Gơs ală bơta ji sồt tom lài or lơh nùs he găm ji tŭ kah gơhôr wơl. Ală bơta lơh tìs, rọh gơcọh, bơta tềl sồt găm tĭng jat gen gơs tŭ he ò git lơh mbe lơi nàng hồ săng. Kŭng ndrom be añ dô ơnòng kơnjơ̆ đah hwing, bŏl he kòl bơta yau lơh njơ̆ ngkơi tian gơs òhềt gŏ ngai rơp tus. Mơya he git sơl, Yang ò koñ he păl añ sum bơta njơ̆ njŭt hơ̆. Ngai do la dô ngai pa, mơ bơta nđàc Kơnrẵn tơl lìu lac tồ tòmgơl rài kis he.

Ngai do, ngai 22/07/2025 bơta Hòi Dăn Kòp Ngai dăn jà ală ồng mò oh mi bơtê bal Jơnau Yàng dê kơnờm dê bơta dong kòl Scott Presson dê bơh Tơnggume BƠTA YAU OR NEH LÒT GĂN RAU

Sră Goh: “Hŭi tĕ ală bơta neh yau, bañ ơm sùm tòm ală ngai neh rlau. Do, Añ mòr lơh dô bơta pa! (Esai 43:18-19)

Bơta yau or neh lòt găn rau. Bơta neh pơndut rau. Neh sir rau. Do mìng la kơmbuh ù. Ngai do la dô ngai pa. Gen he rơp sac rwah kis tai mbe lơi?

Digơlan găm wơl ală jơnau yau or gen bŏl he păl tìp măt, mơya Yang ai gơnoăr ală bơta hơ̆ gơlik gơs tồ bŏl he geh gơs pơnah băl tòm dô jơnau yăl tơnggit niăm her gen Kơnrẵn găm cih tơlik. Oă dơ̆ Yang găm tề lăm bŏl he lòt găn ală gùng dà kal ke, tồ bơh să tom bŏl he rơp la cau cèng bơta sơmbòi, bơta nđàc sơngit tus cau ndai.

Cau lơi tom bŏl he kŭng neh găm kòl tềl sồt, gơs ală broă gen bŏl he mìng kơp koñ be òhềt gơlik gơs. Mơya sơlơ̆ wơl lah, bulah lòt găn bơta ji sồt jrô ndơp, ală cau dòn kơnòm Yang găm đơs: “dilah gơs sac rwah dô dơ̆ tai, ăñ găm rơp ò tòmgơl bơta lơi jơh.” Hơ̆ la tŭ bŏl he gŏ mpang ti Yang lơh broă tòm rài kis he, mơ git lọh he la ñcau tòm Kơnrẵn.

Rềp do mo, gơs dô nă cau ọh mi tus tơngkah băl mơ ăñ dô jơnau buơn ngăn: “bŏl he păl git he la ñcau lơi tom Kơnrẵn” iat gen buơn ngăn, mơya do la dô bơta kwơ màng tơnggu di.

Bŏl he păl càng kah lah bơta yau or là dô pơnah gơlik gơs să tom he ngai do, mơya bơta yau or ò di at bồ bơta lơh nền ngai rơp tus. Dilah găm kis sum tom bơta yau, koar tus gơ, lòi gơ sa siar rọh kòp ngai, gen bơta srat bơtăng mơ gợhào gơjrañ rơp rhòi rhòi pit ala wơl ală bơta niăm her gen Yang lơh tom nùs bŏl he. Yang găm gơs gơnoăr lơh jơh ală bơta, mơya bŏl he păl càng bơtê bơta hồ săng gơnoăr at bồ mơ lòi Kơnrẵn sơmbòi, gen cơnđòa lot băl tai mơ Kơnrẵn.

Bơta yau neh sir rau. Ngai or gơri hơ bơta yau. Digơlan găm gơs ală broă bơh ngai or mơ bŏl he păl lơh ngai do mo, mơya Yang ai gơnoăr ală broă hơ̆ gơlik gơs tồ bŏl he geh pơnah băl tòm broă tòmgơl pa Kơnrẵn di. Gơnap gơnoăr Kơnrẵn di găm tơngkah tơngkăñ. Kơnrẵn rơp tòmgơl ală bơta ji sồt rlau jơh gơlik gơs ală bơta niăm rlau jơh tai, mơya bŏl he păl dòn kơnòm Kơnrẵn.

Yang koñ bŏl he cơnđòa lòt tòm bơta pha lin , ò di pha lin bơh pràn is ò, mơya tòm nùs koñ sàng gọh Kơnrẵn di. Do ò di la broă “jọng să să tom he” mơya la dô tŭ lơmpah nàng gŏ Yang lơh broă dô bă lọh lang mơ sŏng ngăn ngai do mo. Dô tŭ lơmpah tồ geh Yang mòn tiăr, tồ bŏl he gơlik gơs dô nơm gri niam hang mơnĕ mơ Kơnrẵn rơp ngùi tòm broă lơh Yang di.

Gen behơ̆…klọ săng tĕ bơta yau. Klọ săng mo. Kah tĕ he la ñcau lơi tòm Yang. He la cau pơrdòn Kơnrẵn di, la cau pơrdòn at bồ băl mơ Bơtau Krist. He geh họi sac tồ lơh broă băl mơ Kơnrẵn, gơlik gơs cau tọès tom kơnhai tọès đah hwing. He la cau bơyô ngăn Bơtau hơđăng Bơtau di! He gơs kwơ. He gơs màng ryŭ ngăn. He gơs gơnoăr bơh Yang Tom Trồ ai pà.

Gen behơ̆, rlô bŏl tĕ tom Kơnrẵn. Dòn kơnòm tĕ mơ king crŭ di Kơnrẵn. Tồ Kơnrẵn tề lăm rài kis he mơ ngùi he ngai do mo.

Tài bơh bơta yau neh lòt găn rau.

Dan jà bol he dô nùs bal tòm bơta hòi dan:
Khoai Yang koñ gơboh, gơs ală bơta tềl sồt tom rài yau or găm pơnji pơnkôr mơ lơh njơ̆ njŭt hwing soan kọn. Mơya ngai do, kọn sac rwah dòn kơnòm mơ jào phi Kơnrẵn ĭn. Kọn sac rwah hồ săng jơh ală bơta neh lòt găn, tồ dòp rò bơta pa lơm Kơnrẵn di. Dăn Yang sơmbòi ală pơnah găm lề lac tòm kọn. Dăn bơtọ kọn git kah he la ñcau tòm Kơnrẵn: kọn la cau geh koñ gơboh, geh sac rwah, mơ geh họi sac nàng kis dô rài kis ơn jơh rài Kơnrẵn ĭn. Kọn jơh nùs họi dăn, kọn ai sơnđăn Yang Jesu Krist, Amen.

Ơ ală ồng mọ ọh mi koñ gơboh, bơta yau or ò tŭ lơi tòmgơl, mơya ngai tơnơ̆ gen găm pò tơlik diđap măt he. Băñ lòi ală bơta yau or kùp jàm git nđợ bơta niăm her gen Yang koñ lơh gơlik gơs ngăn tom tòm rài kis he ngai do. Lik lòt tĕ bơh bơta klăm jơngọ ngai or, mơ cơnđòa mut tòm tiah bơta àng gơcrà bơta nđàc Kơnrẵn di. Tŭ he bơtê git klŏ săng mơ pò nùs tồ lòi Yang cơnđòa mut, he rơp geh sơmbòi, geh lơh wơl pa, mơ geh Kơnrẵn ngùi nàng lơh gơs ală bơta dờng krơi is crih crài.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.