Gơs tú lơi he lơh broă tòm dồ mpồl, cau lơi kung jak chài, mơya cau lơi kung kờn jat nùs is he dê, gơlik gơs broă ờ rgơi lơh. Bulah gơs bơta jak chài kàr lơi, bol he ờ rgơi lòt ngài dilah siớu bơta dồ nùs bal. Mơ tòm gùng lòt jat Yàng kung bè hớ, bol he geh hòi sac nàng lơh broă bal mơ gơp, yờ đơ bal mơ gơp, nàng rgơi lơh sir broă Yàng dê.

Ngai do, ngai 10/09/2025, rơndap bơta hòi dăn kòp ngai hòi jà ồng mọ oh mi kơlôi sơnơng Jơnau Yàng bal mơ ồng Wally Odum bơh tơnggume DỒ NÙS CÈNG TUS BƠTA SIR BROĂ.

“Kòp nă tòm ală oh mi bañ mìng kơlôi rcang broă tòm he dê, mơya kung pal kơlôi rcang broă cau ndai in sơl.” (Philip 2:4)

Casey Stengel, ồng huấn luyện viên tòm mpồl môn bóng chày, neh đơs dồ jơnau dingan: “jòi bàn dồ nă cau jak chài ờ kalke. Mơya nàng bol khai rgơi dồ nùs bal do ngan la bơta jê bồ.” jơnau đơs do ờ di mìng đơs di tòm bơta ntoat pơrlòng, mơya kung di tòm ală broă kòp ngai sơl.

Cau lơi tòm bol he kung pal tìp ală sèng lùp: lơh mbè lơi nàng ală bơta nđàc mơ bơta jak chài Yàng ai he in rgơi dồ nùs bal mơ ală cau ndai taih? Lơh mbè lơi nàng dồ nùs lơh broă bal, dồ nùs cơnđoà lòt bal, mơ dồ nùs sền dồ bă bal taih? Sèng lùp do ờ di mìng ngui tòm broă lơh hala tòm hìu nhă, mơya kung pal càng kơlôi tus tòm gùng lòt jat Yàng sơl.

Gơs ală môn thể thao mìng dồ nă lơm, gơlơh bè bơta tom pơt, tom lơh hala kơnhơl golf, geh phan bàn hala ờ mìng dồ nă rgơi lơh. Mơya ală bơta coh plai, bóng rổ, bóng chày hala bóng bầu dục là ală môn gơs oă cau, he mìng geh phan bàn tú mơ dồ mpồl he dê phalin. Gùng lòt jat Yàng bal mơ rài kis he dê ngan kung bè dồ môn thể thao gơs oă cau do. Nàng rgơi geh phan bàn he pal git dồ nùs bal mơ ală cau ndai.

Nùs jòng să mơ sềt pơnhiă la bơta kup kơryan dờng ngan nàng dồ mpồl ờ rgơi geh yò tơnguh dờng dồ bă pràn kơldang. Yàng Jesus neh bơtê bol he lah bulah ală cau at bồ, kung pal bơtê nàng pơndềt să mơ kis nàng duh broă cau ndai. Ồng Pol là dồ nă cau git loh lang bơta do. Ồng sùm sền dờng màng bơta dồ nùs bal tòm broă lơh, tài bơh ồng git lah mìng tú he dồ nùs dồ bă bal, sùm bol he rgơi lơh sir gơnoar broă Yàng jào he in.

Tòm sră pơyoa Hìu Jum Goh Philip dê, ồng tơngkah cau dờn Yàng:

“Bañ lơh bơta lơi bơh nùs sềt pơniă hala bơh bơta gơklŏ ò kwơ, mơya pìn pơndêt tĕ să, kòp nă sền cau ndai la dờng màng rlau mơ he. Kòp nă tòm ală oh mi bañ mìng kơlôi rcang broă tòm he dê, mơya kung pal kơlôi rcang broă cau ndai in sơl.” (Philip 2:3-4)

Ồng Pol khin cha nàng ràng tơlik broă rgơi lơh ờ pràn kơl dang ală mpồl lơh broă hớ là: nùs sềt pơniă. Tú dồ nă cau mìng git să tờm he lơm, mìng sền tus dê cồng nha he dê lơm mơ ờ kah tus dê cau ndai, cau hớ rơp sơntờm cah is mơ ờ rgơi gơlik cồng nha oă tai.

Jơnau “nùs sềt pơniă” tòm jơnau greek geh gơtha: “An geh cồng nha lơi tòm broă do taih?”. Do la dồ nùs nhơm tom pìt cồng nha, broă do ờs mờng gó tòm ală cau at bồ làng bol tóm pah rài hớ. Mơ ngai do kung ờ gơ krơi sơl.

Ồng Pol hòi jà bol he pal sền cau ndai “bè dờng rlau mơ he”. Bơta do là bồ broă kalke dờng gơwèt mơ poăc să kòn mơnus dê. Tài bơh tòm dunnia sùm tòm pìt, boă gơjran, cau lơi kung kờn geh cồng nha is să tờm he dê.

Mơya ồng Pol ờ đơs tus la bol he pal ờ dờn dờp bơta nđàc hala bơta jak chài să tờm he dê. Ồng tơngkah bol he pal sền dờng màng mơ dờn dờp ală bơta mà Yàng pà ai cau ndai in. tài bơh cau lơi kung gơs pơnah pràn is cau hớ dê, cau lơi kung gơs pơnah jak chài rlau cau hớ dê. Ờ gơs cau lơi la gơs jơh ală bơta, mơ ală bơta mơ cau ndai gơs gen ngan la ală bơta mơ bol he pal kờn.

Yàng Jêsus kờn ală cau bơtê kis dồ rài kis dồ nùs bal, ờ sềt pơniă. Gơs dồ bơta pơnyơu niam ngan bơh broă do neh gơlik gơs tòm Thế vận hội mùa đông nam 1964.

Tòm bơta pơrlòng rơndeh trượt tuyết bàr nă, mpồl lơgar Anh gơs ồng Tony Nash at ngke rơndeh neh tus đik dớ bàr tòm dớ sơnrờp. Mơya bol khai đal git gơs dồ nơm kòn bơrlòng tềng kong rơndeh ờ kớ tai. Broă do rgơi lơh bol khai in ờ rgơi ntoat pơrlòng tai.

Tú hớ, dồ nă cau ntoat pơrlòng jak chài lơgar Ý la ồng Eugenio Monti gam ơm rơndap dớ dùl. Tú ồng kơno, ồng neh tă kon bơrlòng bơh rơndeh ồng dê nàng pà tus dê mpồl lơgar Anh nàng ngui ing.

Kơnờm mơ hớ, mpồl lơgar Anh rgơi ntoat pơrlòng tai mơ dờp geh huy chương vàng. Mơya ồng Monti mơ mpồl ồng dê mìng tus đik tềng rơndap dớ pe.

Tú cau lùp ồng nchi bơtài chò nùs nàng dong cau ndai, ồng Monti pơndềt să hơ wơl: “Tony Nash geh phan bàn ờ di tài bơh an ai khai in ngui ing bơrlòng ờ, mơya tài bơh khai la dồ nă cau at ngke rơndeh jak chài rlau jơh.”

Broă lơh niam do neh dong ồng Monti gơlik gơs cau sơnrờp ngan geh jào huân chương De Coubertin, do la dồ nơm phan bàn dờng ngan nàng jòng rơ nùs nhơm niam tòm kỳ Olympic.

Yàng ai lơngai tus dê ală nùs nhơm pơndềt să. Do kung la dồ nơm gùng nàng bol he rgơi gơlik gơs cau phalin tòm rài kis he dê. Phalin ờ di tus tú he ai pràn nàng pha mơ cau ndai, mơ la tú bol he git dồ nùs bal nàng cơnđoà lòt tòm bơta kờngơboh mơ tòm bơta dồ nùs bal.

Casey Stengel neh tề lăm mpồl ồng dê lòt gan oă ngan chức vô địch, ờ di tài bơh ồng jòi bàn cau jak chài rlau jơh, mơ la tài bơh ồng gơs dồ mpồl git dồ nùs mơ git dong kòl bal mơ gơp.

Bơta do geh ngui tòm bơta ntoat pơrlòng, tòm Hìu Jum Goh, mơ tòm rài kis kòp ngai he dê sơl. Tài bơh tú he dồ nùs dồ bă bal, ờ tom pìt, ờ boă gơjran, gen tú hớ la tú gơnoar broă Yàng dê gơlik cồng nha dờng rlau jơh.

Dan jà bol he dô nùs bal tòm bơta hòi dan: Khoai Yàng, kon ừn ngài Yàng tài bơh ală bơta nđàc mơ Yàng neh pà ai kon in, mơ tòm ală oh bi gut dar kon dê sơl. Dan bơtê kon in git kis pơndềt să, sùm sền cau ndai bơh nùs nhơm sền dờng màng mơ kờn gơboh. Dan dong kon chò nùs lơh broă bal, duh broă mơ yờ đơ ală cau ndai bal mơ kon tòm gùng lòt jat Yàng, nàng bol kon dồ nùs dồ bă bal lơh oă broă cồng nha Yàng in. kon jơh nùs hòi dăn, ai sơnđan Yàng Jesus Krist, Amen.

Ơ ală ồng mọ oh mi kờn gơboh, Yàng bol he dê ờ jòi “cau jak chài rlau jơh”. Yàng hòi sac ală nùs nhơm chò nùs nàng pơndềt să he tồ yờ tơngguh cau ndai, bal mơ gơnoar broă là yò tơnguh dờng broă lơgar Yàng dê. La oh bi tòm Yàng, kơp kờn ngan bol he kòp ngai bơtê git pơn dềt să, git tom pà, nàng yờ tơngguh bal mơ gơp geh dờng tòm bơta nđàc Yàng dê. Tài bơh broă lơh hìu jum goh geh pràn kơldang ờ di la bơta pràn is cau dê, mơ la nùs nhơm pơndềt să, kờn gơboh, mơ dồ nùs dồ bă bal jơl tus dê lồi dut.

Ơm ngac ală ồng mò oh mi yơ. Dăn Yàng ai lơngai ală ồng mò oh mi in tòm jơh dô ngai pa mơ dan tìp wơl ală ồng mò oh mi tòm ngai hìng!

Ơ ală ồng mò oh mi kòñ gơboh, dilah ồng mò oh mi kòñ bơtê git oă rlau bơh Yàng hala gơs bơta kalke, kơlôi sơnơng lơi mơ kòñ tompà mơ bol hi, dan ồng mò oh mi cih lòi wơl bơta kơlôi sơnơng hơ̆ tòm tiah hơđơm do, hala cih tòm fanpage Facebook dê, hala pơyoa email tus dê: [email protected]. Yàng Jesu kòñ gơboh ồng mò oh mi. Bol hi kơp kòñ ngăn gơs bơta gơtòmklac bal mơ ală ồng mò oh mi.