Kư̆m đei, lu bơ̆n đei mơn ‘bôh chăl arih kơdih đei hlôi hrĕnh rim năr, ưh kơ đei kơ nhăm hơđăl, ưh kơ đei kiơ ‘blŏk gĭt tơpă. Oei dôm kơ tơdrong juăt kơ bơ̆jang – năm hŏk, năm jang, hiơ̆k bơngơ̆t păng arih thoi kơ lu bơngai nai. Na thoi noh, đơ̆ng lu tơdrong hơlơ̆k hơle noh, lu bơ̆n đei mơn kơ gleh lap, jet kơdih: Rŏ lăng Kră Yang hăm oei ‘bôh bơ̆n ưh? Kră Yang hăm oei hiơ̆k lăng tơdrong arih bơ̆n ưh? Mă lei buăl băt ưh, mă lăm kơplah buăl ưh kơ ‘bôh hơđăl tơdrong kiơ oei đei truh, Kră Yang oei bơ̆jang wă ăn tơdă tơdrong ‘lơ̆ng tơpăt đơ̆ng Sư ăn kơ chăl arih buăl.

Năr ‘nâu, ‘năr 21/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Brad Henry kơ̆l ‘bai KRĂ YANG OEI BƠ̆JANG.

Sơ̆p Hla Bơar ‘Bok Kei-Dei:: “Ih hăm chă hơnguang tơmam sa ăn kơ dăm-brang akăn, Ăn kơ kon dăm-brang sa hrăp. Kơplah sư oei drum lăm anih trôm sư. Dah oei răp chop chă sem bri wă sa? Bu chă tơmam sa ăn kơ ak; Kơplah hơnar sư krao ôr apinh Kră Yang ‘Bok Kei-Dei, Dah păr wơ̆t wih to âu yua kơ ưh kơ đei tơmam sa?” (Jop 38:39-41)

Hăm đei layơ buăl đei blĕk kơ Kră Yang ưh? Kư̆m đei lu bơ̆n đei hlôi mơn kơ tơdrong noh, mă hơdrol hloh kơplah ‘bôh dôm tơdrong arih măng ‘mu. Lăm kơplah thoi noh, lu bơ̆n băt tơpă tơdrong ‘maih wă đơ̆ng Kră Yang, dôm kơ tơdrong đei noh jơ̆ tơdrong tơsŭl tơwŏk đĕch. Dui lu bơ̆n năm tơ tơdrong tơchĕng rŏng hơnăp thoi kơ: Yua kơ tơdrong ‘nâu đei truh, na băt kơnăl noh Kră Yang wă, dah inh ưh kơ đei sơng iŏk bơ̆jang tơdrong jang ‘nâu, rŏ lăng tơdrong ‘nâu Kră Yang wă. Satan ‘maih wă dêh kơplah lu bơ̆n mơ̆t lăm tơdrong noh: hơdrin wă kơ băt kơ đơ̆ng Kră Yang gơnang kơ tơdrong tơchĕng pơwao kon bơngai. Yua kơplah thoi noh, lu bơ̆n kơnhăm kơ kơdih akâu, đơ̆ng lăm ‘maih wă kơdih akâu, yua kơ ‘bônh kơ chông anhăk đơ̆ng ‘maih wă kơdih tơplih kơ chu yom. Lơ tơdrong lăm tơdrong arih đei truh đơ̆ng dôm tơdrong noh.

Tơdah lu bơ̆n kư̆m đei hlôh đĭ kơ Kră Yang, thoi yơ khan Sư jơ̆ ‘Bok-Kei-Dei! Đon tơchĕng hăm trong Sư ling lang tih hloh kơ đon tơchĕng lu bơ̆n, lei yua kơ kiơ lu bơ̆n hiong jơ năr hiơ̆k bơngơ̆t kơ tơdrong arih tơ anăp? Tơpă, rai ataih đơ̆ng Kră Yang, lu bơ̆n roi ‘maih bơwei lăng dôm tơdrong. Mă lei rai jê̆ Kră Yang, lu bơ̆n gô mơn đei jơhngơ̆m ‘mêm păng dôm tơdrong tuh ăn kơ bơ̆n, mă lăm kơplah ưh kơ hlôh tôm tơdrong. Kư̆m đei lu bơ̆n ‘bôh bơngai pơm kơnê̆ mă sư đei tôm, bơngai pơm ‘lơ̆ng tơpăt mă chu iŏk tơdrong pơmat tat. Kơplah đei apinh tơdrong ‘nâu, lu bơ̆n oei adrin wă kơ hlôh kơ tơdrong ‘lơ̆ng tơpăt ‘Bok-Kei-Dei, noh jơ̆ tơdrong hloh kơ jơhngơ̆m đon kon bơngai hlôh băt dang ei. Inh kư̆m đei apinh Kră Yang đunh sơnăm, thoi âu, yua kơ kiơ Ih pơdrâu tơdrong arih ‘bă inh mă kơplah inh 13 sơnăm? Yua kơ kiơ inh ‘maih wă dêh pơm tơdrong kơnê̆ na hiong răm đĭ dôm tơdrong lăm chăl arih? Yua kơ kiơ kon drŏnglo inh arih ôn kơdih akâu sư? Yua kơ kiơ? Yua kơ kiơ? Yua kơ kiơ? Dôm kơ nơ̆r jet noh gô ưh kơ đei nơ̆r tơl tôm ‘lơ̆ng kơplah lu bơ̆n oei arih kơpal teh ‘nâu.

Ưh kơ đei hlĭch kơplah lu bơ̆n mơn kơ sơ’ngon dôm kơ tơdrong dan hơmet hơdrol ưh kơ đei pơm keh. Lu bơ̆n lăng lăm dôm tơdrong oei đei păng ‘bônh kơ ‘bôh ưh kơ dang ăi, ưh kơ ‘bôh Kră Yang oei bơ̆jang.

Inh đei ‘blŏk kơ tơdrong pơtih gia tơ anih pơdơh Disney World, dôm kơ tơmam kơ pal teh ‘bôh ‘lơ̆ng hơ iă, hiôk chơt păng hrĕp ‘lơ̆ng. Mă ưh kơ đei bu băt, tơ ala noh đei kơ minh “pơlei tih ôn tơ ala” – anih đe tơplih hơbăn ao, sĭt hơbăn ao, proh hơmet tôm tơdrong … Dôm tơdrong tơ ala ‘bôh nhen thoi tơsŭl dêh, mă lei đơ̆ng dôm tơdrong jang noh tơ gŭm dôm tơdrong tơ kơpal tơproh ‘lơ̆ng.

Tơdrong arih kư̆m thoi noh. Lu bơ̆n ngăl ưh kơ băt yua kơ kiơ dôm tơdrong mă đei thoi noh, mă dôm tơdrong ưh kơ khan Kră Yang ưh kơ đei bơ̆jang.

Lu bơ̆n ngăl drơ̆ng hơdai hăm tơdrong chơt hiôk hăm dôm tơdrong bơ̆n gơh pơm. Kơplah dôm tơdrong năm trŏ ‘blep, lu bơ̆n ‘bôh hiôk hơđơ̆ng. Mă lei Kră Yang krao lu bơ̆n ưh kơ ăn kơ lu bơ̆n bơwei, Kră Yang krao lu bơ̆n wă kơ lui gơnang. Păng tơdrong chơt hiôk tơpă gô truh kơplah lu bơ̆n băt thoi âu, mă khan ưh kơ băt đĭ tôm tơdrong, Kră Yang oei bơ̆jang lăm bơ̆n đĕch.

Mă khan buăl đei jên tơmam lơ, đei tơdrong jang kơjăp, jơhngơ̆m pran dah tơdrong arih tơ anăp ‘lơ̆ng kơjăp thoi yơ, na dôm tơdrong kư̆m gô ‘bônh kơ hiong răm đĕch. Tơpă thoi noh, lăm tŏsĕt đĕch, dôm tơdrong ngeh kơ kơjăp dêh bơih kư̆m gô pơchah răm.

Jop đei hlôi kơ tơdrong noh. Sư jơ̆ bơngai mơdrŏng, mơng rŏ hloh kơ đĭ đăng tơ dêh noh kơplah noh sơ̆. Sư đei dôm tơdrong mă kon bơngai lăm teh đak khan kơjăp dêh bơih. Sơ̆p hla bơar ‘Bok-Kei-Dei chih: “Jop đei tơpơh-rơbâu tŏ triu, pêng-rơbâu tŏ aseh lăk-đa, pơđăm-hrĕng hơgrop rơmo choh, pơđăm-hrĕng tŏ aseh iĕ akăn păng đei đĭch đam lơ; sư mơdrŏng hloh kơ đĭ-đăng bơngai lăm dêh char gah Hơlĕch.” (Jop 1:3). Mă lei, lăp lăm jơ năr kơ đeh đĕch, sư hiong răm đĭ đăng. Đơ̆ng rŏng kơ dôm tơdrong ưh kơ thoi bơ̆n wă, đơ̆ng rŏng kơ dôm nơ̆r jet ngeh kơ pă đei nơ̆r tơl, ‘Bok-Kei-Dei đei tơl Jop. Kră Yang jet Jop:

“ Ih hăm gơh wơh kơmlat athei sư nơnăm. Na lu sư hăm tơl ih khan: “Lu nhôn tơ âu?” Bu ăn tơdrong gơh hơgei lăm jơhngơ̆m păng ăn bơih tơdrong hlôh wao lăm kơ̆l ‘ngok? Bu gơh yua tơdrong hơgei na jô̆ lu hơmơ̆l?Dah hăm đei bu gơh gơling tuh ge đak đơ̆ng plĕnh kơplah ‘mi jur ‘mui teh tơklep băl kơtuăl teh tơklep băl jing arăng? Ih hăm chă hơnguang tơmam sa ăn kơ dăm-brang akăn, Ăn kơ kon dăm-brang sa hrăp. Kơplah sư oei drum lăm anih trôm sư. Dah oei răp chop chă sem bri wă sa? Bu chă tơmam sa ăn kơ ak; Kơplah hơnar sư krao ôr apinh Kră Yang ‘Bok Kei-Dei, Dah păr wơ̆t wih to âu yua kơ ưh kơ đei tơmam sa? (Jop 38:35-41)

Đơ̆ng nơ̆r tơl Kră Yang pơma hăm Jop, lu bơ̆n ‘bôh thoi âu: mă khan dăm brang năm hơnguang chă sa, Kră Yang bơih Tơ’ngla ba ăn tơmam sa ăn kơ sư. Mă khan sem ak păr juang chă pă đei tơmam sa, Kră Yang bơih jơ̆ Tơ’ngla wei rong lu sư. Yua kơ thoi noh, lu bơ̆n ‘nĕ kơ pơ-ang na tơchĕng dôm tơdrong đei ‘bôh noh yua kơ đơ̆ng adrin hăm jơhngơ̆m kơdih. Dôm tơdrong kiơ bơ̆n oei pơm đei noh tơdrong Kră Yang pơjao đĕch. Đĭ đăng đơ̆ng Kră Yang ngăl đĕch. Ư- ang kơ Sư.
Păng kĕ jei, mă yak năm dơ̆ng, noh đơ̆ng jơhngơ̆m ‘mêm mơnat Sư đĕch.

Buăl adrin bơ̆jang pơnam đĭ jơhngơ̆m, năr ‘nâu truh tơ năr nai, wă kơ druh kiơ̆ tơdrong dan hơmet hơdrol păng hơpơi wă kơdih akâu. Mă lei tơdah tơdrong ưh kơ lăm ‘maih wă đơ̆ng ‘Bok-Kei-Dei, mă khan adrin truh tơ dang yơ, noh kư̆m ưh kơ đei jing tơdrong tơpă. Bơngai ayăt kơ buăl, Satan, ling lang wă kơ buăl lui ngeh Kră Yang ưh kơ ‘mêm kơ buăl. Mă tơpă Kră Yang bơih jơ̆ anih mă buăl gơnang.

Năr ‘nâu, athei pơdơh khan buăl jơ̆ bơngai wơ̆r tơm kơ thŏng nan kơ chăl arih kơdih. Tơdrong buăl đei krao noh athei pơyơ̆r chăl arih dôm kơ đon gơh hơgei ăn kơ Kră Yang. ‘Nĕ kơ hưch wă dôm tơdrong teh đak ‘nâu, mă lei athei lăng gah tơdrong lôch păng pơlei ‘lơ̆ng noh jơ̆ tơmam apah ăn kơ kơdih, sĭt tơpă ưh kơ đei tơdrong kiơ kơpal teh ‘nâu tơtông iŏk jơhngơ̆m chơt hiôk đơ̆ng buăl! Noh jơ̆ kĕ jei tơpă!

Apĭnh đĭ đăng krao khan hơdai:
Kơkuh kơ Kră Yang mă ‘mêm kơ kon. Kră Yang ơi, mă khan kon ưh kơ ‘bôh đĭ dôm tơdrong Ih oei bơ̆jang, mă lei kon lui ngeh Ih oei pơgơ̆r păng chĕp chăl arih kon. Apinh Kră Yang huay kơ jô̆ yo yua kơ lơ wơ̆t kon gơnang kơ jơhngơ̆m kơdih, tơchĕng khan dôm tơdrong đei noh jơ̆ đơ̆ng ti kơdih kon bơ̆jang đei, mă hiơt kơ Ih bơih Tơ’ngla tuh ăn kơ kon. Tŏk bŏk chăl arih pơmat tat, hơpơi kơ Kră Yang chô̆ kơjăp kon lăm tơdrong pơgơ̆p hăm Ih, wă kơ kon ling lang đei Ih chông anhăk đơ̆ng lăm rim trong yak năm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Kră Yang oei wei rong buăl rim năr mă kơplah năr buăl oei ngĭl ngŭl gah proh hơmet đơ̆ng Kră Yang ăn kơ chăl arih kơdih. Năr ‘nâu, mă buăl oei tơ anih ayơ, pơm kiơ, dah oei lăng dôm tơmam Kră Yang pơjing. Đơ̆ng dôm kơ tơdrong noh gô tơ’blŏk kơ buăl thoi âu: Kră Yang ưh kơ đei layơ achăng lê̆ buăl, păng Sư oei bơ̆jang lăm chăl arih buăl.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.