m pran yak năm rim yak hiôk hian hơdai hăm Ih, wih tơ trong mă Ih đei dan ăn bơih kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, rŏ lăng buăl oei đom ‘bơ̆t tơdrong pơmat tat kơ chăl arih ‘nâu. Kư̆m rŏ lăng buăl pơ̆k huŏng tôm tơdrong, păng đei mơn nhen thoi pă tam bơih. Mă lei huay, mă noh ưh kơ đĭ bơih ôh. Kră Yang oei dơ̆ng gô buăl, hăm jơhngơ̆m ‘mêm mơnat păng bơyar tơpang ti sơng iŏk buăl. Kră Yang ‘maih wă tơiung buăl, pơklaih jĭ rơka buăl, păng chih pơtrơp roi hơ’mon kơ chăl arih buăl lăm chăl arih plơ̆ng ‘lơ̆ng rŏ hloh. Buăl oei gô kiơ dơ̆ng mă ưh kơ rôp ti Kră Yang?

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.