Koob tsheej Tswv Yexus yug yog lub caij ntawm txoj kev zoo siab thiab cia siab. Nyob ua ke nrog tej suab nkauj thiab tej teeb cig lam lug qhov txhua chaw, peb yooj yim xav tias sab nraud thiaj yog kev zoo siab tiag. Tiamsis koj puas paub, txoj kev zoo siab thiab koob hmoov tiag ntawm koob tsheej Tswv Yexus yug pib hauv lub dabzaub hauv Npelehees thaum ub, qhov chaw uas Vajtswv los yug ua neeg, thiab los rau hauv lub ntiajteb no cawm tib neeg.

Hnub no, yog hnub 11/12/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Kenneth W. Osbeck dhau ntawm Zaj kawm KOOB HMOOV PUB RAU TIB NEEG NTIAJTEB.

“Thaum luag muab Yexus Khetos dai rau saum tus ntoo khaublig lawm, Vajtswv thiaj foom koob hmoov rau lwm haivneeg uas los ntseeg Yexus Khetos raws li Vajtswv tau coglus tseg rau Anplahas, thiab Vajtswv pub Vaj Ntsujplig rau peb txhua tus uas ntseeg Yexus Khetos raws li Vajtswv tau coglus tseg lawm” (Kalatias 3:14).

“Koob hmoov pub rau ntiajteb” lossis “Joy to the Word” yog ib zaj nkauj muaj lub suab zoo siab tshaj. Zaj nkauj no tsis hais txog cov yug yaj, cov timtswv, thiab cov tub txawg txawj saib hnub qub tiamsis hais txog txoj kev hwm thiab zoo siab thaum Tswv Yexus los yug. Ntau xyoo dhau los, tib neeg ntshaw kom tau ntsia pom Vajtswv nthuav tawm Nws tus kheej kom meej thiab qhov ntawd dhau los ua qhov tseeb thaum “Txojlus ntawd tau los yug ua neeg, nws puv npo txojkev hlub, nws yog qhov tseeb thiab nws nrog peb nyob.” (Yauhas 1:14). Yog li lub caij ua koob tsheej thiaj dhau los ua lub sijhawm cia rau peb xav txog Tswv Yexus yog Vajtswv qhov khoom plig uas loj tshaj, tau muab pub rau lub ntiajteb muaj kev txhaum no.

Zaj nkauj: “Koob hmoov pub rau lub ntiajteb no” Yog muab ntsiab ntawm Ntawv Nkauj 98: “Neeg ntiajteb cia li hu nkauj zoo siab qhuas tus Tswv; cia li hu nkauj qhuas nws thiab zoo siab ua nws tsaug…Tej dej, nej cia li npuaj teg; tej hauv roob, nej cia li hu nkauj zoo siab ua ke tabmeeg tus Tswv, rau qhov nws los kav lub ntiajteb no lawm. Nws yuav kav neeg ntiajteb ntawm txojkev ncaj ncees thiab dawbhuv” (Nqe 4,8,9).

Tus sau Ntawv Nkauj 98 nthuav tawm txoj kev zoo siab vim tus Tswv tiv thaiv Nws haiv neeg. Yawg kuj nthuav tawm txoj kev tos ntsoov hnub uas Nws ua Vajtswv rau tag nrho lub ntiajteb. Tiamsis Isaav Watts, tus sau zaj nkauj “Koob hmoov pub rau ntiajteb”, tau sau raws li Ntawv Nkauj 98 raws li lub ntsiab hauv Vajluskub Tshiab, hais txog Yexus Khetos txoj kev cawmdim. Txoj kev cawmdim pib thaum uas txojlus dhau los ua neeg, yug los ntawm tus menyuam mos. Nws tau los yug cawm peb tso peb dim ntawm txoj kev foom hauv txojcai, kom peb tau txais koob hmoov zoo. Vajluskub sau: “Vajtswv txoj kevcai twb ua rau peb raug foom tsis zoo lawm, tiamsis Yexus Khetos los hloov peb chaw, nws thiaj raug foom tsis zoo; rau qhov Vajtswv txojlus hais tias, “Tus uas raug dai rau saum ntoo, tus ntawd twb raug foom tsis zoo lawm.” Thaum luag muab Yexus Khetos dai rau saum tus ntoo khaublig lawm, Vajtswv thiaj foom koob hmoov rau lwm haivneeg uas los ntseeg Yexus Khetos raws li Vajtswv tau coglus tseg rau Anplahas, thiab Vajtswv pub Vaj Ntsujplig rau peb txhua tus uas ntseeg Yexus Khetos raws li Vajtswv tau coglus tseg lawm” (Kalatias 3:13-14).

Tseeb tiag, Tswv Yexus txoj kev los yug yog qhov koob hmoov loj tshaj uas tib neeg tau txais. Vim yog lub sijhawm uas Vajtswv los yug ua neeg, nkag siab peb tej kev zoo siab thiab kev txomnyem. Nws tsis nyob deb tiamsis twb “dhau los ua sab nqaij tawv thiab ua neej nyob hauv peb”. Los ntawm Tswv Yexus txoj kev los yug ua neeg, txoj kev sib raug zoo ntawm Vajtswv thiab tib neeg tau hloov pauv. Tib neeg tau zam txim, tau suav tias ncaj ncees, tau txais kev cawmdim thiab tau rov qab nrog Vajtswv sib raug zoo, tag nrho tsuas yog dhau ntawm Tswv Yexus. Peb pheej xav txog lo lus “koobhmoov” nyob hauv tej khoom ntiajteb lossis meej mom, tiamsis koob hmoov tiag thiab kev zoo siab tiag loj tshaj yog tau txais kev cawmdim thiab dhau los ua Vajtswv tus menyuam.

Zaj nkauj “Koob hmoov pub rau ntiajteb” thaum thawj lub npe yog “The Messiah’s Coming and Kingdom” (Txhais tias: Tus Mexiyas los thiab lub tebchaws Vajtswv kav) vim tshwm nyob hauv Isaac Watts phau nkauj xyoo 1719. Lub suab taub ntawm zaj nkauj no tau ib tug tub hu nkauj neeg Mekas yog Lowell Mason txhais. Yawg muab ib txhia hauv zaj “Vajntxwv ntawm txhua tus Vajntxwv” (The Messiah) uas yog George Frederick Handel sau tau muab hu thawj zaug rau xyoo 1742.
“Koob hmoov pub rau ntiajteb” yog zaj nkauj sib tov xyaw ntxaws ua ke ntawm peb tug tib neeg muaj peev xwm nyob rau peb tiam sib txawv ua ke yog: Isaac Watts, ib tug tub txawg txawj nkauj neeg Askiv tiam 18; Georgre Frideric Hand, tus tub txawj suab nkauj neeg Đức nyob nrog yawg ua ke; thiab Lowell Manson, yog tus tub txawg sau nkauj neeg Mekas tiam 19. Los ntawm cov neeg hlub Tswv Yexus, ib zaj nkauj zoo tau hu, yog zaj nkauj qhuas Vajtswv vim txoj kev zoo siab thiab koob hmoov loj uas Vajtswv tau pub rau neeg ntiajteb.

Thov caw nrog kuv peb thov Vajtswv ua ke: Tus Tswv, kuv lub siab puv npo kev nco tshav ntuj vim Koj tau los yug kom kuv tsis ua neej nyob hauv txoj kev raug foom los ntawm kev txhaum lawm tiamsis tau ua neej nyob hauv txoj kev ywj pheej thiab tau koob hmoov. Nyob rau lub caij muaj kev zoo siab no, thov pub kom kuv muaj lub siab hlub ntawm Vajtswv txoj kev hlub loj, kom kuv ua neej yog rau lub meej mom uas yog Vajtswv cov menyuam, kom kuv saj tau txoj kev muaj sia sib raug zoo ua ke nrog Koj, thiab nrhiav tau txhua txoj koob hmoov zoo rau txhua lub sijhawm hauv lub neej. Kuv thov hauv Tswv Yexus Khetos lub npe, Amees.

Cov kwv tij, koob tsheej xyoo no, peb txhua tus txhob cia yus lub siab raug cab mus rau tej kev txhawj thiab tsis khoom hauv lub neej ua rau peb hnov qab tej koob hmoov tiag uas yus tab tom muaj, yog tau Vajtswv cawm, tau hu Vajtswv ua Leej Txiv, tau tab pov txojsia ib txhis ntawm tiam no thiab tiam tom ntej. Paub txog qhov no, cia li ua lub neej li tus tau txais koob hmoov, tsis ceev txoj koob hmoov ntawd rau yus, tiamsis zoo siab hlo qhia txog Vajtswv, yog tag nrho tej yam zoo tau ua nyob rau hauv peb lub neej. Yog peb twb tau koob hmoov lawm, ces kuj yuav tau dhau los ua lub raj nchuav koob hmoov zoo rau tej neeg ib ncig peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.