Hăm đei layơ buăl bơ̆jang lăm mĭnh khŭl, bu bu kŭm gơh rơgei, mă lei kư̆ kơ rim ‘nu mĭnh tơdrong kiơ̆ kơdih, ưh kơ đei bu wă chu kiơ̆ bu, păng thoi noh na tơdrong đei yua ưh kơ đei truh tơ yơ hloi? Mă khan đei tơdrong gơh rơgei truh dang yơ, bơ̆n kŭm ưh kơ gơh năm ataih dah ưh kơ đei mĭnh khŭl tơpôl mĭnh jơhngơ̆m hơdai. Păng lăm trong yak năm kiơ̆ Kră Yang kŭm thoi noj, bơ̆n đei krao lăm tơdrong bơ̆jang hơdai, dŏng tơgŭm dih băl, wă jang pơkeh tơdrong kơnhăm tơ kơpal plĕnh ti đơ̆ng Sư.

Năr ‘nâu, ‘năr 10/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Wally Odum kơ̆l ‘bai MĬNH JƠHNGƠ̆M DING TRUH TƠ KEH ĐANG ‘LƠ̆NG.

“Iĕm ‘nĕ kơ pơm minh tơdrong kiơ mă ưh kơ ‘lơ̆ng kơ đe, thoi lĕ kơ tơdrong pơang, dah tơdrong ưh kơ băt mơnat kơ đe. Iĕm athei pơm ‘lơ̆ng ling-lang thoi bơngai dim jô̆ kơ đe bơngai ‘lơ̆ng hloh kơ iĕm. Iĕm athei pơhiôk jơhngơ̆m đe mơ̆n, ‘nĕ kơ pơhiôk jơhngơ̆m kơdih đĕch ôh.” (Philip 2:3-4)

Casey Stengel, bơngai pơtho pơtơ̆p đơ̆ng sơ̆ lăm teh bơlŏng, đêl đei pơma mĭnh nơ̆r trŏ tơpă: “Chă ‘bôh đei mĭnh ‘nu bơngai teh ‘bơlŏng gơh lei ưh kơ anat. Mă lei pơm thoi yơ wă kơ lu sư teh bơlŏng hơdai ‘lơ̆ng tơduă khŭl ‘noh jơ̆ tơdrong jĭ kơ̆l.” Nơ̆r pơma ‘noh ưh kơ sĭ trŏ lăm tơdrong pơjei băl gah jơhngơ̆m pran, mă kŭm trŏ tơpă lăm tơdrong arih rim năr.

Bu lăm lu bơ̆n kŭm gô đei tơ’bơ̆p hăm nơ̆r jet: Pơm thoi yơ wă kơ dôm tơdrong gơh pơm păng tơdrong gơh hơgei đơ̆ng Kră Yang ăn kơ bơ̆n gơh hơdai mĭnh jơhngơ̆m hăm bơngai nai? Pơm thoi yơ wă kơ bơ̆jang hơdai, hơdai yak năm, hơdai băl năm truh tơdrong kơnhăm hơdai? Nơ̆r jet ‘nâu ưh kơ sĭ lăp ‘măn kơ tơdrong gah tơdrong jang dah hnam dơnŏ, na kŭm kăl dêh kơ đei tơchĕng pơwao lăm trong yak năm kiơ̆ Kră Yang.

Đei dôm kơ tơdrong pơthi pơjei băl gah jơhngơ̆m pran đei kiơ̆ kơdih kâu, thoi pơjei gah tơglơ̆m tơwĕch băl, tơteh tơchok băl dah teh bơlŏng, buăl kăl kơ pŭ iŏk kơdih đĭ đăng, kĕjei dah ưh ‘noh yua kơ mĭnh drô̆ buăl pơdrơ̆ng. Mă lei đă bơlŏng, bơlŏng rô, bơlŏng teh dah bơlŏng chaih jơ̆ lu tơdrong pơthi pơjei gah jơhngơ̆m pran hơdai khŭl, buăl lăp kĕjei kơplah đĭ đăng khŭl kĕjei hơdai. Lăm trong yak năm kiơ̆ Kră Yang păng đĭ tơdrong arih đơ̆ng lu bơ̆n tơpă kŭm lĕi lăi thoi mĭnh tơdrong pơjei băl gah jơhngơ̆m pran khŭl hơdai. Tơdrong tơm kăl wă kơ kĕjei ‘noh bơih băt kơ hlôh băl hơdai hăm bơngai nai.

Jơhngơ̆m pơ-ang păng tơdrong wă kơdih kâu đĕch ‘noh bơih jơ̆ tơdrong pơgăn tih pơm kơ mĭnh khŭl hơdai ưh kơ gơh wơ̆ pran kơjăp. Kră Yang Yêsu pơtho lu bơ̆n khan mă khan dôm lu bơngai jang tơdrong jang pơgơ̆r, bu kŭm kăl kơ pơhrăm iŏk tơdrong tơjur akâu kơdih păng arih wă bơwih bơwăn kơ bơngai nai. ‘Bok Pôl hlôh hơđăl tơdrong gĭt đơ̆ng tơdrong bơ̆jang. Sư ling lang hơtŏk tơdrong mĭnh jơhngơ̆m jang hơdai khŭl, yua kơ sư băt khan lăp kơplah mĭnh jơhngơ̆m tơpă hơdai băl, na lu bơ̆n gơh jang keh ‘lơ̆ng nơ̆r tơtă đơ̆ng Kră Yang pơjao.

Lăm kơthơ gơih kơ Khŭl Bơngai Lui tơ Philip, sư akhan kơ lu bơngai lui:
“Iĕm ‘nĕ kơ pơm minh tơdrong kiơ mă ưh kơ ‘lơ̆ng kơ đe, thoi lĕ kơ tơdrong pơang, dah tơdrong ưh kơ băt mơnat kơ đe. Iĕm athei pơm ‘lơ̆ng ling-lang thoi bơngai dim jô̆ kơ đe bơngai ‘lơ̆ng hloh kơ iĕm. Iĕm athei pơhiôk jơhngơ̆m đe mơ̆n, ‘nĕ kơ pơhiôk jơhngơ̆m kơdih đĕch ôh.” (Philip 2:3-4)

‘Bok Pôl pơ̆n nuih roi hơđăl anăn tơdrong jĭ gơh pơm kơ rim khŭl tơpôl ayơ kŭm rai rơdu: ‘noh jơ̆ ưh kơ băt mơnat kơ đe. Dah mĭnh ‘nu bơngai lăp băt kơ tơchĕng kơ akâu jăn kơdih đĕch, kơnhăm hloi kơ tơdrong đei yua kơ kơdih kâu đĕch na hiơt kơ bơngai nai, lu sư gô ‘net ‘net jing tơklah adrô̆ păng ưh pă đei yua dơ̆ng bơih.

Đơ̆ng “ưh kơ băt mơnat kơ đe” lăm nơ̆r chư Hylap đei hlôh thoi: “Inh đei yua kiơ đơ̆ng lăm tơdrong ‘nâu?” ‘Noh jơ̆ mĭnh tơdrong tơ’bôh đơ̆ng lăm tơdrong pơjĕi băl wă kơ đei lơi yua, ‘noh trŏ kơ đei lăm khŭl bơngai pơgơ̆r lăm jơhnơr ‘noh. Păng dang ei kŭm ưh kơ đei phara kiơ.

‘Bok Pôl krao lu bơ̆n lăng bơngai nai “trŏ kơ pơyom hloh kơ bơ̆n kơdih”. Tơdrong ‘nâu jơ̆ mĭnh tơdrong pơlong lăng tih hăm tơdrong sĕch kar đơ̆ng bơngai trŏ thoi noh. Yua kơ lăm mĭnh teh đak pơjei băl kơnê̆ dêh, bu kŭm ‘maih wă kơ đei sơng iŏk, bu kŭm ‘maih iŏk tơdrong kĕjei.

Mă lei ‘bok Pôl ưh kơ đei pơma khan lu bơ̆n athei ưh kơ pơdrơ̆ng sơng iŏk tơdrong mơnat ăn dah tơdrong gơh hơgei đơ̆ng kơdih kâu. Sư lăp akhan lu bơ̆n kăl kơ pơyom hloi kơ dôm tơdrong Kră Yang ăn kơ bơngai nai dai. Yua kơ bu kŭm đei tơdrong pran pha ra băl, bu kŭm gơh hơgei hloh kơ lu bơ̆n ‘bơ̆t mĭnh tơdrong ayơ noh. Ưh kơ đei bu gơh đei đĭ đăng, păng dôm tơdrong kiơ bơngai nai đei tơpă tă kơ jơ̆ tơdrong lu bơ̆n kăl.

Kră Yang Yêsu wă kơ lu bơngai pơhrăm arih mĭnh chăl arih ‘mêm mơnat dih băl, ưh kơ wă kơdih kâu đĕch. Mĭnh tơdrong pơtih gia ‘lơ̆ng dêh gah jơhngơ̆m ‘noh đei truh lăm Tơdrong Pơthi Pơjing lăm bơyan tơngiĕt sơnăm 1964.

Lăm tơdrong pơjei wơ̆r gre tơsĕr tơ prĕr ‘bar ‘nu, khŭl dêh char Anh đơ̆ng Tony Nash chĕp wơ̆r oei dơ̆ng ‘bơ̆t mă ‘bar đơ̆ng rŏng kơ tơsĕr blŭng a. Mă lei sư ‘bôh băt đei mĭnh pôm wih ‘bơ̆t rŏng gre đei hư. Yua kơ đơ̆ng tơdrong hơmet ‘nâu kŭm gơh pơm kơ măr sư weh đơ̆ng trong pơjei.

Kơplah ‘noh, bơngai wơ̆r juăt đơ̆ng sơ̆ bơngai Y Eugenio Monti oei chông adrol. Kơplah mơ̆ng tơdrong tơbăt, sư pơ̆n nuih plôh wih đơ̆ng kơdih gre sư wă gơih ăn kơ khŭl bơngai Anh roi yua.

Yua kơ thoi noh, khŭl bơngai Anh gơh pơtrơp tơdrong pơjei păng đei kĕjei iŏk tơmam apah hăm maih. Na Monti păng khŭl bơngai Y đei iok brŏk truh tơ anih hơgăt ‘bơ̆t anih mă pêng.

Dah đei jet yua kơ liơ đei jơhngơ̆m tơgŭm hloi khŭl ayăt, Monti iŏk đon ala tơl tơwih: “Tony Nash kĕjei ưh kơ trŏ yua kơ inh ăn kơ sư mưng iŏk wih, mă yua kơ sư ‘noh jơ̆ bơngai wơ̆r gơh hloh.”

Tơdrong pơm tơ’bôh ‘lơ̆ng hloh ‘noh tơgŭm Monti jing bơngai blŭng a đei iŏk tơmam apah De Coubertin, mĭnh lăm dôm anăn pơ-ư gĭt hloh pơ-ư kơ jơhngơ̆m gah tơdrong pơjei băl gah jơhngơ̆m pran đơ̆ng sơ̆ gah Olympic.

Kră Yang ăn tơdrong pŭn kơ dôm lu jơhngơ̆m chu iŏk đon ala păng mơnat tơgŭm bơngai nai. ‘Noh kŭm jơ̆ mĭnh trong ‘noh đĕch ăn kơ lu bơ̆n jing “bơngai kĕ jei” lăm kơdih tơdrong arih kơdih. Kĕjei ưh kơ truh dah lu bơ̆n adrin iŏk gah hloh, mă jơ̆ kơplah bơ̆n băt hơdai băl yak năm lăm tơdrong ‘mêm mơnat păng tơdrong mĭnh jơhngơ̆m đon.

Casey Stengel đei chông anhăk khŭl đă bơlŏng sư truh tơ lơ kĕjei, ưh kơ trŏ yua kơ sư chă ‘bôh kơ mĭnh ‘nu bơngai gơh hloh, mă yua kơ sư đei khŭl tơpôl băt hơdai mĭnh jơhngơ̆m păng tơgŭm dih băl.

Tơdrong ‘noh đei yua iŏk lăm tơdrong pơjei băl gah jơhngơ̆m pran, lăm Khŭl Bơngai Lui, păng hăm lăm tơdrong arih rim năr đơ̆ng lu bơ̆n. Yua kơ dah bơ̆n mĭnh jơhngơ̆m hơdai tơpă, ưh kơ wă bu hloh kơ bu, ưh kơ tơgar băl, lei ‘noh bơih jơ̆ kơplah tơdrong jang Kră Yang đei bơ̆jang hăm tơdrong đei yua hloh.

Apĭnh đĭ đăng krao khan hơdai: Kơkuh kơ Kră Yang, kon bơnê kơ Ih yua kơ dôm tơdrong Ih mơnat ăn đĕch đei dan ăn lăm chăl arih kon, păng lăm kơdih dôm kơ ‘nhŏng mŏ oh tăp dăr kơ kon. Apĭnh bơtho kon băt arih chu iŏk đon ala, ling lang lăng bơngai nai hăm jơhngơ̆m pơyom păng ‘mêm mơnat. Apĭnh tơgŭm kon wă bơ̆jang hloi, bơwih bơwăn păng dŏng tơgŭm dôm lu bơngai hơdai hăm kon lăm trong yak năm kiơ̆ Kră Yang, ăn kơ lu nhôn hơdai băl gơh pơm lơ tơdrong đei yua kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Kră Yang kơ lu bơ̆n ưh kơ chơ chă “bơngai gơh hơgei hloh”. Sư krao dôm lu jơhngơ̆m wă tơjur akâu kơdih hloi wă tơ iung hơtŏk bơngai nai, hăm tơdrong kơnhăm hơdai jơ̆ wơ̆ pran tơdrong jang Dêh Char ‘Bok Kei-Dei. Jơ̆ ‘nhŏng mŏ oh lăm Kră Yang hơdai băl, hơpơi khan lu bơ̆n rim năr pơhrăm iŏk tơdrong chu iŏk đon ala, klah asong, wă hơdai dŏng tơgŭm băl wơ̆ kơjăp lăm tơdrong mơnat ăn đĕch. Yua kơ đơ̆ng tơdrong pơm jing mĭnh tơpôl bơngai wơ̆ pran ưh kơ trŏ jơ̆ jơhngơ̆m pran đơ̆ng rim bơngai, mă jơ̆ jơhngơ̆m chu iŏk đon ala, ‘mêm mơnat, gô yak năm hơdai hloi truh tơ tuch luch.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.