Nyob rau hauv lub ntiajteb vam meej niaj hnub nim no, peb yuav zam tsis dhau tej suab nrov nroo ntws thiab tsis khoom txhua hnub – lub suab nroo ntawd los ntawm lub xov tooj tshaj xo txog tej kev tshaj tawm tshwm tuaj, tej haujlwm tab tom tos tau ua. Tawm nraum zoov, peb lub pob ntseg yuav hnov tej suab nrov nroo ntws ntawm tej tsheb, tej tib neeg coob coob, thiab ntau lub suab ntxhia ntxiv. Lub suab nrov ntawm lub ntiajteb sab nraud thiab hauv peb lub siab ua rau peb tsis muaj dabtsi thiab qhuav qhawv. Hnub no, cia li tseg sijhawm, tso tej kev txhawj tseg thiab nrog tus Tswv mus rau hauv qhov chaw ntsiag to, nrog Nws nyob ua ke.

Hnub no, yog hnub 18/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Gene Markland dhau ntawm Zaj kawm KHIAV NKAUM MUS RAU QHOV CHAW NTSIAG TO

Vajluskub: “Tiamsis Yexus lub moo hajyam nrov ncha mus thoob plaws txhua qhov. Tiamsis Yexus pheej mus rau tej qhov chaw uas tsis muaj neeg, thiab thov Vajtswv qhov ntawd” (Lukas 5:15-16)

Mary yog ib tug ntxhais ua lag luam hluas loj hlob hauv ib tsev neeg ntseeg Vajtswv thiab muaj kev ntseeg tob tob ntawm Vajtswv. Tiamsis nws hnov khoob lug zuj zus, tsis muaj kev sib txuas ua ke ntawm nws thiab Pawg Ntseeg nrog Vajtswv tus kheej. Txawm yog twb sib dov txog tej no ntau xyoo los, nws nrhiav tsis tau lo lus teb rau tej phab ntsa thaiv ntawm nws thiab Vajtswv. Tej zaug yog vim Mary tsis muaj sijhawm khoom – lub nra ntawm tej haujlwm yuav ua, kev sib txeeb, ua haujlwm ntxiv sijhawm txog tag hmo, nrog rau tej haujlwm sab nraud – tag nrho tej no ua rau nws hnov tias txhua yam nyhav dhau nws lub zog.

Yog li, Mary txiav txim siab so ib lub sijhawm. Nws mus saib nws pog nraum ib lub zos nyob nraum ntus nroog, cheeb tsam Tennessee, tsis pom tej kev ua haujlwm li hauv lub nroog loj. Txawm li cas los nws yeej tseem tshuav nws lub sijhawm tau so.

Mary tu nra thiab tsav tsheb mus rau Tennessee. Zoo kawg li thaum uas nws ntsib nws pog thiab yawg nkawd, tau zaum ntawm lub siav viav vias qub qub, saib tej toj roob hauv pes, xyoob ntoo thiab ntuj ntsuab xiab nrog rau ib puas tsav yam nyob kaj siab lug. Hnub ob, Mary pog zaum saum lub siav, maj mam tuav Mary tes thiab nug: “Mary, yam dabtsi tab tom ua rau koj txhawj?”

“Kuv tsis paub thiab, pog. Kuv hnov cuag li tsis muaj dabtsi. Kuv txoj kev sib raug zoo nrog Vajtswv yav dhau los kuv muaj thaum no cuag li tsis muaj lawm. kuv tsis muaj sijhawm pub rau tus kheej, thiab kuj tsis paub yus yuav ua dabtsi. Kuv tsis paub yam dabtsi tab tom tshwmsim rau kuv tus kheej.”

Pog saib ib ncig, haus ib pas café kub lug tas hais tias: “Yooj yim xwb tiag, kuv tus xeeb ntxwv. Vim koj maj dhau. Koj tus yeebncuab uas yog dab ntxwgnyoog, tab tom xav kom koj khiav deb Vajtswv.”

“Koj hais li cas no pog? Kuv yeej tsis ua dabtsi. Kuv tsis ua txhaum, kuj tsis ua lub neej dog dig.”

“Pog tsis yog hais tias koj ua txhaum. Ntxias kom lwm tus ua txhaum tsuas yog yeeb ncuab ib lub tswv yim xwb, yeej ib txwm yog tus txeeb peb txoj kev kaj siab. Nws lub homphiaj tseem zais zoo tshaj. Txawm yog zais zoo los tseem phomsij heev thiab, ua rau peb lub neej, lub siab, thiab thaum kawg yog koj tus ntsujplig raug puas tshuaj.

Koj puas pom lawm tau, peb tab tom nyob rau hauv lub ntuj muaj ntau lub suab nroo. Lub suab nroo ntawd nrov ntawm lub TV hauv tsev tuaj, ntawm tej xov tooj, máy tính thiab lwm yam. Txawm yog peb pw los nws yeej nrhiav kev nkag los, cuam tshuam rau peb lub hlwb thiab peb lub siab. Yog li peb puas tab tom tso cai rau nws kav peb lub hlwb?

Nyob rau tiam no, nyuaj rau peb muaj lub sijhawm nyob ntsiag to, tshwj xeeb yog thaum no peb muaj xov tooj, yog ib qhov cuab yeej zoo, tiamsis nws kuj koom tes rau txoj kev ua kom peb lub neej tsis khoom ntau tuaj. Tas, muaj ntau zaug peb kuj nroo tias: “Vim li cas yus tsis muaj kev kaj siab li? Vim li cas yus tsis hnov Vajtswv lub suab?” Lo lus teb yooj yim xwb: Ntawd yog tej suab nroo, yog lub sijhawm tsis khoom ntawm lub neej no.

Mentxhais, yam uas tib neeg tiam no siv los ua rau xav tsis thoob yog nyob ntsiag to. Yuav ua li cas peb thiaj nrhiav tau kev kaj siab, lossis hnov Vajtswv lub suab thaum uas peb pheej tsau tsawv rau hauv tej lub suab nrov nroo ntws ntawm tej xov xwm, fuab cua, txog rau tej kev hu nkauj ua si? Pog kuj nyiam tej ntawd ib yam li koj. Tiamsis ntau zaug peb yuav tau nres ib pliag. Nres cia kom peb lub hlwb khiav tawm hauv tej suab nrov ntawd, thiab nyob ntsiag to ntawm Vajtswv xub ntiag.”

Tswv Yexus nyob hauv Nws tes haujlwm, kom nyob ze Vajtswv Vaj Leej Txiv hauv txoj kev sib raug zoo, Nws kuj mus rau ntawm tej chaw tsis muaj neeg thov Vajtswv: “Tiamsis Yexus lub moo hajyam nrov ncha mus thoob plaws txhua qhov. Tiamsis Yexus pheej mus rau tej qhov chaw uas tsis muaj neeg, thiab thov Vajtswv qhov ntawd” (Lukas 5:15-16).

Dhau ntawm tej uas Lukas sau, peb pom tias txawm yog Tswv Yexus lub npe tau coob tug paub txog thiab nws tes haujlwm yim hnub yim tsis khoom los, Tswv Yexus yeej tseg sijhawm txav tawm ntawm tej qhov chaw nrov nroo ntws ntawd. Qhov no ua rau peb yuav tau xav txog: yog tias Tswv Yexus yog Vajtswv tus tub kuj cheem tsum sijhawnm nyob ntsiag to ntawm leej txiv ib sab, ces peb yog cov neeg tsis muaj zog, yim cheem tsum lub sijhawm ntsiag to rau peb lub neej sab ntsujplig tshaj.

Nyob hauv lub ntiajteb niaj hnub nim no, nyob ntsiag to cuag puav tam li yog ib lub sijhawm uas nyob deb heev. Tej suab nrov ntawm xov tooj, fuab cua, haujlwm thiab ntau yam kev txhawj hauv lub neej ua rau qaug zog thiab yooj yim khiav caum txoj kev ua neej, txog qhov uas peb ua poob lub sijhawm nyob ntsiag to. Tiamsis thaum xav txog Vajtswv tej lus, peb pom tias txawm yog Tswv Yexus los yeej nrhiav kev txav chaw mus rau tej qhov chaw nyob ntsiag to thov Vajtswv. Qhov no txawm tsis yog pab kom peb xav txog txoj kev mus ntxiv, ua haujlwm ntxiv, mus rau qhov chaw ntsiag to yog qhov chaw zoo rau kom peb rov qab muaj lub hlwb tshiab, lub siab tau ntxuav kom huv, kom tau hnov Vajtswv lub suab meej dua lov?

“Koj sim zaum twj ywm ntsiag to 10 feeb saib. Yog koj xav nrhiav tau txoj kev kaj siab sab hauv thiab hnov Vajtswv lub suab, ces ntawm no yog lub sijhawm pib. Thaum no pog mus hauv tsev ib pliag, tshuav koj ces zaum twj ywm ntawm no, mloog los ntawm yus lub pob ntseg, tsau tsawv hauv txoj kev nyob ntsiag to thiab hnov Vaj Ntsujplig lub suab hais”.

Thaum nyob ntsiag to ntawm Vajtswv lub xub ntiag, Mary nrhiav pom txoj kev kaj siab thiab rov qab muaj txoj kev sib raug zoo ua ke nrog Vajtswv, ntawm lub siav viav vias ntawd.

Phooj ywg, thaum no, koj cia li los cuag Vajtswv thiab nyob ntsiag to ntawm Vajtswv lub xub ntiag hnub no.

Thov caw nrog kuv peb thov Vajtswv ua ke
Tus Tswv ntau hnub dhau los kuv cia tej suab nrov hauv lub ntiajteb no tswj kuv lub neej, ua rau kuv qaug zog thiab tsis muaj lub siab kub lug rau koj tej lus hais. Thov Vajtswv hlub tshua txog kuv thiab coj kuv los nyob ntawm koj ib sab hauv txoj kev nyob ntsiag to, yog qhov chaw cia rau kuv ntsia pom koj txoj kev hlub thiab dawbhuv. Thov kom tej lub sijhawm nyob ntsiag to ua ke nrog Vajtswv yog lub sijhawm kuv tau ntsib koj, thiab tau loj hlob hauv txoj kev sib raug zoo ntawd. Kuv thov hauv Tswv Yexus Khetos lub npe. Amees.

Cov kwv tij txhua tus, txawm yuav tsis khoom npaum cas los, Tswv Yexus yeej tseg sijhawm mus nyob rau qhov chaw ntsiag to thov Vajtswv. Yog Tswv Yexus cheem tsum lub sijhawm ntsiag to los nrog Leej Txiv sib tham, kom ua rau sab ntsujplig rov qab tshiab, ces peb yog cov neeg qaug zog, yim cheem tsum tshaj. Hnub no, Vajtswv kuj tab tom caw koj los xyaum nws tus qauv, tig rov qab los rau hauv txoj kev nyob ntsiag to tos Vajtswv, sib raug zoo ua ke nrog nws, mloog Nws lus thiab nrog Nws sib tham.

Yog li, cia li nrhiav rau yus ib qhov chaw nyob ntsiag to, tua tag nrho xov tooj thiab tseg sijhawm los zaum, los xav thiab thov Vajtswv. Thaum koj ua raws li txoj kev no, koj yuav saj tau txoj kev kaj siab thiab loj hlob hauv txoj kev sib raug zoo ua ke nrog Vajtswv. Pib kiag hnub no, vim paub tias nyob hauv qhov chaw ntsiag to ntawd, koj yuav nrhiav pom koj tus kheej thiab Vajtswv.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.