Hăm đei layơ buăl đei tơtok hăm Kră Yang: yua kơ kiơ kon đei tơ’bơ̆p lơ tơdrong pơmat tat, tơdrong pơlong lăng thoi noh? Đei lơ tơdrong chhŭr nuih rŏ kơ ưh pă đei băt pơm liơ, pơm kơ buăl blĕk păng pă băt pơm thoi yơ. Buăl hăm băt ưh, kư̆m đei Bơngai ‘Bă mă ‘mêm mơnat pŭ iŏk wă kơ kon đei hlôi mơn kơ pơmat tat, yua kơ noh jơ̆ tơdrong kăl kơ wă wơ̆ ‘lŏ. ‘Bok Kei-Dei ‘Bă ăn kơ kon Sư đei hlôi mơn kơ tơ’bơ̆p tơdrong pơmat tat ưh kơ sĭ yua kơ Sư hiơt kơ lu bơ̆n bơih, mă yua kơ Sư kơnhăm tơ anih tih hloh tơ lăm chăl arih lu bơ̆n.

Năr ‘nâu, ‘năr 15/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jonathan Santiago kơ̆l ‘bai KƠNHĂM TIH HLOH ĐƠ̆NG ‘BOK KEI-DEI

Sơ̆p Hla Bơar ‘Bok Kei-Dei: “ Nhôn iŏk tơdrong pơmat-tat dang ei kư̆m bưh, sư hơiơch ‘biơ̆, nhôn hăt kơ chă tơdrong arih ling-lang ning-mônh ei kăl hloh.” (II Kôrintô 4:17)

Minh ‘nu bơngai ‘bă ling lang ơh sơ’ngon kơplah ‘bôh kon sư jĭ jăn. Kơplah kon nhơ̆m, jơhngơ̆m bă chhŭr nuih. Mă-lei, kư̆m đei ‘bă lê̆ kon sư đei hlôi mơn kơ tơdrong jĭ jăn biơ̆ đĕch, yua kơ tơdrong hiôk ‘lơ̆ng khŏm khŏm kơ chăl arih kon.
Tơdrong bơwei trŏ ‘blep pơm kơ hơ’lơ̆p sơ’ngon, chhŭr nuih kơplah noh, mă lei rei tơ lăm jơhngơ̆m kon hơ’lơ̆p dôm kơ ‘bai hŏk gĭt kăl lăm trong yak năm tơ wơ̆ ‘lŏ.

Hnam dơnŏ lu nhôn đei tơdrong juăt: “pêng wơ̆t pơma tơ ‘blŏk”. ‘Bar ‘măng ‘blŭng a mĕ ‘bă tơ’blŏk đĕch, mă lei truh tơ mă pêng ‘măng gô đei tơdrong pơtho tơ’bôh trăp biơ̆. Lơ wơ̆t lu kon inh đei tơ’blŏk ‘bơ̆t mă ‘bar ngăl đĕch na hơmet kơdih akâu lu sư. Mă kư̆m đei, klo akăn nhi kư̆m đei phak kon – ngăl athei pơdơh kơ lăng điê̆n thoăi dah kơmăi tinh prăt năr đơ̆ng rŏng kơ noh.

Kư̆m đei, inh tơ’blŏk kơ kon drŏkăn hơdruch inh, na kư̆m băt kơ akăn tơ’blŏk kơ kon inh ‘bar wơ̆t hơdrol bơih. Thoi noh, nơ̆r tơ’blŏk inh thoi kơ đei tơ ‘blŏk “Pêng ‘măng bơih” – păng kon inh gô pŭ iŏk đêl tơdrong sư pơm. Kơplah noh, jơhngơ̆m kư̆m sơ’ngon, đei tơchĕng ‘maih wă “hơwơ̆t ti” kơ kon. Mă lei, inh bơwei tơdrong juăt kơ pơm, lui ngeh kơ jơhngơ̆m chhŭr nuih tŏ sĕt jơ’nâu gô tơgŭm sư tơ anăp ning mônh.

Na đei yua noh jơ̆, tơplih kơ lăng điê̆n thoăi, kon drŏ kăn inh đei chhơ̆ rup ‘lơ̆ng dêh – inh oei hơtol tơ lăm phŏng jang inh.

Sơ̆p hla bơar kŭm tơ’bôh tơdrong pơjuăt hăm tơdrong ‘mêm mơnat đơ̆ng ‘Bok Kei-Dei.

Lăm năr Phĕt ‘blŏk kơ Yang Bơhngol ‘Lơ̆ng, ‘bok Pêtrôs iung roi tơ’băt tơdrong proh hơmet đơ̆ng ‘Bok Kei-Dei: Tơ’bôh Yang Yêsu noh jơ̆ ‘Bok Dŏng Pơklaih, mă khan băt tơdrong gô truh tơ tơdrong pơmat tat Sư.

‘Bok Kei-Dei ăn Kon Sư mă ‘mêm pŭ iŏk tơdrong klai areh, đe tơ blơ̆, pŭ iŏk pơ̆ng kơ đinh tơ kơpal ‘long pơglang: Pêtrôs pơma lăm Tơdrong Jang 2:22-24:
“Ơ lu đe Isơrael, mơ̆ng inh bĕ. Yêsu Pơlei Nasaret, bơngai mă ‘Bok Kei-Dei wơh Sư pơm tơdrong mơsêh mơyang, pơm tơdrong hlĭch hlăch, tơ’bôh kơ iĕm tơdrong chrơp, ‘Bok Kei-Dei yua Sư pơm lu tơdrong ‘noh tơ lăm lu iĕm, thoi lu iĕm đei băt boih. Đe rôp Sư kiơ̆ thoi ‘Bok Kei-Dei pơkă lê̆ hơdrol. Lu iĕm pơlôch Sư. Lu iĕm athei lu bơngai pơm kơnê̆ pơ̆ng pơlôch Sư tơ ‘long pơglang. Mă-lei ‘Bok Kei-Dei kuă ăn Sư lôch răm na pơklaih Sư đơ̆ng tơdrong ‘noh, ăn Sư iung arih dơ̆ng, yua kơ Sư ưh kơ đei lôch ling-lang ôh. Đe ưh kơ gơh rôp pơkơ̆ng Sư lăm tơdrong lôch ôh. ”

Yang Yêsu ưh kơ đei tơdrong yoch. Sư arih minh chăl arih ‘lơ̆ng rơgoh tôm tơdrong, ưh kơ đei yoch kiơ ( II Kôrintô 5:21)

Mă-lei đơ̆ng Sư pŭ iŏk tơdrong pơmat tat păng tơdrong lôch, ‘Bok Kei-Dei đei pơm keh minh tơdrong tih dêh: Sư pŭ iŏk tơplih kơ lu bơ̆n – mă trŏ kơ kon bơngai gô pŭ phak – ăn kơ lu bơ̆n đei dŏng pơklaih.

Tơdrong Kră Yang pŭ iŏk tơplih ăn kơ lu bơ̆n tih hloh rơbâu wơ̆t kơ dôm tơdrong phak iĕ iĕ lăm tơdrong arih rim năr.

Yua kơ thoi noh, kơplah tơ’bơ̆p tơdrong pơmat tat, pơlong lăng, athei ‘blŏk thoi âu: rŏ lăng noh jơ̆ minh pah lăm tơdrong pơtho hơmet hăm tơdrong đơ̆ng Kră Yang, yua kơ Sư oei bơ̆jang tơdrong tih hloh lăm chăl arih lu bơ̆n.

Thoi kơ sơ̆p hla bơar ‘Bok Kei-Dei lăm II Kôrintô 4:17 đei chih: “Nhôn iŏk tơdrong pơmat-tat dang ei kư̆m bưh, sư hơiơch ‘biơ̆, nhôn hăt kơ chă tơdrong arih ling-lang ning-mônh ei kăl hloh.”

Tơdrong proh hơmet lê̆ hơdrol gô pơm ăn kơ khei năr pơmat tat hrei âu jing tơdrong ‘lơ̆ng, hloh kơ jơhngơ̆m đon bơ̆n tơchĕng. Athei chơt hiôk, dơ̆ng kơjăp păng bơnê kơ Kră Yang lăm tôm tơdrong!

Apĭnh đĭ đăng krao khan hơdai:
Kơkuh kơ ‘Bă mă ‘mêm, apinh ‘Bă ăn kơ tơdrong ‘maih wă Ih gô jing lăm tơdrong arih kon lăm năr ‘nâu. Apinh tơ’blŏk kơ kon dôm tơdrong pơmat tat, chhŭr nuih kon đei hlôi mơn noh đei kăl yua, mă tơgŭm ăn kơ tơdrong kơnhăm tih hloh Ih ăn kơ kon. Bơnê kơ ‘Bă đei ăn ‘Bok Dŏng Pơklaih Yang Yêsu jur tơ teh đak, Ih jơ̆ kơmĭl tơ’bôh ‘lơ̆ng tôm tơdrong ăn kơ jơhngơ̆m chu yom păng ‘mêm mơnat. Apinh man hơmet kon rim năr, wă kơ kon rai nhen thoi Yang Yêsu Krist hloh. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Kră Yang oei yua tơdrong pơlong lăng, chhŭr nuih oei đei dang ei wă man hơmet lu bơ̆n wă kơ nhen thoi rup Kon Sư. Mă khan kơplah jơ ‘nâu rŏ lăng lu bơ̆n tim mă hlôh đĭ, mă lei athei lui kơjăp kơ pơtho hơmet ‘mêm mơnat đơ̆ng ‘Bok Kei-Dei gô ba lu bơ̆n truh tơ anih ư-ang khŏm khŏm. Athei chu yom păng pơjao tôm tơdrong ăn kơ Sư, wă kơ dôm tơdrong pơlong lăng năr ‘nâu gô jing kơ nao kung chông anhăk lu bơ̆n dĭng truh tơ tơdrong jang tih hloh mă Kră Yang oei wă pơm keh lăm chăl arih lu bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.