07.06 Amăn Jơ Krao Khan Rim Năr: ATHEI WEI LU KON TRIU INH

Hơ’lơ̆p jơ̆ sơnăm đei lăng ‘bôh nhen thoi kơ tơnơm ‘long ‘nao bluh kơ jơhnơr plơ̆ng lăm Hnam Akŭm, păng jơ̆ tơm kơ tơmam pran ăn kơ dêh char. Mă lăng pơđĭ pơđăng, ‘nâu kư̆m jơ̆ sơnăm ngăl ‘bônh kơ “ hiơt hiong” lơ hloh. Lu hơ’lơ̆p kăl kơ bơwei lăng, ‘mêm mơnat, wei rong, pơtho tơ’bôh tôm mah wă kơ đei jah ‘bônh kơ wơ̆ ‘lŏ kiơ̆ kơ tơdrong arih rim năr wă, yua kơ sơ năm kơplah ‘nâu ‘bônh kơ sơ’ngon, ‘bônh kơ đei pơđep, păng ‘bônh kơ đei pơhlŭ. Kăl hloh noh lu sư kăl kơ đei pơtho tơ’bôh wă kơ Băt păng Lui sơng iŏk Yang Yêsu.

Năr ‘nâu, ‘năr 07/06/2025, tơdrong tơdă Amăn Jơ Krao Khan Rim Năr, apĭnh krao wơ̆n bơngai mơ̆ng hơdai tơchĕng pơwao nơ̆r Kră Yang hăm kơ̆l ‘bai ATHEI WEI LU KON TRIU INH

Sơ̆p Hla Bơar ‘Bok Kei-Dei: “Yêsu khan kơ sư: “Lei ih rong kon triu Inh.” (Yôhan 21:15)

Inh đei tơpŭ tơ pơlei iĕ đĕch, dơnuh hin pơmat tat tơlăm dêh tŏk bŏk – teh đak Viêt Nam. Tơdah đei bu bu jet thoi âu: ‘Blŏk kơ kơplah oei hơ’lơ̆p lăm inh lơ hloh noh jơ̆ kiơ? Na inh ling lang kơ ‘blŏk noh jơ̆: Mĕ ‘Bă inh ưh kơ đei layơ ăn kơ inh dah ‘nhŏng oh lu nhôn năm chă ngôi lăm Năr Tơpơh. Mĕ ‘Bă inh ling lang pơma pơkă hơđăl thoi âu: athei ‘măn jơ lơ hloh kơ năm akŭm kơkuh kơ Kră Yang.

pơge Năr Tơpơh, đơ̆ng rŏng kơ hơmet hơbĕn ao, chơkhŏ ‘lơ̆ng bơih na Mĕ ‘Bă chông ba ‘nhŏng oh lu nhôn năm akŭm kơkuh kơ Kră Yang. Kơplah brŏk tơhnam, Mĕ ‘Bă inh gô jet gah ‘bai pơtho pơge năr noh, tơdah lu nhôn tơl ưh kơ tôm, dah kơplah ngôi akŭm ưh kơ ngôi hrĕp ‘lơ̆ng na kơ ‘năr dơ̆ng năr noh, gô pă jor ‘nhŏng oh lu nhôn gô đei pơtho tơ’bôh dêh tơpă. Yua kơ thoi noh, ‘nhŏng oh lu nhôn hơmet mă ‘lơ̆ng năm akŭm kơkuh kơ Kră Yang năr tơpơh ưh kơ sĭ yua kơ ‘maih wă mă kuă kơ gô đei teh. Dang ei đei tơchĕng ming, dôm kơ tơdrong ‘nâu nhen thoi oei hơ’lơ̆p, mă lei hăm inh, noh jơ̆ yak năm blŭng-a ‘nhŏng oh lu nhôn đei pơtho tơ’bôh lăm tơdrong arih kơkuh kơ Kră Yang, hli yom kơ Kră Yang, ‘mêm kơ Kră Yang.

Bơnê kơ Kră Yang, yua kơ đei đơ̆ng noh na lu nhôn wơ̆ ‘lŏ lăm tơdrong akŭm hơdai lăm Hnam Akŭm, dôm kơ ‘bai hơri ư- ang kơ ‘Bok Kei-Dei jing đei lăm jơhngơ̆m đon lu nhôn, tơdrong iung tơ oei, mă kơplah ư-ang kơ Kră Yang, kơplah đŏk Nơ̆r ‘Bok Kei-Dei… tôm tơdrong ‘bôh tơdrong ‘noh ‘lơ̆ng truh tơ lu nhôn dang ei. Lăm blŭng a năm hŏk tơ Sai Gon, inh pơnam kơ năm akŭm păng ‘maih wă hơdai khŭl kơkuh kơ Kră Yang păng hŏk pơhrăm Nơ̆r Kră Yang hăm bơngai lui lăm Hnam Akŭm, yua kơ tơ noh inh đei tơdrong pơgơ̆p, ‘mêm băl đei mơ̆ng Nơ̆r Kră Yang, đei hơri ‘bai juăt kơ hơri ư-ang kơ ‘Bok Kei-Dei thoi kơ tơ hnam. Bơnê kơ Kră Yang yua kơ đơ̆ng tơdrong gĭt kăl noh na inh wơ̆ ‘lŏ lăm đon lui, hiôk chơt yua kơ đei hŏk băt kơ Kră Yang lơ hloh păng bơ̆jang kơ Kră Yang kiơ̆ kơ Kră Yang đei krao bơ̆jang.

Lu sư achăng sa boih na Yêsu jet Simôn Pêtrôs thoi âu: “Ơ Simôn kon Yôhan, ih hăm ‘mêm kơ Inh hloh kơ lu buăl ih âu ‘mêm kơ Inh?” (Yôhan 21:15)

Kơplah Yang Yêsu krao ‘bok Pêtrôs hăm nơ̆r Hêbơrơ: “ Simôn kon Yôhan”. Noh jơ̆ anăn tơpă ‘bok Pêtrôs, minh ‘nu bơngai đei jơhngơ̆m pran mă lei ‘bônh kơ rơdu, ‘bônh kơ chu iŏk tơdrong hiong răm. Mă lei, Kră Yang đei rơih iŏk sư păng tơplih anăn sư jing Pêtrôs wă khan: tơmo kŭk, arăng dêh, pran kơtang (Mathiơ 16:17). Tơdrong arăng pran kơtang noh ưh kơ sĭ wă ăn kơ ‘bok Pêtrôs jing minh ‘nu bơngai yŏng pơgơ̆r hăm tơdrong pran kơtang păng pôk pơ-ư, mă wă kơ Pêtrôs ‘blŏk kơ sư jing minh ‘nu bơngai wei pran kơtang, ‘bĕnh kơ jơhngơ̆m ‘mêm mơnat thoi kơ Yang Yêsu noh.

Mă ‘bar wă kơ kơnhăm, kơplah Kră Yang đei jet: “ih hăm ‘mêm kơ Inh hloh kơ ‘mêm kơ lu buăl ih âu ‘mêm kơ Inh?” Kră Yang oei wă lăng tơ jơhngơ̆m ‘mêm Pêtrôs ăn kơ Sư hăm đei lơ hloh mă jơhngơ̆m ‘mêm sư ăn kơ bơngai jum dăr dah dôm tơdrong nai mă Pêtrôs oei wă ‘maih pơm. Jơhngơ̆m ‘mêm sư hăm trŏ kơ ‘maih wă ‘biơ̆ đĕch, păng ‘bônh kơ tơplih? Kră Yang Yêsu wă kơ Pêtrôs mơn băt tơpă thoi âu: ‘mêm kơ Kră Yang ưh kơ đơ̆ng jơhngơ̆m hiôk biơ̆ đĕch, mă jơhngơ̆m ‘mêm noh athei pơjing đơ̆ng hơnă mơn băt kơ Kră Yang noh Sư jơ̆ bu păng tơdrong ‘mêm Sư ăn kơ kơdih akâu bơ̆n. tơdrong tơgŭm ‘bok Pêtrôs đei jơhngơ̆m pran, kơjăp bơ̆t anăp tơdrong hli krê, đe rôp phak oei răp gô tơ anăp.

Hơdrol kơ đei pơdrơ̆ng đơ̆ng ‘bok Pêtrôs: “Tơpă, ơ Kră Yang, Ih băt mơ̆n inh ‘mêm kơ Ih.” Yang Yêsu khan kơ sư: “ Lei ih rong triu inh.” Buăl mă ‘mêm! Lu bơ̆n gô pơm kiơ kơplah bơ̆n băt kơ jơhngơ̆m ‘mêm ‘Bok Kei-Dei ling lang lăng tơ bơngai hiong răm lăm teh đak ‘nâu? Kră Yang ling lang lăng lu sư jơ̆ kon triu Sư, Kră Yang đei jơhngơ̆m ‘mêm mơnat kơplah kon triu Sư wơ̆l jrok tơ kơpal kông, tơ pôi teh kơjung … nhen thoi kon triu ưh kơ đei bơngai wei (Mathiơ 10:36).

“Athei wei lu kon triu inh” Kră Yang wă kơ ‘bok Pêtrôs pơtrơp tơdrong jang Sư athei ‘mêm mơnat păng bơwei lu kon triu Sư, lăm noh đei lu kon triu oei iĕ, jơ̆ lu “ triu kon”. “Athei wei triu kon Inh”, “Athei ăn kơ kon triu oei iĕ Inh sa”. Athei wei rong kon hơlơ̆p Kră Yang hăm tơmam sa noh jơ̆ Nơ̆r Kră Yang wă kơ lu sư wơ̆ ‘lŏ.
Hrĕi ‘nâu, buăl hăm inh, bơngai tơl nơ̆r jet Kră Yang “ih hăm ‘mêm kơ Inh hloh kơ ‘mêm kơ bôl buăl ih ưh?” hăm nơ̆r tơl pơsĭt “kon ‘mêm kơ Kră Yang”, Yang Yêsu kư̆m pơma khan kơ lu bơ̆n thoi âu “Athei wei lu triu kon Inh”, yua kơ Kră Yang ‘mêm kơ lu sư dêh. Yang Yêsu khan: “Mă ‘Bă bơ̆n tơ plĕnh ti kư̆m thoi noh mơ̆n, Sư ưh kơ wă kơ minh ‘nu bơngai ‘lơ̆p thoi âu hiong răm.” (Mathiơ 18:14)

Yang Yêsu Sư ‘mêm mơnat dêh păng bơwei kon hơ’lơ̆p, Sư đei pôk glơng, pel kơ̆l, krao khan păng hơkat pŭn hiôk ăn kơ lu sư (Markôs 10:16). Yang Yêsu đei yua iŏk lu hơ’lơ̆p wă tơ’bôh ăn kơ lu bơngai mơ̆ng gah bơhngol gĭt kăl. Tơdrong noh, tơ’bôh ăn thoi âu: lu hơ’lơ̆p lăm Hnam Akŭm hrei âu kư̆m đei wă kơ bơwei, mêm mơnat păng pơtho tơ’bôh Nơ̆r Kră Yang mă tôm mah wă kơ lu sư pơtơm tơdrong arih ‘lơ̆ng, Kră Yang lăp đon đơ̆ng kơ plah oei hơ’lơ̆p.

Yua kơ thoi noh, athei pơtho kon hơ’lơ̆p hăm Nơ̆r Kră Yang, athei ba lu sư tơ’bơ̆p Yang Yêsu ‘nĕ kơ iŏk lê̆ đơ̆ng lu sư tơdrong kơkuh kơ Kră Yang hăm Hnam Akŭm, hăm mĕ ‘bă, athei ăn kơ lu sư wơ̆ ‘lŏ lăm hnam Kră Yang. Athei ăn kơ kon hơ’lơ̆p đei mơ̆ng ‘bai hơri ư ang kơ ‘Bok Kei-Dei hiôk hian ba ăn tơdrong arih đơ̆ng pơlei ‘lơ̆ng.

Apĭnh đĭ đăng krao khan hơdai:
Kơkuh kơ Kră Yang jơ̆ ‘Bă kơ kon, bơnê kơ Ih đei ‘mêm kơ kon hăm tơdrong ‘mêm tôm tơdrong, Ih đei chơchă kon păng dŏng iŏk kon, tơplih kon jing bơngai ‘nao lăm Ih. Apinh Kră Yang ăn tơdrong ‘mêm đơ̆ng Ih ‘bĕnh ‘blai lăm jơhngơ̆m kon wă kơ kon đei jơhngơ̆m ‘mêm, wei rong lu triu kon lăm hnam Kră Yang, jơ̆ lu kon hơ’lơ̆p mă Ih ăn. Apinh Ih yua kon wă pơtho tơ’bôh lu hơ’lơ̆p hăm nơ̆r Kră Yang, hăm tơdrong ‘mêm Ih wă kơ lu hơ’lơ̆p wơ̆ ‘lŏ păng jing dôm kơ tơmam đei yua lăm tơpang ti Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, Yang Yêsu ‘mêm kơ lu bơ̆n thoi kơ Sư ‘mêm kơ ‘bok Pêtrôs, huay pă jô̆ yo mă kư̆m lăp đon yua sư wă kơ wei triu ăn kơ Kră Yang, na năr ‘nâu, lu bơ̆n gô pơm kiơ ‘bơ̆t anăp tơdrong ‘mêm tih Kră Yang ‘măn ăn kơ bơ̆n? Hơdrol hloh, buăl athei hưch hanh kơ Nơ̆r Kră Yang, ‘măn jơ gĭt kăl bơ̆n wă kơ đŏk, hŏk pơhrăm păng tơchĕng pơwao Nơ̆r Kră Yang. Athei iŏk tơdrong arih đei tơplih bơ̆n wă tơ’bôh Nơ̆r ‘Bok Kei-Dei ăn kơ bơngai nai, kăl hloh noh jơ̆ pơm kơ mĭl ăn kơ kon hơ’lơ̆p. Athei krao khan ăn kơ hơ’lơ̆p lăm Hnam Akŭm, mơ̆ng păng iŏk jơhngơ̆m ‘mêm mơnat hăm lu sư thoi kơ Kră Yang ‘mêm mơnat kơ lu bơ̆n. Athei pơtơm đơ̆ng năr ‘nâu, hăm nơ̆r krao khan ăn kơ lu hơ’lơ̆p lăm hnam dơnŏ păng hnam Akŭm lu bơ̆n, yua kơ jơhnơr wă pơtrơp ăn kơ dêh char ‘Bok Kei-Dei.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.