Nôel jơ̆ bơyan hiôk chơt păng chang hơmĕng. Kơplah tơdrong arih ‘nă hal hăm đei preh brŏ păng đei pơgong ŭnh dreng drao, ‘brê ‘bra jơ̆p kơ anih, lu bơ̆n ‘bônh kơ ngeh dôm tơdrong pah ‘ngoaih noh jơ̆ chơt hiôk tơpă. mă lei buăl hăm băt ưh, chơt hiôk hăm pŭn hiôk tơpă kơ bơyan Nôel noh blŭng a đơ̆ng bơng ‘nhĕt kro đơ̆ng pơlei Betlehem sơnăm sơ̆ noh, anih mă Kră Yang jing bơngai, jur tơ teh đak dŏng pơklaih kon bơngai.

Năr ‘nâu, ‘năr 11/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Kenneth W. Osbeck kơ̆l ‘bai PŬN HIÔK ĂN KƠ KON BƠNGAI.

“Yêsu huai iŏk bơ̆n boih, na mă ‘Bok Kei-Dei tơgŭm kơ đĭ-đăng kơ bơ̆n, mă bơngai Juđê, mă bơngai ưh kơ sĭ khŭl Juđê, noh kư̆m thoi Sư pơkă kơ Abraham bơ̆n sơ̆ khan wă tơgŭm bơ̆n, wă khan ăn kơ bơ̆n Yang Bơhngol ‘Lơ̆ng dah bu lui păng gơnang kơ Sư.” (Galati 3:14)

“Pŭn hiôk ăn kơ kon bơngai” dah “Joy to the World” jơ̆ minh lăm lu ‘bai hơri Nôel đei kơ lơ boa tơ ‘nguơ̆ hiôk. ‘Bai hơri ‘nâu ưh kơ pơma tơ’blŏk kơ lu bơngai wei triu, linh jang ‘lơ̆ng, dah lu bơngai hnhoi sơnglŏng mă pơma ‘bơm kơ đei jơhngơ̆m kơkuh păng jơhngơ̆m ‘nă hal tơpŭ kơ Yang Yêsu. Đunh kơ đơ̆ng jơhnơr, kon bơngai rơhing ‘maih wă lăng ‘bôh ‘Bok Kei-Dei tơ’bôh mă rơđah, păng tơdrong noh đei tơpă kơplah “Yêsu Krist dang nơ̆r ‘Bok Kei-Dei, Sư jur jing kon bơngai. Sư oei hơdai păng kon bơngai bơ̆n. Bơngai bơ̆n ‘bôh Sư gơh pơm tơdrong mơsêh mơyang; Sư ‘noh boih Kon pôm ‘Bok Kei-Dei tơpă; Sư ‘mêm mơnat kơ bơ̆n, pơklaih bơ̆n đơ̆ng tơdrong yoch păng tơbăt ăn kơ bơ̆n tơdrong ‘Bok Kei-Dei tơpă.” (Yôhan 1:14) . Bơyan chang gô Kră Yang jur yua kơ thoi noh jing jơ năr wă kơ lu bơ̆n tơchĕng tơ Yang Yêsu, jơ̆ tơmam tih hloh đơ̆ng ‘Bok Kei-Dei, ăn kơ teh đak âu ‘bĕnh kơ tơdrong yoch.

‘Bai hơri “Pŭn hiôk ăn kơ kon bơngai” đei iŏk pơcheh đơ̆ng Hơriso 98: “Ơ đĭ-đăng teh đak, ôr chơt ‘nă hal bĕ kơ Kră Yang. Hơri chơt hiôk bĕ păng hơri tơ’nguơ̆ bơnê kơkuh bĕ kơ sư, Đak krong wang tap ti bĕ! Kông groi kư̆m wang hơri chơt hiôk bĕ ‘bơ̆t anăp Kră Yang! Yua kơ Sư truh wă sek tơlang kơ teh đak. Sư sek tơlang kơ teh đak hăm tơdrong tơpăt sư, tơpăt hơnơ̆ng. Sư sek tơlang kơ kon pơlei pơla. ( trong 4, 8,9)

Bơngai chih Hơriso 98 tơ’bôh tơdrong hiôk chơt yua kơ ‘Bok Kei-Dei đei bơwei bơngai lui kơ Sư. Sư kư̆m tơ’bôh jơhngơ̆m sư chang gô Kră Yang jơ̆ ‘Bok Kei-Dei kơ teh đak. Mă lei, Isaac Watts, đei pơma tơblang lăm Hơriso 98 kiơ̆ kơ gah Pơgơ̆p pah So, pơma gah tơdrong dŏng pơklaih đơ̆ng blŭng a kơplah Kră Yang jur jing bơngai, jur tơ teh đak thoi kơ kon nge. Sư jur wă dŏng pơklaih lu bơ̆n đơ̆ng lăm tơdrong hiap pơtê̆ đơ̆ng khôi juăt, wă kơ lu bơ̆n đei pŭn hiôk. Sơ̆p hla bơar ‘Bok Kei-Dei chih: “Bơ̆n ưh kơ kĕ ôh kiơ̆ tôm tơdrong juăt ‘Bok Kei-Dei, na trŏ yơh kơ ‘Bok Kei-Dei wă phak bơ̆n – Sơ̆p hla bơar ‘Bok Kei-Dei khan boih thoi âu: “Kon bơngai bu pơm yoch na tơduă kon bơngai phak pơlôch bơngai mă pơm yoch noh atol sư tơ kơpal ‘long – noh kư̆m thoi Sư pơkă kơ Abraham bơ̆n sơ̆ khan wă tơgŭm bơ̆n, wă khan ăn kơ bơ̆n Yang Bơhngol ‘Lơ̆ng dah bu lui păng gơnang kơ Sư.” (Galati 3:13-14)

Mă tơpă, tơdrong tơpŭ kơ Yang Yêsu jơ̆ tơdrong pŭn hiôk tih ăn kơ kon bơngai. Yua kơ thoi noh na ‘Bok Kei-Dei jur jing kon bơngai, wă kơ hlôh tơdrong hiôk chơt păng ơh sơ’ngon lu bơ̆n. Sư ưh kơ ataih mă “jing kon bơngai arih hơdai lu bơ̆n”. Yua kơ đơ̆ng tơpŭ kơ Yang Yêsu, tơdrong pơgơ̆p đơ̆ng ‘Bok Kei-Dei hăm kon bơngai đei tơplih. Huay pă jô̆ yo kơ kon bơngai, jô̆ kon bơngai ‘lơ̆ng tơpăt, đei dŏng pơklaih păng arih hiôk hian hăm ‘Bok Kei-Dei, tôm tơdrong đei noh đơ̆ng Yang Yêsu. Lu bơ̆n pơma kơ chư “pŭn” lăm tơdrong jang dah mŭk tơmam, noh jơ̆ tơdrong pŭn đei pơklaih păng jing kon ‘Bok Kei-Dei.

‘Bai hơri “Pŭn hiôk ăn kơ kon bơngai” blŭng a đei chih kơ̆l ‘bai hơri thoi âu “The Messiah’s Coming and Kingdom” ( tơblang: ‘Bok Mêsi truh păng Dêh char Sư pơgơ̆r), đei chih tơlăm sơ̆p hla bơar hơri Isaac Watts lăm sơnăm 1719. Gah chih gah preh brŏ đơ̆ng Bơngai Lui bơngai Mi anăn sư Lowell Mason. Sư đei jơhngơ̆m chih preh brŏ gah hơri khŭl đei tôm kơ nơ̆r “Pơtao kơ đi đăng pơtao” (The Messiah) đơ̆ng George Frederick Handel, đei pơdah hơri blŭng a lăm sơnăm 1742.
“Pŭn hiôk ăn kơ kon bơngai” đei pơgơ̆p hiôk hơ iă đơ̆ng pêng ‘nu bơngai pha ra kơ jơhnơr: Isaac Watts, bơngai gơh hơgei chih gah tơdrong pơđơ̆k bơngai English lăm jơhnơr 18, Geogre Frideric Handel, hăm bơngai gơh hơgei gah preh brŏ bơngai Đư̆k lăm chăl noh sơ̆; păng Lowell Manson, bơngai chih ‘bai hơri păng thây ‘bơtho bơngai Mi lăm jơhnơr 19. Đơ̆ng lăm jơhngơ̆m ‘mêm kơ Yang Yêsu, minh ‘bai hơri ư ang kơ ‘Bok Kei-Dei đei chih hơri, jơ̆ ‘bai hơri ư ang kơ Kră Yang yua kơ jơhngơ̆m hiôk chơt păng pŭn hiôk tih mă Kră Yang ăn kơ kon bơngai.

Apĭnh đĭ đăng krao khan hơdai: Ơ Kră Yang mă kon ‘mêm, jơhngơ̆m kon ‘bĕnh kơ jơhngơ̆m băt kơ bơnê yua kơ Ih jur tơ teh đak âu wă kơ kon hoei kơ pŭ iŏk tơdrong hiap pơtê̆ lăm tơdrong yoch, mă đei arih lăm tơdrong rơngei păng pŭn hiôk. Đơ̆ng lăm dôm kơ năr bơyan wă sơng iŏk Nôel, apinh ăn kơ kon đei jơhngơ̆m mơn băt kơ tơdrong ‘mêm mơnat đơ̆ng Ih, wă kơ kon arih trŏ kơ anăn jơ̆ kon Ih, ăn kơ kon hlôi mơn đei tơdrong arih pơgơ̆p hăm Ih, păng chă ‘bôh tơdrong pŭn hiôk đơ̆ng Ih ăn kơ tơdrong arih kon lăm tôm tơdrong arih lăm chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, bơyan Nôel sơnăm ‘nâu, rim ‘nu lu bơ̆n ‘nĕ ăn jơhngơ̆m hiơ̆k bơngơ̆t păng hiơt đĭ kơ dôm tơdrong pŭn hiôk tơpă mă bơ̆n đei, noh jơ̆ đei đơ̆ng Kră Yang pơklaih, gơh krao kơ ‘Bok Kei-Dei noh jơ̆ ‘Bă, đei hiôk hian lăm chăl arih ‘nâu hăm tơdrong arih đơ̆ng rŏng ning mônh. Hlôh băt kơ tơdrong ‘nâu, athei arih thoi bơngai đei pŭn hiôk, ưh kơ bơwei pŭn hiôk noh kơ kơdih đĕch, mă athei ră roi kơ đe tơdrong Kră Yang, ră roi gah tơdrong lơ̆ng tơpăt Sư ăn kơ chăl arih lu bơ̆n. Tơdah lu bơ̆n đei pŭn hiôk, wă kơ thoi đing pơtrơp tơdrong pŭn hiôk đơ̆ng pơlei ‘lơ̆ng ăn kơ rim ‘nu bơngai jum dăr kơ bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.