Thaum Tswv Yexus rov mus saum ntuj, Vajtswv tsis cia cov neeg uas ntseeg Nws nyob ib leeg. Nws pub Vaj Ntsujplig los qhia, ntuas lawv thiab coj lawv kev rau txhua yam. Vaj Ntsujplig ua haujlwm rau hauv peb txhua tus dhau ntau txoj kev. Vaj Ntsujplig tej zaug yuav los ntawm ib nqe Vajluskub uas ib txwm swm, ib daim duab uas tau ntsib, lossis ib lo lus twg uas lawv tau hais txog. Thaum peb cia peb lub siab tiaj tus, peb yuav pom tias: Vajtswv yeej tseem tab tom hais thiab coj peb kev txhua hnub.

Hnub no, yog hnub 09/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke nrog tus qhia Marsha Brickhouse Smith dhau ntawm Zaj kawm HLOOV LUB PAJ HLWB HAUV YEXUS KHETOS

Vajluskub: “Tus Pab uas yog Vaj Ntsujplig tus Dawbhuv uas kuv thov kom Leej Txiv txib los, nws yuav qhia txhua yam rau nej thiab pab kom nej nco txhua yam uas kuv tau qhia rau nej lawm” (Yauhas 14:26)

Puas tau muaj ib zaum twg koj hnov cuag li Vajtswv “pheej” hais txog ib nqe Vajluskub twg ntawd los cob qhia koj lawm tau? Ib yam li Vajtswv tab tom siv txhua txoj kev los ua rau kom koj yuav tau ceev faj txog nqe ntawd – dhau los ntawm tej zaj nkauj koj mloog, dhau ntawm ib zaj lus qhuab qhia hauv Pawg Ntseeg, dhau ntawm tej fuab cua koj nyeem dhau, lossis muaj ib tug twg tau hais txog. Peb tus Vajtswv yog tus tsim ib puas tsav yam, thiab Nws muaj txhua txoj kev los ua rau kom peb paub tias Vajtswv tab tom hais rau peb!

Kuv tus kheej twb muaj ntau zaug ntsib dhau txoj kev poob li ntawd, thaum Vajtswv hais mus hais los ib nqe Vajluskub rau kuv, ib yam li xav hais rau kuv tias: “Yuav tau tsom ntsoov rau qhov tseeb no.”

“Kuv muab kuv txojkev kaj siab tso rau nej; txojkev kaj siab uas kuv muab pub rau nej, kuv tsis muab rau nej li neeg ntiajteb muab. Nej tsis txhob txhawj, tsis txhob nyuaj siab thiab tsis txhob ntshai” (Yauhas 14:27).

Kuv nco txog ib lub sijhawm uas tsis muaj sijhawm khoom, muaj ntau txoj haujlwm yuav ua thiab lub nra yuav ris, Vajtswv xav ntuas kom kuv txhob tseg kuv lub siab thiab lub hlwb ntxhov nyho li no. Dhau ntawm lub sijhawm nrog Vajtswv nyob ntsiag to, nqe Vajluskub no tshwm nyob txhua qhov, muaj ib taig kis thaum tab tom taug kev mus ua haujlwm, kuv mus tom qab ib lub tsheb lo ib kab ntawv muaj lub npe tias “Thauj Khoom Kaj Siab Lug” – tsis tas li ntawd, tseem lo ob tug nquab, yog daim duab piv txog Vaj Ntsujplig thiab! Thaum ntawd, kuv paub tias Vajtswv tab tom ntuas kuv. Txoj kev uas kuv mus ua haujlwm yog deb li ib sij kev, txaus sijhawm rau kuv xav txog lo lus ntawd.

Loj hlob hauv Pawg Ntseeg, kuv paub tias Vaj Ntsujplig yog tus pub lub hwjchim thiab txhawb zog. Tiamsis tsis yog thaum twg kuv twb nco ntsoov tias Vajtswv yog tus uas cob qhia kuv – tus pab peb nkag siab txhua qhov tseeb thiab ntuas kom peb nco txog tej uas Vajtswv tau hais txog. Vaj Ntsujplig yog tus uas yuav ntxuav kom peb lub siab hloov dua tshiab, pab kom peb nkag siab Vajluskub zoo dua (Saib Loos 12:1-2).

Kuv nco Vajtswv tshav ntuj vim Tswv Yexus tau txib Vaj Ntsujplig los ua siab ntev qhia peb. Ib nyob rau hauv tej kaujruam loj hauv kuv lub neej yog thaum Vaj Ntsujplig qhib kuv lub qhov muag, kom nkag siab tias yus tau suav tias ncaj ncees yog los ntawm Vaj Ntsujplig – thiab kuv tsis tas yuav siv zog ua zoo los ntawm kuv lub zog. Tseeb tiag, yog yus tus kheej cim civ siv zog ua zoo ces yuav tsis muaj hnub muaj kev ywj pheej. Kuv yuav tsis muaj hnub hnov qab lub sijhawm ntawd, txawm yog twb tau 25 xyoo dhau mus lawm.

Muaj ib zaug, Vajtswv pub rau kuv hnov ib zaj lus qhuab qhia hais txog daim duab Vajtswv yog “Anpas” – Leej Txiv muaj kev hlub. Yav dhau los, kuv yeej ib txwm xav txog Vajtswv zoo li ib tug Vajtswv nyob deb deb, tus uas tsuas ntsia pom kuv tej kev txhaum xwb. Tiamsis thaum uas kuv pom tias Nws yog Leej Txiv – muaj siab mos siab muag, nyob ze – kuv lub siab pib dhau los muaj lub siab mos muag.
Txhua zaug nyeem Yauhas tshooj 14, kuv xav tsis thoob txog Tswv Yexus txoj kev ua haujlwm pub rau cov thwjtim, nyob rau hmo uas Tswv Yexus yuav raug ntxeev siab. Tswv Yexus ntxuav lawv ko taw, cog lus yuav txib tus txhawb zog los cuag lawv, thiab qhia kom lawv txhob ntshai, txhob txhawj. Ua ntej uas yuav nce mus rau saum ntoo khaub lig theej neeg ntiajteb tej kev txhaum, nws yeej tu, yeej hlub. Thiab yog ib tus Cawm Seej zoo kawg nkaus!

Hnub no, kuv xav txhawb nej zog: nco ntsoov tej uas Vajtswv qhia thiab hais rau koj. Cia Vaj Ntsujplig ua kom koj muaj lub siab tshiab, ntuas kom koj nco ntsoov tias: Vajtswv tej lus cog tseg yeej tseem muaj nqis los txog niaj hnub nim no.

Thov caw nrog kuv peb thov Vajtswv ua ke
Tus Tswv, ua Koj tsaug vim koj pub Vaj Ntsujplig los ua tus coj thiab ntuas kuv txhua hnub. Thov qhib kuv lub siab thiab lub hlwb, pab kom kuv hnov Vajtswv lub suab. Nyob ntawm tej kev txhawj thiab tsis khoom nyob rau hauv lub neej txhua hnub, thov kom Vajtswv txojlus dhau los meej meej, nrov ntxhia rau txhua qhov, thiab muaj txoj kev kaj siab tiag rau kuv. Thov pab kom kuv mus raws li Vaj Ntsujplig ua tus coj, cia kuv lub hlwb thiab tus ntsujplig tau hloov dua tshiab nyob hauv Yexus Khetos txhua hnub. Kuv thov hauv Tswv Yexus Khetos lub npe. Amees.

Cov kwv tij txhua tus, tej zaug hnub no, Vaj Ntsujplig tab tom xav ntuas kom koj nco txog Vajtswv ib lo lus cog tseg, txhawb koj thiab ua kom koj txoj kev ntseeg tshiab. Nws yog tus ua siab ntev qhia koj, nws yog lo lus hais ntxhi twj ywm tiamsis muaj zog tsis tseg tsis tu qhia qhov tseeb rau koj. Tseg koj lub siab cia Vaj Ntsujplig ntuas, coj kev, kom koj tau khov kho nyob hauv Vajtswv txoj kev hlub thiab txoj kev kaj siab uas Vajtswv muab pub rau koj.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.