Đei mĭnh wơ̆t inh đei đŏk khan: “Tơdah lu bơ̆n ưh kơ pơtho kon hơ‘lơ̆p lu bơ̆n băt sơng iŏk Kră Yang păng kiơ̆ Sư, lei teh đak gô pơtho sư tơdrong tơplơ̆ dơ̆ng”. Tơpă thoi noh, lu bơ̆n oei arih lăm mĭnh chăl mă Satan oei pơm tôm tơdrong wă tơgar iŏk lu bơ̆n, hloh kơ ‘noh bơih jơhnơr khŭl hơ ‘lơ̆p, ataih đơ̆ng Kră Yang. Tơdrong pơtho kon hơ‘lơ̆p bơ̆n băt kơ Kră Yang đơ̆ng hrôih kiơ̆ kơdih sư jing hăt dêh păng kăl tơpă. Lu bơ̆n gô pơm tơdrong ‘nâu thoi yơ lăm tơdrong arih rim năr?

Năr ‘nâu, năr 06/06/2025, tơdrong tơdă Amăn Jơ Krao Khan Rim Năr krao wơ̆n bơngai mơ̆ng tơchĕng pơwao Nơ̆r Kră Yang hăm kơ̆l ‘bai KRAO KHAN HƠDAI HĂM KON

Sơ̆p Hla Bơar ‘Bok Kei-Dei: “Đơ̆ng ih oei iĕ sơ̆ ih pơhrăm sơ̆p hla bơar tơdrong ‘Bok Kei-Dei. Sơ̆p hla bơar Sư boih ăn kơ bơ̆n băt tơdrong Sư pơklaih bơ̆n đơ̆ng tơdrong yoch yua kơ bơ̆n lui kơ Kră Yang Yêsu Krist.” (II Timôthê 3:15)

Mĭnh kơmăng ‘nei lăm jơ krao khan lăm hnam dơnŏ, kon drŏkăn lu nhôn kơplah ‘noh dang 7 sơnăm, thar tơlĕch nơ̆r jet: “Mĕ ơi, măng ‘nâu bơ̆n krao khan pha tŏ sĕt hăm gơh ưh?” Inh tơl “Gơh kon, kon ‘maih wă krao khan thoi yơ?” Kon tơl “Bơ̆n hăm gơh tep măt adrol tŏ sĕt phŭt păng krao khan kơdih hăm Kră Yang adrol kơ bơ̆n krao khan rơ̆n re hăm gơh ưh?” Inh hiĕk păng pơdrơ̆ng. Dôm phŭt đơ̆ng rŏng, kon pơtơm krao khan re nơ̆r hăm mĕ ‘bă “Kră Yang ơi, kon bơnê kơ Kră Yang ăn kơ kon đei mĭnh năr ‘lơ̆ng tơpă, hiôk ‘lơ̆ng. Bơnê kơ Kră Yang gah teh đak, kơpal plĕnh păng đak dơsĭ. Bơnê kơ Kră Yang đei pơjing tôm tơdrong. Bơnê kơ Kră Yang đei pơjing hloi sem dơrong sa mur hơngĕnh yua kơ mur hơngĕnh ưh kơ ‘lơ̆ng kơ lu nhôn. Apĭnh Kră Yang tuh ăn pŭn hiôk kơ lu bơngai dơnuh hin wă kơ lu sư đei tơmam sa. Buăl Sarah kon năr brei jĭ bơlŏ kăl kơ brok tơ hnam hrôih, bơnê kơ Kră Yang đei pơklaih kơ buăl păng năr ‘nâu Sarah đei gơh năm hŏk dơ̆ng. Apĭnh tuh ăn pŭn hiôk kơ tơdrong jang kơ ‘bă kon…”

Inh đei hiĕk lăm jơhngơ̆m mă khan ưh kơ băt kon hăm đei tơdrong ôn hlơp ‘maih wă pơma dơnuh hơdrô̆ hăm Kră Yang, mă lei jơhngơ̆m chơt hiôk kơplah lăng ‘bôh kon ‘maih pơma dơnuh hăm Sư. Jơ krao khan lu nhôn ‘lơ̆ng rŏ tơpă kơplah đei kon bơih buăl hơdai krao khan hăm mĕ ‘bă.

Nơ̆r Kră Yang pơtho “Bơtho tơ’bôh bĕ kơ lu bơngai oei hơ’lơ̆p trong sư wă yak kiơ̆. Wă truh tơ kră lu sư huay kơ weh dơ̆ng trong noh.” (Tơdrong Pơđơ̆k 22:6)
Hơ bŏ đei bơngai mơ‘nah tơchĕng khan, oei hơ‘lơ̆p ‘noh lăp lu bơngai hơ‘lơ̆p ưh tim mă băt kiơ. Mă lei, lu bơngai lăng hơlen đei tơ ‘bôh khan kơplah sơnăm 4-14 jơ̆ sơnăm ‘bônh kơ sơng iŏk tơdrong tơpăt dŏng pơklaih hloh.

Kơdih ‘bok Timôthê jơ̆ bơngai mă đơ̆ng kơplah oei hơ‘lơ̆p đei băt kơ Sơ̆p Hla Bơar ‘Bok Kei-Dei bơih gơh pơm kơ sư gơh hơgei wă kơ gơh dŏng pơklaih yua đơ̆ng đon lui lăm Kră Yang Yêsu Krist (II Timôthê 3:15), păng bơngai đei tơgŭm Timôthê sơng iŏk hrôih tơdrong dŏng pơklaih đơ̆ng Kră Yang ưh kơ bu nai ‘noh bơih yă păng mĕ sư (II Timôthê 1:5).

Kŭm đei bơngai lăm lu bơ̆n tơchĕng khan bơngai pơhrăm iŏk khŭl hơ‘lơ̆p bơih tơdrong jang kơ khŭl lui, đơ̆ng khŭl hơ‘lơ̆p, bơ̆n chông ba kon hơ‘lơ̆p năm tơ hnam akŭm rim giĕng lei tôm bơih. Tơpă ưh kơ trŏ thoi noh! Pơtơm pơjing khŭl hơ‘lơ̆p, dah pơma kiơ̆ kơ ‘bônh kơ hlôh biơ̆ ‘noh bơih tơgŭm khŭl hơ‘lơ̆p jing lơ lăi thoi Kră Yang Yêsu, jơ̆ tơdrong jang đơ̆ng kơdih rim ‘nu bơngai mĕ ‘bă, rim hnam dơnŏ. Păng ‘noh ưh kơ trŏ tơdrong jang mĭnh giĕng mĭnh wơ̆t, mă ‘noh bơih 24/7.

Đei lơ tơdrong mă lu bơ̆n gơh pơtho kơ khŭl hơ’lơ̆p băt kơ năl kơ Kră Yang păng kiơ̆ Sư, mĭnh lăm dôm tơdrong gĭt kăl mă lu bơ̆n gơh pơm rim năr hăm kon ‘noh jơ̆ krao khan hơdai kon. Tơdrong krao khan kơ kon jơ̆ mĭnh tơdrong mă inh tơchĕng khan lơ bơngai mĕ ‘bă oei juăt kơ pơm. Lăm tơdrong jang pơm mĕ, inh ‘bôh kơdih đei pŭn dêh kơplah ưh kơ sĭ lăp krao khan kơ kon, mă kŭm gơh krao khan hơdai kon. Jơnăr krao khan hơdai kon đơ̆ng klo akăn nhi đei dôm lu tơdrong tơplih kiơ̆ kơ sơnăm kon.

Klo akăn măr nhi đei jơ năr krao khan hơdai băl rim năr, đơ̆ng dôm lu năr kon oei lăm klak mĕ, na kơplah pôk kon tơ ti, kon lăp mơ̆ng mĕ ‘bă đŏk Sơ̆p Hla Bơar ‘Bok Kei-Dei păng krao khan hơdai. Kơplah kon wơ̆ ‘lŏ tŏ sĕt, lei kon hơ oei hơdai na “Amen” kơplah lu nhôn pơtôch nơ̆r krao khan.

Kơplah kon lăm sơnăm hŏk khŭl hơ‘lơ̆p, wă kơ jơnăr hơkŭm kơkuh lăm hnam dơnŏ ưh kơ bơ̆l hăl hăm kon, lu nhôn pơm tôm tơdrong, đơ̆ng roi hơ‘mon lăm Sơ̆p Hla Bơar ‘Bok Kei-Dei truh tơ pơm sen hơdai. Kơplah kon gơh đŏk hơđăl bơih, lei lu nhôn hơdai kon đŏk Sơ̆p Hla Bơar ‘Bok Kei-Dei, klah asong tơdrong bơnê kơ Kră Yang lăm năr păng krao khan hơdai. Đei kơplah wă tơgŭm kon lăm tơdrong krao khan, lu nhôn pơm lơ hla ar krao khan păng rim ‘nu rơih iŏk hla ar ayơ wă kơ gơh krao khan kơ lơ tơdrong pha ra đơ̆ng hnam dơnŏ, khŭl lui, bôl buăl dah krao khan kơ lu kon pơlei tim mă kơ tơ̆ng Tơdrong ‘Nao ‘Lơ̆ng.

Tơdrong mă lu nhôn hŏk iŏk ‘noh bơih đơ̆ng mĭnh kơplah ayơ ‘noh lăm dôm lu năr oei hơ‘lơ̆p kon pơtơm băt kơ Kră Yang jơ̆ Tơ‘ngla mơ̆ng păng tơl tơwih nơ̆r krao khan. Kon băt chơ chă tơ Kră Yang, gơ nang kơ Kră Yang, kơplah tơ‘bơ̆p tơdrong pơmat. Đei kơplah kơ dang kê̆ 4-5 sơnăm, tơdrong blŭng a kon pơm kơplah băt kơ inh đei bơlŏ yuh ‘noh kon đei năm jê̆, dan ti kơpal inh krao khan apĭnh Kră Yang pơklaih, kiơ̆ thoi lu nhôn oei pơm kơ kon kơplah kon jĭ bơlŏ.

Mă đĭ jơhngơ̆m hơpơi wă tơgŭm kon băt kơ Kră Yang păng pơm pơkeh tơdrong jang đơ̆ng kơdih wă rong pơtho kon kơ Kră Yang, lu nhôn oei jơ̆ dôm lu mĕ ‘bă ưh tim mă ‘lơ̆ng tôm, lu nhôn krao apĭnh Kră Yang huay kơ jô̆ yo, apĭnh Kră Yang tuh ăn kơ lu nhôn tơdrong ‘mêm, tơdrong kĕ chơ̆n, tơdrong gơh hơgei đơ̆ng anih Kră Yang wă rong pơtho kon kơ Sư, wă tơgŭm kon jing bơngai Kră Yang wă.
Lăm tơdrong jang lu nhôn, đei lơ bơngai mĕ ‘bă năm tơ lu nhôn lăm đak măt kơplah lu sư băt kơ lu đei dan glăi tơdrong ayơ kăl adrol hloh kơplah kon oei hơ‘lơ̆p. Yua kơ băn ao hrŭk jên tơmam phe sŏng, yua kơ lơ tơdrong jang pha ra, lu sư ưh kơ đei jơnăr hơdai hăm kon, dah hơdai krao khan hăm kon wă tơgŭm kon băt kơ Kră Yang. Dĭng truh kơplah kon wơ̆ ‘lŏ păng ataih Kră Yang, lu sư ưh pă đei jơ ‘noh bơih, păng tơdrong jĭ ‘noh tơpă hiơ̆k tơtăm, ưh kơ tôch.

Inh hơpơi wă lu bơ̆n gô pơm adrol kơplah kơ đê̆ hloh ưh pă tam bơih. Apĭnh Kră Yang pơchrang chông trong, pơthim tơdrong pŭn kơ rim ‘nu lu bơ̆n wă tơgŭm kon wơ̆ ‘lŏ lăm đon lui rim năr đơ̆ng tơdrong krao khan păng nơ̆r Kră Yang.

Apĭnh đĭ đăng krao khan hơdai:
Kơkuh kơ Kră Yang ‘mêm, apĭnh Kră Yang huay kơ jô̆ yo kơ lu nhôn yua kơ đei lơ wơ̆t lu nhôn ưh kơ bơngơ̆t păng ưh kơ pơm keh tơdrong Kră Yang pơjao lăm tơdrong tơgŭm kon hơ‘lơ̆p lu nhôn băt kơ Ih. Apĭnh tơgŭm lu nhôn proh hơmet dôm tơdrong ‘măn adrol. Apĭnh tuh tơ lu nhôn tơdrong ‘mêm mơnat, tơdrong kĕ chơ̆n păng tơdrong gơh hơgei wă kơ băt rong pơtho kon hơ‘lơ̆p lu nhôn kơ Kră Yang. Apĭnh ăn kơ hnam dơnŏ lu nhôn wơ̆ ‘lŏ rim năr lăm tơdrong arih krao khan păng ăn kơ kon hơ‘lơ̆p lu nhôn băt kơ Kră Yang đơ̆ng hrôih păng jing thoi Ih. Kon kŭp kơ̆l krao khan hăm anăn Yang Yêsu Krist, A-men.

Ơ lu bơngai mơ̆ng mă ‘mêm kơ-eng, “pơtho tơ’bôh bĕ kơ lu bơngai oei hơ’lơ̆p trong sư wă yak kiơ̆” jơ̆ mĭnh tơdrong jang gĭt kăl dang ei lăm rim Khŭl Lui, păng lăm rim hna, dơnŏ. Lu bơ̆n gơh tơgŭm hơdai lăm tơdrong jang ‘nâu thoi yơ? Trŏ kơ lu bơ̆n pơt̆ơm hăm tơdrong jang apĭnh kon “Năr ‘nâu hăm kon thoi yơ? Hăm đei tơdrong kiơ kon ‘maih wă bơnê kơ Kră Yang? Hăm đei tơdrong kiơ ‘bă, mĕ, duch, ma gơh krao khan tơgŭm kơ kon ưh? Bơ̆n hơdai krao khan kơ Kră Yang kon bĕ!….” Hơpơi Kră Yang yua rim ‘nu lu bơ̆n wă rŏu tơ iung mĭnh jơhnơr pơtrơp hli yom kơ ‘Bok Kei-Dei, dôm lu bơngai pơhrăm oei hơ‘lơ̆p kơ Ih pơgơ̆r.

Kơkuh kơ đĭ đăng, hơpơi kơ đĭ đăng đei minh năr plơ̆ng đei pŭn hiôk păng gô tơ ‘bơ̆p dơ̆ng lăm năr dơning!

Buăl mă ‘mêm, tơdah ih amaih chă wă kơ băt gah Kră Yang dah ih đei tơdrong hơnat hơnot kiơ kăl kơ roi tơ tơdrong tơdă, athei chih nơ̆r pơma dơnuh tơ tơluch hơla ‘bai, chih tơ lăm fanpage tơ Facebook, dah gư̆ih email tơ hơnih: [email protected]. Kră Yang Yêsu ‘mêm kơ buăl. Tơdrong tơdă hơmĕng kơ gơh tơ ‘bưh hăm buăl.