Dah mơ̆ng kơtơ̆ng truh tơ ‘bar chư “anat anot”, rŏ lăng ưh kơ đei bơngai bu mơn đei hiôk ôh. Kon bơngai ngăl hơ iă kơ dôm tơdrong kiơ dơhnă, tơproh păng ‘bônh ‘biơ̆ hloh kơ dôm tơdrong ưh kơ tơproh ‘lơ̆ng. Mă lei, tơpă jơ̆ teh đak lu bơ̆n oei arih đei ‘bĕnh dôm tơdrong ưh kơ hơđơ̆ng; păng mưh lăp, kơdih chăl arih kơdih kâu lu bơ̆n kŭm ‘bĕnh dôm tơdrong anat anot. Mă lei rŏ lăng, trŏ kơ lăm dôm tơdrong ‘noh, lu bơ̆n gơh đei jơ năr wă lăng lăm jơhngơ̆m kơdih păng băt kơnăl tơdrong oei hơdai đơ̆ng Kră Yang tŏk bŏk dôm tơdrong nhen thoi bơsuơ̆t bơsuăt.

Năr ‘nâu, ‘năr 18/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Dianne Neal Matthews kơ̆l ‘bai CHĂ ‘BÔH KRĂ YANG KƠPLAH ANAT ANOT.

“Đei minh ‘nu adruh gô anăp wă tơpŭ kon drŏ-nglo, Đe anăn kon Sư noh Êmanuel,” Êmanuel wă khan: ‘Bok Kei-Dei oei hơdai hăm bơ̆n.” (Mathiơ 1:23)

Lăm mĭnh gơsơ̆ lăm khei 12, inh mơn đei jơnăr bơyan Nôel hơđăl tơpă kơplah glơng đơ̆ng rim kơthŭng tơmam pơgong đơ̆ng bơbŭng hnam tơjur tơ anih phŏng sơng tơmoi. ‘Bar ‘nu kon hơ‘lơ̆p inh pơtơm pơih rim kơ tơpu wă lăng lăng tơ lăm đei kiơ. Adrol kơ lĕch đơ̆ng phŏng wă pơm tŏsĕt tơdrong jang, inh pơkă kơ bre sư lăp gơh lăng đĕch, ưh kơ gơh iŏk tơmam kiơ tơlĕch dĭng truh kơ kơplah đĭ đăng hnam dơnŏ hơdai pơgong. Inh wă pơgong ‘long hơngo păng hnam kơdih mă kơ klĕp, đei tơproh, kiơ̆ kơ rim kơnao.

Mă lei ‘bar ‘nu kon inh kơchu ưh kơ đei tơchĕng thoi noh. Lăp dôm phŭt đơ̆ng rŏng, kơplah inh wơ̆t tơ phŏng sơng tơmoi, đĭ đăng lu tơpu đei pơih đĭ, păng tơmam pơgong glơch glach jơ̆p anih. Lăng jơ̆p phŏng kơplah ‘noh, inh mơn nhen kơ thoi đei mĭnh pôm ‘long hơngo Nôel ‘nao păk tơkơ̆l tơ ala.

Inh ôr pơret: “Kon athei lăng dôm tơmam glơch glach ‘nâu ă!” Mă lei kon drŏkăn inh đăm sơnăm, hăm đon tơchĕng bơngai ‘lơ̆p, tơl hmă đĕch: “ŏ ah, mă lei mĕ ơi, lăng dôm tơmam tơsŭl tơwŏk ‘nâu kŭm lăng ‘lơ̆ng mơ̆n!”

Lăng tơ ‘bar pah măt ‘bĕnh tơdrong ‘nă hal kơ kon ‘lơ̆p, inh thar tơchĕng gah anih năr Nôel blŭng a. Pơlei ‘Betlehem kơplah noh tơpă đei rơông rơang, yua kơ bơngai đơ̆ng jơ̆p anih wih brŏk wă chih hơmet anăn kon pơlei. Rŏ lăng ‘bok Yôsep păng yă Mari kŭm đei hiơ̆k bơngơ̆t yua kơ đĭ đăng hnam anih tơmoi oei đei ‘bĕnh bơih, dĭng truh kơ Yang Yêsu kơplah đei tơpŭ kŭm đei ‘bĭch lăm minh bơng ‘nhĕt. Kơplah jơ ‘noh ưh kơ đei dreng drao dah ‘lơ̆ng rŏ thoi kon bơngai ngăl tơchĕng gah năr Nôel. Sơ̆p Hla Bơar Nơ̆r ‘Bok Kei-Dei đei chih khan:

“Lăm sơnăm noh ‘bok pơtao tơm đe Rôm, anăn sư Ôgut, chih hla bơar athei đe chă chih măt rim kon bơngai jơ̆p kơ tơring sư pơgơ̆r. ‘Nâu mă blŭng-a đe chih anăn tơ lăm hla bơar, kơplah Krinus oei pơm ‘bok tih lăm dêh char Siri. Lu đe wang brŏk tơ pơlei sư kơdih wă chih tơmơ̆t anăn lu sư. Yôsep yak đơ̆ng Pơlei Nasaret, dêh char Galilê, năm tơ Pơlei Betlehem, dêh char Juđê, pơlei Đawit sơ̆, yua kơ sư kon sâu adrĕch adrung Đawit. Thoi noh sư năm chih tơmơ̆t anăn sư tơ lăm sơ̆p hla bơar hơdai hăm Mari bơngai mă sơkơ̆t hăm sư, sư oei anăp. Lăm năr bre sư oei tơ noh, truh kơ khei ‘năr Mari boih, klaih kơ noh sư tơpŭ kơ minh ‘nu kon kơdră sư. Sư tơsu kơ kon sư minh blah khăn, klaih kơ noh tơ’bĭch kơpal ‘nhĕt kro tơ lăm war rơmo yua kơ ưh kơ đei anih boih lăm hnam ‘bĭch tơmoi.” (Luka 2:1-7)

Mă lei, lăm anih nhen thoi anat anot ‘noh, tơdrong proh hơmet ling lang đơ̆ng ‘Bok Kei-Dei đei tơ’bôh. Yang Yêsu bơih jơ̆ nơ̆r tơl tơwih kơ minh teh đak đei tơdrong yoch pơm kơ ‘mê̆ ‘mach păng pơchah răm. Anih Mă ‘Bar Kră Yang đei mơ̆t lăm teh đak, chĕp akâu jăn kon bơngai, jur lăm minh bơng ‘nhet chu iŏk đon ala. Păng ‘noh bơih jơ̆ tơdrong mơsêh mơyang kơ Nôel: kơplah Tơ’ngla Ling Lang đei jing mĭnh ‘nu Kon Hơ’lơ̆p.

Hloh kơ ‘bar hơbâu sơnăm hlôi, teh đak nhen thoi ưh kơ đei tơplih dôm yơ. Kon bơngai oei pơtrơp pơm tơsŭl tơwŏk dôm tơdrong, pơm kơ đei ơh sơ‘ngon na pŭ iŏk tơdrong ơh sơ’ngon. Lu sư oei nŏng kơ chơ chă chăl arih đei tơdrong tơm păng tôm mah, mă lei ưh kơ chă anih Yang Yêsu, na chă lăm dôm tơdrong gah lăm teh đak ‘nâu.

Jơhngơ̆m inh băt bơnê kơ Yang Yêsu yua kơ Sư đei wơ̆ ‘lŏ, đei arih mĭnh chăl arih ‘lơ̆ng tôm, na chu pŭ iŏk lôch pơmat tat tơ kơpal ‘long pơglang wă ‘mong ăn đơ̆ng tơdrong yoch kơ kon bơngai. Đơ̆ng rŏng kơ iung arih, Sư tŏk tơplĕnh brok tơ anih plei ‘lơ̆ng ư-ang; păng tơ anih ‘noh, Sư hơmet ‘măn tơ minh anih oei ling lang kơ dôm bơngai bu lui sơng iŏk Sư.

Mưh lăp, trŏ đơ̆ng tơdrong rơgoh ‘lơ̆ng păng ưh kơ băt kiơ đơ̆ng mĭnh ‘nu bơngai ‘lơ̆p đei tơgŭm inh đei minh mum lăng ‘nao hloh gah Nôel, păng tơ’blŏk kơ inh ‘blŏk tơdrong kiơ gĭt tơpă. Nôel ưh kơ sĭ jơ̆ ‘long hơngo ‘lơ̆ng rŏ dah mĭnh pôm hnam đei pơgong rang rŏ, kŭm ưh kơ trŏ jơ̆ dôm kơ tơdrong sŏng sa tih dah dôm tơmam apah đei ‘nŭng hơmet ‘lơ̆ng, mă lei lu bơ̆n lăp gơh hlôi mơn đei mĭnh bơyan Nôel đei tơdrong tơm kơplah lu bơ̆n pơ̆n lăng đêl dôm tơdrong anat anot lăm chăl arih bơ̆n, na măt kơnhăm lăng tơ Yang Yêsu, băt kơnăl kơ Sư trŏ jơ̆ Tơ’ngla Dŏng Pơklaih kơ chăl arih bơ̆n, jơ̆ Kon ‘Lơ̆ng Rơgoh đei pơkă ăn đơ̆ng rơbâu sơnăm sơ̆.

“Đei minh ‘nu adruh gô anăp wă tơpŭ kon drŏ-nglo, Đe anăn kon Sư noh Êmanuel,” Êmanuel wă khan: ‘Bok Kei-Dei oei hơdai hăm bơ̆n.” (Mathiơ 1:23)

Apĭnh đĭ đăng krao khan hơdai: Kơkuh kơ Yang Yêsu, ‘Bok Dŏng Pơklaih kơ kon. Lăm dôm tơdrong anat anot kơ chăl arih, kon băt kơnăl kơ jơhngơ̆m kơdih oei lơ tơdrong rơhông păng ưh kơ hơđơ̆ng. Apinh Kră Yang tơgŭm kon băt chơ chă Ih đĭ jơhngơ̆m, wă kơ kon gơh tơ’bơ̆p Ih, đei Ih pơm tơplih ‘nao chăl arih kon, pơtơm blŭng a đơ̆ng kơdih bơyan Nôel ‘nâu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, tŏk bŏk dôm tơdrong anat anot păng ưh kơ ‘lơ̆ng đơ̆ng teh đak, đơ̆ng kon bơngai păng kơdih chăl arih kơdih kâu, Yang Yêsu oei oei hơdai păng ‘măn ăn tơdrong arih tôm mah kơ dôm bơngai bu chơ chă Sư. Yua kơ thoi noh, lăm bơyan Nôel ‘nâu, Kră Yang wă kơ lu bơ̆n athei bơwei iŏk mĭnh jơhngơ̆m hmă đĕch wă kơ gơh chă păng gơh tơ’bơ̆p Sư; roi weh đơ̆ng dôm tơdrong hrơ̆ng jum dăr păng ‘măn jơnăr wă tơchĕng gah tơdrong Nôel đơ̆ng Sư. Hơdai hăm, kŭm athei lăng dơ̆ng dôm tơdrong anat anot lăm chăl arih kơdih kâu truh lăm bơhngol buăl, apĭnh Sư tơplih ‘nao păng tơgŭm buăl hơmet jơhngơ̆m wă sơng Kră Yang jur.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.