Thaum hnov ob lo lus “ntxhov nyho” tej zaug sawv daws yeej hnov tsis txaus siab. Tib neeg nyiam tej yam uas ncaj ncees, nyob muaj chaw thiab yooj yim dua tej uas ntxhov nyho. Tiamsis, tseeb tiag lub ntiajteb peb tab tom nyob puv npo txoj kev nyob tsis ruaj siab; thiab ntau zaug, twb yog peb lub neej kuj puv npo tej teeb meem ntxhov nyho. Tiamsis tseeb tiag, nyob rau hauv tej ntawd, peb thiaj muaj sijhawm los saib yus lub siab thiab pom Vajtswv txoj kev tshwm ntsej muag nyob rau ntawm txhua yam uas saib cuag li ntxhov nyho ntawd.

Hnub no, yog hnub 18/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Dianne Neal Matthews dhau ntawm Zaj kawm NRHIAV POM VAJTSWV NYOB HAUV TEJ TEEB MEEM NTXHOV NYHO.

“”Ib tug nkaujxwb yuav xeeb tub thiab yuav yug ib tug metub thiab sawvdaws yuav hu nws lub npe hais tias Emanu-ees. Lub npe no txhais hais tias, “Vajtswv nrog peb nyob” (Mathais 1:23).

Ncaj rau ib hnub yav tav su hauv 12 hli, kuv saj tau lub caij ua koob tsheej Tswv Yexus yug meej heev thaum uas kuv nqa tej khoom yuav npaj tu lub tsev saum ru tsev los rau ntawm chav txais qhua. Kuv ob tug menyuam pib qhib tej thawv ntawd los saib muaj dabtsi nyob hauv. Ua ntej uas tawm hauv chav mus ua ib mentsis haujlwm, kuv twb hais kom cov menyuam lawv saib xwb, tsis txhob nqa ib yam dabtsi nyob hauv txog rau thaum tsev neeg npaj tu. Kuv xav tsab zam rau tshob ntoo thiab kuv lub tsev kom du lug, nyob muaj chaw thiab ua ib kaujruam zuj zus.

Tiamsis kuv ob tug menyuam txhoj heev ho tsis xav li ntawd. Ob peb feeb xwb, thaum kuv rov qab los saib, tag nrho txhua thawv khoom muab qhib tas, thiab tej khoom hauv muab pov qhov txhua chaw. Saib ib ncig chav ntawd, kuv hnov cuag li muaj ib tsob ntoo Noel nyuam qhuav vau lawm.

Kuv qw nrov nrov: “Neb saib cov khoom ntxhov nyo no saib!” tiamsis kuv tus ntxhais muaj tsib xyoos, lub hlwb menyuam mos, tsis paub dabtsi: “Dabtsi, tiamsis niam, saib tej ntxhov nyho no kuj zoo nkauj thiab mas?!”

Saib tej menyuam lub qhov muag nyiam heev kuv cia li xav txog lub sijhawm thawj thawj uas Tswv Yexus los yug. Lub nroog Npelehees thaum ntawd yuav muaj kev ntxhov nyho, vim tib neeg los qhov txhia chaw tuaj txheeb npe. Tej zaug Yauxej thiab Malis nkawd kuj xav tsis thoob vim tag nrho tej chaw so tib neeg puav leej so puv tas, txog qhov uas qhov chaw Tswv Yexus pw yog lub dabzaub xwb. Lub sijhawm ntawd saib yeej tsis ci ntsa iab lossis zoo nkauj li ib txwm xav txog hnub koob tsheej Tswv Yexus yug. Vajluskub sau tias:

“Lub sijhawm ntawv Vajntxwv Aukuxataus hais rau cov pej xeem uas nyob thoob plaws txhua lub tebchaws uas yog cov nomtswv Loos kav, kom sawvdaws tuaj sau npe. Thawj zaug uas muaj sau npe no, yog lub sijhawm uas Kuleni-us ua nom kav tebchaws Xilias. Txhua tus nyias txawm mus sau npe rau hauv nyias lub nroog. Yauxej tawm hauv lub nroog Naxales uas nyob pem Kalilais mus rau hauv lub nroog Npelehees uas nyob nram lub xeev Yudas uas thaum ub yug Vajntxwv Daviv. Yauxej mus rau hauv lub nroog ntawd, rau qhov nws yog Daviv xeebntxwv. Yauxej coj Malis tus uas nws twb qhaib lawm nrog nws mus sau npe thiab. Thaum ntawd Malis suab ib plab menyuam. Thaum nkawd tseem nyob hauv lub nroog Npelehees, twb txog caij uas Malis yug menyuam lawm. Malis yug nws tus metub hlob, nws muab khaubncaws qhwv tus menyuam thiab muab tso pw rau hauv ib lub dab zaub, rau qhov tej tsev so, neeg twb so puv tas lawm” (Lukas 2:1-7).

Tiamsis nyob rau lub sijhawm ntawd saib cuag li ntxhov nyho, Vajtswv lub homphiaj ib txhis tau nthuav tawm. Tswv Yexus yog lo lus teb rau lub ntiajteb raug kev txhaum ua rau qias tas thiab puas tshuaj. Vaj Leej Tub tau los rau hauv ntiajteb, hnav cev nqaij daim tawv zoo li tib neeg, los yug rau hauv lub dab zaub nyuj txo hwjchim. Thiab ntawd yog qhov zoo ntawm koob tsheej Tswv Yexus yug: Thaum tus nyob ib txhis los yug ua ib tug menyuam mos.

Ob txhiab xyoo dhau los, lub ntiajteb no cuag li yeej tsis hloov pauv. Tib neeg yeej tseem ntxhov nyho ua rau txhua yam nyob tsis sib haum xeeb, ua rau muaj kev txomnyem thiab tiv ntau txoj kev khwv. Lawv siv zog nrhiav lub neej kom muaj nqis thiab lub neej nplua mias, tiamsis lawv ho tsis mus nrhiav ntawm Tswv Yexus, ho nrhiav txhua yam nyob rau hauv lub ntiajteb no.

Kuv lub siab nco Vajtswv tshav ntuj vim Tswv Yexus tau loj hlob, thiab ua ib lub neej zoo kawg nkaus, tas raug tuag txomnyem saum ntoo khaub lig them tus nqi rau tib neeg ntiajteb. Tomqab sawv rov qab los, Nws rov qab mus saum ntuj ceebtsheej thiab nyob ntawm qhov chaw ntawd, Nws npaj ib qhov chaw nyob ib txhis rau tus uas ntseeg nws.

Ntau zaug twb yog los ntawm tej menyuam lub siab dawb paug thiab tsis paub dabtsi ntawd ho pab rau kuv ntsia pom ib qhov tshiab txog koob tsheej Tswv Yexus yug, thiab ntuas kom kuv nco txog yam dabtsi twg thiaj tseem ceeb. Koob tsheej Tswv Yexus yug tsis yog tsuas yog tsob ntoo lossis lub tsev tau npaj kom zoo xwb, thiab kuj tsis yog tej rooj noj rooj haus ntau lossis tej pob khoom uas qhwv zoo zoo, tiamsis peb tsuas saj tau koob tsheej Tswv Yexus yug muaj nqis thaum uas peb kam ntsia rau tej teeb meem ntxhov nyho hauv yus lub neej, tas tig peb lub qhov muag mus rau ntawm Tswv Yexus, paub Tswv Yexus yog tus cawm seej hauv yus lub neej, yog tus metub tau cog lus muab pub puag thaum ub.

“”Ib tug nkaujxwb yuav xeeb tub thiab yuav yug ib tug metub thiab sawvdaws yuav hu nws lub npe hais tias Emanu-ees. Lub npe no txhais hais tias, “Vajtswv nrog peb nyob” (Mathais 1:23).

Thov caw nrog kuv peb thov Vajtswv ua ke: Tswv Yexus, yog kuv tus cawm seej. Nyob rau tej teeb meem ntxhov nyho hauv lub neej, kuv pom kuv lub siab tseem tshuav ntau yam thiab tsis tso siab. Thov Vajtswv pab kom kuv paub nrhiav Vajtswv ua ntej, kom kuv tau ntsib Nws, tau Nws hloov pauv kuv lub neej, pib ntawm koob tsheej Tswv Yexus yug xyoo no. Kuv thov hauv Tswv Yexus Khetos lub npe, Amees.

Cov kwv tij txhua tus, nyob rau tej teeb meem thiab ntxhov nyho hauv lub ntiajteb thiab lub neej ntawm txhua tus, Tswv Yexus yeej tshwm ntsej muag thiab pub txojsia puv ntoob rau tus uas nrhiav Nws. Yog li, koob tsheej xyoo no, Vajtswv xav kom peb muaj lub siab mos muag kom nrhiav tau thiab tau ntsib Nws; khiav deb tej suab nrov nroo ntws ib ncig thiab tseg sijhawm los xav txog Tswv Yexus los yug. Tib txhij ntawd, kuj yuav tau tig rov qab mus saib tej teeb meem ntawm tus kheej hauv sab ntsujplig, thov Vajtswv hloov dua tshiab thiab pab koj npaj lub siab los txais yuav koob tsheej Tswv Yexus yug.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.