Nôel jơ̆ bơyan ‘nă hal, hiôk hian kơplah teh đak đei hiôk chơt đei brŏ re ŭnh pơgong dreng drao, brê bra. Mă lei dah jum dăr bơngai tơpôl hiôk chơt truh tơ dang yơ, kư̆m đei lăm jơhngơ̆m lu bơ̆n oei đei mơn kơ rơhông hlĭch tơpă. Rŏ lăng jơhngơ̆m ‘blŏk kơ minh ‘nu bơngai lôch bơih, dah sơ’ngon pă đei hơđơ̆ng yua kơ dôm tơdrong jang tam mă keh. Noh jơ̆ yua kơ lu bơ̆n ling lang oei lăm măng mu ưh kơ ngơk lăng tơ sơ’nglŏng Wŏng Tar pơchrang hơdah hơdong: tơdrong hơdah ‘Bok Dŏng Pơklaih oei pơchrang lăm kơplah măng mu, đei tơtŏ đơ̆ng lăm mum măng mu, chhŭt đak măt đơ̆ng lăm jơhngơ̆m.

Năr ‘nâu, ‘năr 15/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih kơ̆l ‘bai LĂNG TƠGAH SƠNGLŎNG WŎNG TAR HƠDAH HƠDONG.

“Yêsu khan dơ̆ng thoi âu: “Inh Yêsu, Inh wơh linh jang ‘lơ̆ng năm tơbăt ăn kơ lu iĕm mă lui kơ ‘Bok Kei-Dei tơ rim anih dôm lu tơdrong âu. Inh Kon Sâu Đawit, Inh pơchrang kơ iĕm hơdah thoi sơnglŏng wŏng-tar.” (Tơdrong Tơ’bôh 22: 16)

‘Bôh thoi tŭk pơge wă hiong hach kơplah ‘năr wă hơdah, “bơyan Nôel” lăm inh kư̆m hiong pă đei đơ̆ng dang yơ. Mă lei, inh oei adrin mơ̆t tơ hnam ‘măn tơmam, iŏk dôm tơmam đei ‘măn đơ̆ng bơyan Nôel sơnăm sơ̆. Lăm hnam đei ‘bâu phu ‘buh ‘bĕng ‘băt ‘lơ̆ng, hăm ‘bai hơri ư ang “Măng Hơđơ̆ng” đei pơih brŏ re mơ̆ng hiôk tơpă, na inh hơmet pơgong tơmam wă sơng iŏk bơyan Nôel truh.

Inh dan bơng ‘nhĕt wă pơma tơ hlôh ăn tŏk bŏk anih tơmoi, na ba ăn kơ jơ̆p anih: ‘long hơngo păng ŭnh pơgong chơchêr chơchar, lu ‘long hơngo păng gơwang jơk, lu tơpu kơthơ atol jơ̆p kơ anih lăm hnam. Hnam hơdah hơdong, ‘bĕnh kơ hiôk lơ̆ng lăm bơyan Nôel.

Inh iŏk lu tơmam inh juăt kơ pơgong: dôm kơ tơmam iĕ ‘nŭng hăm hla bơar gôh, lu tơpu kơthơ so đơ̆ng lu kon inh, păng lu tơmam pơm ngôi lu kon inh đêl đei hơtol tơ ‘long hơngo dôm kơ sơnăm adrol ki sơ̆. Inh atol ming dôm kơ lu tơmam, truh tơ tơmam mă đei chih anăn kon drŏ nglo inh anăn sư – Joe. Kơplah noh, đak măt inh lĕch ro. Inh dan tơmam noh tơ kơtơh inh, mơn kơ rơhông păng chhŭr nuih.

Đei đăm sơnăm hlôi bơih đơ̆ng năr Kră Yang krao Joe brŏk tơ Sư. Đăm sơnăm, tơdrong ‘mêm mơnat Kră Yang đei pơlung jơhngơ̆m chŭr nuih inh. Na kư̆m đơ̆ng chhŭr nuih noh tơ’bôh kơ inh tôm tơdrong tih hloh.

Lơ kơ sơnăm adrol ki sơ̆, kơplah pêng ‘nu kon inh oei ‘lơ̆p, inh pơm đĭ jơhngơ̆m hơmet kơ bơyan Nôel tôm tơdrong wă kơ lơ̆ng – ‘long hơngo mă ‘lơ̆ng ‘mơ̆i, tôm tơdrong ‘lơ̆ng ngăl. Yua kơ thoi noh, lăp minh pôm kơ’bŏng ŭnh ưh kơ hơdah, inh kư̆m blĕk pă hiôk bơih. Inh ngăl adrin, hơmet… na hơmet rai đunh rai blĕk hloh.
Ưh kơwao tơpă! inh kơnhăm kơ kơ’bŏng ŭnh răm bơih mă hiơt kơ kơ’bŏng oei hơdah tơ kơpal kơnhŏng ‘long hơngo. Tơdrong arih kư̆m thoi noh, inh hrăn kơ hơmet “kơ‘bŏng ŭnh” răm bơih: lu tơdrong pơgơ̆p đĭ răm pơchah, lu proh hơmet ưh kơjing… mă hiơt kơ Sơnglŏng hơdah hơdong tơpă: ‘Bok Krist, Kră Yang dŏng pơklaih inh – Tơ’ngla đei yua kơ chăl arih inh.

Kơplah jơhngơ̆m rơhông pă đei kiơ wă tơ’bĕnh, na tơm kơ đơ̆ng “sơ’nglŏng đei pơlung” đơ̆ng thoi noh na. Kơplah chhŭr nuih tơgar iŏk jơhngơ̆m hiôk chơt lăm bơyan Nôel, tơm kơ đơ̆ng “Sơnglŏng ‘mêm mơnat” noh đei pŭn hiôk ‘nao. Na kơplah đei jĭ jăn, đei tơdrong kơnê̆ truh pơm kơ lu bơ̆n hli, na đei “sơnglŏng bơwei lăng” noh gô pơchrang tơdrong chang hơmĕng kơ năr dơning ‘lơ̆ng rŏ.
Noh jơ̆ lăm minh pôm Sơnglŏng – Sơnglŏng ưh kơ đei layơ pơdơh kơ pơchrang tơdrong chang hơmĕng, tơdrong hơdah hloh kơ tơdrong hlôh wao kon bơngai.
Hrei âu, kơplah hơtol tơpu kơthơ đơ̆ng Joe tơ ‘long hơngo, inh huay pă sơ’ngon thoi kơ adrol ki sơ̆ bơih. jơhngơ̆m inh đei ‘blŏk kơ lu tơdrong sơ̆ noh – nơ̆r hơnul hiĕk, đei kuăr ‘mêm dih băl, păng sư đei chŭm inh.

Nă inh đei hlôh, yua đơ̆ng tơdrong noh na ‘Bok Kei-Dei đei krao Kon Sư noh jơ̆ “Sơnglŏng Wŏng Tar hơdah hơdong” – Tơ’ngla pơchrang tơ lăm măng mu, chhŭt đak măt, păng pơgơ̆p lu tơdrong lu bơ̆n ưh kơ gơh hơmet kơdih.

Apĭnh đĭ đăng krao khan hơdai: Kơkuh kơ Kră Yang mă ‘mêm, Ih jơ̆ Sơnglŏng Wŏng Tar pơchrang kơ chăl arih kon. Kon bơnê kơ Ih yua kơ tơdrong hơdah Ih ưh kơ layơ tôch, mă kơplah tơdrong arih kon đei măng mu. Kră Yang ơi, tơplih kơ kơnhăm tơ chhŭr nuih hiong răm kơdih, apinh tơgŭm kon lăng tơ Ih, jơ̆ Tơ’ngla pơklaih kon, pơlung kon păng ba ăn tơdrong chang hơmĕng ‘nao ăn kơ kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, rŏ lăng Nôel sơnăm ‘nâu ưh kơ hiôk ‘lơ̆ng thoi kơ lu bơ̆n chang hơmĕng. Rŏ lăng lu bơ̆n đei bơngai bơ̆n ‘mêm lôch bơih, ưh kơ đei tôm tơdrong hiôk chơt, dah ưh kơ đei layơ đei lu tơdrong đêl oei wă pơm mă tam mă jing. Na kăl kơ lu bơ̆n gơnang kơ đơ̆ng Yang Yêsu, na bơ̆n oei đei tơdrong hơdah, oei đei hơmĕng, na oei đei tơdrong bơ̆n yak năm tơ anăp. Athei ăn kơ Sơnglŏng Wŏng Tar hơdah noh chông ba trong lu bơ̆n hăm tơdrong hơdah ‘mêm mơnat, pơklaih, chông ba lu bơ̆n truh tơ jơhngơ̆m hiôk chơt khŏm khŏm, ưh kơ đei layơ tôch.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.