Rŏ lăng bu lăm lu bơ̆n kŭm đơ̆ng đei mơn ‘bôh: đơ̆ng lăm jơhngơ̆m bơ̆n oei đei mĭnh anih rơhông mă teh đak ‘nâu ưh kơ gơh wă dŏng tơgŭm. Lu bơ̆n oei arih rim năr, hrăt hrot, adrin chơ chă tơdrong lăp đon lăm tơdrong jang, lăm dôm tơdrong pơgơ̆p hơdai dah lăm dôm tơdrong hiôk chơt dang ei đĕch, mă lei nhen thoi đĭ đăng tă kơ ưh kơ tôm mah. Thoi noh lei rŏ lăng trŏ jơ phŭt ‘nâu, Kră Yang oei krao wơ̆n buăl mơ̆t lăm tơdrong pơgơ̆p kơjăp hăm Sư- Tơ’ngla mĭnh Sư đĕch gơh tuh tơ ‘bĕnh anih rơhông mă buăl oei ling lang chơ chă.

Năr ‘nâu, ‘năr 10/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm bơngai chih Sheila Weddle kơ̆l ‘bai KRĂ YANG OEI KRAO WƠ̆N.

Sơ̆p Hla Bơar ‘Bok Kei-Dei: “Sư ăn tơdrong dŏng pơklaih kơ kon pơlei pơla Sư. Nơ̆r pơgơ̆p Sư oei oei ling-lang, Anăn Sư ‘lơ̆ng rơgoh păng trŏ kơ hli yom.” (Hơriso 111:9)

Dôm giĕng adrol, inh đei jơ đei sŏng sa lăm mĭnh anih hnam sŏng sa tơgah đak dơsĭ ‘lơ̆ng rŏ lăm kơplah pơge ‘brưch. Lăng tơ dôm tơmam tơ anih jum dăr, inh đei tơchĕng khan: “Kră Yang ‘lơ̆ng rŏ tơpă kơplah pơjing mĭnh teh đak ‘lơ̆ng truh thoi noh!”

Inh ‘bôh dôm lu bơngai yak năm tơ ter đak dơsĭ, lu sư kŭm oei lăng hơlen lăng măt ‘năr ‘net ‘net lĕch ‘bôh. Păng kơplah jơ ‘noh, mĭnh tơdrong tơchĕng đei ‘bôh hơđăl rơđah lăm đon tơchĕng inh: “Kră Yang oei krao wơ̆n rim mĭnh ‘nu bơngai lăm khŭl lu sư sơng iŏk băt kơ Sư.”

Kră Yang tơpă wă kơ lu bơ̆n iŏk păng băt kơ Sư. Sư wă kơ lu bơ̆n lui gơnang tơ anih Sư. Lăng ưh ‘bôh Kră Yang ưh kơ trŏ khan Sư ưh kơ oei hơdai. Tơpă, Kră Yang oei jê̆ hloh kơ lu bơ̆n dui jơhngơ̆m, hơđăl hloh kơ dôm tơdrong kiơ lu bơ̆n đei băt. Sư hơpơi wă kơ lu bơ̆n pơih jơhngơ̆m sơng iŏk tơdrong ‘mêm mơnat đơ̆ng Sư.

Kră Yang ling lang krao wơ̆n lu kon Sư: “Athei năm tơ Inh, athei jê̆ hơdai hăm Inh.”
Mă lei lơ wơ̆t lu bơ̆n ưh kơ băt kơ nơ̆r krao đơ̆ng ‘Bă ‘Bok Kei-Dei, na jing kư̆ kơ nŏng hiơ̆k tơchĕng tơdrong nai, chơ chă tơ kon bơngai dah mŭk tơmam wă kơ tuh tơ’bĕnh dôm lu tơdrong kiơ oei ưh kơ tôm mah. Mă lei tơpă, ưh kơ đei mĭnh ‘nu bơngai bu dah mĭnh tơdrong kiơ gơh tuh tơ ‘bĕnh anih rơhông jrŭ lăm jơhngơ̆m lu bơ̆n- anih trŏ kơ lăp ‘măn kơ mĭnh ‘nu Kră Yang đĕch.

Kơplah ưh kơ đei lăp đon, lu bơ̆n ‘bônh kơ đei ưh pă hơmĕng păng tơchĕng khan: “Kră Yang ưh kơ ‘mêm kơ bơ̆n ôh! Sư ataih dêh, mơsêh mơyang dêh truh tơ bơ̆n ưh kơ gơh wă truh.” ‘Noh bơih dôm lu nơ̆r hơlĕnh. Lu bơ̆n kăl kơ hŏk pơhrăm băt kơ ayơ mă tơdrong tơpă, ayơ jơ̆ nơ̆r pơma hơlĕnh.

Pơm thoi yơ wă kơ gơh băt? Lu bơ̆n kăl kơ ‘blŏk khan Kră Yang ‘mêm mơnat kơ lu bơ̆n hloh kơ bơngai bu nai. Lu bơ̆n đĭ jơhngơ̆m gơh lui gơnang anih tơdrong ‘mêm đơ̆ng Kră Yang, anih proh hơmet, mơsêh mơyang păng tơdrong ăn đĕch đơ̆ng Sư. ‘Bok Kei-Dei tih hloh jơ̆ đĭ đăng dôm lu tơdrong lu bơ̆n kăl. Sư jơ̆ đĭ đăng dôm tơdrong kiơ lu bơ̆n rơhing. Mă khan đĭ kơ lu kon sem iĕ kŭm ưh kơ đei layơ pơgot. Thoi noh hăm trŏ Kră Yang oei hơpơi wă tơdrong pơgơ̆p hơdai kơjăp hăm lu bơ̆n hloh kơ ‘noh dơ̆ng ưh?

Thoi noh lei athei pơtơm blŭng a đơ̆ng yơ? Hăm trŏ kăl kơ năm tơ Sư păng tơ’bôh jơhngơ̆m kơdih hăm đĭ jơhngơ̆m. Lu bơ̆n tơpă gơh pơjao đĭ jơhngơ̆m kơdih kơ Kră Yang, yua kơ Sư băt đĭ tôm tơdrong tah mong tơ lăm jơhngơ̆m lu bơ̆n, păng Sư wă pơklaih đĭ tơdrong jĭ rơka. Đei lơ dôm tơdrong rơhing lăm jơhngơ̆m lu bơ̆n trŏ kơ yua đơ̆ng kơdih Kră Yang dan hơmet- ‘noh bơih lu bơ̆n tim mă lui gơnang wă băt kơnăl kơ dôm lu tơdrong ‘noh trŏ kơ jơ̆ tơdrong ‘lơ̆ng đơ̆ng Sư tơ lăm tơdrong arih bơ̆n.

Lu bơ̆n gơh pơtơm blŭng a hăm nơ̆r krao khan hmă đĕch: “Kră Yang ơi, apĭnh ăn kơ kon mĭnh jơhngơ̆m rơgoh ‘lơ̆ng.” Sư gô pơ ‘lơ̆ng hơmet dôm lu anih mum hlơp mă kơdih lu bơ̆n ưh kơ gơh kơdih wă gơh pơm rơgoh. Mă khan dôm lu tơdrong ‘noh yua kơ đơ̆ng kơdih lu bơ̆n pơm, mă lei Kră Yang oei gơh ôp rơgoh pơ‘lơ̆ng hăm tơdrong ‘mêm ưh kơ đei kiơ gơh pơtŏ pơting đơ̆ng Sư, na wă kơ jơhngơ̆m lu bơ̆n gơh hơđơ̆ng, hiôk chơt păng rai lui gơnang, jê̆ hơdai hloh hăm Sư.

‘Ngoaih kơ Kră Yang lei ưh kơ đei bu nai gơh tuh tơ ‘bĕnh anih rơhông gĭt kăl lăm jơhngơ̆m lu bơ̆n. Sư wă kơ lu bơ̆n đĭ jơhngơ̆m lui gơnang anih Sư păng anih tơdrong ‘mêm mơnat Sư ‘măn ăn kơ lu bơ̆n. Ưh kơ đei kiơ wă hli tơrơ, yua kơ ‘Bok Dŏng Pơklaih Yang Yêsu đei khan: “Inh truh tơ âu wă ăn kơ triu arih păng hiôk chơt tơpă.” (Yôhan 10:10b)

Athei pơdrơ̆ng pơih jơhngơ̆m sơng iŏk tơdrong oei hơdai đơ̆ng Kră Yang. Athei yak mơ̆t lăm tơdrong pơgơ̆p hơdai hăm Sư păng hlôi đei tơdrong hiôk chơt hơdai tơdrong hơđơ̆ng đơ̆ng tơdrong arih rơkah rơkai. Kră Yang oei krao. ‘Nâu bơih jơ̆ tơdrong đơ̆ng Kră Yang wă, ưh kơ trŏ tơdrong đơ̆ng lu bơ̆n wă.

Tơdrong lu bơ̆n kăl kơ pơm ‘noh jơ̆ pơdơh kơ tơblah păng chu kiơ̆ nơ̆r ‘Bok Kei-Dei bơtho: “Athei oei kơjăp lăm Inh khŏm khŏm, mă Inh kư̆m oei lăm iĕm mơ̆n.”
Tơ gah anăp lu bơ̆n jơ̆ mĭnh trong yak năm ‘lơ̆ng rŏ, mĭnh tơdrong đĕch lu bơ̆n kăl kơ pơm ‘noh bơih pơdrơ̆ng yak mơ̆t!

Apĭnh đĭ đăng krao khan hơdai:
Kơkuh kơ Kră Yang, kon bơnê kơ Ih yua kơ tơdrong ‘mêm ‘lơ̆ng rŏ mă Ih ling lang ‘măn hơmet lê̆ bơih ăn kơ kon. Mă khan đei kơplah kon chơ chă tơdrong hiôk chơt păng tơdrong tơm anih teh đak ‘nâu, mă lei jrŭ lăm jơhngơ̆m kon, kon băt kơ lăp mĭnh Ih đĕch tơpă tuh ‘bĕnh dôm lu anih rơhông anih pơhngol kon. Apĭnh Kră Yang pơih jơhngơ̆m kon wă sơng iŏk Inh, lui gơnang anih tơdrong ‘mêm mơnat păng tơdrong ăn đĕch Ih. Hơpơi Yang Bơhngol ‘Lơ̆ng Kră Yang pơ’lơ̆ng sŭt rơgoh pơhngol kon, chông anhăk kon mơ̆t lăm tơdrong pơgơ̆p hơdai hăm Ih, wă kơ kon hlôi mơn đei tơdrong hiôk chơt, tơdrong hơđơ̆ng păng tơdrong arih rơkah rơkai mă Ih đei pơkă ăn. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Kră Yang đei ling lang chơ chă păng chang gô buăl đơ̆ng đunh dêh bơih. Sư pơ’lơ̆ng krao wơ̆n buăl tơl tơwih tơdrong ‘mêm mơnat đơ̆ng Sư. Pơdrơ̆ng jơ̆ ‘bơ̆t anih buăl. Dang ei hloi, lei buăl hăm wă pơih jơhngơ̆m kơdih, ăn kơ Kră Yang mơ̆t, tuh ‘bĕnh dôm anih rơhông lăm buăl hăm tơdrong hơđơ̆ng, tơdrong hiôk chơt păng tơdrong arih hiôk chơt tơpă đơ̆ng Sư? Năr ‘nâu hloi, athei pơih jơhngơ̆m păng krao Kră Yang chông buăl mơ̆t lăm trong yak năm ‘lơ̆ng rŏ hloh kơ tơdrong arih bơ̆n.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.