Lăm trong yak năm kiơ̆ Kră Yang lăm chăl arih ‘nâu, tơpă lơ bơngai lăm lu bơ̆n đei tơ’bơ̆p kơplah dôm jơ adrô̆ ‘măn jơ wă tơchĕng pơwao , dôm tơdrong ơh sơ’ngon, phŏ kŭm jơ̆ dôm tơdrong oei đei ưh kơ hiôk lăm jơhngơ̆m yua kơ tơdrong yoch glăi đơ̆ng kơdih. Bơ̆n ăn kơ dôm lu tơdrong ‘noh pơm kơ jơhngơ̆m ơh sơ’ngon. Mă lei đei mĭnh tơdrong tơpă lăm Sơ̆p Hla Bơar ‘Bok Kei-Dei gô ba truh kơ lu bơ̆n tơdrong dŏng pơklaih. ‘Noh jơ̆ Kră Yang ‘mêm mơnat păng ‘maih tơplih ăn hăm lu bơ̆n: Sư gô iŏk tôm tơdrong ơh sơ’ngon, pŭ tơplih tôm tơdrong yoch glăi, păng pơjao ăn kơ lu bơ̆n tơdrong ‘lơ̆ng rơgoh, hiôk hian, păng rơngei lăm Sư. Buăl hăm ‘maih pơm hloi tơdrong tơplih ăn ‘lơ̆ng rŏ ‘noh?

Năr ‘nâu, ‘năr 08/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jacqueline J. Overpeck kơ̆l ‘bai TƠDRONG TƠPLIH ĂN ‘LƠ̆NG RŎ.

“Bơ̆n băt kơ Sư ‘mêm mơnat kơ bơ̆n tơpă. ‘Bok Kei-Dei Sư gah tơdrong ‘mêm mơnat đĕch, na bơngai bu ‘mêm mơnat kơ đe tơpă, bơngai ‘noh pôm đon păng ‘Bok Kei-Dei păng ‘Bok Kei-Dei oei lăm sư.” (I Yôhan 4:16)

“Bơ̆n băt kơ Sư ‘mêm mơnat kơ bơ̆n tơpă. ‘Bok Kei-Dei Sư gah tơdrong ‘mêm mơnat đĕch, na bơngai bu ‘mêm mơnat kơ đe tơpă, bơngai ‘noh pôm đon păng ‘Bok Kei-Dei păng ‘Bok Kei-Dei oei lăm sư.” (I Yôhan 4:16)

Dah buăl năm hăm Kră Yang lăm tơdrong krao khan, đei mĭnh puăt lăm buăl đei tơlĕch hŭt. Gah ‘noh bơih jơ̆ dôm kơ tơdrong sơ’ngon, ơh sơ’ngon, pơmat tat, hiong răm mă buăl đei hlôi tơ’bơ̆p lăm đĭ chăl arih kơdih. Dah buăl hŭt tơlĕch đĭ dôm tơdrong ơh sơ’ngon lăm jơhngơ̆m bơ̆n ‘bơ̆t anăp Kră Yang, Sư gô tuh tơ’bĕnh bơhngol buăl hăm kơdih tơdrong ‘mêm mơnat đơ̆ng Sư. ‘Bok Kei-Dei jơ̆ tơdrong ‘mêm (I Yôhan 4:16) păng lăm Sư đei tơdrong pơklaih tih dêh (Hơriso 103:1-5).

‘Noh jơ̆ mĭnh tơdrong tơplih iŏk: Buăl pơyơ̆r kơ Kră Yang tơdrong ơh sơ’ngon đơ̆ng kơdih, Sư pơklaih buăl păng pơm tơ’bĕnh jơhngơ̆m buăl hăm tơdrong đơ̆ng Sư wă. Buăl dan tơjur tơdrong hli tơrơ, Kră Yang gô tơplih hăm đon lui. Buăl pơyơ̆r kơ Sư tơdrong yoch đơ̆ng kơdih, Sư ‘măn ăn kơ buăl tơdrong jing ‘lơ̆ng rơgoh đơ̆ng Sư.

Minh tơdrong tơplih iŏk. Đei lu bơngai sư kư̆m pơting tơdrong tơplih iŏk thoi kơ măt ‘năr pơchrang noh jơ̆: đơ̆ng măt ‘năr pơchrang ăn kơ lu hla ‘long, na hla ‘long gô đei tơdrong arih. Dôm tơdrong đei tơdrong arih đơ̆ng tơplih iŏk ‘nâu lu ‘nhĕt ‘nhot, sem dơrong păng kon bơngai.

Pơtih gia, hla ‘long arih yua kơ đơ̆ng hơdah. Tơdrong tơplih iŏk pơtơm kơplah hơdah pơchrang tơ hla ‘long. Hla ‘long tơ’bôh dơ̆ng tơ hơdah măt ‘năr, sơng iŏk đơ̆ng măt ‘năr wă pơm kơ tơmam rong arih sư, kŭm đei tơlĕch hơyuh kial oxy păng oxy jing tơmam ăn kơ dôm sem dơrong nai arih. ‘Noh jơ̆ tơdrong tơplih iŏk đơ̆ng măt ‘năr pơchrang jing tơdrong arih pran.

Kŭm thoi noh, đĭ đăng kon bơngai đei yua kơ đơ̆ng hơdah đơ̆ng Yang Yêsu, Kon ‘Bok Kei-Dei, wă kơ gơh tơplih, gơh pơklaih păng jing gơh ‘lơ̆ng tôm.

Lĕi lăi thoi kơ rim hla ‘long đei đơ̆ng hơdah măt ‘năr pơchrang, đơ̆ng kơ rim chăl lăm kon bơngai buăl gô đei hơtŭt păng praih klaih yua kơ đơ̆ng tơdrong oei hơdai ‘lơ̆ng rơgoh đơ̆ng ‘Bok Kei-Dei. Đei yua kơ đơ̆ng tơdrong pơgơ̆p trŏ ‘lơ̆ng ‘noh bơih jơ̆ “kial rong” kơ tơdrong arih bơhngol. “’Bok Kei-Dei ăn kơ bơ̆n gơh arih gơh bơ̆jang. ‘Bok thây iĕm kư̆m chih thoi âu: ‘Bơ̆n kư̆m kon ‘Bok Kei-Dei mơ̆n.” (Tơdrong Jang 17:28)

Thoi noh năr ‘nâu, buăl hăm wă tơplih ăn hloi tơdrong ơh sơ’ngon đơ̆ng kơdih wă iŏk hơdah đơ̆ng tơdrong ‘mêm Yang Yêsu ưh? Tơdrong tơplih iŏk gô đei pơm kơplah buăl achăng dôm lu tơdrong so wă sơng iŏk tơdrong ‘nao păng kơdih buăl gô gơh sơng iŏk tơdrong ‘nao plơ̆ng lăm tơdrong kơdih.

“Ơ bơhngol inh, hơri bơnê bĕ kơ Kră Yang! Đĭ jơhngơ̆m hơri bơnê bĕ kơ anăn ‘lơ̆ng rơgoh Sư! Ơ bơhngol inh, kơkuh bơnê bĕ kơ Kră Yang. ‘Nĕ hiơt dôm tơdrong ‘lơ̆ng Sư pơm. Sư mơnat ăn dôm tơdrong yoch đêl ih pơm, Pơklaih dôm tơdrong jĭ jăn ih. Sư dŏng pơklaih tơdrong arih ih đơ̆ng sơlŭng jrŭ. Iŏk tơdrong ‘mêm păng tơdrong mơnat na pơm môk pơtao pơyơ̆l ăn kơ ih. Sư ăn kơ hơlŏng ih hrăp jơnap. Hăm tơmam sa ‘lơ̆ng, sơnăm hơmuh hơmŏng ih wih ‘nao dơ̆ng thoi Klang.” (Hơriso 103:1-5)

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon! Kon bơnê kơ Kră Yang yua lăm dôm tơdrong pơmat tat, tơdrong pơlong lăng, pơ̆k huŏng đơ̆ng chăl arih Kră Yang oei ling lang hơdai kon. Ih đei chu lôch tơ ‘long pơglang wă kơ tơdrong yoch kon gơh mơnat ăn, tuh tơ’bĕnh jơhngơ̆m rơhông đơ̆ng kon hăm kơdih tơdrong ‘mêm mơnat ưh kơ đei kiơ gơh pơtŏ pơting đơ̆ng Ih. Hơpơi apĭnh Kră Yang ăn kơ kon ling lang rơhing chơ chă Ih rim năr, wă sơng iŏk tơdrong pran kơtang đơ̆ng anih Ih ‘măn ăn, na arih, bơ̆jang păng pơyơ̆r chăl arih kon lăm tơdrong bơwih bơwăn kơ Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, wă kơ gơh ba tơdrong ‘mêm mơnat đơ̆ng Kră Yang tơ’bôh kơ dôm bơngai tăp dăr lei adrol hloh tơdrong arih đơ̆ng bơ̆n kăl kơ đei tơplih. Hăm trŏ lu bơ̆n đêl đơ̆ng lu bơngai oei ‘blŏk răk kơ tơdrong yoch, hưch hanh kơ teh đak? Tơdrong ‘mêm đơ̆ng Kră Yang đei tơplih buăl năr ‘nâu hloi ưh? Oei dôm yơ tơdrong lăm jơhngơ̆m, hiơ̆k tơtăm, ơh sơ’ngon, ưh kơ hiôk lăm tơdrong arih buăl, năr ‘nâu đei ba truh dan ‘bơ̆t jơ̆ng Sư ưh? ‘Bok Dŏng Pơklaih ‘mêm mơnat oei chang gô păng gô pơm hloi kơ mĭnh tơdrong tơplih ăn ‘lơ̆ng rŏ, wă ‘măn ăn kơ lu bơ̆n mĭnh chăl arih ‘nao lăm Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.