oă dớ, bol he sền gó rài kis he dê lòt gan kòp ngai dồ bă ring ngềt, ờ git tiah pal lòt, ờ gơs dồ bơta krơi is lơi. sùm la ală broă ờs mờng – lòt bơtê, lòt lơh broă, kơlôi rcang ală broă tòm rài kis bè ală cau ndai. mơya gen, tòm ală bơta bè hớ, bol he sơntờm gơlơh bòl glar, mơ he lùp is lah: Ngan Yàng gam sền gó he hala ờ? Yàng kah kơlôi tus dê rài kis he sơl ơ? mơya he git sơl ơ, tòm tú he ờ gó loh làng bơta lơi gơlik gơs, Yàng sùm lơh broă nàng lơh sir rơndap niam rlau jơh mơ Kơnràn neh rcang sir rài kis he in.

ngai do, ngai 21/07/2025, rơndap bơta hòi dăn kòp ngai hòi jà ồng mọ oh mi kơlôi sơnơng jơnau Yàng bal mơ ồng Brad Henry bơh tơnggume YÀNG SÙM GAM LƠH BROĂ

Neh gơs tú lơi he gợjran mơ Yàng sơl ơ? gơs tú he neh gơs nùs nhơm bè hớ, đơs is la tú ală broă tòm rài kis he dê gơlik klăm jơngo. tòm tú bè hớ, bol he ngan kờn git nùs kờn Yàng, mơya cồng nha hê dờp wơl mìng la bơta klôi rcang. bol he gơ cèng tòm bơta kơlôi sơnơng mờng ờs: tài bơh broă do neh gơlik gơs, gen ngan do la nùs kờn Yàng, hala an ờ cau dờp lơh broă tềng tiah do, digơlan do là bơta mơ Yàng kờn. Satan kờn ngan bol he gơ tơmut tòm bơta bè hớ: ai pràn nàng jòi git lài nùs kờn Yàng hơđang mơnàng bơta kơlôi kon mơnus dê. gen tú hớ, bol he mìng sền să tờm he lơm, sền ală bơta he kơp kờn is, mơ mhar ngan gơ tề lăm he tòm bơta nùs kờn is rlau mơ bơta dờn bơr. oă bơta kalke tòm rài kis he dê lik bơh broă do.

dilah bol he rgơi git jơh ală bơta bơh Yàng, gen ngan Yàng ờ di la Yàng Tòm Trồ tai! nùs kơlôi mơ gùng dà Yàng dê sùm dờng rlau mơ bơta kơlôi bol he dê, gen bè hớ nchi bơtài bol he lơh roh oă tú jơ tơngai nàng kơlôi rcang tus dê ală ngai pơnjat tòm rài kis he dê taih? dồ bơta nền cê, sơlơ ngài bơh Yàng, bol he mhar kờn at bồ jơh ală bơta. mơya sơlơ ơm rềp mơ Yàng, bol he rơp dờp git bơta kờn gơboh mơ rơndap Yàng dê hơđang rài kis he dê, bulah he ờ git loh làng ală bơta. oă dớ tú he sền gó cau iơh bơsak geh cồng nha, mơya cau song ring gen kong bòl glar. tú he khào lùp bơh bơta do, hớ la bol he ai pràn nàng git jơh bơta song ring Yàng Tòm Trồ dê, la bơta dờng rlau mơ bơta pràn kòn mơnus dê. an neh gơs jơnau khào lùp Yàng tòm oă sơnnam, hớ là nchi bơtài Yàng hòi cau bàp an rê mơ Yàng tú an 13 sơnam taih? nchi bơtài an gơtơmut tòm bơta chu iùh mơ lơh roh oă bơta tòm rài kis an dê taih? nchi bơtài kon klau an gơkòl tự kỷ taih? nchi bơtài? nchi bơtài? mơ nchi bơtài? ală sèng lùp do digơlan rơp ờ gơs sèng hơ wơl dồ bă loh làng tú he gam kis tòm ù do.

ờ ai lơh krơi tú bol he gơlơh bè roh nùs bơh ală rơndap mơ he ờ rgơi lơh. bol he kung sền tus dê ală broă gam gơlik gơs mơ mhar sền gó bơta ờ song ring, hala roh lơm, tài bơh bol he ờ sền gó broă Yàng gam lơh.

an kah tus dồ jơnau pơnyuơ bơh tiah kơnhơl Disney World, tiah mơ jơh ală phan tòm ù àng gơcrà, chò hòp mơ geh rơp dap tap sèng. mơya, ết cau git lah, hơđơm ală bơa hớ là dồ “bòn dờng ơm hơ đơm” – tiah cau soh ồi ào, rcang phan ngui, lơh ală broă ndai, … ală broă tềng do oă ngan, mơ kơnờm bơh ală broă rcang do gen tàng tiah hơđang ù rgơi gơlik niam. rài kí he dê kung bè hớ sơl. ờs mờng bol he ờ git nchi bơtài ală broă gơlik bè hớ, mơya bơta do ờ geh gơtha la Yàng ờ lơh broă.

bol he ờ mờng sền drờp bal bơta chò hòp mơ bơta at bồ. tú ală bơta lòt di gùng, bol he sền gó geh ring lơngai. mơya Yàng ờ hòi sac bol he nàng at bồ, Yàng hòi jà bol he gơn kơnòm. mơ bơta chò hòp ngan rơp tus tú bol he git lah, bulah ờ sền gó jơh ală bơta, Yàng sùm lơh broă Kơnràn dê mơ ờ rlô.

bulah he gơs oă jền pră, broă lơh niam, bơta pràn hala ngai pơnjat kớ cê kàr lơi, gen jơh ală bơta do rgơi roh lơm tòm dồ bơta crlim mat. ngan bè hớ, mìng tòm dồ ết, jơh ală bơta gơlơh bè kớ cê rlau jơh kung rgơi tơrlah tơrlơm jơh.

ồng Jop la dồ nă cau neh lòt gan bơta do. ồng la cau passơm rlau jơh tòm ală cau đah mat tơngai lik. ồng gơs ală phan mơ cau dunnia sền là kớ cê. Sră Goh cih: “Khai gơs poh rbô belàt, pe rbô làkđa, pram rhiang yô kơnrồ, pram rhiang alàng me, mơ oă ngan cau duh broă. Gen tàng khai la cau pas gơs tiơng pơnro rlau jơh tòm ală làng bol ơm đah mattơngai lik.” (Jop 1:3). mơya, mìng tòm dồ ết jó, ồng neh roh jơh ală bơta ồng gơs. tơnớ jơh ală bơta gơlòng bòl glar, tơnớ ală sèng lùp gơlơh bè ờ rgơi hơ wơl, Yàng Tòm Trồ neh hơ wơl mơ ồng Jop. Yàng lùp ồng Jop:

Mê rgơi sồr puhlèp lòt, gen tàng bol gơ lòt Mơ gơ đơs mơ mê lah: ‘Do, gơs bol hi’ sơl? Ñcau neh ơn bơta jak chài tòm dơlam nùs, Hala ai bơta git wă dơngoh in? Ñcau gơs bơta jak chài nàng kòp ală mhwal? Mơ ñcau rgơi sơrkềng lềng dà ală tap trồ dê. Tòm tŭ kơmbuh ù gơlik kơnut mơ ală pơnai ù gơđềt bal mơ gơp taih?

bơh sèng hơ wơl Yàng dê gơwèt mơ Jop, bol he dờp git lah: bulah klìu triă rgơi lòt mòc, sătờm Yàng là Bơtau cèng phan sa gơ in. bulah kon kơđà lòt lềng làng kung ờ rgơi jòi bàn phan sa, Yàng sùm là Bơtau ròng siăm gơ. gen bè hớ, bol he bañ gơs tú lơi pơnhừ să tú he kơlôi is lah jơh ală bơta he gơs hớ la kơnòm bơta pràn is he dê. jơh ală broă he gam lơh mìng la pơnah broă mơ Yàng jào, la bơta jak chài mơ Yàng ai. cồng nha gơrê mơ Yàng. bơta gơkló gơrê mơ Yàng. mơ bơta phalin, dilah he gơs, kung kơnòm bơh nùs nđàc sơngit Yàng dê lơm.

bol he rgơi tơriang tơryồng lơh broă, ngai do tus dê ngai ne, nàng jòi bàn bơta he kơp kờn sătờm is he dê. mơya dilah bơta hớ ờ om tòm nùs kờn Yàng Tòm trồ dê, gen bullah he ai pràn kàr lơi kung rơp ờ rgơi lơh sir. cau sòtơm he dê la Satan, sùm kờn he dờn ngan lah Yàng ờ kờn gơboh he tai. Mơya jơnau song hớ la mìng Yàng la tiah bol he rgơi gơn kơnòm.

ngai do, ơm wơl té broă kơlôi he la cau at bồ rài kis he dê. bơta he geh hòi sac hớ la ơn rài kis he dê bal mơ ală bơta nđàc Yàng in. bañ ham kờn phan dunnia ngai do, kung bañ sền rài kis hơđang ù do la wil tơl rau, mơya pal sền tus dê bơta chơt mơ lơgar trồ bè la phan bàn he in, lơh nền lah bañ lòi phan lơi tòm dunnia ngai do rgơi kơñau bơta chò hòp he dê! do sùm la bơta phanlin ngan!

Dan jà bol he dô nùs bal tòm bơta hòi dan:
khoai Yàng kờn gơboh kòn dê. bulah kờ ờ rgơi sền gó ală broă Yàng gam lơh, mơya kon dờn nền Yàng sùm at bồ mơ sền gàr rài kis kon dê. dan Yàng toh glài tài bơh oă dớ kon kơnòm pràn is kon dê, kơlôi is ală bơta kon gơs la bơh mpàng tê kon lơh, mơ neh híu sătờm Yàng la Bơtau ai bơta nđàc kon in. dê gùl rài kis bềng bơta kalke do, dan Yàng prap gàr kon tòm bơta tomklac mơ Yàng, nàng kon sùm geh Yàng tề lăm tòm kòp cơnđoà jơng kon dê. kon jơh nùs hòi dăn, ai sơnđan Yàng Jesus Krist, Amen.

ơ ală ồng mọ oh mi kờn gơboh, Yàng sùm ròng siăm he kòp ngai bulah gơs tu he pin wil wơl rơndap Yàng dê hơđang rài kis he dê. ngai do, bulah he ơm tềng tiah lơi, lơh broă lơi, kung tơnggờr té hơđăng trồ, hala sền ală phan Yàng crơng gơs, mơ kơlôi tus dê bơta niam Yàng dê. sătờm ală bơta hớ rơp tơngkah bol he lah: Yàng ờ tú lơi sang lòi he, mơ Yàng sùm lơh broă hơđang rài kis he dê.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.