Koob tsheej Tswv Yexus yug yog lub caij ntawm qhov pom kev thiab qhov zoo nkauj txhua qhov puav leej zoo kawg nkaus. Tiamsis, lub koob tsheej Tswv Yexus yug thawj thawj nws tsis zoo li ntawd. Thaum ntiajteb txhawb nqa tej uas zoo, hwjchim thiab muaj zog, ces Vajtswv ho xaiv tej uas qaug zog, me thiab txo hwjchim kom nthuav tawm Vajtswv lub hwjchim. Thiab Tswv Yexus txoj kev hauv ntiajteb no yog ib qhov pov thawj rau qhov ntawd.

Hnub no, yog hnub 12/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Brian Simmons dhau ntawm Zaj kawm NTAWM LUB DAB ZAUB MUS TXOG NTOO KHAUB LIG.

“Tiamsis Vajtswv coj nej los nrog Yexus Khetos koom ib txojsia, Yexus Khetos yog lub tswvyim thiab txojkev ncaj ncees uas Vajtswv pub rau peb, peb thiaj tau los ua Vajtswv haivneeg uas dawbhuv kom peb dim peb lub txim” (I Kauleethaus 1:27-30).

Muaj tej zaj xwm txheej ua rau peb nyiam, tshwj xeeb yog tej zaj xwm uas hais txog “hloov pauv”, cia li los txog tamsim tsis muaj leej twg paub tau. Piv txwv ib tug menyuam kawm ntawv ua zoo, tsis muaj leej twg quav ntsej txog cia li muaj ib tug ntxhais ceev faj txog, tshuav ib tug tub nto npe ho tsis tau xaiv. Lossis muaj ib ntsus kev tsov rog twg ntawd, cov neeg uas tuaj pab tsawg, xav tias ntshai yuav swb, thaum kawg ho kov yeej cov neeg uas muaj hwjchim thiab nplua nuj dua. Lub neej ntau zaug txawv, tiamsis tej yam me thiab tsis muaj zog tej zaug nws siab tshaj tej uas zoo thiab muaj zog.

Peb pom tej zaj xwm txheej zoo li no zoo heev, tej zaug vim nws tsuas tshwmsim nyob hauv lub neej. Rau qhov, tus neeg nplua nuj thiab muaj hwjchim ho yog tus yeej ntau, tshuav cov neeg tsis muaj zog lawv swb ntau yam.

Tiamsis, nyob hauv Vajtswv lub homphiaj tseg rau tib neeg, Vajtswv hloov pauv tej uas ntiajteb swm, ntawd yog tus tsis muaj zog tau txhawb nqa, tus muaj hwjchim raug muab txo nqes, tus khav theeb ntog, tshuav tus muaj tsis txaus ho tau noj tsau npo. Qhov no tau hais txog nyob hauv Malis zaj nkauj: “Nws tsa nws txhais tes uas muaj hwjchim ua kom cov neeg uas khavtheeb tsis sib haum thiab tawg pab tawg pawg. Vajtswv muab cov vajntxwv uas muaj hwjchim txo ntawm lawv lub zwmtxwv, thiab Vajtswv muab cov neeg uas tsis muaj hwjchim tsa rau qhov chaw siab. Vajtswv pub tej zaub mov zoo rau cov neeg uas tshaib nqhis tau noj tsau npo Nws ntiab cov neeg npluanuj khiav mus tes dawb tes npliag” (Lukas 1:51-53).

Teeb meem ntawm “cov neeg uas muaj lub siab xav khav theeb” yog lawv tso siab rau yus tus kheej pauv qhov uas tso siab rau Vajtswv, thiab xav tias yus muaj txaus tsis cheem tsum kev cawmdim lawm. Txoj kev khav theeb no raug suav tias yog kev txhaum, ib yam li Pajlug 16:18 sau: “Kev khavtheeb coj mus raug kev puastsuaj, thiab kev muab hlob yuav pooh ntsejmuag” Vajtswv yog tus yuav txo lawv nqes thiab raws rov qab “mus tes dawb tes npliag”. Tsuas yog tus tus tshaib nqhis Vajtswv xwb thiaj tau noj tsau npo.

Nyob rau Tswv Yexus tiam, cov neeg Yixalayees lawv raug cov neeg Loos caij tsuj. Lawv ua neej nyob qab tswjhwm ntawm cov neeg muaj txiag nplua nuj, muaj hwjchim ntau zaug tseem yog neeg siab hlo. Lawv tos ntsoov tus Mexiyas yuav tshwm los zoo li ib tug vajntwv kav lawv tso lawv dim ntawm lwm haiv neeg kev tswjhwm. Tiamsis tsis zoo li sawv daws tej kev cia siab tos, Tswv Yexus tus Mexiyas tau cog lus muab pub ntau txhiab xyoo thaum ub, ho tau yug rau hauv lub dabzaub, tsis muaj hwjchim, tsis nplua nuj.

Tus Vajtswv uas peb pehawm cuag li nyiam tej uas neeg ntiajteb suav tias tsis muaj dabtsi, me thiab tsis muaj zog, ntau zaug tseem yog ruam. Yog li tej uas Paulus tau sau: “Tiamsis Vajtswv xaiv yam uas neeg xav hais tias ruam kawg nkaus hauv lub ntiajteb no kom cov neeg txawj ntse txajmuag; thiab Vajtswv xaiv yam uas neeg suav hais tias tsis muaj zog hauv lub ntiajteb no kom cov neeg muaj zog poob ntsejmuag. Vajtswv xaiv tej uas neeg thuam, saib tsis taus thiab xav hais tias tsis tseemceeb, kom tej uas neeg xav hais tias tseemceeb puastsuaj mus, Vajtswv ua li no kom tsis muaj leejtwg yuav muaj cuabkav khav tau li. Tiamsis Vajtswv coj nej los nrog Yexus Khetos koom ib txojsia, Yexus Khetos yog lub tswvyim thiab txojkev ncaj ncees uas Vajtswv pub rau peb, peb thiaj tau los ua Vajtswv haivneeg uas dawbhuv kom peb dim peb lub txim” (I Kauleethaus 1:27-30).

Vajtswv siv tej uas tib neeg suav tias ruam los ua kom tiav Vajtswv lub homphiaj cawmdim. Yexus Khetos raug muab ntsia saum ntoo khaublig raws li txoj kev uas Vajtswv siv los cawm tib neeg ntiajteb. Ntawd yog ib txoj kev uas haiv neeg Yixalayees tiam ntawd lawv xav txog, vim lawv tos ib tug vajntxwv muaj hwjchim, nplua nuj, tsis yog ib tug cawm seej ua lub neej txomnyem, tiv ntau txoj kev mob thiab txaj muag. Qhov no ua rau pom tib neeg yuav siv tsis tau yus txoj kev txawj ntse ntawm tus kheej los nkag siab txog Vajtswv.

Twb yog vim txoj kev txawj ntse thiab Vajtswv lub siab nyiam nws siab tshaj tib neeg kev to taub yog li peb thiaj yuav tau tso txoj kev khav ntawm tus kheej tseg. Pauv qhov uas vam khom rau yus lub zog thiab peev xwm, Vajtswv nqua hu kom peb txo hwjchim thiab ntseeg Nws, ib yam li Yakaunpaus ntuas peb tias: “Nej cia li txo nej lub hwjchim tabmeeg Vajtswv, Vajtswv thiaj yuav tsa nej lub hwjchim” (Yakaunpaus 4:10).

Koob tsheej Tswv Yexus yug xyoo no, peb tsis tas yuav nres rau ntawm saib tej teeb cig zoo nkauj lossis kev zoo siab sab nraud xwb, tiamsis cia peb lub siab xav txog Tswv Yexus lub neej txo hwjchim, txog lub dab zaub uas Nws tau yug los, thiab tus ntoo khaub lig uas Tswv Yexus tau ris cawm peb. Dab zaug thiab ntoo khaub lig puav leej yog tej yam uas neeg ntiajteb saib tsis taus, tiamsis ho dhau los muaj nqis nyob hauv Vajtswv lub homphiaj. Peb tau koob hmoov ntau tshaj thaum tau “Tiamsis Vajtswv coj nej los nrog Yexus Khetos koom ib txojsia, Yexus Khetos yog lub tswvyim thiab txojkev ncaj ncees uas Vajtswv pub rau peb, peb thiaj tau los ua Vajtswv haivneeg uas dawbhuv kom peb dim peb lub txim” (1 Kauleethaus 1:30).

Thov caw nrog kuv peb thov Vajtswv ua ke: Tus Tswv Yexus, kuv ua Koj tsaug vim koj tau hlub kuv, yug los ua neeg tuag theej kuv tej kev txhaum. Thov kom kuv lub siab tau ntuas txog Koj lub neej txo hwjchim, ntawm lub dabzaub qhov chaw uas koj yug los mus txog rau ntawm tus ntoo khaub lig koj tau ris vim kuv. Kuv ntseeg tias koj tab tom siv kuv tej kev qaug zog, puas tshuaj thiab txomnyem los cob kom kuv paub ua neej txo hwjchim thiab ntseeg koj dua. Kuv thov hauv Tswv Yexus Khetos lub npe, Amees.

Cov kwv tij, koob tsheej xyoo no, tseg sijhawm tsis yog xav txog Tswv Yexus txoj kev los yug xwb, tiamsis tseem xav txog tag nrho Tswv Yexus lub neej thiab txoj kev txomnyem vim peb. Nws tseg rau koj ib tug qauv txo hwjchim, yog li peb kuj yuav tau txo peb lub hwjchim nqes muab yus lub neej fij rau Vajtswv, paub tias tej kev txomnyem, sim siab hauv lub neej puav leej nyob hauv Vajtswv txhais tes tswj, thiab dhau ntawd, koj kawm paub vam khom Vajtswv lub zog uas muaj hwjchim, pauv qhov uas vam khom rau tus kheej lub zog.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.