Lăm trong yak năm kiơ̆ Kră Yang, lu bơ̆n đei pŭn wă hŏk iŏk băt kơ Kră Yang đơ̆ng lăm hŏk pơhrăm nơ̆r ‘Bok Kei-Dei, jơ akŭm kơkuh, đơ̆ng lăm sơ̆p hla bơar đei chih lu bơngai lui kơ ‘Bok Kei-Dei. Mă lei, yua kơ kiơ hŏk lơ tơdrong gah Kră Yang, tơdrong arih lơ bơngai lăm lu bơ̆n oei mơn kơ đei hrĕng kro lăm bơhngol păng ưh tam mă ‘bôh wơ̆ ‘lŏ lăm tơdrong hlôh băt kơ Kră Yang? Lei lu bơ̆n băt tơpă kơ Kră Yang bơih lei mă lăp băt gah Kră Yang đĕch?

Năr ‘nâu, ‘năr 07/09/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Janice Moore kơ̆l ‘bai BĂT KƠ KRĂ YANG TƠPĂ LEI BĂT ĐĔCH KƠ KRĂ YANG?

“Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist.” (Philip 3:8)

Lu bơngai đe ngăl pôk pơ ư đei ‘bôh lăm phĕt ‘lơ̆ng rŏ, mă loi kơplah sư đei tơgŭm ăn kơ kon pơlei. Tơdrong jang gah tơgŭm kơ kon pơlei noh jơ̆ tơdrong jang ‘lơ̆ng, mă lei gô keh đang kơnh ưh kơ thoi lu bơ̆n wă. Yua kơ lu sư pơm tơdrong ‘lơ̆ng noh wă kơ đe pôk pơ ư kơ kơdih sư đĕch. Păng sơ’ngon tơpă, kon bơngai dan lê̆ khan bơngai đei pôk pơ ư athei pơm tơdrong kiơ noh ăn kơ tơring kơdih. Tơdrong ‘nâu kư̆m đei bơih hăm Yang Yêsu lăm tơdrong bơ̆jang Sư.

Sơ̆p hla bơar ‘Bok Kei-Dei đei chih pơtơm blŭng a lăm tơdrong bơ̆jang, Yang Yêsu brŏk tơ dêh Galilê păng mơ̆t tơ lăm hnam akŭm tơ pơlei Nasaret, pơlei Sư ‘mơ̆i. Tơ noh, Sư đŏk lăm Êsai 61 păng bơtho kon pơlei: “Klaih kơ noh Yêsu wih tơ Pơlei Nasaret, pơlei Sư kơdih. Lăp truh kơ năr pơdơh Sa’bat Sư năm akŭm tơ hnam ‘Bok Kei-Dei pơlei Sư kơdih, yua kơ rim năr pơdơh Sa’bat Sư juăt kơ akŭm ngăl. Lăp truh tơ ei Sư iung wă đŏk kơ đe sơ̆p hla bơar ‘Bok Kei-Dei. Đe ăn kơ Yêsu sơ̆p hla bơar Êsai, bơngai pơtruh nơ̆r ‘Bok Kei-Dei adrol sơ̆. Na Yêsu plơ̆ lăng sơ̆p hla bơar ei ‘bơ̆t mă đei chih thoi âu:“Yang Bơhngol ‘Lơ̆ng ‘Bok Kei-Dei oei hơdai Inh. Sư rơih Inh wă năm bơtho ăn tơdrong ‘nao ‘lơ̆ng kơ lu bơngai dơnuh hin păng pơlung lu bơngai ơh sơ’ngon. Sư wơh Inh roi tơdrong Sư wă tơlĕch lu bơngai đe phak, păng pơklaih lu bơngai măt tol. Sư wơh Inh pơklaih lu bơngai mă đe pơjuă pơđep, păng roi kơ đe tơdrong Kră Yang wă pơklaih kon bơngai dang ei.” Yêsu đŏk lăng tơdrong noh đang boih na Sư đơ̆p lê̆ hla bơar noh pơdrĕo ăn kơ bơngai wei-lăng lăm hnam akŭm ei. Đơ̆ng noh Sư tơoei wă bơtho thoi đe noh juăt sơ̆, na đĭ-đăng kơ lu bơngai oei lăm hnam akŭm ei pơglăn lăng tơ Sư. Na đơ̆ng ei Yêsu khan kơ lu sư: “Tơdrong mă Êsai khan lê̆ hơdrol noh sơ̆, năr âu boih iĕm ‘bôh tơdrong noh truh tơpă.” Na đĭ-đăng kơ lu sư lăp đon kơ Yêsu păng lu sư kư̆m sơleng kơ đon mơ̆n yua kơ Yêsu bơtho kơ lu sư ‘bơ̆r đon hơgei tơpă. Na lu sư khan: “Bơngai âu kon Yôsep dah kiơ?”(Luka 4:16-22)

Kơplah đŏk đang bơih, Yang Yêsu khan nơ̆r lăm sơ̆p hla bơar ‘Bok Kei-Dei lăm Êsai noh pơma kơ Sư. Rŏ lăng lơ bơngai tơ Nasaret đei kơ tơ̆ng kơ tơdrong hlĭch mơsêh mă Kră Yang đei pơm kơ lơ bơngai tơ Kapernum. Păng lu sư kư̆m chang gô Kră Yang gô pơm tơdrong thoi noh, yua kơ lu sư tơchĕng trŏ kơ lu sư đei tơdrong noh.

Mă lei Yang Yêsu ưh kơ pơm thoi lu sư chang gô noh. Na Yêsu khan kơ lu sư: “Iĕm wă jô̆ kơ Inh tơdrong đe juăt kơ pơma thoi âu: Ơ ‘bok thây pơgang, pơklaih tơdrong jĭ ih kơdih ‘mơ̆i, yua kơ pơlei âu pơlei Ih kơdih na Ih athei pơklaih đe tơ âu kư̆m thoi nhôn kơtơ̆ng ang Ih pơklaih đe tơ Pơlei Kapernum ki.” Na Yêsu khan dơ̆ng kơ lu sư thoi âu: “Inh khan kơ iĕm tơpă, lu bơngai pôm pơlei hăm bơngai pơtruh nơ̆r ‘Bok Kei-Dei, lu sư ưh kơ wă sơng iŏk sư ôh.” (Luka 4:23-24)

Na Yang Yêsu tơ’blŏk tơdrong hơ’mon lăm tơdrong pơgơ̆p Pah So: bơngai khan lê̆ hơdrol Êli đei wơh năm truh tơ yă hơdro Sarepta, noh jơ̆ bơngai gah ‘ngoaih kơ pơlei sư. Na Êli pơklaih Naman, kư̆m bơngai gah ‘ngoaih kơ pơlei sư: “Na dang ei Inh roi pơtih gia kơ iĕm tơdrong noh: Kơplah Êli pơtruh nơ̆r ‘Bok Kei-Dei tơ dêh char Isơrael âu sơ̆, kơplah lăm pêng sơnăm ưh kơ đei ‘mi jơ̆p kơ dêh char Isơrael. Na đei tơdrong pơngot rơwĕt tơpă. Kơplah noh sơ̆ đei lơ yă adro tơ dêh char Isơrael. Mă-lei ‘Bok Kei-Dei ưh kơ wơh Êli năm tơgŭm lu sư ôh. Sư wơh Êli năm tơgŭm minh ‘nu yă adro tơ Pơlei Sarepta lăm dêh char Siđôn đĕch, noh kư̆m dêh char tơmoi. Kư̆m thoi noh mơ̆n, kơplah Êlisê pơtruh nơ̆r ‘Bok Kei-Dei tơ dêh char Isơrael âu sơ̆ đei lơ bơngai jĭ chin lăm dêh âu. Mă-lei Êlisê ưh kơ đei pơklaih lu sư ôh. Sư pơklaih pôm ‘bok Naman, bơngai đơ̆ng dêh char Siri đĕch, sư dêh char tơmoi mơ̆n.”(Luka 4:25-27)

Kơplah Yang Yêsu tơ’blŏk ming bơngai khan lê̆ hơdrol Êli păng Êlisê pơm tơdrong mơsêh ăn kơ bơngai ‘ngoaih kơ pơlei sư mă ưh kơ pơm ăn kơ kon pơlei Isơrael na lu bơngai lăm hnam akŭm blĕk. Lu sư dui tơ lĕch wă pơlôch Kră Yang: “Na lu bơngai oei mơ̆ng lăm hnam akŭm ei kơtơ̆ng thoi noh na đĭ-đăng kơ lu sư hil areh kơ Yêsu tơpă. Lu sư gruih graih iung rôp hloi Yêsu anhăk tơlĕch Sư đơ̆ng pơlei ei năm tơ kông ‘bơ̆t jê̆ pơlei sư ei wă hiŏng hơtat Sư đơ̆ng kơpal jih nak ‘nei ră. Mă-lei Yêsu klĕnh hloi yak kiơ̆ tŏk-bŏk đe, lĕch jăk hloi tơ nai.” (Luka 4:28-30)

Hăm đei layơ đunh sơnăm bơih buăl brŏk tơ pơlei kơdih na ‘blŏk kơ lu bơngai juăt kơ buăl … mă tơpă ưh kơ băt kiơ kơ buăl? Tơdrong noh đei truh kơ inh kơplah inh hơdai tơ’bơ̆p ‘blŏk kơ năr lĕch đơ̆ng hnam trưng. Năr noh đei lơ bơngai dai năm. Minh ‘bar ‘nu kơnăl kơ inh, na lu sư pơma tơ’blŏk ‘blŏk kơ inh, inh kon drŏ kăn bơngai bu noh, đêl bơngai thoi yơ, dah đêl đơ̆ng kơnao hŏk đơ̆ng lăm kơnao blŭng a sơ̆. Mă khan ‘blŏk păng kơnăl kơ inh, mă lei ưh kơ băt tơpă gah inh.

Kon pơlei tơ Nasaret kư̆m ưh kơ băt tơpă kơ Yang Yêsu. Lu sư băt kơ Kră Yang kiơ̆ kơ thoi kon bơngai: kon drŏ ‘nglo Yôsep, minh ‘nu bơngai ot ‘long hmă đĕch. Lu sư ưh kơ băt kơ Sư noh jơ̆ ‘Bok Mêsi, Tơ’ngla mă tuh pơgang rơmă, Tơ’ngla jur tơ teh đak wă ră roi gah tơdrong ‘Nao ‘Lơ̆ng đơ̆ng Dêh Char ‘Bok Kei-Dei, wă tơlĕch lu bơngai đe phak, păng pơklaih lu bơngai măt tol, pơklaih lu bơngai mă đe pơjuă pơđep. Pơma khan “băt” đơ̆ng kon pơlei noh jơ̆ “băt” mơlôh mơlônh gah pah ‘ngoaih. Na kơplah Yang Yêsu roi tơ băt Sư noh Tơ’ngla thoi noh, tơplih kơ sơng iŏk đon lui, lu sư tă kơ klai blĕk păng wă pơ lôch Kră Yang.

Hrei ‘nâu, hăm trŏ kơ lu bơ̆n băt kơ Kră Yang thoi pơlei Nasaret sơ̆ noh ưh? Lu bơ̆n ngeh kơ bơ̆n băt kơ Yang Yêsu yua kơ lu bơ̆n năm tơ hnam akŭm, mơ̆ng ‘bai bơtho, hơdai lu khŭl hŏk pơhrăm lăm Hnam Akŭm, kư̆m truh tơ bơtho gah Kră Yang. Mă lei tơdah lu bơ̆n “băt đĕch gah Kră Yang” đơ̆ng lăm đon tơchĕng đĕch mă ưh kơ pơgơ̆p hăm Sư, tơnat wă kơ lu bơ̆n mơn đei tơdrong ‘mêm mơnat ăn đĕch păng gơh hơgei đơ̆ng Sư. Tơdrong arih băt kơ Kră Yang mơlôh mơlônh ưh kơđei plei ‘lơ̆ng tơpăt, mă gô jing đei plei kơnê̆.

‘Bok Pôl kư̆m bơngai đêl đei hlôh băt jrŭ să gah ‘Bok Kei-Dei kiơ̆ kơ khôi juăt. Sư jơ̆ adrĕch adrŭng bơngai Isơrael. Gah khôi juăt, sư noh gah bơngai Pharisi, gah tơdrong tơpăt kiơ̆ kơ khôi juăt sư ưh kơ đei ‘bơ̆t ayơ wă pơdê kơ sư. Mă lei, ‘bok Pôl lăng dôm kơ tơdrong nhen thoi “hla đuih đăm” pơting hăm băt kơ ‘Bok Dŏng Pơklaih Yang Yêsu. Đơ̆ng tơdrong pơjing khŭl lui hrĕng kro, ‘bok Pôl hlôi mơn đei ‘Bok Krist noh hiôk hloh kơ đĭ đăng: “Mă tơdrong kiơ đe khan yua, inh lăng ưh pă yua boih, yua kơ dôm tơdrong inh sơđơ̆ng kơ Yŏng inh Yêsu Krist kăl hloh kơ đĭ-đăng tơdrong noh. Inh hăt kơ kiơ̆ Sư lê̆ đĭ dôm tơdrong akâu inh sơđơ̆ng thoi lĕ kơ hla đuih đăm, wă kơ inh gơh sơng iŏk Yêsu Krist.” (Philip 3:8)

Apĭnh đĭ đăng krao khan hơdai: Kơkuh kơ Kră Yang mă ‘mêm kơ kon. Kră Yang ơi, apinh ăn kơ kon băt kơ Ih tơpă đơ̆ng lăm pơgơ̆p kơdih akâu kon, băt tơpă kơ Ih ưh kơ khan băt đĕch kơ Ih. Apinh mơnat kơ kon kơplah lơ wơ̆t kon hŏk gah Ih mă ưh kơ ăn dôm tơdrong noh mơ̆t lăm jơhngơ̆m, na pơm kơ kon ưh kơ wơ̆ ‘lŏ lăm tơdrong băt kơ Ih tơpă, mă dơ̆ng ‘bơ̆t tơdrong gơh hơgei ưh kơ đei yua kiơ păng ưh kơ đei mơsêh. Hơpơi kơ Kră Yang chông anhăk kon, tuh ăn kơ kon jơhngơ̆m rơhing wă kơ băt kơ Ih tơpă, ưh kơ bơ̆l hăl kơ dôm kơ tơdrong kon hŏk mă đei băt bơih, mă hơpơi kơ băt kơnăl tơpă lăm tơdrong pơgơ̆p hăm Ih lơ hloh. Apinh ăn kơ kon đei pơma thoi kơ ‘bok Pôl băt kơ ‘Bok Dŏng Pơklaih Yang Yêsu noh gĭt kăl hloh lăm chăl arih kon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ eng, kon pơlei Nasaret băt kơ Yang Yêsu mă lei lu sư ưh kơ lui kơ Yang Yêsu. Mă khan đon lu sư mơ̆ng kơ tơ̆ng nơ̆r Kră Yang khan, mă lei ưh kơ ăn Kră Yang hơtŭt ‘bơm lăm jơhngơ̆m. Hrĕi ‘nâu, lu bơ̆n ‘bônh kơ pơ̆k lăm tơdrong pơhlŭ thoi noh: hŏk băt lơ tơdrong gah Kră Yang lăm sơ̆p hla bơar ‘Bok Kei-Dei, mă lei ưh kơ ăn jơhngơ̆m hơtŭt ‘bơm nơ̆r ‘Bok Kei-Dei păng đei tơplih đơ̆ng Nơ̆r noh. Năr ‘nâu, athei apinh Kră Yang tơplih jơhngơ̆m buăl wă kơ buăl băt tơpă kơ Kră Yang păng arih pơgơ̆p hăm Sư. Rim kơ yak năm hăm Nơ̆r Kră Yang, athei dan jơhngơ̆m băt kơ rơhing đei mơ̆ng nơ̆r Sư, đei tơ’bơ̆p Sư, đei hlôi mơn Sư oei hơdai păng đei tơplih đơ̆ng Kră Yang.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.