La dô nă cau dòn jat Yàng, bol he gam cơnđoà lòt digul bơta tòm lơh đah hwềng. Bula ò gơs đao hala ồs, mơya đah hwềng he dê git loh: ngan gơs dô bơta tòm lơh pràn ngan gơlik gơs, tiah mơ bơta klam jơngo mơ bơta ang tòm lơh. Tòm tú do la tú Yàng Tòm Trồ hòi jà lang bol Kơnràn dê kah rngal, ntao tòm tiah tòm lơh he dê, ngui jơnau hòi dan, bêng gơnap gơnoar nàng tòm lơh mơ ală cau sò tơm đah hwềng. Gen ồng mò oh mi kơno kơlwòk uh tòm tôr he sơl?

Ngai do, ngai 18/09/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ Jonathan Santiago bơh tơnggume BƠTA TÒM LƠH ĐAH HWỀNG.

“Bơh bol he ò di tòmlơh mơ poac mơ mhàm ò, mơya tòmlơh mơ ală gơnoar at bồ, mơ ală gơnoar, mơ ală bơtau at bồ rài klam jơngo do, mơ mpồl cà jàñ bơsak ơm tòm pah gòi.” (Ephesô 6:12)

Tòm ală ngai neh rlau, ẵn mơ ală oh mi ẵn jê sơntòm pơjum bal tòm kòp ang drim nàng hòi dan ală pơnah pal cang dà lơgar in. Cau lơi kung sên gó do la ală bơta pal cang ngan. Kung bè ală cau ling kơp digal dơrnang, kòp nă cau tòm bol he ntào tòm tiah mơ Yàng ơn – kah rngal, kơp gơn jơnau đơs Cau Gơnoar Ơn Phan Duh Khoai dê.

Cau geh hòi tus hơđap, cau pal ơn kơp; gơs cau geh chôl nàng drơng kơp, cau ndai geh tề lam tus hơ bơta rlô bol – jơh ală bơta do gơlik tus di tú di pal mơ Yàng Hwềng Goh tề lam. Bơh ming Kơnràn git loh lang ală bơta gơlik gơs tòm tiah gam sum sum, mơ ală cau gơs nùs nhơm git kơno gen rơp dòp git gung dà Kơnràn dê, nàng hòi dan al he in tòm bơta tòm lơh đah hwềng.

Bơta tòm lơh đah hwềng gơs bơh yau or mơ ò hềt jơh. Tòm ală tú tơngai tòm lơh, bơta ang mơ bơta jơngo tòm dră ò dơh. Dilah ming sên ma bơta sên gó đah poac să gen bol he buôn ngan tồn lah gơ ơm tòn dunnia do lơm. Mơya ò di ming behớ. Cau Tề Lam Đah Hwềng bol he dê sum tơngkah ală cau ling Kơnràn dê lah:
“Bơh bol he ò di tòmlơh mơ poac mơ mhàm ò, mơya tòmlơh mơ ală gơnoar at bồ, mơ ală gơnoar, mơ ală bơtau at bồ rài klam jơngo do, mơ mpồl cà jàñ bơsak ơm tòm pah gòi.” (Ephesô 6:12)

Dô dớ tai, Yàng tơngkah bol he sên ală bơta mơ gar mat đah hwềng: do ò di la bơta tòm dră mơ jơi kon mơnùs. Ală bơta tòm lơh gơlik gơs di ală tap trồ – sơrlèt rlau mơ gơnoar he dê. Mơ tú bơta sên gó đah hwềng ồng mò oh mi dê geh pò gen ồng mò oh mi rơp sên gó loh lang bơta tòm lơh lơi la bơta tòm lơh ngan.
Yàng neh sơnio bol he gó cau sò tơm he de la ncau. Mơ Jơnau Kơnràn đơs: “Bơh cau lơi geh ai oă, gen kong lùp wơl oă; mơ cau lơi geh jào oă, gen kong lùp wơl oă rlau.” (Luca 12:48b) . Behớ gen, tú bol he kơt but mơ jơnau song mơ lik lòt tòmlowh, bol he sơmbat kớ dô bơta pràn kơldang mơ Yàng neh rcang lang bol Kơnràn in.

“Tòm tŭ dĭ gơna cau Yàng Tom Trồ dê guh gòñ bơh drim lik lòt, gŏ dô mpồl ling bal mơ rơndeh ơseh ơm gơrwàng ƀòn dờng. Cau dĭ gơna đơs mơ Elise lah: “Ơ yàng! Ñchi bol he pal lơh taih?” Elise ho lah: “Bañ rngòt, ală cau ơm bal mơ bol he oă rlau mơ ală cau ơm bal mơ bol khai.” Gen Elise hòi dan lah: “Ơ Yàng Jehôwa, dan pò mat cau dĭ gơna añ, nàng khai in geh gŏ.” Gen Yàng Jehôwa pò mat khai, mơ khai gŏ mơnơm bềng ală ơseh mơ rơndeh mơ ồs ơm gùt dar Elise.” (II Ală Bơtau 6:15-17).

Tòm tú gam tòm lơh tòm bơta hòi dan, sơmbat kớ té dô bă kớ cê: Cau ling Yàng dê rơp geh pha lin tòm bơta tòm lơh do. Bơta mơ bol he pal lơh tòm tú do hớ la ntao kớ tòm bơta pha lin hớ, sơmbat kớ jơnau ho bơh bơta phalin, mơ pràn kơldang cơnđoà lòt, bơto yal bơh bơta gơkló Kơnràn dê: “LƠGAR BÈP GƠS TUS; NÙS KÒÑ BÈP GƠS DI, TÒM Ù BE TRỒ!”

Dan jà bol he dô nút bal tòm bơta hòi dan: Khoai Yàng, digul bơta tòm lơh đah hwềng do, dan Yàng dong kon sum kah rngal nàng jòi lùp nùs kỡn niam Kơnràn dê, mơ ntào tòm tiah mơ Kơnràn hòi jà kon. Dan ai kon in dô nơm nùs nhơm ngac ngar nàng don jat bơta tề lam Yàng Hwềng Goh dê. Dan dong kon sum prap gar bơta dòn ò dơrcul lơnggơr, nàng rgơi ntào kớ tòm bơta pha lin mơ Kơnràn neh pà ai kon in bơh lài gam sum sum. Kon jơh nùs hòi dan ai sơnđan Yàng Jesus Krist, Amen.

Ơ ală ồng mò oh mi kỡn gơboh, Yàng neh rcang bol he in tơl ală bơta tòm lơh đah hwềng. Kơnràn neh rang tơlik bol he in git cau tòm sơm ngan he dê la ncau. Bơta tòm lơh hớ gam gơlik gơs. Ntào té tòm tiah he dê. Mơ cih wơl ală bơta dơng mang: Yàng neh ai bơta pha lin bol he in rau! Tú do, bol he ming ntao kớ tòm jơnau ho hớ, dòn jat bơta tề lam Yàng Hwềng Goh dê, mơ cơnđoà lòt tòm bơta pha lin tòm bơta tòm lơh đah hwềng.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.