Kră Yang lu bơ̆n Sư jơ̆ pơm dôm tơdrong hlĭch chrơp! Sư pơklaih bơngai jơ̆ng jo gơh yak năm, bơngai măt tol ‘bôh hơdah, truh tơ bơngai lôch iung arih. Păng năr ‘nâu, Sư oei bơ̆jang dôm tơdrong hiôk hơ-iă tơpă lăm chăl arih bơngai bu mă lui gơnang kơ Sư. Rŏ lăng tŏk bŏk tơdrong jang hrat, lu bơ̆n ‘bônh kơ hiơt kơ Kră Yang oei ling lang mơ̆ng, păng gô tơl tơwih lu jơhngơ̆m oei chơchă Sư. Lei lu bơ̆n hăm lui ngeh Kră Yang oei bơ̆jang hăm tơdrong hlĭch chrơp lăm teh đak hrei ‘nâu, lăm chăl arih lu bơ̆n rim năr?

Năr ‘nâu, ‘năr 13/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Jordan Buntgen kơ̆l ‘bai TƠDRONG MƠSÊH PĂNG PƠM HLĬCH CHRƠP

Sơ̆p Hla Bơar ‘Bok Kei-Dei: “Lu bơngai jơ̆ng ‘bang Yêsu pơm lơ tơdrong mơsêh mơyang đơ̆ng Kră Yang ăn. Lu bơngai lui pôm jơhngơ̆m akŭm tơ pra hnam ‘Bok Kei-Dei tơm mă đe anăn Pra Sôlômôn.” (Tơdrong Jang 5:12)

Sơ̆p hla bơar ‘Bok Kei-Dei lăm Tơdrong Jang 5:12,16-17 đei chih ră roi gah nơ̆r ‘Bok Kei-Dei thoi âu:

“Lu bơngai jơ̆ng ‘bang Yêsu pơm lơ tơdrong mơsêh mơyang đơ̆ng Kră Yang ăn… Lu bơngai lui kơ Kră Yang Yêsu mă drŏ-nglo mă drŏ-kăn, rai đunh rai lơ…Tăp dăr Pơlei Jêrusalem lu kon pơlei pơla lơlang lơlap năm anhăk ba lu bơngai jĭ jăn păng lu bơngai yang mơ̆t. Na đĭ-đăng kơ lu sư klaih ngăl.

Thoi noh na ‘bok soi tơm păng lu bôl sư khŭl đe Sađusê areh klai khŭl bơngai jơ̆ng ‘bang Yêsu, tah lu sư tơ hnam phak.”

Kơplah đŏk nơ̆r ‘Bok Kei-Dei, lơ wơ̆t lu bơ̆n đŏk wă kơ hlôi đĕch mă ưh kơ kơnhăm kơ đĭ đăng tơdrong kăl wă đei tơ lăm noh. Athei pơlong dơ̆ng ‘mơ̆i ‘bơ̆t nơ̆r ‘nâu păng tơchĕng pơwao: “Lu bơngai jơ̆ng ‘bang Yêsu pơm lơ tơdrong mơsêh mơyang đơ̆ng Kră Yang ăn.” (Tơdrong Jang 5:12). Athei tơchĕng lăng buăl oei dơ̆ng ‘bơ̆t doh, ‘bơ̆t cheng lu jơ̆ng ‘bang Yêsu, ‘bôh hăm măt bơngai jơ̆ng jo đei pơklaih, ‘bôh pơpuh yang kơnê̆, dah bơngai hơwen iung yak năm. Sĭt tơpă, kơplah ‘bôh tơdrong mơsêh ‘Bok Kei-Dei đei tơ’bôh thoi noh, rŏ lăng lu bơngai lui kơplah noh chơt hiôk păng đei pơlung tưk tơ iung jơhngơ̆m đon tơpă.

Hrei âu, lu bơ̆n hăm oei kăl kơ lui kơ ‘Bok Kei-Dei oei pơm dôm tơdrong mơsêh păng hlĭch chrơp ưh? Nơ̆r krao khan lu bơ̆n hăm đei pơma kơ jơhngơ̆m đon lui noh ưh?

Inh ‘blŏk kơ đei hlôi mơn hiôk hơ-iă brei mơsơ̆. Đei buăl juăt inh năm pel lăng akâu jăn păng đei iŏk lăng lăng pham- hơdrol ki sơ̆ tơ hnam pơgang, rim wơ̆t iŏk pham đei jĭ păng gleh lap. Mă ‘bơ̆t ‘nâu, băt kơ iŏk lơ kơ pham, lei na hơdrol kơ năm, lu nhôn đei krao khan apinh Kră Yang ăn dôm tơdrong wă kơ ‘bônh. Păng đei hiôk hơ-iă tơpă: noh jơ̆ iŏk pham tĕnh hloh, hiôk hloh mă bơngai noh hlôi đei! Mă-lei kơplah lĕch đơ̆ng anih pel lăng akâu jăn, đei mơn ‘blŏk … kư̆m đei chrêu, kơplah ‘bôh dôm tơdrong đei hlôi hiôk hơ-iă thoi noh bơih. Na năr đơ̆ng rŏng kơ noh, inh đei mơn hloi inh đei Kră Yang tơ’blŏk pơtho. Yua kơ kiơ inh ‘bôh chrêu kơ đon? Thoi yơ inh ưh kơ lui ngeh Kră Yang mơ̆ng tơl tơwih nơ̆r krao khan inh hă?

Hơpơi kơ hrei ‘nâu Kră Yang gô bơ̆jang ăn kơ đon lui wơ̆ ‘lŏ lăm rim ‘nu lu bơ̆n, wă kơ lu bơ̆n sĭt lui ngeh sư gô bơ̆jang – păng sư gô pơm hlĭch chrơp; wă kơ dôm nơ̆r krao khan pơyơ̆r kơ Kră Yang tơ’bôh đon lui kơjăp noh. Mathiơ 7:7 păng 11 đei tơ’blŏk:

“Krao khan apinh ‘Bok Kei-Dei khŏm khŏm na Sư gô asong kơ iĕm. Iĕm nŏng kơ chă khŏm khŏm, Sư gô tơ’bôh kơ iĕm. Iĕm dơdŭ ‘măng Sư khŏm khŏm, na Sư gô pơih ăn…Iĕm bơngai kơnê̆ ră mă-lei iĕm kư̆m băt chă ăn kơ kon iĕm tơmam sa ‘lơ̆ng, pơma kiơ kơ ‘Bă bơ̆n tơ plĕnh ti, Sư asong ăn kơ bơ̆n tơmam ‘lơ̆ng tơpă dôm lu bơngai mă krao khan apinh Sư, Sư ưh kơ kret ôh.”

Lu bơ̆n athei apinh! Mă-lei kư̆m athei hlôh băt thoi âu: chơ̆n jơhngơ̆m đon apinh ưh kơ sĭ layơ lu bơ̆n kư̆m đei tơdrong bơ̆n ‘maih wă. Nơ̆r Kră Yang lăm Yakơ 4:3 đei tơ’blŏk kơ lu bơ̆n:

“Phŏ iĕm kư̆m krao khan apinh ră, mă iĕm apinh ưh kơ trŏ kơ tơdrong Sư wă, na Sư ưh kơ ăn. Iĕm apinh tơdrong wă yua kơ akâu iĕm kơdih đĕch.”
Lu bơ̆n krao khan kăl kơ kiơ̆ thoi Kră Yang wă, ưh kơ kơnhăm lăm tơdrong bơ̆n ‘maih wă.

Lăm chăl ‘nâu, đei minh ‘bai hŏk kư̆m kăl kơ tơchĕng pơwao. Lăng pơlơ̆k dơ̆ng lăm Tơdrong Jang 5:17, lu bơ̆n ‘bôh lu ‘bok soi tơm păng bơngai Sađusê areh klai kơ lu bơngai jơ̆ng ‘bang Yang Yêsu. Mă lu tơdrong mơsêh hlĭch chrơp ling lang oei đei, lu sư dơ̆ng tơ’ngoaih lăng đĕch. Rŏ lăng lu sư areh klai kơ đe lăng lơ, đei lơ bơngai lăp đon păng tơdrong mơsêh mă lu jơ̆ng ‘bang Yang Yêsu đei.

Lăm tơdrong arih kiơ̆ Kră Yang hrei ‘nâu kư̆m thoi noh: ‘bôh bơngai nai Kră Yang yua pran kơtang, na bơ̆n ưh kơ đei pơjao tơdrong kiơ sĭt hloh, jơhngơ̆m lu bơ̆n ‘bônh kơ đei klai gar. Mă-lei lu bơ̆n ‘nĕ ăn tơdrong klai noh pơgăn tơdrong Kră Yang oei bơ̆jang. Athei ăn kơ jơhngơ̆m thĕng hreh: Kră Yang đei proh hơmet ‘lơ̆ng ăn kơ rim ‘nu lu bơ̆n, păng Sư gô bơ̆jang trŏ kơ jơnăr Sư. Tơplih kơ klai areh, athei chơt hiôk yua kơ Kră Yang oei bơ̆jang đơ̆ng lu bơngai jum dăr lu bơ̆n, păng athei pơih jơhngơ̆m ăn kơ Sư wă yua lu bơ̆n truh tơ trŏ kơ jơnăr Sư wă yua.

Apĭnh đĭ đăng krao khan hơdai:
Kơkuh kơ ‘Bok Dŏng Pơklaih Yang Yêsu, anăn Ih hlĭch chrơp tơpă! Ih jơ̆ ‘Bok Kei-Dei mơsêh mơyang, Ih jơ̆ tơ’ngla pơm dôm kơ tơdrong mơsêh hlĭch chrơp đơ̆ng sơ̆ khơ̆ dang ei. Apinh ăn kơ kon đei đon lui tih hloh lăm nơ̆r krao khan, lui kơjăp kơ Ih gô bơ̆jang hlĭch chrơp lăm chăl arih kon, lăm tơpôl bơngai tơ anih kon păng jơ̆p jang kơ teh đak. Apinh yua kon, ăn kơ tơdrong ‘lơ̆ng ‘maih wă đơ̆ng Ih, păng tơplih kon jing Ih lăp đon rim năr. Bơnê kơ Kră Yang yua kơ dôm tơdrong jang Ih oei bơ̆jang đơ̆ng lu bơngai jum dăr kơ kon, păng apinh Ih tơgŭm kon băt kơ ‘mêm mơnat, bơ̆jang kơ Ih tôm hloh dơ̆ng. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, ‘nĕ kơ pơma khan ‘Bok Kei-Dei pơm lăp dôm noh đĕch kơ kon bơngai. Sư bơ̆jang lơ hloh kơ lu bơ̆n apinh păng tơchĕng. Kơplah lu bơ̆n lui ngeh kơ Sư tôm tơdrong, tơdrong jang hlĭch chrơp Sư gô tuh ăn lăm chăl arih lu bơ̆n, kư̆m gô ba ăn kơ bơngai jum dăr dai. Athei ling lang kơ apinh, chơchă Sư hăm jơhngơ̆m lui gơnang kơjăp. ‘Bok Kei-Dei mơsêh mơyang, ăn kơ Sư pơm dôm tơdrong tih hloh lăm kon pơlei Sư!

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.