Puas tau muaj zaum twg koj tsis txaus siab thaum uas pom ib tug twg muaj lub neej zoo dua yus? Lossis koj khib koj tej kwv tij thaum lawv muaj kev zoo siab? Muaj tej lub sijhawm koj tawm tsam nrog koj tus kheej, pom tias yus tus kheej muaj cuab kav “quaj nrog tus quaj” tiamsis tsis yoojyim “zoo siab nrog tus zoo siab”. Hnub no, cia li nres tshuaj yus lub siab, saib koj puas tab tom cia txoj keb sib khib, sib txeeb koj qhov chaw hauv koj lub siab lawm.

Hnub no, yog hnub 1/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Ken Barnes dhau ntawm Zaj kawm LUB HAUV PAUS NTAWM TXHUA TXOJ KEV PHEM

Vajluskub: “Yog muaj kev sib ntxub thiab muaj neeg ntshaw ua tus hlob, yeej yuav muaj kev kub ntxhov thiab yuav muaj ntau yam kev phem” (Yakaunpaus 3:16)

“Sawvdaws yeej paub tej uas neeg lub siab nyiam ua, tej ntawd yog li no: Kev ua nkauj ua nraug, kev phem kev qias thiab ua dog ua dig, pe dab pe mlom, ua neeb ua yaig, ua yeebncuab, sib ceg sib ntaus, sib khib, sib chim, xav ua tus hlob, sib faib ua pab ua pawg, ntshaw luag ntug, quav yeeb, quav tshuaj, quav cawv, qw ua nqaj ua nqug thiab ua ntau yam uas zoo li tej no. Yav tas los kuv twb ntuas nej ib zaug lawm, tiamsis nimno kuv rov ntuas nej dua ib zaug hais tias cov neeg uas ua tej ntawd, lawv yeej yuav tsis tau Vajtswv lub Tebchaws los ua lawv tug ib zaug li. (Kalatias 5:19-21).

Thaum kuv sau cov lus no, yog lub caij ntuj tshiab rov los txog, tej paj hauv vaj twb tawg zoo nkauj kawg lawm. Tiamsis, qhov chaw twg muaj paj zoo, qhov chaw ntawd kuj muaj nroj tsuag. Yog tsis dob nroj ntxov, ces tej nroj ntawd yuav loj hlob sai tuaj, voob tas lub vaj. Nyob ntawm sab ntsujplig, peb nkag siab tias tej nroj tsuag ces piv zoo li kev txhaum, yog tsis “nrho hlo cag”. Ces yuav loj zuj zus tuaj, thiab ua rau peb sab ntsujplig tsis loj hlob.

Sib khib, sib ntxub thiab sib txeeb yog yam uas Vajluskub hais tias pib ntawm peb sab nqaij tawv tuaj. Kom tiv thaiv tau yus lub zog sab ntsujplig, peb yuav tau khiav deb tej kev txhaum no.

Ob peb xyoos los no, vim yog muaj mob nkeeg thiab vim lub caij nyoog hloov pauv, yog li peb thiaj tsis tu peb tej paj hauv vaj. Kuv pojniam nyiam ua haujlwm hauv vaj, tshuav kuv ces tsis quav ntsej. Tiamsis vim hlub pojniam, kuv thiaj yuav tau pab nws ua tej haujlwm no.

Nyob rau ob peb thiv dhau los, wb pib ua tej haujlwm uas cheem tsum no, txawm yog yeej tseem tshuav qee yam uas yuam tus kheej. Thaum dob nroj huv si lawm, wb nco txog tej yam uas wb tau kawm ntau xyoo dhau los tias nyob ntawm tej nroj ntsuag, yog tsis nrho hlo hauv paus, tom qab ob peb hlis xwb yuav rov qab fab tuaj dua.

Qhov no ceeb toom rau kuv nco ntsoov tias tej haujlwm ntawm sab nqaij tawv xws li sib ntxub, sib ntaus, sib khib, puav leej koom tib lub hauv paus, ntawd yog kev khav theeb. Thomas Aquinas hais tias khav theeb yog lub hauv paus pib ntawm lwm txoj kev txhaum. Nws nkaum sab hauv zoo li tej cag nroj ntsuag. Yog tus cwjpwm khav theeb no tsis daws, ces tsis ntev xwb, “lub vaj” sab ntsujplig yuav fab tuaj voob tas.

Kom tshem tawm tej nroj tsuag thiab tej qhov fab hauv vaj, peb yuav tau thaiv yus tus kheej kom zoo, kom thiaj tsis chob, thaum dob tej nroj ntawd. Kuj zoo ib yam li ntawd, nyob hauv lub neej, yog xav kom zam dhau tej “nroj tsuag” sib khib thiab sib ntxub tsis tuaj hauv peb lub siab, peb yuav tau “npog” peb lub hlwb kom zoo thiab ua tib zoo txog peb tej kev xav tej lus hais txhob muab sib piv rau lwm tus.

C.S. Lewis hais tias: “Kev khav theeb tsis yog tsuas yog los ntawm tej uas koj muaj dabtsi xwb, tiamsis tseem yog los ntawm qhov uas koj muaj ntau dua koj tus neeg zej zog. twb yog vim tej kev sib piv no ua rau koj lub siab khav theeb, thaum koj txoj kev txaus siab ua rau koj pom tias yus muaj ntau dua lwm tus.” Sib piv yog yam ua rau peb lub siab muaj kev sib khib thiab sib txeeb.

Kuv kuj pom tias tej nroj tsuag feem ntau yog tej uas tshwm saum npoo av. Nws raug tej nplooj paj muab ntis tas rau hauv. Qhov no kuj zoo ib yam li txoj kev sib khib thiab sib ntxub. Peb pheej nkaum tom qab tej lo lus hais cuag li qab zib qhuas. Vim tej lus ntawd ua rau lwm tus zoo siab, tiamsis peb kuj tsis paub txog yam uas nyob tom qab tej lo lus hais ntawd. Tej no tab tom tu peb txoj kev khav theeb, yog lub hauv paus ntawm txhua qhov teeb meem.

Thaum uas kov raug qee hom nroj muaj taug, tej zaug peb tej tawv nqaij yuav sawv pob xua tamsim. Tiamsis kuj muaj tej lub sijhawm, yuav tau ib lub sijhawm ntev loo ces tej qhov txob ntawd thiaj tshwm thiab. Kev khib thiab kev chim kuj ib yam li ntawd. Muaj tej zaug peb pom kiag tamsim, tiamsis kuj muaj tej zaug nws maj mam loj hlob hauv peb lub siab thaum peb tsis ceev faj txog. Yog qhov kev phem no tsis raug tswj ces thaum txog caij tshwm tuaj, ces nws yuav rhau cag mus rau peb tej kev xav, ua rau peb tus kheej muaj kev tu siab thiab tej neeg ib ncig tib si.

Paulus hais tias, peb tawm tsam peb tej kev txhaum yog vam khom Vajtswv lub hwjchim, los ntawm lub hwjchim ntawd, peb muaj cuab kav “yuam tau txhua txoj kev xav yuav tau mloog Yexus Khetos lus” (II Kauleethaus 10:5). Yog peb tsis yuam kom peb tej kev xav hwm Yexus ces lawv yuav kom peb ua raws li lawv.

“Yog muaj kev sib ntxub thiab muaj neeg ntshaw ua tus hlob, yeej yuav muaj kev kub ntxhov thiab yuav muaj ntau yam kev phem” (Yakaunpaus 3:16).

Thov caw nrog kuv peb thov Vajtswv ua ke
Tus Tswv, hnub no kuv los cuag Koj, lees tias kuv lub siab muaj qee zaus tau cia tej kev khib, kev sib txeeb nkaum rau hauv. Thov Vajtswv pab kom kuv saib lwm tus dhau ntawm koj lub qhov muag, yog tus muaj kev hlub puv npo. Thov kom tej paj txiv kev hlub yuav ntws lug hauv kuv lub siab, kom kuv hlub tau tej neeg ib ncig kuv, thiab yim hnub yim ua tau ntau txoj haujlwm zoo. Kuv thov hauv Tswv Yexus Khetos lub npe. Amees.

Cov kwv tij txhua tus, tej kev txhaum hauv peb lub siab yeej tsis txawv tej nroj ntsuag fab pos hauv peb sab ntsujplig. Yog tsis tshuaj txhua lub sijhawm thiab rho pov tseg, nws yuav rhau cag, fuam dav, thiab ua rau peb lub siab muaj teeb meem. Muaj ntau zaug, kev sib khib, muab tus kheej piv rau tus ub tus no, kev sib txeeb… tau fab tuaj hauv yus lub siab, ua rau koj thiab lwm tus muaj kev tu siab tib si? Hnub no, cia li nco txog leej twg yog tus neeg uas koj tau khib thiab muaj lub siab sib txeeb? Cia li muab yam ntawd qhia rau Vajtswv hauv txoj kev lees txim tiag tiag, thiab cog lus rau Vajtswv tias koj yuav tsis cia tej kev sib piv no rhuav tshem txoj kev sib raug zoo sib hlub nrog tej neeg ib ncig yus. Nco ntsoov tias peb puav leej tau Vajtswv tsim los tshwj xeeb, muaj nqis ib yam nkaus, thiab puav leej tau Vajtswv hlub. Yog li, kev sib piv yuav tsis muaj qab hau, tsuas ua rau peb txav deb txoj kev zoo siab, kev kaj siab thiab koom ua ke ua ib xwb. Thov kom peb lub siab yuav tau kho zoo, hloov dua tshiab, hlub lwm tus los ntawm lub qhov muag hlub puv npo kev hlub thiab ua siab ntev ib yam li Vajtswv.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.