07.12 Amăn Jơ Krao Khan Rim Năr: NÔEL BLŬNG A

Lu bơ̆n đei yak năm wă hlôi kơ minh giĕng lăm khei 12, rim năr rai jê̆ hloh kơ phĕt ‘blŏk hơdơ̆r năr Nôel. Jơ̆p kơ anih oei ‘nă hal sơng iŏk năr phĕt âu. Đơ̆ng lăm pơlei tih, lăm rim kơ trong, rim ‘nu đei ‘blŏk kơ năr Nôel wă jê̆ truh bơih, pơm kơ jơhngơ̆m lu bơ̆n ‘blŏk kơ năr tơpŭ kơ Yang Yêsu. Mă lei, kơplah tơdrong hrăt hrot kơ hơ met kơ bơyan phĕt ‘nâu, athei amăn jơ ‘blŏk kơ pơlei ‘Betlehem sơnăm sơ̆ noh, anih mă măng đei Nôel blŭng a lăm hrĕp hreh păng pơyom.

Năr ‘nâu, ‘năr 07/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Cathy Irvin kơ̆l ‘bai NÔEL BLŬNG A.

“Klaih kơ noh sư tơpŭ kơ minh ‘nu kon kơdră sư. Sư tơsu kơ kon sư minh blah khăn, klaih kơ noh tơ’bĭch kơpal ‘nhĕt kro tơ lăm war rơmo yua kơ ưh kơ đei anih boih lăm hnam ‘bĭch tơmoi.” (Luka 2:7)

Buăl hăm oei chang gô bơyan tơngiĕt truh, chĕp ba găng tơngiĕt kư̆m truh tơ đei prĕl kok hmông? Gah kơdih akâu inh wă kơ đei minh năr mă tơngiĕt tơpă, wă kơ ngôi minh ‘bôt lăm hnam, su khăn tơtŏ păng huch đak hla che, minh ly ka phê, dah sôcôla tơtŏ.

Pơma mă tơpă, bơyan tơngiĕt jơ̆ bơyan inh ưh kơ ‘maih wă. Mă lei, kư̆m đei minh ‘bar wơ̆t inh lĕch ngôi tơ’ngoaih wă răt tơmam, dui jơhngơ̆m hơ yuh tơngiĕt. Mĭnh wơ̆t inh kư̆m đei chông ba mon inh chă ngôi tơ jơ̆p kơ tơ pơlei tih, lăng lu ŭnh pơgong kơ bơyan Nôel.

Đei minh ‘măng inh hưch wă kơ bơyan tơngiĕt dang kơ 12 sơnăm hơdrol ki sơ̆, kơplah inh oei tơ Toronto, Canada. Inh oei ‘blŏk kơ đei mơn pel prĕl, păng mơn prĕl noh hrĕng ưh kơ đei hơ iuh. Inh hao gre treng tơ lăm ala teh truh tơ pơlei tih, lĕch đơ̆ng gre, yak năm chă ngôi tơ pơlei tih noh, mơ̆t tơ lăm anih tĕch tơmam, păng ‘bôh hlĭch kơ tơ anih noh mă khan tơngiĕt huay kơ tơngiĕt dêh.

‘Nao dôm năr hơdrol, inh đei pơma dơnuh hăm buăl juăt gah năr Nôel blŭng a. Inh jet kơdih, kơplah noh sơ̆ hăm tơ’ngiĕt dêh ưh, dah đei prĕl jur dah ưh? Inh ‘blŏk kơ Yang Yêsu ‘bĭch kơpal bơng ‘nhĕt kro, tơ lăm war rơmo na tơsu hăm khăn hmă đĕch, thoi kơ sơ̆p hla bơar ‘Bok Kei-Dei chih: “Klaih kơ noh sư tơpŭ kơ minh ‘nu kon kơdră sư. Sư tơsu kơ kon sư minh blah khăn, klaih kơ noh tơ’bĭch kơpal ‘nhĕt kro tơ lăm war rơmo yua kơ ưh kơ đei anih boih lăm hnam ‘bĭch tơmoi.” (Luka 2:7)

Sơ̆p hla bơar ‘Bok Kei-Dei chih rơđah tơpŭ kơ Yang Yêsu kơplah bơyan ayơ. Tơdrong noh hăm kăl hloh kơ đơ̆ng lăm jơhngơ̆m lu bơ̆n ‘blŏk kơ năr Nôel ưh? Bơng ‘nhĕt rơmo sơ năm sơ̆ noh kư̆m nhen thoi jơhngơ̆m lu bơ̆n: ‘bĕnh kơ măng mu, ưh kơ trŏ đei Kră Yang mơ̆t oei. Na hăm oei đei anih lăm jơhngơ̆m lu bơ̆n wă ăn kơ Kră Yang mơ̆t oei ưh? Dah jơhngơ̆m noh oei ‘bĕnh kơ hiơ̆k bơngơ̆t păng tơ tok tơtăm kơ chăl arih ‘nâu?

Yua kơ thoi noh, rim wơ̆t tơchĕng pơwao kơ bơyan Nôel blŭng a, lu bơ̆n kăl kơ lăng ming kơdih akâu păng apĭnh Kră Yang mơ̆t oei, pơgơ̆r lu bơ̆n. Yang Yêsu rơih iŏk jur tơ teh âu hăm tơdrong pơyom tơjur iŏk jơhngơ̆m đon tơ ala na tơpŭ ‘bơ̆t bơng ‘nhĕt kro. Rim wơ̆t tơchĕng tơ Tơ’ngla pŭ iŏk tôm tơdrong pơmat tat păng ưh kơ đei sơng iŏk đơ̆ng kon bơngai, inh đei tơ ‘blŏk kơdih athei bơwei ‘maih wă kơ bơyan Nôel lăm jơhngơ̆m inh, đơ̆ng rim kơ tơdrong arih rim năr lăm chăl arih. Yua kơ đơ̆ng thoi noh, inh hlôi kơ đơ̆ng tơdrong pơmat păng anat anot lăm chăl arih, yua kơ inh na Yang Yêsu pŭ iŏk jĭ pơmat hloh kơ inh.

‘Bai hơri ư ang kơ ‘Bok Kei-Dei “ Nôel Blŭng A” roi hơ’mon kơ “Lu bơngai wei triu dơnuh hin” hnhoi kiơ̆ sơ’nglŏng kơplah linh jang ‘lơ̆ng roi tơbăt kơ lu sư. Kơplah truh tơ anih, lu sư bôh Nge Yêsu oei ‘bĭch ‘bơ̆t bơng ‘nhĕt kro lăm war rơmo yua kơ anih hnam tep ăn kơ tơmoi pă đei anih ăn kơ Sư bơih. Măng Nôel blŭng a tơ pơlei ‘Betlehem ưh kơ đei pơgong ŭnh dreng drao, ‘brê ‘bra, ưh kơ đei akŭm bơngai tơpôl lơ, lăp minh pôm sơnglŏng hơdah tŏk bŏk plĕnh kơmăng mu, pơchrang hơdah ăn kơ Kon ‘Bok Kei-Dei đei tơpŭ, ăn tơdrong hơdah chang hơmĕng kơ kon bơngai:

“Nôel blŭng a linh jang ‘lơ̆ng roi tơbăt
Ăn kơ bơngai wei triu dơnuh hin oei kral lăm kơmăng noh;
Wei lăng triu lu sư. Lăm kơ măng bĕnh kơ tŭk gom.
Nôel, Nôel,Nôel, Nôel,
Lăm kơ măng tơpŭ kơ Pơtao Isơrael!”

Apĭnh đĭ đăng krao khan hơdai: Kơkuh kơ Kră Yang ‘mă ‘mêm! Kră Yang ơi, kon bơnê kơ Ih yua kơ Ih đei tơ’blŏk kơ kon năr Nôel blŭng a. Apinh Ih tơgŭm kon tơchĕng ‘blŏk kơ măng pŭ iŏk jơhngơ̆m đon ala păng ‘lơ̆ng rơgoh noh wă kơ dôm tơdrong hiơ̆k bơngơ̆t kơ tơdrong arih, kon oei bơwei tôm tơdrong arih ‘lơ̆ng ‘bơ̆t anăp Ih. Apinh ih mơ̆t oei lăm jơhngơ̆m ‘nâu, ‘bĕnh kơ tơdrong kơnê̆, păng tơplih jing ‘nao jơhngơ̆m kon lăm bơyan Nôel ‘nâu. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, lu bơ̆n oei arih lăm bơyan hiơ̆k bơngơ̆t kơ bơyan phĕt. kơplah hiơ̆k bơngơ̆t noh, lu bơ̆n đei krao sơng iŏk wih brŏk tơ pơlei ‘Betlehem sơ năm sơ̆ noh păng lăng Yang Yêsu, Tơ’ngla jur tơ teh đak âu hăm tơdrong pơyom. Na hrei âu, Kră Yang oei chơ chă lu jơhngơ̆m pơyom pơih ăn kơ Sư mơ̆t oei pơgơ̆r.

Adrol kơ wă truh tơ bơyan Nôel, athei tơchĕng tơdrong kiơ oei đei lăm jơhngơ̆m buăl, lei tơdrong noh hăm pơm kơ jơhngơ̆m buăl rai hrăt hrot, hrĕng kro? Athei apinh Kră Yang hơmet mă rơgoh dôm kơ tơdrong noh, wă kơ buăl gơh sơng iŏk Sư mơ̆t păng ‘bĕnh blai lăm jơhngơ̆m, tơplih tơdrong arih kơdih akâu.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.