17.12 Amăn Jơ Krao Khan Rim Năr: PƠKAO GÔH BƠYAN NÔEL

Kơplah Nôel truh, jơ̆p jang kơ anih đei pơgong ‘lơ̆ng rŏ păng ‘bâu phu. Lơ bơngai đei atol ŭnh hơdah lơ̆ng, pơdơ̆ng ‘long hơngo, ‘nŭng tơmam păng rơih iŏk dôm lu tơmam ‘lơ̆ng hloh wă pơgong. Na lu bơ̆n nŏng kơ wă pơgong gah ‘ngoaih mă hiơt lê̆ kơ dôm lu tơdrong sĭt gĭt kăl Nôel- noh jơ̆ năr Yang Yêsu ‘Bok Dŏng Pơklaih jŭr tơ teh đak. Sư nhen thoi pơkao tơlang tơ anih teh hrĕng kro, ba ăn tơdrong arih păng ‘bâu phu ăn kơ lu jơhngơ̆m rơhing wă kơ đei tơdrong mơnat đơ̆ng Sư.

Năr ‘nâu, ‘năr 17/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Cathy Irvin kơ̆l ‘bai PƠKAO GÔH BƠYAN NÔEL.

“Inh thoi pơkao gôh tơ tơmăn Sarôn, Thoi pơkao kok jơk tơ lăm thŭng.” (Hơri Hiôk 2:1)

Rim kơ sơnăm kơplah đei lu ‘bai hơri Nôel đei hơri tơyơ noh lăm rim trong tơ pơlei tih, plei nuih inh ‘nă hal hlĭch tơpă. Rŏ lăng yua kơ inh hưch wă kơ tơdrong arih kơplah bơyan phĕt ‘nâu. Inh wă kơ hnam inh đei hơmet ‘lơ̆ng rơgoh mă khan hnam iĕ wă kơ đei ‘blŏk kơ dôm lu tơdrong đêl đei ki sơ̆. Lăp Atol dôm kơ tơlei ŭnh, đei pơgong ‘long hơngo, păng dan dôm lu tơmam ‘lơ̆ng hơ iă, noh jơ̆ nhen đei Nôel wă jê̆ truh tơ ‘măng hnam bơih.

Inh đei pơgong đơ̆ng hrôih, kư̆m đei đơ̆ng blŭng a khĕi jĭt ‘bar, inh đei tơlĕch tơmam wă pơgong bơih, na gô ding truh tơ khĕi mă mônh sơnăm tơ anăp inh plôh hơmet tơmam noh. Dôm lu tơmam đei kơ minh tơdrong kơdih kơdih. Đei kơ sơnăm inh răt pơkao kok đei pơgong đak jơk, lăng ‘lơ̆ng rŏ păng hơdah. Inh dan tơ ‘long hơngo, kơplah bơyan phĕt hlôi, inh plôh ming hơmet ‘măn pơ‘lơ̆ng. Sơnăm tơ anăp, inh đei yua pơkao gôh wă pơgong kơ tơmam ăn kơ buăl juăt, nhen thoi tơ’blŏk kơ jơhngơ̆m chơt hiôk đei đơ̆ng sơnăm hlôi bơih.

Na đei minh sơnăm nai, inh đei lăng ‘bôh minh hơnŭng pơkao gôh, lăng ‘lơ̆ng trŏ kơ bơyan “Nôel”. Inh nhen thoi bơngai ‘nao ‘bôh anih ‘măn tơmam gĭt, pơ’lơ̆ng rơih iŏk lu pơkao, na chĕp ba tơhnam. Lu buăl juăt inh hiĕk, khan kơ inh “‘maih” pơgong dêh bơih. Inh pơm thoi noh ưh kơ yua kơ inh hưch wă kơ pơkao, yua kơ đei tơdrong gĭt kăl phara kơ noh.

Lăm sơ̆p hla bơar ‘Bok Kei-Dei, đei krao kơ Yang Yêsu noh jơ̆ “pơ kao gôh Sarôn”- rup Sư nhen thoi pơkao chăt ‘lơ̆ng rŏ tơ teh hrĕng kro. Rim wơ̆t lăng ‘bôh pơkao gôh, inh đei blŏk kơ anăn noh. Lu đơng pơkao mă khan iĕ mă lei đei ‘bâu phu tơ’blŏk kơ inh gah tơdrong ‘mêm Kră Yang, jơ̆ tơdrong ‘mêm tih dêh.

Tơ kơpal ‘long hơngo inh đei tôm tơmam: rup linh jang, rup kơtuăl teh, sơnglŏng, kư̆m đei pơm truh tơ hơgơp tơmo iĕ. Mă đơ̆ng lu pơkao gôh noh pơm kơ lơ bơngai trĕng lăng đunh hloh kơ đĭ đăng. Bu bu năm ngôi tơ hnam kơ plah bơyan Nôel kư̆m đei pơ ư kơ ‘long hơngo inh ‘lơ̆ng păng jet yua kơ kiơ đei lơ pơkao gôh thoi noh. Na yua kơ thoi noh, inh đei tơdrong wă roi kơ lu sư mơ̆ng, lu pơkao noh ưh kơ sĭ tơmam wă pơgong đĕch, mă jơ̆ nơ̆r tơ’blŏk kơ ‘Bok Dŏng Pơklaih.

Hiôk hơ iă tơpă kơplah minh tơdrong iĕ đĕch thoi noh mă pơih ăn kơ inh đei nơ̆r ră roi gah Yang Yêsu. Inh huay kơ đei tơblang lơ, inh kăl kơ pơma Sư jơ̆ “pơkao gôh Sarôn”, Tơ’ngla jur ba ăn tơdrong arih păng chang hơmĕng ăn kơ kon bơngai. Kơplah pơma tơdrong kiơ noh, inh bôh lăm măt bơngai mơ̆ng sư tơchĕng pơwao ming, nhen thoi sư đei mơn băt kơ đei tơdrong gĭt kăl tơpă lăm bơyan Nôel.

Inh hưch wă tơdrong arih kơplah đei phĕt, mă lei rai wơ̆ ‘lŏ gah đon lui, inh đei mơn ‘bôh Nôel ưh kơ sĭ bơyan pơgong ŭnh, ‘long hơngo, đei tơmam lơ dah đei tơmam sa ‘lơ̆ng. Tơdah ưh kơ pơ’lơ̆ng, tơm kơ đơ̆ng lu tơmam lăng ‘lơ̆ng hơ iă noh pơm kơ lu bơ̆n hiơt kơ bơyan phĕt ‘nâu. inh ưh kơ wă dui ba inh năm tơ tơdrong maih wă kơ răt tơmam dah pơting hnam hăm đe bu pơgong ‘lơ̆ng hloh. Inh wă kơ dôm lu tơmam lăm hnam inh, đơ̆ng ŭnh truh tơ pơkao gôh, na inh ‘blŏk tơ ‘bai hơri “Hloh kơ đĭ đăng” đơ̆ng bơngai pơcheh Paul Baloche păng LeBlanc:

“Dôm kơ lu pơkao gôh đei juă pơ hĕch tơ hơnă teh,
Sư lôch tơplih, yua kơ ‘mêm kơ kon hloh kơ tôm tơdrong.”

Tơdrong ‘mêm noh jơ̆ jrŭ sa tơpă – adrô̆ sư chu pŭ iŏk tôm tơdrong ơh sơ’ngon, tơjur kơdih tơ ala, yua kơ wă dŏng pơklaih inh. “Pơgao gôh Sarôn” juă pơ hĕch tơ teh hrĕng kro tơlăm the teh đak âu wă kơ tơ anih noh đei tơdrong ‘lơ̆ng noh đei arih anao.

Yua kơ thoi noh, inh huay kơ mơlâu kơ tơ’bôh đon lui đơ̆ng lăm tôm tơdrong iĕ. Hăm inh, dôm kơ lu pơkao tơ kơpal ‘long hơngo păng hơgơp tơmo iĕ bơ̆t tơm anih mum hnam noh jơ̆ tơ’bôh inh ư ang kơ Kră Yang. Noh ưh kơ sĭ pơm kơhnam rai ‘lơ̆ng hloh, mă pơm kơ jơhngơ̆m inh rai hơđơ̆ng hloh, inh mơn ‘bôh pơchrang hơdah noh oei tơ’blŏk kơ inh Yang Yêsu ‘Bok Dŏng Pơklaih jơ̆ tơdrong Hơdah tŏk bŏk măng mu.

Tơdah đei tơdrong kiơ tơgŭm buăl ‘blŏk kơ Sư, nhen thoi tơmam wă pơgong, đei bai hơri, dah ‘bâu phu ŭnh jrĕnh Nôel. Athei ‘nĕ kơ mơlâu wă tơ’bôh ăn kơ lơ bơngai. Athei ăn kơ tơdrong noh jing nơ̆r kơdranh đơ̆ng buăl ăn kơ bơyan phĕt ‘nâu. Yua kơ Nôel ưh kơ sĭ hơmet hnam đĕch, mă wă kơ đei dan Kră Yang tơ kơpal lăm jơhngơ̆m rim ‘nu kon bơngai.

Wă băt kơ kiơ, đơ̆ng lăm tơdrong iĕ thoi noh, minh pôm pơkao gôh, minh kơ ‘bai reh brŏ, dah tơdrong hơdah ‘lơ̆ng rŏ, gô đei bơngai bu noh sơng iŏk ‘Bok Dŏng Pơklaih mă lu sư tam mă băt.

Apĭnh đĭ đăng krao khan hơdai: Kơkuh kơ Yang Yêsu ‘Bok Dŏng Pơklaih, kon bơnê kơ Ih yua kơ Nôel Ih tơ jur Ih tơ ala wă ăn kơ kon đei tơdrong arih. Apinh tơ’blŏk kơ kon huay kơ hiơt dôm lu tơdrong tơpă kơ bơyan Nôel âu. Dôm lu tơdrong kon pơm, apinh tơgŭm kon ling lang lăng tơ Ih, wă kơ đơ̆ng kon, bơngai nai ‘bôh tơdrong ‘lơ̆ng păng tơdrong ‘mêm mơnat jrŭ să đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, buăl đei dôm lu tơdrong ‘lơ̆ng rŏ gah ‘ngoaih pơm kơ kơdih hiơt kơ dôm lu tơdrong gĭt kăl tơpă kơ bơyan Nôel ưh? Lăm bơyan phĕt ‘nâu, athei ‘măn jơ tơ ‘blŏk kơ kơdih blŏk kơ Yang Yêsu jơ̆ tơm kơ tôm tơdrong chơt hiôk păng tơ’bôh tơdrong chơt hiôk noh ăn kơ bơngai jum dăr. Sư jơ̆ pơkao gôh tŏk ‘bŏk teh hrĕng kro, jơ̆ tơdrong chang hơmĕng ăn kơ kon bơngai ơh sơ’ngon. Dôm kơ lu tơdrong jum dăr, hơpơi kơ ‘Bok Dŏng Pơklaih ‘nao noh jơ̆ tơdrong ‘lơ̆ng hloh kơ đĭ đăng mă bơ̆n ‘mêm kơ eng, jơ̆ tơdrong ‘nă hal ăn kơ teh đak lăm bơyan Nôel ‘nâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơp dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.