Nôel đei tơ’blŏk thoi kơ bơyan tơdrong hiôk chơt, kơ hơdah păng nơ̆r hiĕk. Mă lei tơpă, ưh kơ trŏ bu lăm lu bơ̆n kŭm ‘bônh kơ gơh mơn đei tơdrong ‘noh. Mưh lăp, tŏk bŏk dôm kơ re đơ̆ng brŏ reh păng nơ̆r hiĕk pơma tăp dăr, jơhngơ̆m lu bơ̆n oei gleh trăp yua kơ dôm tơdrong ơh sơ’ngon, pơmat tat, hăm lơ tơdrong ưh tam mă tôm mah. Rŏ lăng trŏ lăm dôm jơnăr rơdu păng măng mu hloh, lu bơ̆n kăl kơ ăn jơhngơ̆m kơdih wă băt kơnăl khan Kră Yang oei ling lang tơpăt, păng Sư ưh kơ đei layơ achăng lu bơ̆n.

Năr ‘nâu, ‘năr 16/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Elaine Creasman kơ̆l ‘bai KƠ‘BANG SŎNG SA ĐƠ̆NG TƠDRONG ‘LƠ̆NG TƠPĂT KRĂ YANG.

“Lu bơngai ‘lơ̆ng tơpăt đei lơ tơdrong pơmat-tat truh. Mă-lei Kră Yang dŏng pơklaih đĭ tơdrong noh.” ( Hơriso 34:19)

Bơyan Nôel sơnăm sơ̆, lăm jơ sŏng sa hiôk chơt hăm bôl buăl, inh đei dơ̆ng kơtă lăm anih hnam chă bơyơ̆ng.

Tơ’ngoaih jơ̆ nơ̆r hiĕk pơma ơ̆r ăr, mă lei lăm jơhngơ̆m inh đei gleh trăp yua kơ hnam dơnŏ ‘nao đei tơdrong truh. Lăm kơplah ‘noh, mĭnh tơdrong tơchĕng so sơ̆ mă juăt đei ‘blŏk lăm đon tơchĕng: Rŏ lăng chăl arih lu sư đei Kră Yang tuh ăn pŭn hiôk hloh kơ inh. Rŏ lăng Sư ‘mêm mơnat kơ lu sư hloh kơ inh.

Na dôm nơ̆r pơma ưh kơ ‘lơ̆ng đei kơtơ̆ng lăm kơ̆l inh, dôm lu nơ̆r jô̆ yoch mă inh đei kơtơ̆ng loi hrĕng wơ̆t: “E ưh kơ đei ‘lơ̆ng tơpă kiơ ôh”, “Đĭ đăng jơ̆ tơdrong glăi đơ̆ng e”, “Chăl arih e răm ‘băm đĭ bơih, ưh pă đei trong ayơ wă gơh dŏng dơ̆ng bơih.”

Mă lei lăm jơ ‘noh hloi, tŏk bŏk hrơ̆ng hreng lăm jơhngơ̆m, inh mơ̆ng kơtơ̆ng nơ̆r Kră Yang mơmơnh: “Athei hiôk sơng iŏk tơdrong tơpăt đơ̆ng Inh.”

Lăm kơplah jơ ‘noh, inh băt Kră Yang oei tơ’blŏk kơ inh pơdơh, ngơk lăng tơ kơpal, păng ‘blŏk dơ̆ng đĭ đăng dôm tơdrong kiơ Sư đei pơm lăm chăl arih inh.
Inh tơchĕng đei mĭnh kơ’bang sŏng sa tih, ‘bĕnh kơ dôm tơmam sa ‘lơ̆ng tơplih kơ đĭ đăng dôm tơdrong Kră Yang đei pơm kơ inh. Na inh kơtơ̆ng thim minh nơ̆r tơ’blŏk pơ’lơ̆ng mă lei gĭt jrŭ: “ ‘Nĕ kơ sơ’ngon yua kơ dôm tơdrong kiơ ưh kơ đei tơ kơpal kơ’bang. Athei băt bơnê păng hiôk hăm dôm tơdrong kiơ oei đei.”

Inh dơ̆ng hreh tŏ sĕt, wă kơ dôm nơ̆r ‘noh ‘blŏk jrŭ lăm jơhngơ̆m inh. Kơplah yak năm, inh tơpă sơng iŏk jơ năr oei hơdai hăm dôm lu bôl buăl mă ‘mêm. Tơdrong mơlŏu păng ơh klai hiong đĭ, tơplih kơ noh jơ̆ tơdrong hiôk chơt păng tơdrong hiôk hian.

Kơplah truh tơ jơ klah song krao khan, inh roi kơđeh gah tơdrong kơdih inh păng đei đĭ đăng krao khan tơgŭm. Đơ̆ng rŏng kơ noh, inh hơdai lăm nơ̆r hiĕk păng hiôk chơt hơdai hăm dôm lu bơngai juăt tơpăt. Kơplah hơri hơdai “ ‘Bai Hơri Nôel,” tơpă inh mơn đei tơdrong pŭn hiôk noh lăm jơhngơ̆m.

Tơdrong hlôi mơn đei ‘noh pơm kơ inh băt kơnăl kơdih ngăl ‘bônh kơ huŏng lăm tơdrong pơhlŭ kơnhăm lăm dôm tơdrong kơ’bah lăm chăl arih, tơplih yua kơ băt bơnê đơ̆ng lơ tơdrong pŭn hiôk Kră Yang đei ăn. Păng tơdrong ‘noh lăp chông ba inh truh tơdrong ơh sơ’ngon, phŏ kŭm ưh pă đei hơmĕng.

Kơplah brok tơhnam, inh thar ‘blŏk truh kơ Nơ̆r ‘Bok Kei-Dei inh đei đŏk: “Lu bơngai ‘lơ̆ng tơpăt đei lơ tơdrong pơmat-tat truh. Mă-lei Kră Yang dŏng pơklaih đĭ tơdrong noh” (Hơriso 34:19).

Inh đei lăng ‘bôh lăm lu sơ̆p tơblang nai, nơ̆r “pơmat-tat” đei tơ’bôh jing “tơdrong ưh kơ tơproh,” “tơdrong kơnê̆,” “pơmat,” “tơdrong truh.” Păng inh băt kơnăl kơdih ngăl lăp kơnhăm lăm “pơmat-tat” na hiơt kơ mĭnh pah lăm trong ‘nâu: “Kră Yang dŏng pơklaih đĭ tơdrong noh.”

Inh pơtơm chih tơlĕch dôm kơ “pơmat-tat” mă Kră Yang đei dŏng pơklaih inh hlôi kơ ‘noh. Rai chih, inh rai băt kơnăl khan dôm tơdrong chih hơmet ‘nâu gơh dui kơjung ưh kơ tôch.

Sơ̆p chih ‘noh đei ‘măn lơ tơdrong yoch mă Kră Yang đei dui inh lĕch hlôi. Păng kơplah tơchĕng gah tơdrong ‘noh, inh ‘bôh jơhngơ̆m kơdih phyơl hloi. Dah Sư đei dŏng inh, na Sư kŭm gô dŏng dôm lu bơngai inh ‘mêm hlôi kơ tơdrong pơdăr tơdrong yoch đơ̆ng lu sư.

Bơyan Nôel ‘nâu, inh tơpă ‘maih “hơ oei lăm kơ’bang sŏng sa” mă Kră Yang đei hơmet ‘măn kơ inh- kơ’bang đơ̆ng tơdrong tơpăt Sư. Inh ‘maih yak hơdar wă lăng đêl păng băt bơnê yua kơ đĭ đăng dôm tơdrong ‘lơ̆ng tơpăt Sư đei pơm, dôm lu anih măng mu mă Sư đei chông trong inh lĕch hlôi.

Dôm “pơmat-tat” oei ‘bơ̆t doh ah? Inh lui kơ Kră Yang oei bơ̆jang. Păng inh rôp chĕp kơjăp iŏk nơ̆r pơkă lăm Êphêsô 3:20:

“Bơnê kơ ‘Bok Kei-Dei Kră Yang mơsêh tăp pang mơyang tăp dăr tơgŭm bơ̆n lơ hloh kơ đêl bơ̆n apinh, lơ hloh kơ đêl đon bơ̆n tơchĕng.”

Đei dôm kơ tơdrong inh ling lang lui tơpă: tơdrong tơpăt đơ̆ng Kră Yang ling lang kơjăp, tơdrong ‘mêm mơnat Sư ‘măn ăn kơ inh ưh kơ layơ tơplih mă tơdrong đei thoi yơ, păng Sư ling lang oei hơdai inh.

Lăp kơdih 3 tơdrong tơpăt ‘noh đĕch kŭm tôm ăn kơ inh hiôk chơt ‘nă hal lăm bơyan Nôel ‘nâu!

Apĭnh đĭ đăng krao khan hơdai: Kơkuh kơ Kră Yang, tŏk bŏk dôm năr hăt hot hơmet kơ phĕt ‘blŏk Nôel, apinh tơgŭm kon pơdơh wă sơng iŏk Ih tơpă. Ưh kơ sĭ lăm tơdrong hiôk chơt, mă hăm lăm dôm anih rơdu tơrăn, hli tơrơ păng ơh sơ’ngon hloh đơ̆ng kon. Bơnê kơ Kră Yang yua kơ Ih oei ling lang tơpăt, oei ‘mêm mơnat kơ kon mă kon lơ wơ̆t pơ̆k huŏng păng ngĭl ngŭl kơ tơdrong ‘mêm ‘noh. Apinh ăn kơ jơhngơ̆m kon ‘bĕnh blai tơdrong băt bơnê, ăn kơ kon ưh pă lăng lăm tơdrong kơdih ưh tim mă đei, mă lei hiôk chơt pơ ư-ang yua kơ Kră Yang oei oei bơ̆jang lăm chăl arih kon hăm tơdrong ‘mêm mơnat ‘lơ̆ng tơpăt đơ̆ng Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng buăl kŭm oei tơ’bơ̆p mĭnh bơyan Nôel ưh kơ thoi chang gô, hăm dôm tơdrong ơh sơ’ngon tim mă klaih păng dôm lu nơ̆r krao khan đei đunh ưh kơ đei tơl tơwih. Mă lei athei pơdơh tŏ sĕt wă lăng cheng “kơ’bang sŏng sa” chăl arih bơ̆n: rim kơ dui jơhngơ̆m rim năr buăl oei arih, băt dôm wơ̆t Kră Yang đei bơwei păng dŏng pơklaih buăl lĕch hlôi đơ̆ng măng mu- đĭ đăng đei jơ̆ pơm kơdranh pran kơtang tơ’bôh tơdrong ‘lơ̆ng tơpăt Sư. Păng Sư oei oei bơ̆jang, oei oei chih pơtrơp hơ’mon kơ buăl hăm tơdrong ‘mêm mơnat ưh kơ đei tơplih. Athei lui gơnang anih tơpăt đơ̆ng Sư, wă kơ tơdrong hiôk chơt Nôel tơpă đei rŏu tơiung lăm jơhngơ̆m buăl năr ‘nâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.