Bơ̆n hăm đei đêl tơchĕng khan kơdih kăl “bơwei rup gah ‘nguaih” wă kơ gơh đei đĭ đăng bơngai pơyom, ‘mêm mơnat ưh? Layơ kŭm kăl kơ tơ’bôh kơdih kâu hiôk, kơdih nuih pran, ‘lơ̆ng tôm…mă jrŭ tơlăm jơ̆ lơ tơdrong tơchâu tơkach băl, rơdu mă buăl oei adrin wă ôn lê̆? Mưh lăp, ưh kơ trŏ jơ̆ dôm lu tơdrong ưh kơ ‘lơ̆ng, mă yua kơ đơ̆ng jơhngơ̆m pơ-rŏ păng pơ-ang gah sĕch akar jơ̆ tơdrong pơm kơ bơ̆n tơhiong tơdrong ư-ang tơpă lăm dêh char ‘Bok Kei-Dei pơgơ̆r.

Năr ‘nâu, ‘năr 16/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Ken Barnes kơ̆l ‘bai ĐEI PƠYOM ĐƠ̆NG IŎK JƠHNGƠ̆M ĐON ALA.

“Tơdrong băt hli yom kơ Kră Yang chrih bơtho bơngai noh gô jing hơgei; Đei iŏk đon ala ba adrol tơdrong đe pơyom.” (Pơdơ̆k 15:33)

Inh đơ̆ng đêl bơ̆jang lăm mĭnh khŭl chă năm bơtho jơ̆p dêh char đei hơnăm Youth With A Mission – Druh Dăm Hăm Nơ̆r Tơtă, đei krao ‘noh YWAM. Kơplah ‘noh, tơdrong jang inh jơ̆ chă bơngai păng pơjing lu jơ tơ’bơ̆p năm bơtho tơ 35 pơlei tih gah yă Nâm teh đak My. ‘Bơ̆t rim anih, inh đei jơnăr đei bơ̆jang hăm dôm ‘nhŏng mŏ ŏh hơiă tơpă. Tơpă, lu bơngai chă năm bơtho kŭm lăp jơ̆ dôm kon bơngai hmă đĕch, đei Kră Yang mơnat ăn đĕch gơh bơ̆jang kơ Sư. Mă lei mưh lăp, inh đei mơn bơngai nai lăng lu nhôn hăm măt hơiă….đei hloh hnang.

Lăm năr đĭ kơ giĕng ei, đei mĭnh pôm hnam dơnŏ năm ngôi lăng anih YWAM anih mă inh oei arih tơ noh. Bre sư ngăl tơgŭm inh lăm tơdrong bơ̆jang. Bre sư lăp đon kơ nơ̆r tơtă chă năm bơtho păng pơyom gĭt dêh kơ dôm tơdrong bơ̆jang mă lu nhôn oei bơ̆jang. Mă lei lăm kơplah ‘noh, inh đei hlĭch hlăch tơpă kơplah băt tơpă yua kơ đơ̆ng kiơ mă pơm kơ bre sư ‘mêm lăp đon kơ lu nhôn truh thoi noh.

Pơge Năr Tơpơh năr ‘noh, ‘bar ‘nu klo kăn măr sư drong ngôi tơhnam nhôn sŏng sa pơge, na gô hơdai năm tơ hnam akŭm. Inh nŏng kơ hăt hot kơdâu đơ̆ng hnam gŏ, anih tep, đei sơng tơmoi, đei hiơ̆k tơplih băn ao kơ kon drŏ kăn ‘lơ̆p hơdruch. Tôm tơdrong pơm kơ inh đei hiơ̆k tơtăm. Juăt kơ kon inh yom dêh, lei na pơge ‘noh đei ưh kơ chu yom, ưh kơ wă mơ̆ng nơ̆r. Tuch luch, inh ưh pă kĕ chơ̆n păng ôr hil kon kiơ̆ tơdrong ưh kơ đei tơdrong ‘mêm. Lăp kơplah nơ̆r ‘nao wă tơlĕch, inh băt kơdih đei glăi bơih. Inh hăt hot kơ pơtruh kơ kon, păng thoi kơ dôm lu hơ’lơ̆p nai, kon ‘bônh kơ huay pă jô̆ yo kơ inh.

Mă lei tơdrong ‘nâu đei truh lăm anih tơtil anih tơmoi oei hơoei. Inh đei tơtăm: “Ưh kơ băt lu sư hăm mơ̆ng kơtơ̆ng ưh kih?” Na mơn đei mơlŏu hloi. Inh đei tơchĕng pơwao: “Ưh kơ băt lu sư gô tơchĕng liơ gah inh ‘nâu?”

Đĭ lăm pơge ‘noh, inh ưh kơ phara kiơ kơ mĭnh ‘nu bơngai hơ’lơ̆p băt kơdih pơm glăi, na ưh kơ pơ̆n lăng tơklă tơ măt mĕ ‘bă. Hăm inh, kơplah jơ’noh tơpă mơlŏu dêh.

Đơ̆ng rŏng kơ sŏng sa, inh băt kơdih ưh kơ gơh weh wer đơ̆ng măt lu sư đĭ prăt năr ôh. Truh ‘năr dơ̆ng, lu nhôn đei năm sŏng sa hơdai. Lăm kơplah adrol kơ krao khan kơ wă sŏng sa, inh pơdrơ̆ng kăl kơ roi tơbăt đơ̆ng lăm jơhngơ̆m inh. Mă khan lu sư đei mơ̆ng kơtơ̆ng tơdrong pơge hei dah ưh, inh oei ‘maih wă roi tơpăt- wă kơ lu sư gơh ‘bôh tơdrong rơdu inh, păng apĭnh lu sư krao khan tơgŭm kơ inh băt kơ wă tơ’bơ̆p hăm tơdrong tơtăm ‘noh ‘lơ̆ng hloh.

Inh roi dơ̆ng tơdrong hơ’mon. Bơngai klo đei hiĕk păng pơma” “Trŏ yua kơ thoi noh na lu nhôn đei gĭt dêh kơ YWAM – lu iĕm ling lang tơ’bôh pơih đĭ hăm đĭ jơhngơ̆m tơpăt!”

Inh thar brĕng. Đơ̆ng ki sơ̆ inh đei lui kơ mĭnh nơ̆r pơma hơlĕnh: khan tơdah bơngai nai băt kơ kon bơngai inh tơpă thoi yơ, lu sư gô ưh pă ‘mêm păng pơyom kơ inh dơ̆ng. Yua kơ kiơ inh đei ngeh kơ tơdrong hơlĕnh thoi noh? Trŏ jơ̆ yua kơ jơhngơ̆m pơ-ang. Inh đei kơnhăm dêh kơ tơdrong bơngai nai tơchĕng thoi yơ gah inh. Mă lei dah dôm tơdrong rơdu đơ̆ng inh đei tơ’bôh, inh ưh đei mơlŏu, na tơplơ̆ dơ̆ng đei pơyom hloh dơ̆ng!

Yua kơ lăm dêh char ‘Bok Kei-Dei pơgơ̆r, tơdrong pơyom păng ư-ang ling lang pơtơm đơ̆ng jơhngơ̆m chu iŏk đon ala.

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon, kon bơnê kơ Kră Yang yua kơ tơdrong mơnat ăn đĕch oei rơkah rơkai ăn kơ kon mă khan kơplah kon ưh kơ kĕjei păng rơdu tơrăn. Apĭnh bơtho kon arih tơpăt, pơ̆n nuih tơ’bôh akâu jăn kơdih kiơ̆ iŏk đon ala. Apĭnh tơgŭm kon ‘nĕ kơ adrin hloh kơ jơhngơ̆m pran wă bơwei rup gah ‘nguaih ‘lơ̆ng, mă lei ling lang arih tơpăt ‘bơ̆t anăp Ih păng ‘bơ̆t anăp dôm kơ ‘nhŏng mŏ ŏh hơdai lăm đon lui mă Ih dan ăn tăp dăr kon. Hơpơi kơ gơh hiôk lăm tơdrong ư-ang tơpă đơ̆ng anih Kră Yang. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, dah akâu jăn oei kơ’bah ưh kơ trŏ khan lu bơ̆n ưh kơ trŏ đei pơyom. Dah buăl pơ̆n chu iŏk đon ala arih tơpăt ‘bơ̆t anăp Kră Yang, buăl gô băt kơnăl mĭnh tơdrong gĭt tơpă khan jơhngơ̆m pran đơ̆ng Kră Yang ling lang tôm mah wă klơ̆p đĭ tôm tơdrong rơdu tơrăn đơ̆ng buăl, tơdrong ‘mêm mơnat Sư ling lang rơkah rơkai wă dŏng tơgŭm buăl rim năr. Păng dah buăl tơjur akâu kơdih, Kră Yang gơh yua dôm kơ tơdrong mă buăl ngeh kơ jơ̆ mơlŏu wă tơ’bôh tơdrong ư-ang Sư kiơ̆ hăm tơdrong rang rŏ hloh.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.