Arih lăm teh đak dang ei, lu bơ̆n ưh kơ gơh weh wer đơ̆ng tơdrong hrơ̆ng hreng păng tơdrong hrăt hrot rim năr- re hrơ̆ng ‘noh đơ̆ng điê̆n thoăi hăm lu tơdrong tơbăt lĕch ‘bôh, lu tơdrong jang oei gô wă pơkeh. Lĕch tơ’nguaih, ‘bar pah đon lu bơ̆n hơnơ̆ng kơ mơ̆ng dôm lu re hrơ̆ng đơ̆ng gre, tơpôl lơ, păng lơ tơdrong re nai. Re hrơ̆ng đơ̆ng teh đak gah ‘nguaih truh tơ gah lăm jơhngơ̆m pơm kơ lu bơ̆n pă kĕ păng hrĕng kro. Năr ‘nâu hloi, athei ‘măn jơnăr, ming hơmet dôm tơdrong hiơ̆k bơngơ̆t păng yak hơdai hăm Kră Yang mơ̆t lăm anih thĕng hreh, lăm tơdrong oei hơdai đơ̆ng Sư.

Năr ‘nâu, ‘năr 18/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Gene Markland kơ̆l ‘bai WEH NĂM TƠ ANIH KUENG.

Sơ̆p Hla Bơar ‘Bok Kei-Dei: “Yêsu kuă ăn kơ đe băt tơdrong Sư pơklaih bơngai noh hei ră, mă-lei đe kơtơ̆ng ang tơdrong noh jơ̆p-jang hloi. Na đei lơ bơngai năm wă mơ̆ng Sư bơtho păng wă kơ Yêsu pơklaih jĭ jăn lu sư mơ̆n. Mă-lei hơtai noh Yêsu wă năm krao khan kơ ‘Bă Sư ‘Bok Kei-Dei tơ anih kueng, na Sư năm hloi.” (Luka 5:15-16)

Mary jơ̆ mĭnh ‘nu bơngai drŏkăn mơdro ‘lơ̆p đei wơ̆ ‘lŏ lăm mĭnh hnam dơnŏ Bơngai Lui păng đei đon lui kơjăp tơ anih Kră Yang. Mă lei sư rai mơn ‘bôh rơhông, hiong tơdrong tơ’bưh đơ̆ng kơdih hăm Khŭl Lui păng hăm kơdih Kră Yang. Mă khan đei tơglơ̆m lăm lơ khei sơnăm, sư ưh kơ đei chă ‘bôh nơ̆r tơl tơwih kơ dôm lu tơdrong pơgăn tŏk bŏk kơdih hăm ‘Bok Kei-Dei. Hơbŏ lăng yua kơ Mary đei hrăt hrot dêh- hăm gleh hrat hăm tơdrong jang, tơdrong tơgar băl, dôm lu jơ jang thim jơ truh tơ kơmăng, hăm lu tơdrong jang gah ‘nguaih- đĭ đăng pơm kơ sư mơn ‘bôh tôm tơdrong tơpă hloh kơ jơhngơm.

Yua kơ thoi noh, Mary pơdrơ̆ng pơdơh tŏ sĕt. Sư đei năm ngôi tơ yă sư tơ mĭnh pơlei iĕ, tơ anih Tennessee, wă kơ weh đơ̆ng tơdrong pơjĕk păng hăt hot đơ̆ng pơlei tih. Mă khan liơ jê̆ sư kŭm oei lăm bơyan phep pơdơh sư.

Mary tah hơmet tơmam păng huơ̆r gre năm truh tơ Tennessee. Hiôk hơ iă tơpă kơplah đei tơ’bơ̆p ‘bok yă, đei hơoei tơ kơpal nih nŭn so ‘bơ̆t kơdeng hnam, sơng iŏk anih bri kông, tơnơm ‘long, plĕnh hơmơ̆l dreng păng tơdrong hơđơ̆ng đơ̆ng anih noh. Lăm năr mă ‘bar kơ năr năm ngôi, yă kơ Mary hơ oei ‘bơ̆t cheng sư kơpal nih nŭn, pơ ‘lơ̆ng rôp ti sư păng jet: “Mary ơi, tơdrong kiơ oei pơm kơ sâu hiơ̆k bơngơ̆t thoi noh?”

“Sâu dai ưh kơ băt mơ̆n, yă ă. Sâu mơn ‘bôh rơhông. Tơdrong jê̆ hơdai mă sâu đơ̆ng đêl mơn đei hăm Kră Yang dang ei ưh pă đei bơih. Sâu ưh kơ đei jơnăr kơ kơdih kâu, păng kŭm ưh kơ băt kơdih athei pơm kiơ. Sâu ưh kơ hlôh tơdrong kiơ đei truh hăm kơdih.”

Yă lăng tơ anih jum dăr, huch kaphê tơtŏ păng pơma: “ ‘Bônh đĕch, sâu ‘mêm. ‘Noh bơih yua kơ sâu hrăt hrot dêh hnang. Ayăt kơ sâu jơ̆ yang kơnê̆, oei wă kơ sâu ataih đơ̆ng Kră Yang.”

“Yă pơma liơ? Sâu ưh đei pơm kiơ hloi. Sâu ưh kơ pơm tơdrong yoch, kŭm ưh kơ đei arih kư̆ kă.”

“Yă ưh kơ sĭ wă pơma khan sâu pơm yoch. Tơdrong pơhlŭ bơngai nai pơm yoch ‘noh jơ̆ mĭnh lăm dôm tơdrong đơ̆ng lăm yang kơnê̆, trŏ kơ bơngai tơtông iŏk tơdrong hiôk hian đơ̆ng lu bơ̆n. Tơdrong đơ̆ng sư pơm gơh rơgei lơ hloh. Mă khan gơh rơgei mă lei kơnê̆ dêh, pơm pơrăm kơ tơdrong arih, jơhngơ̆m, păng tơluch ‘noh pơhngol sâu.

Sâu ‘bôh ‘noh, lu bơ̆n oei arih lăm mĭnh teh đak ‘bĕnh kơ tơdrong re hrơ̆ng. Re hrơ̆ng ‘noh lĕch đơ̆ng TV lăm hnam, đơ̆ng điê̆n thoăi, măy tĭnh păng lơ tơmam nai. Mă khan lu bơ̆n oei hơđơ̆r dah tep, sư oei ưh kơ pơdơh, ‘bơm truh tơ đon tơchĕng păng pơgơ̆r jơhngơ̆m lu bơ̆n. Thoi noh lu bơ̆n hăm đei ăn kơ lu sư pơgơ̆r đon tơchĕng bơ̆n ưh?

Lăm chăl dang ei, anat tơpă wă đei dôm lu jơ phŭt thĕng hreh, hloh jơ̆ dang ei lu bơ̆n đei điê̆n thoăi, mĭnh tơmam hlĭch chrơp, mă lei kŭm pơm kơ tơdrong arih lu bơ̆n kŭm hrơ̆ng hreng hloh. Păng na, lơ wơ̆t lu bơ̆n đei pơma jŏk: “Yua kơ lơ liơ inh ưh kơ đei tŏ sĕt jơ hơđơ̆ng ayơ? Yua kơ liơ inh ưh kơ gơh mơ̆ng kơ tơ̆ng nơ̆r Kră Yang?” Nơ̆r tơl ‘bônh đĕch: ‘noh yua kơ đơ̆ng re hrơ̆ng, jơ̆ yua kơ tơdrong hăt hot đơ̆ng chăl arih ‘nâu.

Sâu ‘mêm, tơdrong mă kon bơngai lăm chăl dang ei iŏk pơm tơdrong ưh kơ juăt ‘noh bơih jơ̆ tơdrong thĕng hreh. Pơm thoi yơ lu bơ̆n gơh hơpơi chă ‘bôh tơdrong hơđơ̆ng, dah mơ̆ng kơ tơ̆ng nơ̆r Kră Yang kơplah rim năr nŏng kơ kŭp môch lăm dôm tơdrong re hrơ̆ng hreng đơ̆ng lu tơdrong tơdă roi tơbăt, roi tơbăt gah khei năr, tơdrong pơthi pơjei băl truh tơ gah brŏ reh? Yă kŭm hơiă kơ dôm lu tơdrong ‘noh nhen thoi sâu. Mă lei mưh lăp lu bơ̆n kăl kơ pơdơh. Pơdơh ăn đon tơchĕng bơ̆n gơh lĕch hlôi đơ̆ng dôm tơdrong re hrơ̆ng ‘noh, păng thĕng hreh ‘bơ̆t anăp Kră Yang.”

Kră Yang Yêsu, lăm tơdrong jang Sư, wă jê̆ hơdai hăm ‘Bok Kei-Dei ‘Bă lăm tơdrong pơgơ̆p, Sư ngăl wih wơ̆t tơ anih kueng adrô̆ wă krao khan: “Yêsu kuă ăn kơ đe băt tơdrong Sư pơklaih bơngai noh hei ră, mă-lei đe kơtơ̆ng ang tơdrong noh jơ̆p-jang hloi. Na đei lơ bơngai năm wă mơ̆ng Sư bơtho păng wă kơ Yêsu pơklaih jĭ jăn lu sư mơ̆n. Mă-lei hơtai noh Yêsu wă năm krao khan kơ ‘Bă Sư ‘Bok Kei-Dei tơ anih kueng, na Sư năm hloi.” (Luka 5:15-16)

Đơ̆ng tơdrong roi tơbăt lăm Luka, lu bơ̆n ‘bôh khan mă anăn Kră Yang Yêsu đei lơ bơngai băt kơtơ̆ng păng tơdrong jang rai hrăt hrot, mă lei Sư oei ‘măn jơ năr wă krao khan păng weh ataih đơ̆ng tơdrong hrơ̆ng hreng. Tơdrong ‘nâu pơm kơ lu bơ̆n đei tơchĕng: tơdah kơdih Kon ‘Bok Kei-Dei- Tơ’ngla ‘bĕnh tơdrong mơsêh mơyang mă lei oei kăl kơ jơnăr thĕng hreh hăm ‘Bă, lei lu bơ̆n, jơ̆ dôm lu bơngai rơdu tơrăn, rai kăl kơ tơdrong thĕng hreh kơ tơdrong arih gah pơhngol loi hloh dơ̆ng.

Lăm teh đak dang ei, tơdrong thĕng hreh nhen thoi jing mĭnh tơdrong ưh kơ hơnhŏ đei. Tơdrong re hrơ̆ng đơ̆ng điê̆n thoăi, đơ̆ng tơdrong tơbăt lăm teh đak, tơdrong jang păng lơ tơdrong hiơ̆k bơngơ̆t nai pơm kơ lu bơ̆n gleh lap păng ‘bônh dêh kơ druh kiơ̆ tơdrong pơdăr đơ̆ng tơdrong arih, mah truh tơ lu bơ̆n tơ hiong tơdrong gĭt đơ̆ng thĕng hreh. Mă lei, kơplah tơchĕng pơwao Nơ̆r Kră Yang, lu bơ̆n ‘bôh khan mă khan Kră Yang Yêsu oei hơnơ̆ng wih wơ̆t mơ̆t lăm anih kueng wă krao khan. Tơdrong ‘nâu hăm trŏ kơ đei tơgŭm lu bơ̆n tơchĕng pơwao khan wă pơtrơp yak năm, pơtrơp bơ̆jang dơ̆ng, mơ̆t lăm anih kueng jơ̆ mĭnh anih ‘lơ̆ng ăn kơ đon tơchĕng lu bơ̆n gơh tơplih ‘nao, jơhngơ̆m đei ôp rơgoh, wă mơ̆ng kơtơ̆ng Kră Yang hơđăl rơđah hloh ah?

“Sâu athei pơlong hơoei mĭnh dơnơ̆ng lăm hrĕp hreh dang 10 phŭt hơ. Tơdah sâu đei jơhngơ̆m tơpă hơpơi chă ‘bôh tơdrong hơđơ̆ng tơ lăm păng mơ̆ng kơtơ̆ng nơ̆r Kră Yang, lei ‘nâu bơih jơ kơplah pơtơm. Lei na dang ei yă mơ̆t lăm hnam tŏ sĕt, na sâu hơoei dâu, wă mơ̆ng kơtơ̆ng hăm ‘bar pah đon kơdih, ăn kơdih lăm tơdrong hrĕp hreh păng mơ̆ng kơtơ̆ng nơ̆r akhan đơ̆ng Yang Bơhngol ‘Lơ̆ng bĕ.”
kơplah thĕng hreh ‘bơ̆t anăp Kră Yang, Mary đei chă ‘bôh tơdrong hơđơ̆ng păng klaih praih lăm tơdrong pơgơ̆p hăm Kră Yang, tơ anih nih nŭn so ‘bơ̆t kơdeng hnam yă.

Dang ei, buăl mă ‘mêm, athei năm hăm Kră Yang păng thĕng hreh ‘bơ̆t anăp Sư lăm năr ‘nâu.

Apĭnh đĭ đăng krao khan hơdai:
Kră Yang ơi, kon dôm lu năr hlôi bơih kon đei ăn kơ tơdrong re hrơ̆ng đơ̆ng teh đak pơgơ̆r tơdrong arih kon, pơm kơ kon gleh lap păng ưh kơ hơbĕch hơbal hăm nơ̆r akhan đơ̆ng Ih. Apĭnh Kră Yang mơnat păng chông anhăk năm hăm Ih lăm tơdrong thĕng hreh, jơ̆ anih kon gơh sơng iŏk tơdrong ‘lơ̆ng rơgoh păng tơdrong ‘mêm đơ̆ng Ih. Hơpơi kơ dôm lu jơ mĭnh adrô̆ hăm Kră Yang jơ̆ kơplah kon gơh tơ ‘bơ̆p Ih, păng gơh wơ̆ ‘lŏ lăm tơdrong pơgơ̆p gĭt kăl ‘noh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, mă khan hrăt hrot truh dang yơ, Yang Yêsu oei ‘măn jơ krao khan yak mơ̆t tơ anih kueng păng krao khan. Tơdah Yang Yêsu kăl kơ tơdrong thĕng hreh wă pơgơ̆p hăm ‘Bok Kei-Dei ‘Bă, wă kơ gơh tơplih bơhngol ‘nao, lei lu bơ̆n, jơ̆ dôm lu kon bơngai rơdu tơrăn hloh, rai kăl kơ tơdrong ‘nâu hloh dơ̆ng. Năr ‘nâu, Sư kŭm oei krao buăl rŏk kơmĭl Sư, wih brŏk hăm tơdrong hơđơ̆ng chang gô Kră Yang, pơgơ̆p hăm Sư, mơ̆ng kơtơ̆ng Nơ̆r Sư păng pơma dơnuh hăm Sư.

Thoi noh na, athei chă kơ kơdih mĭnh anih kueng adrô̆, pĭt lu tơmam kơmăy, păng ‘măn jơnăr hơoei mĭnh dơnơ̆ng, tơchĕng pơwao păng krao khan hăm Kră Yang. Kơplah bơ̆jang tơdrong ‘nâu hơnơ̆ng, buăl gô hlôi mơn đei tơdrong hiôk hian păng wơ̆ ‘lŏ lăm tơdrong tơ’bưh pơgơ̆p hăm Kră Yang. Athei pơtơm năr ‘nâu hloi, yua kơ băt khan tơ anih thĕng hreh ‘noh, buăl gô chă ‘bôh kơdih akâu buăl păng kơdih Sư.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.