Năr ‘nâu, Năr Tơpơh Khŭl hơ‘lơ̆p Bơngai Lui, mĭnh năr gĭt kăl tơpă kơplah đĭ đăng Khŭl Bơngai Lui ‘măn jơnăr wă hơdai hăm kon hơ‘lơ̆p hiôk hơri, ư-ang kơ Kră Yang. Kră Yang Yêsu ‘mêm kơ khŭl hơ‘lơ̆p. Kơplah bơ̆jang tơdrong jang tơ lăm teh đak, Sư đei krao: “Lê̆ lu hơ‘lơ̆p năm tơ Inh…” Sư ưh kơ sĭ kuăr lu hơ ‘lơ̆p lăm jơhngơ̆m đĕch, mă kŭm pơtho khan bơngai bu ‘maih mơ̆t lăm Plei ‘Lơ̆ng kŭm kăl kơ jing thoi bơngai hơ‘lơ̆p. Ưh kơ sĭ lăp ‘mêm kơ hơ‘lơ̆p, Kră Yang đei pơjao kơ lu bơ̆n mĭnh nơ̆r tơtă: “Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆.” ‘Nâu bơih tơdrong jang mă rim ‘nu lu bơ̆n kăl kơ nhăm, đĭ jơhngơ̆m hiơ̆k bơngơ̆t păng pơm hloi lăm kơdih hnam dơnŏ păng Khŭl bơngai lui bơ̆n.

Năr ‘nâu, ‘năr 08/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai ATHEI PƠTHO TƠ‘BÔH KƠ HƠ‘LƠ̆P.

Sơ̆p Hla Bơar ‘Bok Kei-Dei: “Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Wă truh tơ kră lu sư huay kơ weh dơ̆ng trong noh.” (Tơdrong Pơđơ̆k 22:6)

Lăm mĭnh tơdrong ră roi tih tơ Ha Nôi, inh đei tơ‘bơ̆p dơ̆ng mĭnh ‘nu hơ‘lơ̆p hoc pơhrăm Sơ̆p Hla bơar Mơsêh kơplah oei hơ‘lơ̆p, dang ei đei hŏk sơnăm mă 2 trương Thanh Kinh Ha Nôi. Oh đei yak năm lăm tơdrong pơkă đơ̆ng kơdih, pơyơ̆r akâu jăn bơ̆jang kơ Kră Yang. Oh dang ei ‘lơ̆ng, hơ iă, đei jơhngơ̆m lăm dôm tơdrong jang.

Bơnê kơ Kră Yang, inh đei lăng ‘bôh oh wơ̆ ‘lŏ đơ̆ng khei sơnăm. Đơ̆ng mĭnh ‘nu adruh ‘lơ̆p kon kông pơmat tat, oh đei mĭnh pôm hnam dơnŏ ‘Bok bơtho iŏk rong. Oh pơhrăm iŏk băt kơ Kră Yang đơ̆ng tơdrong ‘mêm mơnat, wei rong, pơtho đơ̆ng hnam dơnŏ, hlôi hŏk pơhrăm Sơ̆p Hla bơar Mơsêh. Nơ̆r Kră Yang đei ‘blŏk răk lăm jơhngơ̆m oh. Đơ̆ng oei hơ‘lơ̆p, sư đei hơpơi wă gô ‘lŏ jing mĭnh ‘nu bơngai bơ̆jang kơ Kră Yang, chông anhăk lơ bơngai wih brŏk tơ Kră Yang. ‘Nâu bơih mĭnh tơdrong đei yua đơ̆ng tơdrong rei pơtăm Nơ̆r Kră Yang kơ jơhnơr pơtrơp, mĭnh tơdrong pơjing ‘bĕnh tơdrong ‘mêm mơnat đơ̆ng hnam dơnŏ păng Khŭl lui. Bơnê kơ Kră Yang!

“Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Wă truh tơ kră lu sư huay kơ weh dơ̆ng trong noh.” (Tơdrong Pơđơ̆k 22:6)

Nơ̆r Kră Yang lăm Tơdrong Pơđơ̆k 22:6 đei juăt tơpă: Inh lăng ‘bôh Nơ̆r Kră Yang lăm trong Sơ̆p Hla Bơar ‘Bok Kei-Dei ‘nâu ưh kơ sĭ lăp mĭnh nơ̆r pơtho pơ‘lơ̆ng kơ lu bơ̆n, mă ‘noh kŭm jơ̆ mĭnh tơdrong tơtă: “Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆….”

“Bơtho tơ’bôh”- Kră Yang krao lu bơ̆n athei pơm mĭnh tơdrong gĭt kăl: bơtho tơ‘bôh Nơ̆r Kră Yang kơ kon hơ‘lơ̆p lu bơ̆n. Nơ̆r Kră Yang ‘bơ̆t dâu ưh kơ pơma khan “kơplah rơhơi” dah “ gơh”, mă lei roi tơbăt kiơ̆ hăm mĭnh tơdrong hơđăl: athei bơtho. Mă tơproh ‘lơ̆ng, dah đei tơdrong pơgăn, athei chơ chă trong wă pơtho tơ‘bôh kơ lu hơ‘lơ̆p. ‘Nâu jơ̆ tơdrong tơtă ‘măn kơ đĭ đăng bơngai bu ‘mêm kơ Kră Yang, hăm lu mĕ ‘bă, ‘Bok pơtho Khŭl lui, bơngai pơhrăm khŭl mơ lôh, khŭl hơ‘lơ̆p păng đĭ đăng dôm lu bơngai bu oei đei Kră Yang dan wă kơ khŭl hơ‘lơ̆p oei hơdai sư.

“Bơtho” dah “tơdrong pơtho” jơ̆ mĭnh trong yak. Lăm trong yak ‘noh, kăl kơ đei tơdrong năm hơdai, pơm kơmĭl, ‘mêm mơnat păng kĕ chơ̆n. Khŭl bơngai pơtho đơ̆ng lu bơ̆n ‘noh bơih khŭl hơ‘lơ̆p, lei tơdrong ‘noh rai kăl athei mă hơđăl păng tơ’bôh rơđah đơ̆ng lăm nơ̆r pơma, tơdrong pơm tơ‘bôh đơ̆ng lu bơ̆n.

Kon hơ‘lơ̆p gô ‘bônh kơ hlôh hloh kơplah lu bơ̆n ling lang kơ pơhrăm hŏk hơdai, pơchơt hơdai, yak năm hơdai hăm lu sư. Lu mon hơ’lơ̆p kăl kơ lăng ‘bôh mĭnh kơmĭl, mĭnh rup wă rok kiơ̆. Lăm dôm lu tơdrong lu bơ̆n pơtho păng lăm dôm lu tơdrong lu bơ̆n pơm, kăl kơ athei hơdai băl.

Lu bơ̆n ưh kơ gơh khan ưh kơ gĭt kơ tơdrong đei hơtŭt ‘bơm đơ̆ng dôm lu tơdrong lu bơ̆n rei lăm jơhngơ̆m kơ lu hơ’lơ̆p iĕ năr ‘nâu. Lu bơ̆n oei chhơ̆ dôm tơdrong trong lăm tơdrong arih kơ lu hơ’lơ̆p, ưh kơ trŏ hăm tơdrong kơdih wă, mă hăm trong đei ‘măn lê̆ bơih lăm Sơ̆p Hla Bơar ‘Bok Kei-Dei: ‘noh bơih kơdih Yang Yêsu.

“Yêsu khan: “Inh boih trong iĕm năm tŏk tơ ‘Bă Inh, hăm Inh boih tơhlôh ăn kơ iĕm tôm tơdrong Sư păng Inh gơh ăn kơ kon bơngai arih. Bơngai bu ưh kơ năm trong Inh, bơngai ‘noh ưh kơ truh tơ ‘Bă Inh ôh.” (Yôhan 14:6)

Kră Yang Yêsu bơih Trong năm, trong năm truh tơ ‘Bok Kei-Dei, trong năm truh tơdrong arih, trong năm hlôh wao, trong năm gơh hơgei, trong năm đơ̆ng jơhngơ̆m ‘lơ̆ng, đơ̆ng tơdrong iơ̆m dim, bơwih bơwăn păng chu yom tôm tơdrong truh tơ tuch luch.

Mĭnh tơdrong đei gĭt kăl tơpă: lu hơ’lơ̆p kăl kơ băt kơ lu bơ̆n jơ̆ dôm lu bơngai pơtho lu sư, ‘mêm mơnat kơ lu sư, hiơ̆k bơngơ̆t kơ lu sư, păng khan ‘Bok Dŏng Pơklaih Yang Yêsu Krist bơih Tơ‘ngla ‘mêm mơnat păng hiơ̆k bơngơ̆t kơ lu sư lơ hloh.

Lu bơ̆n gơh pơm tơdrong ‘nâu yua kơ Sư ‘mêm kơ lu bơ̆n, păng Kră Yang wă kơ lu bơ̆n kŭm ‘mêm kơ tơdrong Kră Yang ‘mêm. Mĭnh Sư bơih Trong năm tơ ‘Bok Kei-Dei. Lu hơ’lơ̆p kăl kơ hlôh tơdrong ‘nâu păng ‘blŏk răk hơđăl tơdrong ‘noh đơ̆ng oei hơ‘lơ̆p iĕ, wă kơ kiơ̆ khei ‘năr wơ̆ ‘lŏ, tơdrong lui ngeh tơ anih Tơdrong Tơpăt păng Tơdrong Arih gô ling lang jơ̆ hơnă kơjăp kơ chăl arih lu sư.

Lăm tơdrong pơtho hŏk pơhrăm, ưh kơ trŏ đĭ đăng hơ’lơ̆p iĕ đei lơlăi băl. Đei dôm lu hơ’lơ̆p đei pơtho Nơ̆r Kră Yang đơ̆ng ‘lơ̆p, mă lei wơ̆ ‘lŏ oei đei kơplah wơ̆l jrok. Lu bơ̆n kŭm ‘bôh lơ tơdrong jum dăr bơ̆n, păng phŏ kŭm lăm hnam dơnŏ kơdih. Lơ hơ’lơ̆p đei pơtho pơ’lơ̆ng, mă lei lu sư tă kơ kiơ̆ trong năm đơ̆ng kơdih wă.

Mă lei Sơ̆p Hla Bơar ‘Bok Kei-Dei pơkă khan, tơdah lu bơ̆n pơtho trŏ trong năm, tơdrong ‘noh gô ưh kơ weh đơ̆ng jơhngơ̆m lu sư, mă khan kơplah kră. ‘Nâu ưh kơ trŏ nơ̆r pơkăm ‘bônh đĕch, mă ‘noh bơih mĭnh tơdrong pơkă gah tơdrong jơhngơ̆m pran kơjăp đơ̆ng Nơ̆r Kră Yang lăm jơhngơ̆m oei ‘lơ̆p. Yua kơ thoi noh, lu bơ̆n kư̆ kơ pơtrơp tơdrong tơtă kơ kơdih: Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Gô đei kơplah buăl mơn ‘bôh bơ̆l hăl yua kơ đơ̆ng lơ tơdrong. Mă lei lu bơ̆n hơdai tơ‘blŏk băl khan: “Na kư̆m lei-lăi thoi noh, nơ̆r Inh pơma, lĕch đơ̆ng ‘bơ̆r inh bơih, ưh kơ đei tôch đĕch ôh; sĭt gô pơm tơdrong Inh wă. Păng pơkeh tơdrong jang Inh wơh sư.” (Êsai 55:11)

Nơ̆r Kră Yang ‘măn kơ lu bơ̆n ưh kơ dơ̆ng ‘bơ̆t tơdrong tơgŭm lu bơ̆n băt kơ năl kơ tơdrong jang bơ̆n, mă kŭm jơ̆ mĭnh nơ̆r krao wơ̆n athei bơ̆jang hloi. Dôm lu tơdrong jang ‘bônh mă lu bơ̆n pơm lăm kơdih hnam dơnŏ bơ̆n, nhen thoi pơtho lu kon hơ’lơ̆p krao khan rim kơmăng, krao khan lăm rim kơ adrol kơ wă sŏng sa, hŏk pơhrăm Nơ̆r ‘Bok Kei-Dei adrol kơ jơ wă tep, kŭm gơh jing dôm lu tơdrong ‘blŏk hơđăl, ‘blŏk răk păng gô kiơ̆ lu sư đĭ chăl arih.

Lăm Khŭl Lui, lăm dôm kơ lăm pơhrăm nơ̆r ‘Bok Kei-Dei rim giĕng ‘măn kơ khŭl hơ’lơ̆p, lu bơngai wei lăng khŭl hơ’lơ̆p đĭ jơhngơ̆m pơtho tơ’bôh đơ̆ng rim kơ tơdrong iĕ: đơ̆ng tơdrong pơtho lu hơ’lơ̆p ‘blŏk răk rim kơ trong nơ̆r ‘Bok Kei-Dei, truh tơ hơri lu ‘bai hơri, pơm tơ’bôh đơ̆ng tơdrong suang, dah bơtho rim kơ yak lăm mĭnh tơdrong pơchơt hơdai. Đĭ đăng dôm lu tơdrong lăng nhen hmă đĕch ‘noh tă kơ jơ̆ dôm lu găr adrĕch gĭt kăl oei đei rei lăm jơhngơ̆m lu sư, đơ̆ng rim tŏsĕt, kiơ̆ hăm mĭnh tơdrong kơjăp păng ‘bĕnh tơdrong ‘mêm mơnat.

Lăm kơ plah teh đak rai tơplih ‘nao dang ei, kơplah hơ’lơ̆p đei tơ’bơ̆p hăm lơ dêh tơdrong tơchĕng tơplơ̆ hăm Nơ̆r Kră Yang, tơdrong gơh hơgei gơh pơm, lei tơdrong bơtho Nơ̆r Kră Yang rai jing kăl hloh. Lu tơmam kơmăi rai pơjing, tơdrong tơ’bôh lăm teh đak păng tơdrong pơtho gah ‘nguaih đei ‘bơm pran dêh truh kơ tơdrong tơchĕng păng jơhngơ̆m lu hơ’lơ̆p. Tơdah Khŭl Lui păng hnam dơnŏ ưh kơ wă adrin pơrơ̆ng rei Nơ̆r Kră Yang, lei ayăt gô rei lăm jơhngơ̆m lu hơ’lơ̆p tă kơ dôm lu tơdrong hơlĕnh.

‘Noh bơih mă yua kơ kiơ Khŭl Lui kăl kơ pơjing tơpă kơ tơdrong jang khŭl hơ’lơ̆p, ưh kơ sĭ lăp tơdrong tơdă lăm Năr tơpơh, mă ‘noh jơ̆ mĭnh tơdrong bơ̆jang jơnăr đunh: chơ chă lu bơngai bơ̆jang đei jơhngơ̆m ‘maih, pơtho păng tơ’bôh kơ lu sư mă hơđăl wă bơtho tơgŭm păng pơlung đơ̆ng rim kơ mĕ ‘bă lăm Khŭl Lui jang tơdrong jang wei rong bơtho kon hơ’lơ̆p kơ ‘Bok Kei-Dei.

Lu bơ̆n kăl kơ kĕ chơ̆n. Tơdrong tơgŭm lu hơ’lơ̆p wơ̆ ‘lŏ gah đon lui kăl kơ tơdrong kĕ chơ̆n, yua kơ tơdrong jang ‘nâu kăl kơ hiong jơnăr păng ưh kơ đei ‘bôh đei yua hloi. Mă lei tơdah lu bơ̆n pơtrơp rei lu găr chăt gô tih kơjung, mĭnh găr đei plei jĭt găr, mĭnh găr gô đei hrĕng tŏ găr.

Apĭnh đĭ đăng krao khan hơdai:
Kơkuh kơ Kră Yang Yêsu ‘mêm mơnat kơ kon, Ih bơih trong năm, tơhlôh păng tơdrong arih kơ chăl arih kon. Bơnê kơ Kră Yang yua kơ ‘bai hŏk năr ‘nâu, yua kơ Nơ̆r Ih pơchrang păng pơtrŭt jơhngơ̆m kon. Apĭnh tơgŭm kon băt chu yom nơ̆r Ih, pơtơm blŭng a đơ̆ng dôm lu tơdrong iĕ hloh, pơtho tơ’bôh kơ lu hơ’lơ̆p iĕ lăm tơdrong ‘mêm mơnat păng tơdrong tơpăt. Krao apĭnh Kră Yang tơ iung mĭnh jơhnơr lui yom ‘lơ̆ng jơhngơ̆m Ih lăp đon. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, năr ‘nâu jơ̆ Năr Khŭl Hơ’lơ̆p Bơngai Lui, mĭnh tơdrong wă kơ tơ’blŏk kơ lu bơ̆n gah tơdrong tơtă đơ̆ng Kră Yang pơjao kơ lu bơ̆n hăm jơhnơr jê̆ bơ̆n.

Tơdah bơngai mơ̆ng jơ̆ dôm lu bơngai wei khŭl, jơ̆ bơngai pơgơ̆r gah pơhngol đơ̆ng Khŭl Lui, athei ‘măn jơnăr krao khan tơplih gĭt tơpă, athei ling lang ‘măn jơ kơ tơdrong jang tơgŭm lu hơ’lơ̆p wơ̆ ‘lŏ gah đon lui kơ Khŭl Lui lăm proh hơmet tơdrong jang đơ̆ng kơdih, lăm lu jơ pơđâu hơdai hăm kră hnam yang, bơngai wei bơtho khŭl hơ’lơ̆p. Tơdah bơngai mơ̆ng oei lăm tơdrong jang dơ̆ng pơtho Trưng Năr Pơh kơ Khŭl Lui, athei năm tơ lăm hrôih, hơmet ‘bai bơtho hăm jơhngơ̆m ‘bĕnh tơdrong pran, ‘mêm mơnat kơ hơ’lơ̆p tơ’bôh hăm măt lăng, nơ̆r pơma păng tơdrong kĕ chơ̆n. Tơdah buăl jơ̆ mĕ ‘bă, ‘nĕ kơ achăng jơ wă rei Nơ̆r Kră Yang lăm jơhngơ̆m kon hơ’lơ̆p kơdih rim năr, mă khan lăp jơ̆ mĭnh trong Sơ̆p Hla Bơar ‘Bok Kei-Dei. ‘Nĕ kơ lăp hơpơi kơ Khŭl Lui tơplih kơ buăl bơtho kon hơ’lơ̆p bơ̆n. Athei hơdai păng Khŭl Lui, athei pơtơm pơjing đơ̆ng kơdih buăl. Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆, wă kơ ning mônh, đĭ chăl arih sư yak năm lăm hơdah Nơ̆r Kră Yang.

Tơdrong lu bơ̆n pơm năr ‘nâu gô jing hơnă kơ mĭnh chăl arih đon lui kơjăp lăm ning mônh kơ kon hơ’lơ̆p lu bơ̆n. Athei pơtơm păng pơtrơp hloi năr ‘nâu. Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆, dôm tơdrong đơ̆ng rŏng Kră Yang gô pơm lăm tơdrong thoi Sư wă.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.