Lub Koob Tsheej Tswv Yexus los yug yog lub caij puv npho kev xyiv fab, lom zem, thaum lub ntiaj teb txhua qhov chaw txaus siab – zoo siab sov so rau hauv tej suab hu nkauj mos muag thiab teeb ci ntsa iab. Tiam sis txawm tias ib ncig yuav lom zem npaum cas los, tej zaum hauv yus lub siab tseem muaj ib qho khoob lug txawv kawg li. Qee zaus yog vim nco ib tug twg tau ncaim peb mus lawm tiag tiag, lossis tej qhov txias zias ua rau yus tsis hnov qab siab rau ntawm txhua qhov uas ua tsis tau tiav. Ntawd yog vim peb niaj hnub nyob rau hauv txoj kev tsaus ntuj, tsis nco tsa muag saib rau lub Hnub Qub ci thaum yuav kaj ntug. Txoj kev kaj ntawm Tus Tswv Cawm Seej tseem tab tom ci tuaj lub sijhawm hmo ntuj, ntsiag to, sov txaus rau lub neej uas tsuas muaj kev tsaus ntuj nti, so tej kua muag hauv yus lub siab.

Hnub no, yog hnub 15/12/2025, peb kev Thov Vaj Tswv Txhua Hnub caw tus phooj ywg koj los kawm mloog Vaj Tswv Txoj Lus ntawm lub ntsiab TIG SAIB LUB HNUB QUB CI NTSA IAB.

“Kuv yog Daviv tus xeebntxwv; kuv yog lub hnub qub uas ci ci thaum yuav kaj ntug.” (Tshwm Sim 22:16)

Zoo yam li tej huab cua pib yaj zuj zus thaum ntuj pib kaj, “tej huab cua koob tsheej Tus Tswv Cawm Seej los yug” hauv kuv tus kheej kuj ploj mus thaum twg lawm. Txawm li ntawd los, kuv tseem mus ntsiag to rau hauv chav rau khoom, kuv nqa cov khoom uas tau khaws cia lub caij Nu-ees xyoo tas tawm los. Hauv tsev tau hnov tej pa ncuav tsw ntxim qab kawg, nrog rau suab nkauj ntawm zaj nkauj qhuas vaj Tswv “Hmo Muaj Hmoov Zoo” nrov zoo kawg li, kuv pib nqis tes kho txhua yam txais tos lub caij Koob Tsheej.

Kuv tso lub dab zaub tso hauv plaw chav tsev nyob, dai txhua yam ib ncig: ntoo ciab nrog rau cov hlua teeb ci ci, ncej teeb liab thiab lub kauj ntsuab xiab, ob peb daim ntawd caw koob tsheej dai puv chav nyob. Tag nrho lub tsev zoo li cig ntsa iab, puv npho kev sov siab ntawm lub caij hlub tshua.

Kuv muab cov khoom plig uas pheej siv coj los dai: Cov khoom plig qhwv ntawv liab, cov me nyuam ob peb daim ntawv caw qub, thiab me nyuam cov khoom ua si coj los dai saum tus ntoo ciab ob peb xyoo dlau los. Kuv rov qab dai txhua yam, ib yam zuj zus, mus txog thaum kuv txhais tes nchwv rau qhov khoom uas sau kuv tus tub lub npe – Joe. Lub sij hawm ntawd, kuv lub kua muag cia li poob los. Kuv muab qhov khoom plig ntawd tuav tawv rau ntawm hauv siab, cia li hnov lub siab puv npho kev tu siab.

Twb tau 5 lub xyoo txij thaum Joe mus nrog Vaj Tswv nyob. Tsib xyoo, lub tsev tsis muaj Joe lub suab luag lawm. Tsib xyoo dlau los, Vaj Tswv kev hlub pab kom kuv dlau tej kev mob siab. Tab sis tej kev mob siab pab rau kuv saib pom qhov uas loj dua.

Ntau lub xyoo dlau los, thaum peb tug menyuam tseem me, kuv tau siv tag nrho peev xwm kom ua tau ib lub caij Koob Tsheej (Christmas) zoo tiag tiag – ntoo ciab zoo nkauj heev, txhua yam tiav tag nrho. Yog li ntawd, tsuas muaj ib lub teeb tsis ci xwb, kuj ua rau kuv chim siab. Kuv pheej kho, tshem tawm los, muab kho rau, xyuas cov hlua hluav taws xob, rau siab kho kom tau… thiab sij kho sij ua rau kuv chim siab.

Qhov ntawd ruam kawg li! Kuv tsuas ntsia ntsoov lub teeb uas tsis cig lawm mas tsis nco qab saib lub teeb uas cig ci ntsa iab saum ntsis ntoo ciab. Nyob rau hauv kuv lub neej los ib yam, kuv pheej rau siab kho “lub teeb” uas tuag lawm: cov kev sib raug zoo ua tau tawg tas lawm, cov kev npaj ua uas swb tag… thiab kuv cia li tsis nco qab txog lub Hnub Qub uas ci ntsa iab tiag tiag: Tswv Yexus Khe-tos, kuv Tus Tswv Cawm Seej – Tus Tswv npaj muaj hom phiaj rau kuv lub neej.

Thaum peb lub siab khoob lug thiab nqhis ib yam kom puv npho, yam ntawd yog “hnub qub nplij siab” yuav ua rau yus hnov puv npho. Txoj kev nyuaj siab yuav txeeb tau koj txoj kev zoo siab ntawm lub Koob Tsheej, yog “hnub qub kev hlub” yuav pub txoj kev hlub tshiab rau koj. Thiab thaum koj muaj mob, tej xwm txheej ua rau koj tsis paub yuav ua dab tsi, yog “hnub qub tiv thaiv” yuav ci tuaj rau koj txoj kev cia siab rau tag kis ci ntsa iab.

Qhov ntawd kuj tseem yog tib lub Hnub Qub – Hnub Qub tsis paub tuag ntawm txoj kev cia siab, qhov ci ci ntawm dlau ntawm ntiaj teb tib neeg txoj kev paub.
Lub sij hawm no, kuv dai Joe daim ntawv caw rau saum tus ntoo ciab, kuv tsis hnov muaj yam dab tsi los khuam kuv zoo li yav tas los. Kuv lub siab puv npho txhua yam kev zoo yav dlau los – tej suab luag, sib nqawm, thiab txoj kev hlub ntawm kuv tus menyuam.

Thiab kuv pom tias, twb yog vim qhov no Vaj Tswv thiaj hu Nws tus Tub yog “lub Hnub Qub ci ntsa iab” – Tus Tswv ntiab tawm ntawm qhov tsaus ntuj, so lub kua muag, thiab kho tau rov qab tej yam uas peb tib neeg tsis muaj peev xwm kho tau rov zoo li qub.

Thov caw nrog kuv peb thov Vajtswv ua ke: Vaj Tswv Tus uas hlub tshua, Koj yog lub Hnub Qub ci ntsa iab tuaj rau hauv nyuam yaus lub neej. Me nyuam yaus ua Koj tsaug vim qhov ci ntawm Koj tsis paub tuag, xws li thaum nyuam yaus lub neej tsaus ntuj nti tshaj plaws. Tus Tswv aw, zoo li nyuam yaus niaj hnub nyob nrog txoj kev lwj siab poob siab ntawm nyuam yaus tus kheej, thov Koj pab kom nyuam yaus paub tig saib ntsoov Koj, yog Koj tib leeg xwb thiaj kho tau zoo, txhawb nyuam yaus lub siab thiab pub kev cia siab tshiab rau nyuam yaus. Me nyuam yaus thov hawm thiab qhuas koom siab ntawm Tus Tswv Yexus lub npe, Amen.

Cov kwv tij uas hlub tshua, tej zaum lub Koob Tsheej nyoo no yuav tsis zoo txaus raws li koj lub siab xav los. Tej zaum peb ib tug hlub tau ncaim peb mus lawm tiag tiag, poob lawm ib txoj kev zoo siab, lossis tsis muaj hnub ua tiav yus txoj kev ntshaw uas ua tsis tau tiav. Tiam sis tsuav yog peb tseem muab siab npuab Tus Tswv Yexus, ces tseem tshuav qhov kaj nrig, tseem tshuav kev cia siab, thiab tseem tshuav hom phiaj kom peb mus ntxiv. Cia lub Hnub Qub ci ntsa iab coj peb txoj hau kev ntawm qhov kaj kev hlub, tau zoo nyob kaj siab lug, coj peb mus rau qhov kev zoo siab tag ib txhis, tsis muaj hnub xaus.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.