Peb tej kev mob siab yav dhau los ua rau peb yeej tseem hnov mob siab txhua zaug uas rov qab nco txog lub sijhawm ntawd. Tej uas tau ua yuam kev, tej kev puas tsuaj, tej kev tu siab pheej caum peb ua rau tsis paub ua li cas thiaj tso tau tseg. Zoo li ris lub nra nyhav qhov muag ntsia tsis pom, peb raug lub neej yav dhau los muab nias rau hauv qab ua rau ntsia tsis pom lub neej tom ntej. Tiamsis koj puas paub, Vajtswv tsis xav kom koj pheej ris lub nra nyhav ntawd. Hnub no yog ib hnub tshiab, thiab Vajtswv txoj kev hlub yeej txaus rau koj lub neej lawm.

Hnub no, yog hnub 22/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Scott Presson dhau ntawm Zaj kawm LUB NEEJ YAV DHAU LOS TWB DHAU MUS LAWM

Vajluskub: “Tsis txhob nco txog tej xwmtxheej uas twb dhau los lawm lossis tsis txhob xav txog tej xwm ntawd li. Kuv tabtom ua yam tshiab; nimno yam ntawd twb tshwm tuaj lawm” (Yaxayas 43:18-19)

Lub neej yav dhau los twb dua lawm. Xaus lawm. Twb tiav lawm. Thaum no tsuas yog tshuav tshauv lawm xwb. Hnub no yog ib hnub tshiab. Yog li koj yuav xaiv ua lub neej ntxiv zoo li cas?

Tej zaug yeej tseem tshuav tej xwm txheej qub uas peb yuav tau ntsib, tiamsis Vajtswv tso cai rau tej ntawd tshwmsim tuaj kom peb muaj feem koom tes rau hauv Vajtswv zaj xwm zoo uas Vajtswv tab tom sau. Ntau zaug Vajtswv coj peb mus dhau ntau ntu kev khwv, tas thaum kawg peb yuav yog tus neeg coj txoj kev kho zoo, kev hlub tshua mus pab rau lwm tus.

Leej twg hauv peb twb ntsib dhau kev tu siab lawm, muaj tej yam cuag li peb xav kom txhob tshwmsim tuaj. Tiamsis tseeb tiag, txawm yog ntsib dhau tej kev mob siab li ntawd los, cov neeg uas ntseeg siab rau Vajtswv yeej hais tau tias: “Yog tau cai xaiv dua ib zaug ntxiv, kuv yeej yuav tsis hloov dabtsi.” Ntawd yog lub sijhawm uas yuav ntsia pom Vajtswv txhais tes ua haujlwm hauv yus lub neej, thiab paub tseeb tias yus yog leej twg nyob hauv Vajtswv.

Tsis ntev los no, muaj ib tug viv ncaus hais ib lo lus zoo rau kuv li no: “Peb yuav tsum paub tias peb yog leej twg nyob hauv Vajtswv” Mloog cuag li yooj yim, tiamsis tseeb tiag nws ho yog ib yam uas tseem ceeb tshaj.

Peb yuav tau nco ntsoov tias yav dhau los yog ib feem ua rau peb muaj hnub no, tiamsis yav dhau los tsis yog tus tuav cai txiav txim rau feem txuas ntxiv. Yog pheej ua neej tsau tsawv rau yav dhau los, puag tej ntawd cia, cia nws maj mam ntxo yus ib hnub zuj zus, ces kev iab siab, thiab npau taws yuav txeeb chaw tas tsis muaj chaw tseg rau tej yam zoo uas Vajtswv tab tom ua nyob rau hauv peb lub siab. Vajtswv yeej muaj hwjchim ua txhua yam, tiamsis peb yuav tau kawm txoj kev tso tseg qhov uas tswj tus kheej thiab cia Vajtswv kho zoo tas, nrog Vajtswv mus!

Lub neej yav dhau los twb tiav lawm. Nag hmo nws yog yav dhau los. Tej zaug yeej tseem tshuav tej haujlwm uas nag hmo ua tsis tau tas peb yuav tau ua kom tiav rau hnub no, tiamsis Vajtswv tso cai rau tej ntawd tshwm tuaj kom peb muaj feem tau koom tes nrog Vajtswv txoj kev hloov dua tshiab. Vajtswv lub hwjchim nplua mias. Vajtswv muaj cuab kav pauv tej yam uas mob tshaj dhau los ua tej yam zoo tshaj, tiamsis peb yuav tau ntseeg Nws.

Vajtswv xav kom peb txhais ruam mus hauv txoj kev muaj yeej, tsis yog los ntawm peb tus kheej lub zog, tiamsis nyob hauv Vajtswv lub siab nyiam. Ntawm no tsis yog qhov uas peb yuav “khav txog yus tus kheej” tiamsis tseg sijhawm kom pom Vajtswv ua haujlwm meej meej rau hnub no. ib lub sijhawm zoo tau Vajtswv cob, kom peb dhau los ua lub laujkaub av zoo Vajtswv yuav siv rau Vajtswv tej haujlwm.

Yog li… cia li tso lub neej qub tseg. Tso kiag. Nco ntsoov tias koj yog leej twg nyob hauv Vajtswv. Koj yog tus neeg txais Vajtswv tej qub txeeg qub teg, yog tus nrog Yexus Khetos kav. Koj tau nqua hu los nrog Vajtswv ua haujlwm ua ke, dhau los ua ib tug tub sau qoob loo nyob rau hauv lub caij sau sab ntsujplig. Koj yog tus Vajntxwv ntawm txhua tus vajntxwv tus phooj ywg zoo! Koj muaj nqis. Koj muaj meej mom siab. Koj muaj txojcai uas Vajtswv tau muab cob rau koj.

Yog li, cia li so hauv Vajtswv. Ntseeg thiab pheeb rau Nws. Cia Vajtswv coj koj lub neej thiab siv koj hnub no.

Rau qhov yav dhau los twb dhau mus lawm.

Thov caw nrog kuv peb thov Vajtswv ua ke
Tus Tswv uas muaj kev hlub, muaj tej lub qhov txhab nyob rau yav dhau los yeej tseem mob thiab tsuam rawv kuv tus ntsujplig. Tiamsis hnub no, kuv xaiv ntseeg Koj thiab muab fij rau Koj. Kuv xaiv tso txhua yam uas twb dhau mus lawm tseg, txais yuav txoj kev hlub tshiab hauv Koj. Thov kho tej feem uas tau pob puas hauv kuv lawm kom rov qab zoo. Thov qhia rau kuv kom kuv paub nco ntsoov tias kuv yog leej twg nyob hauv Koj: kuv tau hlub, tau xaiv, thiab tau hu los ua ib lub neej muab fij rau koj. Kuv thov hauv Tswv Yexus Khetos lub npe. Amees.

Cov kwv tij txhua tus, yav dhau los yeej hloov tsis tau lawm, tiamsis lub neej tom ntej yeej tseem qhib rawv rau ntawm koj xub ntiag. Txhob cia tej yam qub ntawd muab tej yam zoo uas Vajtswv pub rau koj lub neej hnub no khi cia. Cia li tawm hauv qhov tsaus ntuj nag hmo los, thiab nkag mus rau hauv qhov pom kev tshiab ntawm Vajtswv txoj kev hlub. Thaum koj kawm tso txhua yam tseg thiab qhib siab cia Vajtswv nkag los, koj yuav tau kho zoo, thiab tau Vajtswv siv los ua tej yam loj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.