Ngai Yang Lik Ling là kơnhai chơ hợp dờng, tú jơh ală lơgar ơm tơm bơta hon chờ bal mơ ntas kơni niam lơbơn mơ bơta àng đèng di. Mơya bulah gut dar gơs bơta hon chờ kar lơi, mơ tơm nus he di kung găm geh bơta ngêt ngớt. Rgơi la tài bơh he kah tus dô na ưcau neh sang rài, hala bơta noat mrêt roh ring lơngai digul ală bơta he ò rgơi lơh sir. Hớ là tài bơh bol he kứ ơm sùm tơm bơat klăm jơngo mơ húi tơnggơr sền di Sơmañ bìng gơcrà àng drim: bơta àng Bơtau dong Klas di găm pơnđăng sol digul măng klăm jơngo, nàng sol pơnđăng di tiah jơngo, jut jơh dà mat tơm nus

Ngai do, ngai 15/12/2025, Bơta Hòi Dan Kòp Ngai dan jà ală ồng mò oh mi kơlôi sơnưng bal Jơnau Yàng bơh tơnggume: WET NUS GƠRÊ MƠ SƠMAÑ BÌNG GƠCRÀ ÀNG DRIM.

“Añ la tòm ryas mơ la kòn sau Dabit dê, la sơmañ bìng gơcrà àng drim.”(Yal Tơlik 22:16)

Gơlơh be tuh tơm ang drim tú mattơngai lik, “ bơta hon chờ ngai Yang Lik Ling” tơm nus añ bơh tú lơi neh ò găm gơs. Bulah be hớ, añ kung mut tơm hiu đam nàng ai jơh ală phan neh dap bơh ngai Noel nam lài. Tơm hìu gơs bô ban, băl mơ ntas kơni khà chờ “ Măng Lơngai”, añ sơn tơm broă pơka ngai Yang Lik Ling rơp tus in.

Añ neh ơn bòng nhớt lơh nền digul ơdú wă nak, gen pơka ală chi nho mơ se đèng gut dar, ală đèng drinh brồng mơ phan pơka, bar pe nơm thiệp ngai Yang Lik Ling yồng gut dar hìu. Hìu gơlơh be àng gơcrà ngan, bing tơl bơat chơ hợp ngai kơn gơboh.

Añ neh ai ală phan pơka mơng ơs: ală phăn neh klơm mơ sră brồng, bar pe nơm thiệp yau kon di, mơ ală phan kơnhơl kon di nàng yồng hơ đăng chi nho bơh nam lài or. Añ neh yồng ală phan hớ, dô nơm lài, tian gơs di phăn gơs cih mat kon klau añ di – Joe. Tú hớ, dà mat añ gơ hor. Añ neh kup kớ phan dệt hớ di tơh, nus añ gơlơh moat jrum ngan.

Pram nam neh rlau bơh di ngai Yang hòi Joe rê mơ Yang. Pram nam, hìu như añ ò găm tai bơta nhoh kơnnhal kon di. Pram nam, nus kờn nđac Yang di jut sang bơta moat jrum tơm nus añ. Mơya bơh bơta moat jrum hớ neh dong añ bàñ ală bơta dờng rlau.

Oă nam bơh lài or, tú pe nắ kon găm dệt, añ neh ơn jơh nus nhờm nàng lơh gơs ngai Yang Lik Ling lik gơs niam rlau jơh -chi nho niam ngan, jơh ală bơta la wil tơl. Gen tàng be hớ, ming la dô nơm đèng dệt ò àng gen kung lơh añ in sơ ệt sờ êl. Añ kứ giga, neh hộ, gen lơh wơl, sền wơl ală se điện, bơtơl lơh wơl tus di wil tơl….mơ sơ lơ gơhao gơjran.

Pơngơl gơla ngan! Añ neh sền nề nế di đèng ò àng tai mơ húi sơman àng gơcrà hơ đăng chi nhô. Tơm rài kis he di kung be hớ sơl, añ kư lơh wơl sùm ală “ đèng” neh chớt: ală bơta neh roh rùi, ală bơta rơn dap ò sir….mơ húi sơmañ bìng gơcrà ngăn: Bơtau Krist, Bơtau Dong Klas añ di – Bơtau ai gơtha rài kis an in.

Tú nus nhờm he gơlơh ngệt ngài mơ kơp kờn geh bing tơl, ngan la “ sơmañ pơn dờm pơn iang” hớ lơh he in geh bing tơl. Tú bơta moat jrum gơ lơh be ai jơh bơta chơ hợp ngai Yang Lik Ling di, gen bơh “sơman kờn gơboh” hớ ai he in bơta hon chờ pa. Mơ tú kọp ji, gơlong bol glar tus lơh he in moat jrum, gen “ sơman khin cha” hớ rơp sol pơn đăng di bơta kơp gơn tơm ngai rơp tus.

Hớ là dô nơm Sơman – Sơman ò tú lơi chớt bơta kơp gơn, bơta àng pha rlau mơ ală bơta git wă kon mơnus di.

Jơ do, tú an neh yồng thiệp Joe di hơ đăng chi nhô, an ò găm tai nus moat jrum be lài or. Nus an di geh bing tơl bơh ală kirsơnre- bơta chơ hợp, bơtacop să kon an di.

Mơ an dợp git la, bơh ală bơta hớ mơ Yang Tơm Trồ neh hòi Kon Yang di la “ Sơmañ bìng gơcrà àng drim” – Bơtau sang tơlik jơh bơta klăm jơngo, jut jơh dà mat, mơ lêr jơh ală bơtaa he ò rgơi lơh wơl is

Dan jà bol he dô nùs bal tòm bơta hòi dan: Khoai Ynag kờn gơboh, Yang la ơmañ bìng gơcrà àng drim sol pơn đăng tơm rài kis kon di. Kon ưn ngai Yang bơh Yang là bơta àng ò tu lơi chớt, jơl jơh di tú rài kis kon di ơm tơm bơta klăm jơngo. Ơ Yang, dăn Yang ai kon in git ò wet sền di bơta moat jrum roh rui mơ git wet sền di Yang, la Bơtau rgơi nàng sơm bời, pơn dờm pơn iang mơ ai bơta kơp gơn pa kon in. Kon jơh nus hoi dăn tơm Sơn Đăn Yang Jesu Krist, A-men.

Ơ ală ồng mò oh mi kờn gơboh, digơlăn ngai Yang Lik Ling nam do rơp ò wil tơl be he rơp kơp gơn. Digơlăn he neh roh dô nă cau tơm hìu nhắ he di, siau dô bơta chơ hợp, hala ò tú lơi he neh lơh tơl bơta he neh lơh nền. Mơya, dialh he git kơnòm di Ynag Jesu, gen he kứ găm gơs bơta àng, găm gơs bưoat kơp gơn, mơ găm gơs bơta nàng he lot tus. Lời té Sơman bing gơcrà àng drim tề lam bol he bơh bơta àng kờn gơboh, sơm bời, lam hè tus bơta chơ hợp găm sum sum
Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.