Nyob hauv lub neej, muaj ntau zaug peb cim civ nug tias: Vim li cas cov neeg phem cuag li lawv ho muaj lub neej vam meej thiab muaj neej ua dua, cov neeg uas yog cov uas ntseeg Vajtswv thiab hlub Vajtswv? Puas muaj ib zaum twg koj pom tias ua ib lub neej ncaj ncees yog yam uas tsis muaj nqis? Yog tias hauv koj lub siab muaj tej kev xav no, ces koj tsis nyob ib leeg. Thaum ub, yawm Axafes kuj tau nug Vajtswv txog qhov teeb meem no. Tiamsis nyob rau hauv yawg txoj kev nrhiav Vajtswv tiag tiag, yawg tau Vajtswv nthuav tawm qhov tseeb rau yawg thiab nrhiav tau lo lus teb tiag rau yawg tus ntsujplig.

Hnub no, yog hnub 17/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia giả Mark Burnett dhau ntawm Zaj kawm VIM LI CAS TUS NEEG PHEM HO MUAJ LUB NEEJ VAM MEEJ?

Vajluskub: “Mus txog thaum uas kuv mus rau hauv koj lub Tuamtsev. Thaum ntawd kuv mam paub tseeb txog tej uas yuav los raug cov neeg siab phem ntawd.” (Ntawv Nkauj 73:17)

“Cov neeg siab phem yeej los zoo li ntawd, lawv muaj txhua yam nplua mias lawm los lawv yimhuab xav muaj ntau ntxiv. Qhov uas kuv tswj kuv lub siab kom ua tau neeg zoo thiab tsis ua txhaum ntawd txawm tsis muaj nqis li los?” (Ntawv Nkauj 73:12-13).

Ib lo lus nug loj uas ntau tus ntseeg Vajtswv lawm los lawv pheej tseem xav ntsoov txog yog: Vim li cas tus neeg zoo ho tiv kev txomnyem, tshuav cov neeg phem lawv ho tau lub neej vam meej? ntawm no tsis yog ib lo lus nug tshiab. Tej nqe Vajluskub hnub no tau rho tawm hauv ib tshooj phau Ntawv Nkauj ntawm tus yawm muaj lub npe hu ua Axafes sau los. Yawg yog Daviv ib tug tub sau suab nkauj, thiab tau sau tshooj nkauj no thaum uas nws tawm tsam nrog lo lus nug no!

Thaum uas nyeem cov nqe ua ntej ntawm tshooj no, peb pom Axafes hais tias yawg hnov khib nrog cov neeg “phem” txoj kev nplua nuj. Thaum uas yawg ntsia pom txoj kev tsis ncaj ncees meej meej li ntawd, yawg dhau los qaug zog rau txoj kev ua lub neej ncaj ncees:

“Rau qhov kuv khib cov neeg khavtheeb thaum kuv porn hais tias cov neeg siab phem lub neej zoo dua. Lawv tsis tau tiv kev mob kev nkees, lawv noj qab nyob zoo thiab lawv muaj zog npho lawv tsis tau tiv kev txomnyem li luag tej; thiab lawv tsis muaj kev ntxhov siab li luag lwm tus. Yog li ntawd, lawv thiaj li muab kev khavtheeb los coj ib yam li coj xauv, thiab muab kev nruj tsiv los hnav ib yam li hnav lub tsho ntev (Ntawv Nkauj 73:3-6).

Yawg xaus tias tus neeg khav theeb rau Vajtswv yog cov neeg uas muaj “lub siab puv nkaus tej kev phem” (nqe 7). Tsis yog li xwb, lawv tseem muaj kev kaj siab tsis muaj dabtsi, lawv tej khoom ntiajteb los yim hnub yim muaj ntau (nqe 12). Yog li yawg thiaj xav tias: tsis muaj nqis dabtsi thaum ua ib lub neej ncaj ncees.

Yog li Axafes tau ua li cas kom nws rov qab muaj zog? yawg thaub rov qab thiab ntsia mus rau daim duab loj dua. Yawg mus txog hauv tuam tsev, yog Vajtswv qhov chaw nyob. Axafes thiaj sau tias: “mus txog thaum uas kuv mus rau hauv koj lub Tuamtsev. Thaum ntawd kuv mam paub tseeb txog tej uas yuav los raug cov neeg siab phem ntawd.” (Nqe 17).

Nyob ntawd, yawg tau paub txog qhov tseeb tias peb tib neeg yooj yim hnov qab tias: Vajtswv nrog nraim peb nyob. Nws coj peb kev thiab pub lub zog rau peb. thaum peb lub nej xaus, Vajtswv yuav coj peb mus rau hauv Vajtswv qhov chaw nyob tim ntsej tim muag. Hloov Axafes qhov chaw ntsia, Axafes thiaj hais rau Vajtswv tias: “Dhau koj lawm, tsis muaj lwm yam uas kuv xav tau nyob saum ntuj. Yog muaj koj lawm, kuv tsis ntshaw ib yam dabtsi hauv ntiajteb no li”. (nqe 25).

Siv zog ua lub neej kom haum Vajtswv siab tsis yog yam uas yuav tsis muaj nqis ib zaug li. Yog peb pom tus neeg phem cuag li muaj lub neej zoo, ces nco ntsoov tias qhov uas peb ntsia pom yeej tseem muaj nrim quas. Zoo li Axafes, peb yuav tau tso peb tus kheej rau hauv ib qhov chaw uas muaj cuab kav pab kom tau peb ntsia pom qhov yog. Vim nyob rau qhov ntawd, kev sib khib yuav pauv los ua kev zoo siab thiab peb yog tus yuav txais tau kev muaj yeej thaum peb paub tias peb yog Vajtswv tus.

Thov caw nrog kuv peb thov Vajtswv ua ke
Tus Tswv, muaj tej lub sijhawm nyob hauv lub neej, kuv pom tias cuag li raug ua saib tsis taus thaum uas xaiv ua lub neej ncaj ncees thiab mloog koj lus. Tiamsis ua Vajtswv tsaug, vim dhau ntawm koj tej lus, kuv tau ntuas tias qhov ntawd tsis yog vim koj tsis ncaj ncees, tiamsis yog vim Koj tab tom cob kuv kom kuv dhau los muaj daim duab zoo li koj. Thov Vajtswv pab kom kuv lub qhov muag tig mus rau koj yog tus nyob siab thiab dawbhuv, kom kuv tsis raug cab mus caum tej uas nyob ib vuag hauv ntiajteb, tiamsis ntseeg rau tej koob hmoov uas koj twb npaj tseg rau kuv lawm. Kuv thov hauv Tswv Yexus Khetos lub npe. Amees.

Cov kwv tij txhua tus, yog tib neeg, peb yuav zam tsis dhau muaj tej lub sijhawm peb yuav tsa suab hais tias “Vim li cas?” tshwj xeeb yog thaum peb ntsia pom tej kev tsis ncaj ncees hauv lub neej: tus neeg ua neej zoo ho ntsib teeb meem, tshuav tus neeg phem ces cuag li tsis muaj dabtsi thiab lawv tau lub neej kaj siab lug.

Phooj ywg, hnub no Vajtswv caw koj cia koj lub qhov muag tig mus rau ntawm Vajtswv, thiab ntseeg khov kho rau Vajtswv tias yog Nws yog tus ncaj ncees, kuj yog Leej Txiv puv npo kev hlub tshua. Thiab thaum koj lub qhov muag kev ntseeg tig mus rau ntawm Vajtswv, koj yuav pom koj txoj kev ntseeg ib yam li Axafes tau pom tias: “Dhau koj lawm, tsis muaj lwm yam uas kuv xav tau nyob saum ntuj. Yog muaj koj lawm, kuv tsis ntshaw ib yam dabtsi hauv ntiajteb no li” Tso peb lub siab rau txoj kev cia siab thiab tsis hloov pauv tias: Tus neeg ncaj ncees qhov nqi zog tsis yog nyob hauv ntiajteb no, tiamsis nyob ntawm Vajtswv. Yog li, txhob cia tej kev txomnyem ib vuag no lossis tej kev tsis ncaj ncees hauv lub ntiajteb no ua rau koj txoj kev ntseeg yoj yees, tiamsis nco ntsoov tias Vajtswv muaj ib feem qub txeeg qub teg nyob mus ib txhis tseg rau peb.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.