Đei đunh dang yơ bơih buăl tim mă đei krao wơ̆n bơngai bu nai năm ngôi tơhnam sŏng sa? Lăm tơdrong arih hăt hot chăl dang ei, tơnang ‘măng hnam lu bơ̆n nhen thoi tang kơjăp hloh kơ dang yơ. Bu lăm lu bơ̆n kŭm kăl kơ tơdrong mĭnh adrô̆, thoi noh na tơdrong sơng iŏk tơmoi nhen jing thoi mĭnh tơdrong ưh kơ hơnhŏ! Mă lei buăl hăm băt ưh, mưh phŏ lăp mĭnh nơ̆r krao wơ̆n hmă đĕch, mĭnh jơ sŏng sa hmă đĕch kŭm trŏ kơ pơtơm blŭng a kơ mĭnh tơdrong buăl juăt ‘nao, tơplih đĭ mĭnh chăl arih lăm tơdrong ‘mêm mơnat đơ̆ng ‘Bok Krist!
Năr ‘nâu, ‘năr 14/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Cathy Messecar kơ̆l ‘bai ATHEI BĂT KƠ SƠNG TƠMOI

Sơ̆p Hla Bơar ‘Bok Kei-Dei: “…Lu sư sŏng sa hơdai dih băl ‘blŏk hơdơ̆r kơ Yêsu. Lu sư chơt hiôk tơpă. Lu sư bơnê kơkuh kơ ‘Bok Kei-Dei. Lu kon tơring tơrang kư̆m hơiă kơ lu sư. Rim năr đei bơngai lui na Kră Yang pơklaih lu sư păng tơmơ̆t lu đe noh tơ lăm khŭl bơngai lui.” (Tơdrong Jang 2:46-47)

Sơ̆p Hla Bơar ‘Bok Kei-Dei đei tơ’bôh rup kơ Khŭl Lui blŭng a thoi âu: ““…Lu sư sŏng sa hơdai dih băl ‘blŏk hơdơ̆r kơ Yêsu. Lu sư chơt hiôk tơpă. Lu sư bơnê kơkuh kơ ‘Bok Kei-Dei. Lu kon tơring tơrang kư̆m hơiă kơ lu sư. Rim năr đei bơngai lui na Kră Yang pơklaih lu sư păng tơmơ̆t lu đe noh tơ lăm khŭl bơngai lui.” (Tơdrong Jang 2:46-47)

“Hơpơi kơ đĭ đăng anhŏng oh năm ngôi tơhnam inh sŏng sa hơdai!”- ‘Noh bơih jơ̆ nơ̆r wơ̆n juăt păng hơ iă ‘ngam hloh mă inh đêl đei kơtơ̆ng kơplah oei ‘lơ̆p. Năr ‘noh, đơ̆ng rŏng kơ jơ akŭm pơge năr Tơpơh, lăp đei bơngai bu noh lăm Khŭl Bơngai Lui wơ̆n năm tơhnam pơđâu hơdai jơ̆ tơdrong hiôk chơt đei ‘bĕnh kơ pơge noh.

Lăm khei sơnăm jên tơmam pơmat tat, tơmam sa ưh kơ sĭ layơ kŭm rơkah rơkai. Nơ̆r wơ̆n drong ngôi tơhnam sŏng sa hơdai wă khan jơ̆ hnam dơnŏ ‘noh đei hơmet tôm bơih, păng mĭnh ‘nu bơngai ‘lơ̆p ‘maih sa nhen ĭnh gô tơchĕng hloi kơ dôm tơmam sa ‘bâu phu ‘lơ̆ng kơpal pơnhan, tơ tŏ. Lăp tơchĕng đĕch inh đei ‘bôh chhôk hal bơih.

Hrei ‘nâu, lăm tơdrong arih hăt hot ‘nâu, nhen thoi lu bơ̆n rai ưh pă đei bơngai bu ‘noh wơ̆n năm ngôi tơhnam sŏng sa hơdai. Chăl sơ̆, lu yă, lu mĕ đei pơtăm kơdih ‘nhot, rong iĕr, peh ‘ba, pai gŏ hăm ‘long ŭnh, rim wơ̆t kơ sŏng sa hơdai jơ̆ yua lơ jơhngơ̆m pran. ‘Noh jơ̆ lăm tơdrong jang hmă đĕch lăm tơdrong arih đơ̆ng mĭnh hnam dơnŏ đei kon lơ. Thoi noh mă lei lu sư oei đei jơhngơ̆m wă wơ̆n rông ‘bôt “drong sŏng sa”, wă pai thim hloi gŏ ‘nhot, hơtŭk thim lơ ‘nhot wă wơ̆n ‘bok bơtho păng lu bơngai lui năm sŏng sa hơdai đơ̆ng rŏng kơ jơ akŭm.

Dang ei, hnam oei lu bơ̆n pơm tơtil băl, mă lei kon bơngai tă kơ nhen thoi ataih dêh. Phŏ lăp ‘blŏk kơ hnam pah noh đei ‘măng dur gur jơk, gre gur kok, na kŭm ưh kơ băt kơ bơngai bu oei arih cheng hnam bơ̆n.

Mĭnh wơ̆t ‘nei, inh drơ̆ng wă tơ ‘bôh tơlĕch jơhngơ̆m sơng tơmoi. Inh pơtơm dôm ‘nu mŏ oh păng lu kon hơdai năm phĕ plei iŭ tơ ‘ngoaih kơ pơlei đơ̆ng hrôih, na brŏk tơ hnam sa kơ ‘năr dơ̆ng tŏ sĕt. Mă lei truh kơ pơge năr ‘noh, điê̆n thoăi hơnơ̆ng kơ ôr- đĭ kơ bơngai ‘nâu hrăt hrot, bơngai to kon jĭ bơlŏ, gre hư, jĭ hơnĕnh, sem dơrong đei pơ̆k…. Jơhngơ̆m inh jruh tơ ala, yua kơ đei hơmet lơ tơmam sa, na dang ei tă kơ ưh kơ đei bơngai ngôi hơdai sŏng sa!

Hơplah hơmet năm phĕ plei iŭ, kon drŏ kăn inh đei krao pơma dơnuh. Mơ̆ng đang tơdrong, kon inh khan: “Mĕ ơi, lei dah mĕ wơ̆n lu duch lăm anih kon jang năm sa ă!”

Thoi noh na inh pơprơ̆n krao wơ̆n- păng dôm ‘nu duch ei hiôk chơt drơ̆ng nơ̆r. Lu sư năm sŏng sa iĕr hek, ‘bĕng ‘lơ̆ng đơ̆ng hnam pơm. Hơoei tăpdăr kơ tơmam sa năr ‘noh tă kơ bơngai ưh kơ juăt ngăl, mă lei truh kơ kơchŏk đak tuch luch kŭm đĭ, na bôl buăl ‘nao kơplah ‘noh kŭm chăt. Đơ̆ng rŏng kơ ‘noh, đei mĭnh ‘nu mŏ đei hơdai pơhrăm Nơ̆r ‘Bok Kei-Dei hăm lu nhôn, na mŏ kŭm lui păng sơng iŏk Kră Yang.

Nơ̆r Kră Yang lăm Rôm 12:13 bơtho lu bơ̆n: “Tơduă bơ̆n bơngai lui ‘nĕ kơ kret băl tơmam, tơmoi truh athei băt kơ sơng iŏk tơ hnam.”

Jơhngơ̆m sơng tơmoi ưh kơ kăl athei kơ hơmet tôm mah, kŭm ưh kơ kăl athei gơ ‘bang sŏng sa ‘lơ̆ng. Mĭnh wơ̆t sŏng sa hmă đĕch dah mĭnh nơ̆r wơ̆n hăm jơhngơ̆m hiôk kŭm tôm wă tơguăt jơhngơ̆m bơngai.

Hrei ‘nâu, mă khan đei anih tĕch tơmam tih hiôk hăm dôm lu tơmam pai sa hrĕnh tĕnh, mă lei inh băt kơnăl khan, tơdrong lu bơ̆n kăl hloh jơ̆ pơih mĭnh jơhngơ̆m wă gơh wơ̆n bơngai bu nai sŏng sa hơdai. Mưh lăp kơplah hnam tim mă tam rơgoh ‘lơ̆ng, dah tơdrong sŏng sa lăp jơ̆ dôm tơmam sa hmă đĕch răt hăt hot tơ anih gơ̆p tĕch, mă lei tơdrong pơm kơ bơngai nai ‘blŏk hơnơ̆ng ‘noh jơ̆ jơhngơ̆m hiôk, đĭ jơhngơ̆m.

Inh hơpơi kơdih gô pơtrơp pơih nơ̆r lơ hloh dơ̆ng, păng tơlĕch nơ̆r krao wơ̆n hiôk ‘lơ̆ng “Hơpơi kơ đĭ đăng anhŏng oh năm ngôi tơhnam inh sŏng sa hơdai!”

Apĭnh đĭ đăng krao khan hơdai:
Kơkuh kơ ‘Bă mă ‘mêm. Kon bơnê kơ Ih yua kơ dôm kơ rup jê̆ hơdai, hmă đĕch mă Sơ̆p Hla Bơar ‘Bok Kei-Dei đei bơwei ăn kơ kon lăng sơng iŏk- dôm kơ jơ sŏng sa hmă đĕch tơ cheng đak dơsĭ, dôm lu jơ hiôk ‘lơ̆ng đơ̆ng ‘Bok Dŏng Pơklaih Yang Yêsu păng lu bơngai pơhrăm. Apĭnh bơtho kon băt kơ pơih jơhngơ̆m, pơih ‘măng, wă gô sơng iŏk bơngai ưh kơ juăt nhen thoi kơdih ‘nhŏng oh kon. Apĭnh Kră Yang tơgŭm kon rok kiơ̆ kơmil Ih, jơ̆ Tơ’ngla đei nhur ŭnh ‘bơ̆t cheng đak dơsĭ, chang gô lu bôl buăl juăt năm hơdai yua sŏng sa hơdai hăm Ih. Kon kŭp kơ̆l krao khan hăm anăn Yang Yêsu Krit, A-men.

Ơ lu bơngai mơ̆ng mă ‘mêm kơ-eng, Kră Yang oei chơ chă dôm lu jơhngơ̆m oei pơih- dôm lu bơngai wă pơih jơhngơ̆m krao wơ̆n, tơ ‘bưh, păng rei tơdrong ‘mêm mơnat đơ̆ng Ih đơ̆ng jơhngơ̆m sơng iŏk tơmoi hmă đĕch hloh. Lăp kăl kơ mĭnh nơ̆r wơ̆n jơhngơ̆m hiôk ‘lơ̆ng, mĭnh wơ̆t sŏng sa hơdai hmă đĕch kŭm tôm wă ba bơngai nai năm jê̆ hăm Kră Yang hloh. Hơpơi kơ rim ‘nu lu bơ̆n đei băt arih pơih jơhngơ̆m, wă tơ’bôh hloi jơhngơ̆m sơng tơmoi pơ ‘lơ̆ng hăm dôm lu bơngai juăt, bơngai ưh kơ juăt jum dăr bơ̆n. Hơpơi kơ tơdrong ‘mêm Kră Yang gô ling lang ro hlôi kơ dôm jơ năr lăm tơdrong arih rim năr thoi noh!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.