Ntau zaug, peb hnov cuag li yus lub neej dhau mus txhua hnub tsis muaj dabtsi li, tsis muaj homphiaj, tsis muaj ib yam dabtsi tseem ceeb. Yeej yog tej haujlwm ib txwm ua – mus kawm ntawv, mus ua haujlwm, txhawj rau txhua yam thiab ua lub neej zoo li lwm tus. Tas, nyob rau hauv txoj kev kiv mus kiv los ntawd, peb pib hnov qaug zog, cim civ nug: tsis paub Vajtswv puas tab tom ntsia pom peb? Vajtswv puas tab tom tshua txog peb lub neej? Tiamsis koj puas paub, txawm yog thaum uas koj tsis paub zoo yam dabtsi tab tom tshwmsim tuaj los, Vajtswv yeej tseem ua haujlwm kom ua tiav Vajtswv lub homphiaj zoo rau koj lub neej.

Hnub no, yog hnub 21/07/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Brad Henry dhau ntawm Zaj kawm VAJTSWV YEEJ TSEEM TAB TOM UA HAUJLWM

Vajluskub: “Koj puas nrhiav tau nqaij rau tej tsov ntxhuav noj ,thiab ua kom tej menyuam tsov ntxhuav tsau plab, thaum lawv nkaum hauv qhov tsua lossis pw hauv lawv tej qhov? Thaum uablag tshaib plab thiab ya rau ub rau no, leejtwg yog tug pub rau uablag noj, thiab pub rau uablag tej menyuam uas quaj thov kuv?” (Yauj 38:39-41)

Puas tau muaj zaum twg koj npau taws rau Vajtswv lawm tau? Ntau zaug peb twb tau poob rau tej lub sijhawm zoo li ntawd lawm, tshwj xeeb yog thaum peb pom txhua yam hauv lub neej tsaus ntuj nti. Nyob rau tej lub sijhawm li ntawd, peb yeej xav paub Vajtswv lub siab nyiam, tiamsis thaum kawg tsuas yog teeb meem ntxhov nyho xwb. Peb raug nqus mus rau hauv txoj kev xav tias: Vim qhov xwm txheej no tshwm sim tuaj, tej zaug yog Vajtswv lub siab nyiam, lossis kuv tsis raug txais mus ua txoj haujlwm no, tej zaug nws yog yam uas Vajtswv xav. Xatas nyiam kom peb poob mus rau tej kev xav zoo li ntawd: siv zog xam Vajtswv lub siab nyiam raws li tib neeg txoj kev xav. Vim thaum ntawd, peb tsuas tsom ntsoov rau peb tus kheej, rau peb tej kev xav tau ntawm tus kheej, thiab yooj yim poob mus rau txoj kev qia dub pauv qhov uas mloog lus. Ntau qhov teeb meem hauv lub neej no tshwm sim tuaj pib los ntawm tej ntawd los.

Yog tias peb nkag siab tas txog Vajtswv, ces Vajtswv yuav tsis yog Vajtswv lawm! Vajtswv txoj kev thiab Vajtswv lub tswv yim thaum twg twb siab dua peb tej kev xav, yog li peb ho poob sijhawm los txhawj rau peb lub neej? Tseeb tiag, yim nyob deb Vajtswv, peb yim xav tswj txhua yam. Tiamsis yim nyob ze Vajtswv, peb ho yuav pom Vajtswv txoj kev hlub thiab Vajtswv lub homphiaj tseg rau yus txawm yog yus tsis nkag siab tag nrho txhua yam. Ntau zaug peb pom tej neeg phem lawv muaj lub neej zoo, tshuav tus neeg ncaj ncees ho tiv kev txomnyem. Thaum hais txog qhov teeb meem no, peb siv zog nkag siab txog Vajtswv txoj kev ncaj ncees, yog yam uas nyob siab tshaj peb tib neeg muaj nrim yuav nkag siab tau.

Kuv twb nug Vajtswv ntau xyoo los tias vim li cas Vajtswv ho coj kuv txiv mus thaum kuv nyuam qhuav muaj 13 xyoo? Vim li cas kuv ho poob mus rau txojkev quav yeeb quav cawv ua poob lawm ntau yam hauv lub neej? Vim li cas kuv tus tub ho raug tus mob nyob ib leeg? Vim li cas? Vim li cas?Vim li cas? tej lo lus nug no tej zaug yuav tsis muaj ib lo lus teb zoo thaum peb tseem ua neej nyob hauv ntiajteb no.

Yeej tsis muaj ib yam dabtsi yuav tag kev cia siab vim tej homphiaj uas yus tau teem tseg tiamsis ua tsis tau. Peb saib tej uas tab tom tshwmsim thiab yooj yim ntsia pom txoj kev tsis ncaj ncees, ntxhov nyho thiab tsis muaj nqis, rau qhov tej zaug peb ntsia tsis pom tej yam uas Vajtswv tab tom ua.

Kuv nco txog ib qhov piv txwv nyob rau ntawm qhov chaw ua si nyob rau Disney World, qhov chaw uas txhua yam nyob hauv ntiajteb puav leej ci ntsa iab nyias nyob muaj nyias chaw. Tiamsis muaj tsawg tus paub tias, nyob sab hauv qab yog ib lub “nroog nyob hauv” – qhov chaw sawv daws hloov ris tsho, xaws ris tsho, tsim tej ntawd… txhua yam sab hauv, saib cuag li ntxhov nyho, tiamsis los ntawm tej haujlwm ntawd, thiaj pab tau tej uas nyob saud ua tau haujlwm zoo. Lub neej los kuj zoo ib yam li ntawd. Peb pheej tsis nkag siab tias vim li cas txhua yam nws ho tshwmsim los zoo li ntawd, tiamsis qhov ntawd tsis tau txhais tias Vajtswv tsis ua haujlwm.

Peb thooj yim rau txoj kev zoo siab nrog txoj kev tswj. Thaum txhua yam mus yog kev, peb thiaj hnov tso siab. Tiamsis Vajtswv tsis hu kom peb ua tus tswj, Vajtswv nqua hu kom peb ntseeg. Thiab txoj kev zoo siab tiag yuav los thaum peb paub tias, txawm ntsia tsis pom txhua yam los, Vajtswv yeej ua twjywm ua haujlwm.

Txawm koj yuav muaj nyiaj ntau, muaj haujlwm zoo ua, muaj dag zog, koj lub neej tom ntej yuav tso siab lug los, tag nrho tej ntawd yuav yaj tshis mus. Yog li ntawd, tsuas yog tib pliag xwb, txhua yam uas saib cuag li ruaj khov tshaj kuj yuav puas tshuaj mus.

Yauj yog tus ntsib dhau tej no. Yawg tau sawv daws paub tias yog ib neeg nplua nuj muaj hwjchim tshaj cov neeg nyob lub tebchaws ntawd lub sijhawm ntawd. Yawg muaj yam uas neeg ntiajteb suav tias ruaj khov. Vajluskub sau: “muaj xya txhiab tus yaj, peb txhiab tus ntxhuav, ib txhiab tus nyuj, tsib puas tus neesluav thiab muaj tubtxib coob heev. Nws yog tug uas npluanuj tshaj plaws nyob sab Hnubtuaj” (Yauj 1:3). Tiamsis, tsuas yog tib pliag xwb, yawg poob tag nrho txhua yam. Tom qab tej teeb meem ntawd, yawg thiaj nug ib lo lus nug cuag li tsis muaj lus teb, Vajtswv teb Yauj. Vajtswv thiaj nug Yauj:

“Yog koj hais kom xob laim, nws puas tawm tuaj hais rau koj tias, ‘Kuv nyob ntawm no? Leejtwg qhia rau tus qaibdeg 8 hais tias tus dej Niles yuav huam tuaj lossis leejtwg qhia rau tus lauqaib hais tias nag yuav los? Leejtwg muaj kev txawj ntse suav txheeb tej huab thiab hais kom tej huab ntawd tso nag los rau tej plua av kom nplaum ua tej thooj? “Koj puas nrhiav tau nqaij rau tej tsov ntxhuav noj, thiab ua kom tej menyuam tsov ntxhuav tsau plab, thaum lawv nkaum hauv qhov tsua lossis pw hauv lawv tej qhov? Thaum uablag tshaib plab thiab ya rau ub rau no, leejtwg yog tug pub rau uablag noj, thiab pub rau uablag tej menyuam uas quaj thov kuv?” (Yauj 38:35-41).

Dhau ntawm Vajtswv lo lus teb rau Yauj, peb pom tias: txawm yog tsov ntxuav yuav mus nrhiav tom tsiaj noj los, Vajtswv thiaj yog tus coj tej zaub mov ntawd los pub rau Nws. Txawm yog uab lag ya nrhiav zaub mov noj los Vajtswv yog tus tu tej ntawd. Yog li, peb txhob muaj ib zaum twg khav theeb thiab xav tias txhua yam uas yus muaj puav leej yog yus siv zog los ntawm tus kheej lub zog. Tag nrho tej uas peb tab tom ua puav leej yog feem haujlwm uas Vajtswv muab cob rau peb, los ntawm lub peev xwm uas Vajtswv pub. Txhua yam puav leej yog Vajtswv li. Lub hwjchim yog Vajtswv tug. Thiab kev muaj yeej, yog txawm yuav mus los kuj tsuas yog vam khom Vajtswv txoj kev hlub tshua xwb.

Koj muaj cuab kav siv zog ua haujlwm tas nrho koj lub zog, hnub no dhau hnub tod, caum koj lub homphiaj thiab koj txoj kev npau suav. Tiamsis yog tias yam ntawd tsis nyob hauv Vajtswv lub siab nyiam, txawm koj yuav siv zog npaum twg, nws kuj yuav tsis dhau los muaj tseeb. Koj tus yeebncuab, Xatas, xav kom koj ntseeg tias Vajtswv tsis hlub koj. Tiamsis qhov tseeb tiag, Vajtswv thiaj yog tib qhov chaw uas koj yuav vam khom tau rau.

Hnub no, tsum kiag txhob xav tias koj thiaj yog tus tswv tsav nkoj hauv yus lub neej. Yam uas koj tau nqua hu yog fij koj lub neej nrog koj lub peev xwm rau Vajtswv. Txhob ntshaw lub ntiajteb no, txhob xav tias lub neej hauv ntiajteb yog tag nrho, tiamsis yuav tau saib mus rau txoj kev tuag thiab ntuj ceebtsheej zoo li ib qhov nqi zog pub rau yus, ntseeg tias yeej tsis muaj dabtsi hauv ntiajteb no yuav txeeb koj txoj kev kaj siab mus! ntawd thiaj yog txoj kev muaj yeej tiag!

Thov caw nrog kuv peb thov Vajtswv ua ke
Kuv tus Vajtswv uas muaj kev hlub. Vajtswv, txawm yog kuv tsis pom tag nrho tej haujlwm uas koj ua los, kuv ntseeg tias koj yog tus tswj thiab tuav kuv lub neej. Thov zam txim rau kuv vim muaj ntau zaug kuv vam khom rau tus kheej lub zog, xav tias txhua yam kuv muaj yog kuv txhais tes cim civ khwv los, hnov qab koj thiaj yog tus foom koob hmoov rau kuv. Nyob rau hauv lub neej uas muaj kev txomnyem no, thov Vajtswv txuas kom kuv nyob ze Koj, kom kuv tau Vajtswv coj hauv txhua kaujruam. Kuv thov hauv Tswv Yexus Khetos lub npe. Amees.

Cov kwv tij txhua tus, Vajtswv tab tom tu koj txhua hnub txawm yog muaj tej zaum koj tseem ua xyem xyav rau Vajtswv lub homphiaj pub rau yus lub neej. Hnub no, txawm koj nyob qhov twg, ua dabtsi, los kuj yuav tau tig saib saum ntuj, saib ib puas tsav yam Vajtswv tsim los, xav txog Vajtswv txoj kev zoo. Twb yog tej ntawd ntuas peb tias: Vajtswv tsis tso koj tseg, thiab Vajtswv yeej tseem ua haujlwm hauv koj lub neej.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.