Lăm teh đak lơ tơdrong ưh kơ hơđơ̆ng păng ơh sơ’ngon, kon bơngai ling lang rơhing tơdrong chang hơmĕng, khan đei mĭnh tơdrong kiơ noh ‘lơ̆ng rŏ hloh oei gô tơ anăp. Păng trŏ kơ Nôel jơ̆ nơ̆r pơkăm ‘bĕnh tơdrong ‘mêm mơnat đơ̆ng ‘Bok Kei-Dei, khan tơdrong chang hơmĕng ‘noh jơ̆ đei tơpă. Yua kơ kơdih Sư đei jur lăm rup akâu kon nge, chĕp ba hơdah tơdrong lui ngeh kơ dôm jơhngơ̆m oei chang gô chơ chă.

Năr ‘nâu, ‘năr 06/12/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Wally Odum kơ̆l ‘bai NÔEL CHANG HƠMĔNG.

“Linh jang ‘lơ̆ng khan kơ lu sư: “Iĕm ‘nĕ kơ hli, yua kơ inh wă roi kơ iĕm tơdrong ‘lơ̆ng, tơdrong mă đĭ-đăng kon bơngai ‘nă hal.” (Luka 2:10)

Hăm lơ bơngai, Nôel lăp hmă đĕch jơ̆ bơyan kơ ‘bok kră Nôel păng dôm tơmam apah. Inh ‘blŏk kơ đei gơh đŏk ‘bar hla kơthơ đơ̆ng dôm ‘nu oh hơ’lơ̆p gơih kơ ‘bok kră Nôel, lăm noh đei mĭnh ‘nu ŏh chih: “ ‘Bok kră Nôel mă ‘mêm, sơnăm sơ̆ ih ưh kơ đei chĕp ba kơ kon tơmam apah ayơ ‘lơ̆ng hloi. Sơnăm adrol kŭm thoi noh. ‘Nâu jơ̆ jơ hơtuch kơ ‘bok bơih.”

Mơ̆ng lei ‘maih hiĕk tơpă, mă lei dôm kơ trong chư hmă đĕch ‘noh kŭm pơm kơ inh kơdrăt băt kơnăl: mưh lăp lu bơ̆n kŭm thoi noh, ‘bônh kơ hiơt kơ tơdrong tơm tơpă đơ̆ng Nôel lăm dôm tơdrong ‘lơ̆ng rŏ dreng drao gah ‘ngoaih.

‘Bok bơtho Phillips Brooks jơ̆ bơngai chih ‘bai hơri “Ô ‘Betlehem Plei Iĕ”, đei roi tơ’bôh tôm tơdrong tơm tơpă đơ̆ng Phĕt Nôel lăp lăm mĭnh trong hơri: “Chăl sơ̆ chang hơmĕng, hli tơrơ lơ tơdrong, Dang ei tơ’bơ̆p lăm măng kơjung.”

Trŏ tơ lăm pơlei ‘Betlemhem iĕ hloh noh, ‘Bok Kei-Dei đei tơl tơwih tơdrong chang hơmĕng đơ̆ng đĭ đăng kon bơngai đơ̆ng tơdrong Kon Sư jur- ‘Bok Dŏng Pơklaih Yang Yêsu Krist.

Tơdrong chang hơmĕng noh ưh kơ sĭ lăp ‘măn kơ kon pơlei Juđê- dôm lu bơngai đei Sơ̆p Hla Bơar Nơ̆r ‘Bok Kei-Dei păng lu nơ̆r khan lê̆ adrol mă kŭm ăn kơ kon pơlei ‘ngoaih dai. Dôm lu ‘bok pơjâu đơ̆ng gah hơlĕch, jơ̆ lu bơngai hơgei hnhoi sơnglŏng truh đơ̆ng ‘Ba Tư, đei ngơk lăng kơpal plĕnh wă chă tơdrong tơ’bôh gah mĭnh ‘bok Pơtao wă jê̆ jur. Sơ̆p Mathiơ roi tơbăt khan lu sư đei nơ̆r jet: “Tơ yơ anih mă đe ‘nao tơpŭ kơ pơtao Juđê? Nhôn ‘bôh sơnglŏng Sư đơ̆ng gah hơlĕch, na nhôn hnhoi sơnglŏng noh truh tơ âu wă năm kơkuh kơ Sư.” (Mathiơ 2:2)

Sơnglŏng mă lu sư lăng ‘bôh trŏ jơ̆ tơ’bôh mơsêh mơyang yua đơ̆ng kơdih ‘Bok Kei-Dei ‘măn ăn, wă chông anhăk dôm lu bơngai ‘ngoaih, dôm lu bơngai nhen kơ thoi “ ‘ngoaih đơ̆ng nai”, gơh năm tơ’bơ̆p Kon Sư.

Hơiă tơpă, lu bơngai chă tơmam gĭt so đei chă ‘bôh dôm lu kơ’bang so sơ̆ tơ ‘Ba Tư, đei khan đơ̆ng chăl hơdai hăm Kră Yang Yêsu, lăm noh đei chih răk nơ̆r khan lê̆ adrol khan: “Mĭnh ‘nu ‘bok pơtao tih hloh gô tơpŭ tơ gah Yă Nâm, chăl Sư gô ‘bĕnh blai tơdrong tơpăt, hiôk hian păng hiôk chơt.” Lu sư kŭm đei dan ăn kơ ‘bok pơtao ‘noh mĭnh pôm anăn: Sosiosh.

Dôm lu bơngai noh ưh kơ đei băt ‘Bok Kei-Dei kơ Isơrael, mă lei lu sư đei jơhngơ̆m rơhing chơ chă tơdrong tơpă. Păng ‘Bok Kei-Dei đei tơl tơwih nơ̆r lu sư. Sư oei ling lang tơl tơwih dôm kơ jơhngơ̆m oei chơ chă Sư.

Tơdrong ‘Nao ‘Lơ̆ng mă Phĕt ‘blŏk hơdơ̆r năr Nôel tơ’bôh tơbăt tơm jơ̆: ‘Bok Kei-Dei ba tơdrong chang hơmĕng truh kơ đĭ đăng kon bơngai, mă khan lu sư truh đơ̆ng yơ, kiơ̆ khŭl lui dah tơdrong juăt ayơ. Linh jang roi tơbăt kơ lu bơngai wei triu tơ lăm bri ‘nhĕt măng noh: “Iĕm ‘nĕ kơ hli, yua kơ inh wă roi kơ iĕm tơdrong ‘lơ̆ng, tơdrong mă đĭ-đăng kon bơngai ‘nă hal.” (Luka 2:10)

Nôel jơ̆ bơyan kơ tơdrong chang hơmĕng, ‘măn ăn kơ dôm lu bu oei rơhing gơh pơklaih, dôm kơ jơhngơ̆m oei chang gô ‘Bok Kei-Dei oei hơdai păng tơplih chăl arih sư. Păng tơdrong tơbăt chơt hiôk noh jơ̆ Sư đei truh bơih!

Hơpơi kơ bơyan Nôel sơnăm ‘nâu, ‘Bok Dŏng Pơklaih Yang Yêsu gô dan ăn kơ jơhngơ̆m rim ‘nu lu bơ̆n mĭnh tơdrong chang hơmĕng ‘nao, hơdah ‘lơ̆ng păng arih. Lei lăi thoi nơ̆r hơri bơnê đơ̆ng linh jang lăm măng noh: “Ư-ang kơ ‘Bok Kei-Dei mă oei tơ plĕnh ti. Sư wă ăn hiôk-hian kơ lu bơngai mă Sư lăp đon tơ ala teh âu.” (Luka 2:14)

Apĭnh đĭ đăng krao khan hơdai: Kơkuh kơ Kră Yang Yêsu mă ‘mêm, kon bơnê kơ Ih yua kơ đei jur tơ teh đak măng mu ‘nâu wă chĕp ba tơdrong hơmĕng păng hiôk hian tơpă. Bơnê kơ Ih yua kơ đei rơih truh lăm tơdrong chu iŏk đon ala, wă kơ kon bơngai iĕ ioch thoi kon kŭm gơh năm jê̆ Ih. ‘Bă ơi, lăm dôm kơplah kon rơdu, ơh sơ’ngon dah hiong tơdrong lui, apinh dan ăn dơ̆ng lăm jơhngơ̆m kon hơdah chang hơmĕng đơ̆ng kơdih Ih. Hơpơi jơhngơ̆m kon ling lang băt chơ chă Ih, wă kơ tơdrong hiôk chơt Nôel ling lang đei arih lăm kon rim năr. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, Bơyan Chang Hơmĕng jơ̆ jơ năr ăn kơ lu bơ̆n pơdơh tŏ sĕt, lăng đêl jơhngơ̆m kơdih. Rŏ lăng buăl oei chang gô mĭnh nơ̆r tơl tơwih, mĭnh tơdrong mơsêh, dah lăp hơpơi chă ‘bôh hiôk hian tŏk bŏk dôm năr hrăt hrot. Mă lei lăm jrŭ lăm đĭ đăng dôm lu tơdrong ‘noh, rŏ lăng Kră Yang wă kơ buăl băt kơnăl khan kơdih Sư bơih jơ̆ tơdrong buăl kăl tơpă. Hơpơi kơ bơyan Nôel ‘nâu, buăl gô chă ‘bôh Sư thoi lu ‘bok pơjâu sơ̆, hăm đĭ jơhngơ̆m rơhing. Yua kơ bu đĭ jơhngơ̆m chơ chă Kră Yang lei tơpă gô tơ’bơ̆p Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.