Kơplah tơ’bơ̆p hăm dôm tơdrong pơmat tat, hloh noh jơ̆ dôm tơdrong pơmat tat gah jên tơmam, lu bơ̆n ‘bônh dêh kơ huŏng lăm gleh lap păng ngĭl ngŭl kơ tơdrong tơgŭm đơ̆ng Kră Yang. Dôm lu tơdrong gleh hrat gah jên tơmam jum dăr: jên hnam, jên hŏk ăn kơ kon, jên yua lăm tơdrong arih rim năr rai kơ jung…. Đĭ đăng nhen thoi tŭn kơtĭt pơm kơ lu bơ̆n ‘bôh kơdih iĕ ioch, ưh kơ pơm thoi yơ ‘bơ̆t dôm tơdrong kăl yua tih dêh. Mă lei, lăm kơplah jơ ‘noh, buăl đei krao wă pơdơh păng tơchĕng pơwao gah mĭnh ‘Bok Kei-Dei- Tơ’ngla băt bơih dôm tơdrong buăl kăl yua.

Năr ‘nâu, ‘năr 20/07/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Pam Morrison kơ̆l ‘bai TƠ’NGLA BĂT DÔM TƠDRONG KĂL YUA

Sơ̆p Hla Bơar ‘Bok Kei-Dei: “’Bă bơ̆n tơ plĕnh ti kư̆m băt boih dôm tơdrong lu iĕm kăl yua, Sư gô tơgŭm iĕm tơpă.” (Mathiơ 6:32)

“Kră Yang bơ̆n ‘Bok Kei-Dei mơdrŏng tih tơpă, Sư gô tơgŭm iĕm tôm tơdrong tơmam iĕm kăl yua, kơlih kơ iĕm lui kơ Yêsu Krist.” (Philip 4:19)

Inh hơiă kơ đŏk dôm lu hơ’mon gah dôm lu ‘bok bơtho tih, lăm noh đei ‘bok George Mueller. Sư đei krao khan kơ khŭl hơ’lơ̆p mơti mă sư đei iŏk rong kơplah lu sư ưh pă đei kiơ wă sa; păng hăm kiơ̆ mĭnh tơdrong ayơ ‘noh: ‘bĕng mi, đak toh, hăm dôm lu tơdrong krao pơpôi tơgŭm na đei ‘bôh. Inh kŭm đei đŏk dôm lu tơdrong hơ’mon lĕi lăi đơ̆ng lu Bơngai Lui nai. Mă lei inh đei jet kơdih: inh noh bu? Inh lăp jơ̆ mĭnh ‘nu ‘bok bơtho iĕ ioch tơ gah yă Nâm teh đak Mi, jơ̆ bơngai ưh kơ đei bơngai bu băt, păng lăp oei bơ̆jang kơ Kră Yang thĕng hreh. Lei inh hăm gơh đei mơn hlôi đei gah tơdrong tơgŭm hlĭch chrơp thoi noh ưh? Inh tơchĕng, na păng đei Kră Yang tơ’blŏk.

Kơplah tơchĕng truh kơ tơdrong pơjing tih đơ̆ng ‘Bok Kei-Dei, buăl hăm ‘bôh đei hlĭch chrơp tơpă ưh kơplah Sư đei hiơ̆k bơngơ̆t truh kơ dôm lu bơngai iĕ ioch thoi lu bơ̆n? Lăng tơ kơpal plĕnh, lu bơ̆n ‘bôh lơ hrĕng, rơbâu hơnglŏng hơdah. Tŏk bŏk plĕnh tih să đơ̆ng măng ‘mu ‘noh, lu bơ̆n gơh tơchĕng: “ ‘Bok Kei-Dei tih hloh tơpă, păng Sư kŭm oei tơchĕng truh tơ inh!”

Kơplah pơtao Đawit lăng sơng iŏk tơdrong pơjing tih hloh đơ̆ng Kră Yang, sư kŭm hlĭch hlăch yua kơ kon bơngai mă iĕ ioch, mă lei đei Kră Yang hiơ̆k bơngơ̆t. Sư chih: “Dah inh lăng tơ plĕnh đơ̆ng lu hơnglâu ti Ih pơjing Măt khei păng lu sơnglŏng mă Ih đei pơjing boih. Kon bơngai noh kiơ na Ih mah tơchĕng ‘blŏk? Kon bơngai noh kiơ, na Ih mah wei wêr sư.” (Hơriso 8:3-4)

Kŭm lĕi lăi thoi lơ bơngai nai, inh đei păng oei adrin tơgŭm dôm lu bơngai oei lăm tơdrong pơmat tat hăm dôm tơdrong tơpă hloh, păng mưh lăp tơdrong ‘noh iŏk pơm huach. Inh ‘blŏk đei mĭnh măng ei, kơplah ‘bôh jên tơmam inh đĭ bơih, inh krao khan hăm Kră Yang: “Kră Yang ơi, apĭnh tơgŭm kon.” Lăp dôm kơ nơ̆r ‘noh kŭm đei pơm kơ dôm tơdrong gleh hrat đei dang biơ̆ lăm inh. Đơ̆ng krao khan, lăp lăm ‘bar năr, inh đei sơng iŏk kơsô̆ jên hloh 20 wơ̆t kơsô̆ jên inh kăl. Mĕ ‘bă inh đei pơyơ̆r kơdih mă inh ưh tim mă đei pơma hăm mĕ ‘bă gah tơdrong inh đei tơ’bơ̆p. Hlĭch tơpă!

Mĕ ‘bă inh jơ̆ khŭl bơngai adrol đei hlôi tơ’bơ̆p Tơdrong Tơblah mă II, jơ̆ dôm lu bơngai yak hlôi kơ tơdrong pơmat tat na sư pơ’lơ̆ng dêh lăm tơdrong răt tơmam. Măr sư oei yua kơdŭng tah jên kăk păng gơih jên lăm anih mơmăn hăm jên đei pơcheh lăp 3%! Tơdrong măr sư pơyơ̆r đơ̆ng lăm sư kơdih wă păng hơmrah thoi noh tơpă jơ̆ tơdrong mơn lăm jơhngơ̆m truh đơ̆ng ‘Bok Kei-Dei.

Jên ‘noh dang ei đei gơh yua đĭ kơ dôm lu tơdrong kăl yua, kŭm đei tơgŭm kơ tơdrong jang klo akăn măr nhi. Tơpă inh bơnê păng tơjruh akâu kơdih ‘bơ̆t anăp ‘Bok Kei-Dei jơ̆ Tơ’ngla Tơgŭm tơpăt. Sư băt hơđăl đĭ lu tơdrong kăl yua gah sĕch akar truh tơ tơdrong kăl yua lăm pơhngol kơ rim ‘nu lu bơ̆n.

Năr ‘nâu, buăl oei tơ’bơ̆p hăm dôm tơdrong anat hă? Athei năm tơ Sư lăm tơdrong krao khan păng roi hăm Sư rơđah hơđăl dôm tơdrong kiơ buăl kăl. Kră Yang ưh kơ sĭ băt dôm tơdrong kăl yua kơ buăl, mă Sư kŭm ‘maih wă mơ̆ng buăl krao khan, ‘maih wă kơ buăl chă ‘bôh tơdrong hiôk hơđơ̆ng kơplah gơgang tơ anih Sư. ‘Nĕ kơ hiơ̆k bơngơ̆t dah hli tơrơ yua kơ Yang Yêsu đei pơkă khan: “’Bă bơ̆n tơ plĕnh ti kư̆m băt boih dôm tơdrong lu iĕm kăl yua, Sư gô tơgŭm iĕm tơpă.” (Mathiơ 6:32)

Athei pơjao ăn dôm tơdrong kơ Sư, mă khan ‘noh jơ̆ dôm tơdrong iĕ đĕch, ưh kơ gĭt kăl, dah mă khan jơ̆ dôm lu tơdrong mă buăl ưh kơ pơ̆n pơma hăm bu. Buăl gô hlĭch hlăch yua kơ tơdrong dŏng tơgŭm truh đơ̆ng Tơ’ngla Pơgơ̆r. Dah buăl hli tơtăm dah ngĭl ngŭl, athei ‘blŏk truh tơ Hơriso 18:

“Lăm năr hơnat hơnot inh krao chă Kră Yang. Inh krao apinh Kră Yang ‘Bok Kei-Dei inh: Đơ̆ng anih Pơtao Sư, Sư kơtơ̆ng nơ̆r inh, Păng nơ̆r inh krao truh tơ đon Sư. Dang ei teh pơpơ̆ păng tơdrŏ, Na lu kông kư̆m tơrĭ păng kư̆m tơdrŏ, yua kơ Sư hil. ”Đei ‘nhui lĕch đơ̆ng trôm muh Sư, Pla ŭnh khơ̆ng lĕch đơ̆ng ‘bơ̆r Sư, soh sa ngar ngŭr. ‘Sư rĭ plĕnh, đơ̆ng noh jur; Ala kơ jơ̆ng sư đei măng gueo. Sư hao chêrubim, na păr; Sư păr đông hăm pơnăr jơwa kial. Sư pơm măng mu klơ̆p tăp dăr kơ Sư, Sư iŏk hơmơ̆l găm ‘mi hơ’bơ̆l gueo gom tăp kơ Sư. Đơ̆ng lăm rang mơnhal ‘bơ̆t anăp Sư, đei lu hơmơ̆l đông lĕch hloi ‘mi prĕl păng ngar ŭnh ngŭr.

Kră Yang Sư pơm grơ̆m glaih tơ kơpal plĕnh. Kră Yang kơpal hloh ăn kơ đe kơtơ̆ng nơ̆r Sư. Tơ lăm ‘mi prĕl hăm ngar ŭnh ngŭr. Sư prah ‘brơ̆m pơm kơ lu ayăt kơ inh tơklah tơklang đĭ, Tơlĕch kơmlat pơm kơ lu sư mơnhal hơwơ̆l hơwang. Ơ Kră Yang, đơ̆ng nơ̆r Ih chrih, Kial lĕch đơ̆ng trôm muh Ih, na kơđĕl đak dơsĭ ‘bôh hơnă teh đak kư̆m ‘bôh bang. Đơ̆ng kơpal plĕnh kơjung Sư chro ti rôp inh. Hiŏng hơtŏk inh hlôi đơ̆ng đak jrŭ. Sư dŏng pơklaih inh đơ̆ng lu ayăt mă pran kơtang. Đơ̆ng lu bơngai areh kơ inh, yua kơ lu sư pran hloh kơ inh. Lu sư bruh tơ inh, mă-lei Kră Yang dŏng tơgŭm inh, lăm năr inh anat anot. Sư chông tơlĕch inh tơ anih să rơhơi. Dŏng inh, yua kơ Sư hiôk kơ inh.” (Hơriso 18:6-19)

Apĭnh đĭ đăng krao khan hơdai:
Kơkuh kơ Kră Yang- Tơ’ngla băt dôm tơdrong kon kăl yua! Kră Yang ơi, drơ̆ng iŏk đei kơplah jơ kon đei hli tơrơ păng ngĭl ngŭl yua kơ dôm tơdrong hiơ̆k bơngơ̆t. Lăm dôm lu tơdrong ‘noh, apĭnh Kră Yang tơgŭm kon lui tơpă khan Ih jơ̆ Tơ’ngla dŏng tơgŭm, gô ba kon truh tơ anih rơhơi păng rơkah rơkai. Mă kon oei lăm kơplah kơ’bah ưh kơ tôm mah dah phĭ mah, hơpơi kơ Kră Yang tơgŭm kon lui tơpă lăm tơdrong pơgơ̆r đơ̆ng Ih, băt khan dôm tơdrong ih ba truh ling lang jơ̆ tơdrong ‘lơ̆ng hloh. Kon kŭp kơ̆l krao khan hăm anăn Yang Yêsu Krits, A-men.

Ơ lu bơngai mơ̆ng mă ‘mêm kơ-eng, băt kơnăl kơ Kră Yang jơ̆ Tơ’ngla băt dôm tơdrong kăl yua păng ling lang dŏng tơgŭm, buăl hăm đei jơhngơ̆m pơyơ̆r chăl arih kơdih kơ Sư hloi ưh? Athei năm tơ Sư lăm tơdrong krao khan, roi pơyơ̆r dôm lu tơdrong hiơ̆k bơngơ̆t đơ̆ng buăl kơ Sư, păng băt khan Kră Yang oei yak hơdai buăl lăm rok trong ‘nâu. Athei chih tơ ala dôm lu tơdrong buăl đei sơng iŏk đơ̆ng Kră Yang lăm đĭ khei năr hlôi, păng pơtrơp chih tơ ala dơ̆ng dôm lu tơdrong buăl kăl yua, pơtrơp krao khan păng chang gô anih tơdrong tơl tơwih đơ̆ng Sư.
Hơpơi kơ buăl gơh krao khan thoi bơngai chih ‘bai Hơri ư-ang ‘nâu:

“Kŭp apĭnh Ih chông anhăk lu kon
Đĭ rok trong hiơ̆k bơngơ̆t jô̆ jŏk.
Kŭp pơyơ̆r kơ Ih năr dơning hiơ̆k tơtăm,
Bôl tơdrong arih ưh kơ gơgăn trong kon.”

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.