Đei dôm lu tơdrong ơh sơ’ngon lăm adrol ki sơ̆ pơm kơ jơhngơ̆m lu bơ̆n oei nhek jĭ rim wơ̆t kơplah đei ‘blŏk dơ̆ng. Dôm kơ tơdrong yoch glăi, hiong răm, jơhngơ̆m ưh kơ hiôk nŏng kơ oei kiơ̆ mưh lăp lu bơ̆n ưh kơ băt wă pơm thoi yơ wă achăng. Lĕi lăi thoi oei chĕp mĭnh tơdrong pŭ trăp ưh kơ ‘bôh păng măt, lu bơ̆n đei tơdrong adrol ki sơ̆ kơtĭt tơ ala mah truh tơ ưh kơ gơh ‘bôh tơdrong tơ anăp ning mônh. Mă lei buăl băt ưh, Kră Yang ưh kơ wă kơ buăl đei chĕp ling lang tơdrong pŭ trăp ‘noh. Năr ‘nâu jơ̆ mĭnh năr plơ̆ng, păng tơdrong mơnat ăn Sư tôm mah rơkah rơkai wă tơplih tơdrong arih buăl.

Năr ‘nâu, ‘năr 22/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Scott Presson kơ̆l ‘bai TƠDRONG ADROL KI SƠ̆ ĐĬ HlÔI BƠIH

Sơ̆p Hla Bơar ‘Bok Kei-Dei: “’Nĕ pă ‘blŏk dơ̆ng kơ tơdrong adrol ki sơ̆, păng lê̆ pă tơchĕng kơ tơdrong chăl so sơ̆ bơih. Âu, Inh oei pơm minh tơdrong ‘nao!” (Êsai 43:18-19)

Tơdrong adrol ki sơ̆ đĭ hlôi bơih. Tơdrong ki sơ̆ đei tôch bơih. Đei pơkeh bơih. Dang ei oei lăp pă ‘mui tơnuh. Năr ‘nâu jơ̆ mĭnh năr ‘nao. Thoi noh buăl gô rơih iŏk arih pơtrơp thoi yơ?

Rŏ lăng oei đei ‘bơ̆t yơ noh dôm tơdrong adrol ki sơ̆ mă lu bơ̆n đei tơ’bơ̆p, mă lei Kră Yang ăn kơ tơdrong ‘noh gơh truh wă kơ lu bơ̆n đei hơdai lăm tơdrong hơ’mon ‘lơ̆ng rŏ mă Sư oei chih pơjing. Lơ wơ̆t Kră Yang chông lu bơ̆n yak hlôi kơ dôm rok trong pơmat tat, na wă kơdih lu bơ̆n gô jơ̆ bơngai chĕp ba tơdrong pơklaih, tơdrong mơnat truh kơ bơngai nai.

Bu lăm lu bơ̆n kŭm đơ̆ng đei jơhngơ̆m ưh kơ hiôk, đei dôm lu tơdrong mă lu bơ̆n lăp hơpơi rŏ kơ ưh tim mă đei truh. Thoi noh hlĭch tơpă, mă yak hlôi kơ tơdrong ơh sơ’ngon jrŭ dêh, dôm lu bơngai lui gơnang kơ Kră Yang oei pơma: “Tơdah gơh rơih iŏk pă mĭnh wơ̆t dơ̆ng, inh kŭm oei ưh kơ tơplih kiơ ôh.” ‘Noh jơ̆ kơplah lu bơ̆n ‘bôh tơpang ti Kră Yang bơ̆jang lăm tơdrong arih bơ̆n, păng băt hơđăl kơdih jơ̆ bu lăm Sư.

Brei mơsơ̆, đei mĭnh ‘nu mŏ oh năm roi tơbăt hăm inh mĭnh tơdrong tơbăt hmă đĕch: “Lu bơ̆n kăl kơ băt kơdih jơ̆ bu lăm Kră Yang.” Mơ̆ng jơ̆ hmă đĕch, mă lei tơpă ‘nâu tă kơ jơ̆ tơdrong gĭt kăl tơm.

Lu bơ̆n kăl kơ ‘blŏk khan tơdrong adrol ki sơ̆ jơ̆ mĭnh lăm tơdrong pơjing kơdih bơ̆n năr ‘nâu, mă lei tơdrong adrol ki sơ̆ ưh kơ chĕp pơgơ̆r pơdrơ̆ng chăl adrih tơ anăp ôh. Tơdah nŏng kơ arih ling lang lăm tơdrong adrol ki sơ̆, kuăr iŏk sư, ăn kơ sư wă pơrăm rim năr, lei tơdrong ơh păng blĕk gô ‘net ‘net tơgar iŏk anih đơ̆ng dôm lu tơdrong ‘lơ̆ng rŏ mă Kră Yang oei bơ̆jang lăm jơhngơ̆m lu bơ̆n. Kră Yang oei đei tơdrong mơsêh mơyang pơm tôm tơdrong, mă lei lu bơ̆n kăl kơ hŏk iŏk tơdrong achăng tŭk tơdrong pơgơ̆r păng ăn kơ Sư pơklaih, na yak tơ anăp hăm Sư!

Tơdrong adrol ki sơ̆ đei hlôi bơih. Năr brei trŏ kơ gah tơdrong adrol ki sơ̆. Kŭm trŏ oei đei dôm lu tơdrong jang ưh kơ keh đang đơ̆ng brei păng lu bơ̆n kăl kơ pơkeh năr ‘nâu, mă lei Kră Yang ăn kơ lu tơdrong ‘noh truh wă kơ lu bơ̆n gơh hơdai lăm tơdrong jang tơplih ‘nao đơ̆ng Sư. Tơdrong mơsêh mơyang đơ̆ng Sư oei ling lang rơkah rơkai. Sư gơh pơm kơ dôm tơdrong jĭ jăn ơh sơ’ngon hloh jing dôm tơdrong ‘lơ̆ng rŏ hloh, mă lei lu bơ̆n kăl athei lui gơnang kơ Sư.

Kră Yang wă kơ lu bơ̆n yak năm lăm tơdrong kĕ jei, ưh kơ trŏ hăm jơhngơ̆m pran kơdih, mă jơ̆ lăm tơdrong ‘lơ̆ng tơpăt đơ̆ng Sư. ‘Nâu ưh kơ trŏ tơdrong “tơ’bôh akâu jăn”, mă jơ̆ jơ wă kơ ‘bôh Kră Yang bơ̆jang hăm tơdrong hơđăl păng tơpă lăm năr ‘nâu. Mĭnh jơ năr wă kơ đei Sư man hơmet, wă kơ lu bơ̆n jing mĭnh pôm ge ‘lơ̆ng rŏ mă Sư gô yua kơ tơdrong jang Sư.

Thoi noh na…athei achăng tơdrong adrol ki sơ̆. Achăng hloi. Athei ‘blŏk kơ buăl jơ̆ bu lăm Kră Yang. Buăl jơ̆ bơngai sơng iŏk dôm tơmam đơ̆ng Sư, jơ̆ bơngai hơdai pơtrơp hăm ‘Bok Krist. Buăl đei krao wă hơdai bơ̆jang hăm Sư, jing bơngai jang yuă lăm bơyan yuă gah bơngol. Buăl jơ̆ buăl juăt kơ Pơtao kơpal kơ đĭ đăng pơtao! Buăl đei gĭt kăl. Buăl đei anih kơjung gĭt. Buăl đei tơdrong pơgơ̆r mă kơdih ‘Bok Kei-Dei đei pơjao ăn.

Thoi noi na, athei pơdơh lăm Sư. Athei lui ngeh păng gơnang tơ anih Sư. Ăn kơ Sư chông anhăk tơdrong arih buăl păng yua buăl năr ‘nâu.

Yua kơ tơdrong adrol ki sơ̆ đei hlôi bơih.

Apĭnh đĭ đăng krao khan hơdai:
Kơkuh kơ Kră Yang ‘mêm mơnat, đei dôm jĭ rơka đơ̆ng lăm adrol ki sơ̆ oei đei jĭ păng kơtĭt trăp lăm bơhngol kon. Mă lei năr ‘nâu, kon rơih iŏk lui gơnang păng pơjao kơ Ih. Kon rơih achăng đĭ đăng dôm tơdrong kiơ đei hlôi, wă sơng iŏk tơdrong mơnat ăn ‘nao ‘lơ̆ng đơ̆ng Ih. Apĭnh Kră Yang pơklaih dôm lu anih oei tơgơ̆ pơchah lăm kon. Apĭnh bơtho kon băt kơ ‘blŏk răk kơdih jơ̆ bu lăm Ih: Kon jơ̆ bơngai đei ‘mêm mơnat, đei rơih iŏk, păng krao wă arih mĭnh chăl arih pơyơ̆r kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Tơdrong adrol ki sơ̆ ưh kơ gơh tơplih, mă lei tơnăp ning mônh lei oei wă pơih ‘bơ̆t anăp măt buăl. ‘Nĕ kơ ăn dôm tơdrong so sĕch chĭt pơwei lơ tơdrong ‘lơ̆ng rŏ mă Kră Yang wă bơ̆jang lăm tơdrong arih buăl năr ‘nâu. Athei yak hlôi kơ măng mu đơ̆ng năr brei, păng yak năm tơ anih hơdah pơchrang đơ̆ng tơdrong mơnat ăn đĕch Sư. Dah buăl pơhrăm iŏk tơdrong achăng păng pơih jơhngơ̆m ăn kơ Kră Yang mơ̆t, buăl gô đei pơklaih, đei klaih, păng đei Sư yua wă pơm pơjing dôm lu tơdrong tih hloh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.