Muaj ib zaug kuv nyeem tsab xov tias “Yog peb tsis qhia peb tej menyuam kom lawv paub Vajtswv thiab ntseeg Vajtswv, ces lub ntiajteb yuav qhia rau nws tej yam uas tawm tsam Vajtswv”. Tseeb tiag, peb tab tom ua neej nyob rau tiam uas Xatas tab tom ua txhua txoj kev los cab peb, tshwj xeeb yog cov hluas, kom txav deb Vajtswv. Qhov uas qhia tej menyuam kom ntxov paub Vajtswv ntawm lawv tus kheej nws cheem tsum heev. Peb yuav ua qhov no li cas nyob rau hauv lub neej txhua hnub?

Hnub no, yog hnub 06/06/2025, Kev thov Vajtswv txhua hnub thov caw sawv daws nrog kawm Vajtswv Txojlus ua ke dhau ntawm Zaj kawm NROG MENYUAM THOV VAJTSWV UA KE

Vajluskub: “Thiab koj yeej paub hais tias txij thaum koj tseem yau, koj yeej kawm Vajtswv Txojlus los lawm. Vajtswv Txojlus pab tau kom tus uas kawm muaj tswvyim; thiab yog nws los ntseeg Yexus Khetos, nws yuav dim nws lub txim.” (2 Timautes 3:15)

Muaj ib hmo thaum nrog tsev neeg thov Vajtswv ua ke, kuv tus ntxhais thaum ntawd muaj 7 xyoo, cia li tsa suab nug kuv tias: “Niam, hmo no peb thov Vajtswv txawv zog mentsis puas tau?” Kuv teb tias “Tau kawg maj me ntxhais, koj xav thov Vajtswv li cas?” Nws teb “Peb qi muag thov Vajtswv ua ntej ob peb feeb tas mam tawm suab thov Vajtswv nrov nrov puas tau?” Kuv luag ntxhi thiab thooj yim ua li ntawd. Tom qab ob peb feeb, nws pib thov Vajtswv nrov nrov nrog niam thiab txiv “Vajtswv, kuv ua Koj tsaug koj tau pub rau kuv muaj ib hnub zoo. Ua Vajtswv tsaug rau lub ntiajteb, lub ntuj thiab dej hiav txwv. Ua Vajtswv tsaug tau tsim txhua yam los. Ua Vajtswv tsaug tau tsim muaj tej kab ntsig noj yoov vim yoov tsis zoo rau peb. Thov Vajtswv foom hmoov rau cov neeg pluag kom lawv muaj mov noj. Kuv tus phooj ywg Sarah hnub no kom kov yeej mob nkeeg thiab tau los tsev ntxov, ua Vajtswv tsaug tau kho zoo rau kuv tus phooj ywg thiab hnub no kom Sarah rov qab mus kawm tau ntawv. Thov Vajtswv foom hmoov rau txiv txoj haujlwm hnub no…”

Kuv luag twj ywm txawm yog kuv tsis paub tias kuv tus ntxhais nws muaj dabtsi xav hais qhia rau Vajtswv, los kuv zoo siab heev thaum kuv pom nws nrog Vajtswv sib tham. Lub sijhawm thov Vajtswv muaj nqis heev thaum uas kuv tus menyuam yog phooj ywg nrog niam txiv thov Vajtswv ua ke.

Vajtswv tej lus qhia: “Qhia tej menyuam txoj kev uas lawv yuav mus; txawm yog thaum lawv laus lawm los, lawv yuav tsis tso tseg (Pajlug 6:22).

Tej zaug muaj ib txhia neeg xav tias, menyuam tsuas yog menyuam yaus xwb tsis paub dabtsi. Tiamsis, raws li cov tub txawg lawv tau soj ntsuam tias lub hnub nyoog thaum 4-14 xyoo yog lub sijhawm uas lawv yooj yim txais yuav txoj kev cawmdim tshaj.

Timautes yog ib tug uas thaum tseem yau twb paub Vajluskub muaj hwjchim ua rau yawg muaj kev txawj ntse kom tau txais kev cawmdim nyob hauv Yexus Khetos (2 Timautes 3:15), thiab tus neeg uas tau pab rau Timautes kom ntxov paub txog Vajtswv txoj kev cawmdim tsis muaj dua lwm tus yog Timautes pog thiab Timautes niam (2 Timautes 1:5).

Tej zaug peb muaj qee tus yuav xav tias cob qhia tej menyuam yaus yog Pawg Ntseeg haujlwm, yog pab coj tej menyuam yaus haujlwm, yus coj menyuam mus tuam tsev xwb ces txaus lawm. Tiamsis tsis yog li ntawd! Cob qhia tej menyuam yaus, lossis hais kom yooj yim nkag siab yog pab kom lawv dhau los zoo li Tswv Yexus, yog txhua tus ua niam ua txiv lub nra. Thiab qhov no tsis yog qhov haujlwm ib thiv ua ib zaug tiamsis yog txhua txhua hnub, txhua txhua lub sijhawm.

Muaj ntau txoj kev tseg rau peb qhia tej menyuam paub Vajtswv thiab nrog tus Tswv mus tiamsis ib txoj kev tseem ceeb uas peb yuav ua tau txhua hnub yog nrog tej menyuam thov Vajtswv ua ke. Nrog tej menyuam thov Vajtswv yog ib qhov haujlwm uas ntau tus niam txiv yeej ib txwm ua. Thaum yog ib leej niam, kuv pom tias kuv tau koob hmoov tsis yog tsuas thov Vajtswv rau tej menyuam xwb, tiamsis tseem nrog lawv thov Vajtswv ua ke. Wb lub sijhawm uas nrog menyuam thov Vajtswv nws muaj tej yam hloov pauv mus kom raws li lawv lub hnub nyoog.
Wb ob niam txiv muaj sijhawm thov Vajtswv ua ke txhua hnub, txij thaum tus menyuam tseem nyob hauv niam plab, txog thaum puag rau ntawm tes, menyuam tsuas mloog niam txiv nyeem Vajluskub thiab thov Vajtswv ua ke xwb. Thaum tej menyuam loj hlob tuaj me ntsis thiab ces nws nrog yus zaum ua ke koom hais “Amees” thaum peb thov Vajtswv xaus.

Thaum tej menyuam txog xyoo mus kawm tswv kawm menyuam, yog cia kom lub sijhawm thov Vajtswv tsis yog tsuas ua raws kevcai, wb nrhiav txhua txoj hau kev, xws li nyeem Vajluskub lossis ua yeeb yam ua ke. Thaum tej menyuam nyeem tau zoo lawm, ces wb nrog tej menyuam nyeem Vajluskub ua ke, qhia tej yam ua Vajtswv tsaug rau ib hnub thiab thov Vajtswv ua ke. Muaj tej lub sijhawm wb tsim muaj ntau daim ntawv thov Vajtswv thiab ib leeg xaiv peb daim thov Vajtswv rau tej yam xws li hauv tsev neeg, Pawg Ntseeg, phooj ywg lossis thov Vajtswv rau txhua haiv neeg uas tsis tau hnov Txojmoo Zoo.

Yam uas peb kawm tau yog txog ib lub sijhawm twg ntawd thaum tseem yog menyuam yaus pib paub Vajtswv yog tus mloog thiab hnov peb tej lus thov. Kuv paub mus nrhiav Vajtswv, vam khom Vajtswv, thaum ntsib kev txomnyem. Muaj zaug thaum tus menyuam muaj 4-5 xyoo, thawj yam uas nws ua yog paub tias kuv mob suab ces nws los rau ntawm kuv ib sab, tsa tes thov Vajtswv kho zoo rau kuv raws li txoj kev uas wb ib niam txiv pheej ua rau tus menyuam thaum lawv muaj mob.

Txawm yog tag siab ntsws pab kom tej menyuam paub Vajtswv thiab ua tiav yus lub luag haujlwm tu tej menyuam pub rau Vajtswv los, peb yeej tseem yog cov ua niam ua txiv uas zoo tsis txaus, yeej tseem yuam kev. Ntau zaug, peb thov Vajtswv zam txim, thov Vajtswv hliv kom Vajtswv txoj kev hlub puv npo rau peb, ua siab ntev, muaj kev txawj ntse ntawm Vajtswv qhia tej menyuam pub rau Vajtswv, kom pab tej menyuam dhau los ua tus neeg uas Vajtswv xav.

Nyob hauv wb tes haujlwm, muaj ntau nkawm niam txiv los cuag wb nrog lub kua muag thaum lawv pom tias lawv tau muab txhua yam tso tsis yog thaum lawv tej menyuam tseem yau. Vim mov noj, nyiaj siv, vim ntau lub nra sib txawv, lawv tsis muaj sijhawm nrog tej menyuam nyob ua ke, lossis nrog tej menyuam thov Vajtswv pab kom lawv paub Vajtswv. Txog thaum lawv loj hlob thiab khiav deb Vajtswv lawm, lawv tsis muaj lub sijhawm ntawd lawm, thiab txoj kev mob no nws nyob nraim hauv lub siab tsis plog.

Kuv cia siab tias peb yuav nqes tes ua haujlwm ua ntej uas lig dhau. Thov Vajtswv coj kev, ntxiv zog rau peb txhua tus pab kom peb loj hlob hauv txoj kev ntseeg kom txhua hnub dhau mus thov Vajtswv dhau ntawm Vajtswv tej lus.

Thov caw nrog kuv peb thov Vajtswv ua ke
Tus Tswv uas muaj kev hlub, thov Vajtswv zam txim rau kuv vim muaj ntau zaug kuv hnov qab thiab ua tsis tiav tes haujlwm Vajtswv cob rau kuv yog pab tej menyuam kom paub Vajtswv. Thov pab kom kuv paub ua yam twg ua ntej. Thov hliv txoj kev hlub puv npo, kev ua siab ntev, thiab kev txawj ntse rau kuv kom kuv paub qhia tej menyuam pub rau Vajtswv. Thov pub kom kuv tsev neeg loj hlob txhua hnub hauv lub neej thov Vajtswv thiab pub kom peb tej menyuam yuav ntxov paub Vajtswv thiab dhau los zoo li Nws. Kuv thov hauv Tswv Yexus Khetos lub npe. Amees.

Cov kwv tij txhua tus, “qhia tej menyuam thaum lawv tseem yau txoj kev uas lawv yuav mus” yog ib lub nra uas niaj hnub nim no txhua lub Pawg Ntseeg yuav tau ua, thiab nyob rau hauv txhua tsev neeg. peb yuav koom tes rau lub nra no zoo li cas? Peb yuav pib los ntawm nug tej menyuam “Hnub no koj zoo li cas? puas muaj yam dabtsi koj xav ua Vajtswv tsaug? Puas muaj yam dabtsi, niam thiab txiv, tej phauj, tej txiv ntxawm niam ntxawm yuav thov Vajtswv rau koj? Peb koom thov Vajtswv ua ke ov!…” cia siab tias Vajtswv yuav siv peb txhua hnub kom muaj ib tiam txuas ntxiv hwm Vajtswv, cov thwjtim me rau Vajtswv lub tebchaws.

Nyob zoo rau peb txhua tus, thov foom kom nej sawv daws tau txais koob hmoov zoo rau ib hnub tshiab thiab peb mam sib ntsib dua rau tagkis!

Tus phoojywg, yog koj xav paub ntxiv txog Tswv Yexus lossis koj muaj tej teeb meem twg, kev khuab xeeb twg xav hais qhia rau peb paub, thov nej sau ntawv cia nyob rau tom qab zaj kawm no, inbox ntawm peb tus fanpage hauv Facebook, lossis xa tuaj rau peb ntawm tus email: [email protected]. Tswv Yexus hlub koj. Thiab peb xav kom txuas tau nrog koj.