Lu bơ̆n ngăl tơchĕng kơ tơdrong rơngei nhen thoi minh tơdrong pơgơ̆r dah tơdrong pơlei pơla, mă lei Sơ̆p Hla Bơar ‘Bok Kei-Dei đei tơ’bôh thoi âu, rơngei tơpă noh đơ̆ng găh lăm, tơm đơ̆ng lăm bơhngol rim ‘nu. Rơngei noh jơ̆ đơ̆ng kon bơngai đei dŏng pơklaih đơ̆ng tơdrong yoch, klaih đơ̆ng hli tơrơ, klaih đơ̆ng tơdrong juăt kơ pơm đơ̆ng kơdih akâu, wă kơ đei arih ‘mêm mơnat, huay kơ jô̆ yo păng ‘mêm dih băl. Tơm đơ̆ng lăm Hnam Akŭm, tơdrong rơngei noh đei pơjing kơ tơpôl minh jơhngơ̆m đon, hơlăng păng đei jơhngơ̆m ‘mêm dih băl. Na năr ‘nâu, kơplah lu bơ̆n ‘blŏk hơdơ̆r kơ năr blŭng a đơ̆ng sơ̆ kon bơngai, lu bơ̆n rai chĕp răk hloh thoi âu: yua kơ đơ̆ng tơdrong ‘mêm mơnat ‘Bok Dŏng Pơklaih Yang Yêsu, kon bơngai đei rơngei tơpă.

Năr ‘nâu, ‘năr 19/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Mark Burnett kơ̆l ‘bai ‘BLŎK HƠDƠ̆R KƠ NĂR RƠNGEI.

Sơ̆p Hla Bơar ‘Bok Kei-Dei: “Kră Yang Yêsu kư̆m thoi Yang Bơhngol ‘Lơ̆ng. Yang Bơhngol ‘Lơ̆ng oei tơ yơ, tơ anih noh rơngei hiôk-hian.” (II Kôrintô 3:17)

Đơ̆ng rŏng kơ Yang Yêsu Krist tŏk tơ plĕnh, Yang Bơhngol ‘Lơ̆ng jur tơ kon pơlei ‘Bok Kei-Dei. Kơplah noh, Hnam Akŭm, kư̆m jing Akâu Jăn Yang Yêsu Krist tơ kơpal teh, pơtơm blŭng a dui jơhngơ̆m lăm tơdrong arih ‘nao lăm năr Phĕt ‘blŏk kơ Yang Bơhngol ‘Lơ̆ng Jur.

Đei hloi, rơbâu rơngan bơhngol lui sơng iŏk Kră Yang, đơ̆ng lăm tơdrong lôch yak năm tơ tơdrong arih. Tơdrong ‘Nao ‘Lơ̆ng đei ră roi, lanh tĕnh jơ̆p kơ Jêrusalem nhen thoi ŭnh dơhlông sa hơnong ‘ba, na lanh jơ̆p kơ Dêh Rôm.

Dôm lu bơngai đơ̆ng đei tơdrong yoch păng chĕp tơdrong jang măng mu chô̆ pơkơ̆ng đunh sơnăm đei dŏng pơklaih. Glang chô̆ jơhngơ̆m lu sư đei hrĕch kơ tĕch hăm tơdrong mơsêh mơyang ‘Bok Kei-Dei. Păng lu sư đei pơm tơ’bôh blŭng a noh jơ̆ bơnê, kơkuh kơ Kră Yang păng ‘mêm dih băl.

“Dôm lu bơngai lui pôm đon pôm jơhngơ̆m. Rim ‘nu lu sư đei tơmam kơdih kơdih, mă-lei lu sư jô̆ tơmam sư hơdai ngăl.” (Tơdrong Jang 4:32)

Tôm tơdrong jing pôm đon pôm jơhngơ̆m ‘bơ̆t anăp ‘mêm mơnat, rơhing sơng iŏk Tơm Tơdrong Arih. Lu sư klah song tôm mŭk tơmam lu sư đei, yua kơ lu sư hlôh băt lu sư jing minh lăm Yang Yêsu Krist.

“Kră Yang Yêsu kư̆m thoi Yang Bơhngol ‘Lơ̆ng. Yang Bơhngol ‘Lơ̆ng oei tơ yơ, tơ anih noh rơngei hiôk-hian.” (II Kôrintô 3:17)

Nơ̆r pơkă lăm sơ̆p hla bơar ‘Bok Kei-Dei đei tơ’bôh ‘Bok Kei-Dei ‘maih wă dêh kơ rơngei, păng Sư đei tơ’bôh tơdrong noh rơđah kơplah ăn Yang Bơhngol ‘Lơ̆ng Sư jur tơ teh đak. Đơ̆ng noh, kon bơngai ưh kơ sĭ đei rơngei đĕch, mă đei rơngei đơ̆ng tơdrong juăt kơpơm kơnê̆ kơdih wă kơ đei tơdrong arih ‘mêm kơ bơngai nai, tơplih kơ arih ăn kơ kơdih akâu đĕch.

Tơm kơ đơ̆ng Yang Bơhngol ‘Lơ̆ng pơtrŭt, đei soh chhông pơtơm tơdrong jang blŭng a đơ̆ng teh đak Ăng Gle păng Mi wă kơ hŭt lê̆ tơdrong pơgơ̆r pơđep lu bơngai đĭch, pơtơm hăm tơdrong tơplih đơ̆ng lăm jơhngơ̆m, hơdrol kơ truh tơ tơdrong tơplih kon pơlei pơla păng khôi juăt.

Tơdrong rơngei noh đơ̆ng rŏng kơ ‘nâu đei iŏk năr đơ̆ng sơ̆ đei anăn Juneteenth (‘năr 19 khei 6), đei lăng thoi kơ năr ‘blŭng a hŭt lê̆ tơdrong pơgơ̆r pơđep bơngai đĭch tơ Mi.

Mă khan Nơ̆r pơma pơdah pơsĭt Rơngei đei pơdrơ̆ng yua iŏk ‘bar sơnăm hơdrol kơ noh, đei lơ anih oei pơm ưh kơ băt kơ dôm tơdrong lăm khôi juăt ‘nao ‘nâu. Dêh Texas noh jơ̆ anih ưh kơ drơ̆ng iŏk truh tơ tuch luch, truh tơ lu linh dêh char athei lu sư drơ̆ng iŏk ăn kơ lu bơngai đei rơngei kơ lu kon pơlei Mi mă tơm hmơm lu sư đơ̆ng bơngai adrĕch adrŭng bơngai đei akar găm trŏ kơlăm ‘năr 19/6/1865.

Kơplah jơ noh, kơplah lu bơngai đĭch tơ Texas mơ̆ng đe roi tơbăt, lu sư ôr jrĕo chơt hiôk pă đei wă gơh roi. Lu sư krao khan, bơnê kơ ‘Bok Kei-Dei, pơjing sŏng sa păng hơri soang chơt hiôk. Lơ bơngai lăm lu sư lui ngeh thoi âu: Tơm đơ̆ng Kră Yang đei dŏng pơklaih lu sư- thoi kơ Kră Yang đei kơ tơ̆ng nơ̆r nhơ̆m hmoi kon pơlei Isơrael mă đei pơm đĭch tơ dêh Êyiptơ, păng wă dŏng pơklaih lu sư đơ̆ng tơlei glang chô̆ pơkơ̆ng.

Păng tơm kơ đơ̆ng tơdrong noh, teh đak nhen thoi yak năm minh yak wă jê̆ truh tơ tơ tơpôl đei jơhngơ̆m ‘mêm mơnat păng đei dang ăi, thoi kơ Hnam Akŭm blŭng a đei tơdrong arih lăm sơ̆p Tơdrong Jang.

Hrei ‘nâu, ‘năr 19 khei 6 jĭng năr phĕt ‘blŏk hơdơ̆r kơ chơt hiôk năr rơngei noh. Mă lei hăm lu bơngai arih lăm Dêh Char Pơtao Yang Yêsu, lu bơ̆n ‘blŏk hơdơ̆r kơ năr rơngei hloh dơ̆ng: noh jơ̆ kơplah Yang Yêsu Krist lôch tơplih kơ đĭ đăng lu bơ̆n.

Kră Yang iung arih bơih, yua kơ đơ̆ng Sư Iung arih noh, đĭ đăng bơngai đei rơngei: ưh kơ sĭ rơngei đơ̆ng tơdrong lôch đĕch, mă kư̆m rơngei đơ̆ng tơdrong yoch ‘net ‘net gô pơrăm lê̆ tơdrong arih kiơ̆ kơdih păng tơ bơngai tơpôl lơ.

Tơdrong yoch jơ̆ tơm rơh kơ tơdrong pơdê dih băl lăm tơdrong arih, păng minh Kră Yang Yêsu đĕch đei tôm tơdrong gơh tơplih jơhngơ̆m kon bơngai. Đơ̆ng tơdrong mơsêh mơ yang Yang Bơhngol ‘Lơ̆ng, bu bu kư̆m gơh tơplih jing ‘nao, đơ̆ng gah lăm truh tơ gah ‘ngoaih.

Noh jơ̆ jơhngơ̆m chang hơmĕng kơ lu bơ̆n. Păng noh jơ̆ chang hơmĕng ăn kơ teh đak năr ‘nâu oei rơhing hloh kơ đĭ đăng.

Apĭnh đĭ đăng krao khan hơdai:
Kơkuh kơ ‘Bă mă ‘mêm, bơnê kơ Ih yua kơ tơdrong rơngei tơpă mă Ih ăn kơ kon lăm ‘Bok Dŏng Pơklaih Yang Yêsu Krist. Bơnê kơ Ih yua ăn kơ kon rơngei đơ̆ng tơdrong lôch, đơ̆ng tơdrong yoch păng đơ̆ng tơlei glang yang kơnê̆ chô̆ kon lăm rim năr. Apinh Ih tơplih kon đơ̆ng gah lăm, wă kơ kon arih đei tơdrong ‘mêm mơnat, đei băt kơ tơgŭm păng tơ’bôh tơdrong ‘mêm mơnat Ih đơ̆ng lăm dôm tơdrong kon pơm. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, tơdrong rơngei tơpă jơ̆ tơmam ăn đơ̆ng Kră Yang, Sư jơ̆ pŭ iŏk tơdrong lôch yua kơ lu bơ̆n. Noh ưh kơ sĭ tơdrong rơngei đơ̆ng dôm tơdrong pơđep gah ‘ngoaih, mă đơ̆ng lăm tơdrong jrŭ lăm bơhngol- klaih đơ̆ng tơdrong yoch, klaih đơ̆ng kơdih akâu juăt kơpơm tơdrong kơnê̆, klaih đơ̆ng tơdrong arih băt kơ kơdih akâu đĕch. Yua kơ thoi noh, năr nâu athei tơpă tơpăt jet kơdih: Rŏ lăng hăm oei đei hơdai, kiơ̆ kơdih, hli tơrơ, pơm kơ inh tam mă đei arih rơngei tơpă lăm Kră Yang? Athei năm jê̆ Kră Yang Yang Yêsu. Sư pŭ iŏk tơdrong lôch wă kơ buăl đei tơdrong arih. Noh jơ̆ tơdrong rơngei mă teh đak ưh kơ đei wă ăn kơ buăl, păng kư̆m ưh kơ đei gơh wă tơtông iŏk.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.